“Ko Sīsū Kalaisi ʻa e Tupuʻanga ʻo e ‘ʻAmanaki Moʻui,’ ‘ʻAmanaki Lelei,’ mo e ‘ʻAmanaki ʻoku Lelei Angé,’” Liahona, Tīsema 2024.
Ko Sīsū Kalaisi ʻa e Tupuʻanga ʻo e “ʻAmanaki Moʻui,” “ʻAmanaki Lelei,” mo e “ʻAmanaki ʻoku Lelei Angé”
ʻI he faʻahitaʻu makehe ko ʻeni ʻo hono fakafiefiaʻi e ʻaloʻi ʻo e pēpē ʻi Pētelihemá, fakatauange ke tau manauʻi maʻu pē naʻe haʻu ʻa Sīsū Kalaisi ki he māmaní ke hoko ko hotau Fakamoʻui mo e Huhuʻi.
Ko e ʻAloʻí, tā fakatātā ʻa Sharlotte Andrus
ʻOku fakamamafaʻi ʻe he ʻAposetolo ko Pitá mo e ongo palōfita ʻo e Tohi ʻa Molomoná ko Sēkope mo Molonaí ʻa e meʻafoaki fakalaumālie ʻo e ʻamanaki lelei ʻia Kalaisí, ʻi ha ngaahi founga fakaikiiki tatau.
Hangē ko ʻení, naʻe pehē ʻe Pita, “Fakafetaʻi ki he ʻOtua ko e Tamai ʻa hotau ʻEiki ko Sīsū Kalaisí, ʻa ia kuó ne fakatupu foʻou ʻa kitautolu, ʻo fakatatau ki heʻene ʻaloʻofa lahí, ki he ʻamanaki moʻui ʻi he toetuʻu ʻa Sīsū Kalaisi mei he pekiá” (1 Pita 1:3; tānaki atu hono fakamamafaʻí). Kātaki fakatokangaʻi hono fakaʻaongaʻi ʻa e foʻi lea ko e “moʻui” ke fakamatalaʻi ʻaki ʻa e “ʻamanakí.”
Naʻe pehē ʻe Sēkope, “Ko ia, ʻe kāinga ʻofeina, mou fakalelei kiate ia ʻi he fakalelei ʻa Kalaisi, ko hono ʻAlo pē Taha naʻe Fakatupú, pea te mou lava ʻo toe tuʻu, ʻo fakatatau ki he mālohi ʻo e toetuʻu ʻa ia ʻoku ʻia Kalaisí, pea mou hoko ai ko e ʻuluaki fua ʻo Kalaisi ki he ʻOtuá, mou maʻu ʻa e tuí, pea kuo mou maʻu ha ʻamanaki lelei ki he nāunau ʻiate ia ki muʻá peá ne toki fakahā mai ia ʻi he kakanó” (Sēkope 4:11; tānaki atu hono fakamamafaʻí). Kātaki ʻo fakatokangaʻi hono fakaʻaongaʻi ʻa e foʻi lea ko e “lelei” ke fakamatalaʻi ʻaki ʻa e “ʻamanakí.”
Pea naʻe tohi ʻe Molonai, “Pea ʻoku ou manatuʻi foki naʻá ke folofola kuó ke teuteu ha fale moʻó e tangatá, ʻio, ʻi he lotolotonga ʻo e ngaahi nofoʻanga ʻo hoʻo Tamaí, ʻa ia ʻe lava ai ʻe he tangatá ʻo maʻu ai ha ʻamanaki ʻoku lelei angé; ko ia kuo pau ke ʻamanaki lelei ʻa e tangatá, pe ʻe ʻikai te ne maʻu ha tofiʻa ʻi he potu kuó ke teuteú” (ʻEta 12:32; tānaki atu hono fakamamafaʻí). Kātaki ʻo fakatokangaʻi hono fakaʻaongaʻi ʻa e foʻi lea ko e “lelei angé” ke fakamatalaʻi ʻaki ʻa e “ʻamanakí.”
Ko e hā ʻa e ʻAmanaki Lelei ʻia Kalaisí?
Ko e meʻafoaki fakalaumālie ʻo e ʻamanaki lelei ʻia Kalaisí ko e hanganaki fiefia atu ki he moʻui taʻengatá ʻo fakafou ʻi he “ngaahi ngāue māʻoniʻoni, mo e ʻaloʻofa, mo e manavaʻofa ʻa e Mīsaia Māʻoniʻoní” (2 Nīfai 2:8) pea mo ha holi mālohi ki he ngaahi tāpuaki ʻo e māʻoniʻoni kuo talaʻofa maí. ʻOku fokotuʻu mai ʻe he ngaahi hoanauna “moʻui,” “lelei,” mo e “lelei angé” ʻi he ngaahi veesi ko ʻení, ha fakapapau tuʻuloa mo ʻaonga ʻo e Toetuʻú pea mo e moʻui taʻengata ʻo fakafou ʻi he tui kia Sīsū Kalaisí.
Naʻe fakamatalaʻi ʻe he palōfita ko Molomoná:
“Pea ko e tahá, ʻe hoku kāinga ʻofeina, ʻoku ou fie lea kiate kimoutolu ʻo kau ki he ʻamanaki leleí. ʻE lava fēfē ke mou maʻu ʻa e tuí, kapau ʻoku ʻikai te mou maʻu ʻa e ʻamanaki leleí?
“Pea ko e hā ʻa e meʻa ke mou ʻamanaki lelei ki aí? Vakai ʻoku ou pehē kiate kimoutolu te mou maʻu ʻa e ʻamanaki leleí ʻi he fakalelei ʻa Kalaisí pea mo e mālohi ʻo ʻene toetuʻú, ke fokotuʻu hake ki he moʻui taʻengatá, pea ʻe fai ʻeni koeʻuhí ko hoʻomou tui kiate ia ʻo fakatatau mo e talaʻofá.
“Ko ia, kapau ʻoku maʻu ʻe ha tangata ʻa e tuí kuo pau ke ne maʻu mo e ʻamanaki leleí; he kapau ʻoku ʻikai ke ʻi ai ha ʻamanaki ʻe ʻikai lava ke ʻi ai ha tui” (Molonai 7:40–42).
Ko e Palani ʻa e Tamaí ki he Fiefiá
ʻOku kamata ʻa e ʻamanaki lelei ʻia Kalaisi ʻoku moʻui, lelei, mo lelei angé, ʻaki ʻa e ʻilo ʻoku moʻui ʻa e ʻOtua ko e Tamai Taʻengatá. Ko ʻetau Tamaí Ia, pea ko ʻEne fānau fakalaumālie kitautolu. Ko e moʻoni ko e ngaahi foha mo e ngaahi ʻofefine fakalaumālie kitautolu ʻo e ʻOtuá pea kuo tau maʻu ha ngaahi ʻulungaanga fakalangi meiate Ia.
Ko e Tamaí naʻá Ne faʻu ʻa e palani ʻo e fiefiá (vakai, ʻĒpalahame 3:22–28). ʻI heʻetau hoko ko ha ngaahi foha mo ha ngaahi ʻofefine fakalangi ʻa e ʻOtuá, ʻoku tau “tali ʻa ʻEne palani ʻa ia ʻe lava ai ʻEne fānaú ʻo maʻu ha sino fakamatelie pea mo ha taukei ʻi he māmaní ke fakalakalaka hake ki he haohaoá mo ʻiloʻi fakapapau ʻa honau ikuʻanga fakalangi ko ha kau ʻea-hoko ki he moʻui taʻengatá.” ʻOku tau ako ʻi he folofolá: “ʻOku maʻu ʻe he Tamaí ʻa e sino ʻo e kakano mo e hui ʻoku ongoʻingofua tatau mo e sino ʻo e tangatá; pehē foki mo e ʻAló” (Tokāteline mo e Ngaahi Fuakava 130:22). Ko ia ai, ʻoku mahuʻinga hono maʻu ʻo e sino fakamatelié ʻi he fakalakalaka ki hotau ikuʻanga fakalangí.
Ko ha kakai kitautolu ʻoku natula ua. Ko hotau laumālié, ʻa hotau konga taʻengatá, ʻoku fakakofuʻi ia ʻi ha sino fakamatelie ʻoku moʻulaloa ki he ngaahi holi mo e uʻa ʻo e moʻui fakamatelié. ʻOku fakataumuʻa e palani ʻa e Tamaí ki he fiefiá ke ʻomi ha fakahinohino maʻa ʻEne fānaú, ke tokoniʻi kinautolu ke nau foki malu ki ʻapi kiate Ia ʻi ha sino toetuʻu mo hakeakiʻi, pea maʻu e ngaahi tāpuaki ʻo e nēkeneka mo e fiefia taʻengatá.
Ko e Tamasiʻi ko Sīsuú, tā fakatātā ʻa Sharlotte Andrus
Ko e Fatongia Huhuʻi ʻo Sīsū Kalaisi ki he Palani ʻa e Tamaí
Ko Sīsū Kalaisi ʻa e ʻAlo Tofu Pē Taha naʻe Fakatupu ʻo e Tamai Taʻengatá. Naʻá Ne hāʻele mai ki he māmaní ke fai ʻa e finangalo ʻo ʻEne Tamaí (vakai, 3 Nīfai 27:13). Ko Sīsū Kalaisi ʻa e tokotaha kuo pani ʻe he Tamaí ke hoko ko Hono fakafofonga fakataautaha ʻi he meʻa kotoa pē fekauʻaki mo e fakamoʻui ʻo e faʻahinga ʻo e tangatá. Ko Ia hotau Fakamoʻuí mo e Huhuʻí koeʻuhí he naʻá Ne ikunaʻi fakatouʻosi ʻa e maté mo e angahalá.
Naʻe kikite ʻa ʻAlamā ki he kakai ʻo Kitioné ʻo kau ki he ngāue faifakamoʻui ʻa e Mīsaiá:
“Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē; pea ʻe fai ʻeni koeʻuhí ke lava ʻo fakamoʻoniʻi ʻa e folofolá ʻa ia ʻoku pehē te ne toʻo kiate ia ʻa e ngaahi mamahi mo e ngaahi mahaki ʻoku moʻua ai hono kakaí.
“Pea te ne toʻo kiate ia ʻa e maté, koeʻuhi ke ne vete ʻa e ngaahi haʻi ʻo e maté ʻa ia ʻoku haʻihaʻi ʻa hono kakaí; pea te ne toʻo kiate ia ʻa honau ngaahi vaivaí, koeʻuhi ke fonu hono lotó ʻi he ʻaloʻofá, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí.
“Ko ʻeni ʻoku ʻafioʻi ʻe he Laumālié ʻa e meʻa kotoa pē; ka neongo iá ʻe mamahi ʻa e ʻAlo ʻo e ʻOtuá ʻo fakatatau ki he kakanó koeʻuhi ke ne lava ʻo toʻo kiate ia ʻa e ngaahi angahala ʻa hono kakaí, koeʻuhi ke ne lava ʻo fakamolemoleʻi ʻenau ngaahi maumau-fonó ʻo fakatatau ki he māfimafi ʻo ʻene fakamoʻuí” (ʻAlamā 7:11–13).
Ko e ʻuluaki tefitoʻi moʻoni ʻo e ongoongoleleí ko e tui ki he ʻEiki ko Sīsū Kalaisí. ʻOku nofotaha ʻa e tui moʻoní ʻi he Fakamoʻuí pea ʻoku malava ai ke tau falala kiate Ia pea maʻu mo e ʻilo kakato ki Hono mālohi ke fakahaofi kitautolu mei he maté, fakamaʻa kitautolu mei he angahalá, mo tāpuakiʻi kitautolu ʻaki ha mālohi ʻoku mahulu ange ʻi hotau mālohí.
Naʻe fakamoʻoni ʻe Molonai, “Pea tuʻunga ʻi hono huhuʻi ʻo e tangatá, ʻa ia naʻe fou mai ʻia Sīsū Kalaisí, ʻoku toe ʻomi ai ʻa kinautolu ki he ʻao ʻo e ʻEikí, ʻio, ʻoku huhuʻi ai ʻa e kakai kotoa pē, he ʻoku fakahoko ʻe he pekia ʻa Kalaisí ʻa e toetuʻú, ʻa ia ʻoku fakahoko ai ʻa e huhuʻi mei he mohe taʻetuku, ʻa ia ko e mohe ʻe fafangu mei ai ʻa e kakai fulipē ʻe he māfimafi ʻo e ʻOtuá ʻo ka ifiʻi ʻa e talupité; pea te nau ʻalu atu, ʻa e iiki mo e lalahi fakatouʻosi, pea tuʻu kotoa pē ʻi he ʻao ʻo hono nofoʻanga fakamāú, kuo huhuʻi mo vete ange ʻa kinautolu mei he haʻi taʻengata ko ʻeni ʻo e maté, ʻa ia ko e mate ia ko ha mate fakasino pē” (Molomona 9:13).
ʻOku ou fakamoʻoni naʻe maumauʻi ʻe he Fakamoʻuí ʻa e ngaahi haʻi ʻo e maté. Naʻá Ne toetuʻu, ʻokú Ne moʻui, pea ko Ia pē ʻa e tupuʻanga ʻo e ʻamanaki moʻui, ʻamanaki lelei, mo e ʻamanaki ʻoku lelei angé.
Ko ha Taula ki he Laumālié
Naʻe fakamoʻoni ʻa e palōfita ko ʻEtá, “Ko ia, ʻilonga ia ʻoku tui ki he ʻOtuá kuo pau ke ne faʻa ʻamanaki fakapapau ki ha maama ʻoku lelei ange, ʻio, ki ha nofoʻanga ʻi he toʻukupu toʻomataʻu ʻo e ʻOtuá, pea ko e ʻamanaki lelei ia ʻoku tupu mei he tuí, ʻo hoko ko ha taula ki he laumālie ʻo e tangatá, ʻa ia ʻe ngaohi ai ʻa kinautolu ke nau fai mālohi pea tuʻu maʻu, pea fonu maʻu ai pē ʻi he ngaahi ngāue lelei, ʻo langaki ʻenau fakalāngilangiʻi ʻa e ʻOtuá” (ʻEta 12:4; tānaki atu hono fakamamafaʻí).
ʻI he faʻahitaʻu makehe ko ʻeni ʻo hono fakamanatua e ʻaloʻi ʻo e pēpē ʻi Pētelihemá, fakatauange te tau manatuʻi maʻu pē naʻe hāʻele mai ʻa Sīsū Kalaisi ki māmani ke hoko ko hotau Fakamoʻui mo e Huhuʻi. ʻOkú Ne foaki mai kiate kitautolu ʻa e ngaahi meʻafoaki fakalaumālie mahuʻinga ʻo e moʻuí, māmá, fakafoʻoú, ʻofá, melinó, fakakaukaú, fiefiá, mo e ʻamanaki leleí.
ʻOku ou fakaafeʻi kimoutolu ke fekumi ki he meʻafoaki fakalaumālie ʻo e ʻamanaki leleí ʻi he Fakamoʻuí ʻaki hono ako e ngaahi akonaki mo e fakamoʻoni ʻa e kau palōfita ʻo e kuonga muʻá mo onopōní fekauʻaki mo ʻEne feilaulau fakaleleí mo e Toetuʻu moʻoní. ʻI hoʻo fai iá, ʻoku ou palōmesi atu ʻe fakamālohia hoʻo fakamoʻoni ki he faka-ʻOtua ʻo e Huhuʻí, ʻe fakaloloto ange ai hoʻo ului kiate Iá, ʻe tupulaki hoʻo holi mo e fakapapau ke tuʻu ko ha fakamoʻoni loto-toʻa kiate Iá, pea ʻe tāpuakiʻi koe ʻaki ha taula ki ho laumālié—naʻa mo e ʻamanaki moʻui, lelei, mo lelei angé.
ʻOku ou fakahā fiefia ʻeku fakamoʻoni fakataha mo e kau ʻAposetolo kuo nau fakamoʻoniʻi Ia ʻi he ngaahi kuongá kotoa, ko Sīsū Kalaisí ko e ʻAlo moʻui ia ʻo e ʻOtua moʻuí. Ko Ia hotau Huhuʻi kuo toetuʻú mo ha sino nāunauʻia mo ongoʻingofua ʻo e kakanó mo e huí. Pea tuʻunga ʻi he huhuʻi mo e fakalelei mo e ʻOtua ʻa ia ʻoku fakaʻatā ʻe he ʻEikí ki he faʻahinga kotoa pē ʻo e tangatá, te tau lava ai ʻo maʻu ʻa e fakapapau fakalaumālie mo ha ʻamanaki moʻui, lelei, mo lelei ange “ʻe moʻui kotoa pē ʻia Kalaisi” (1 Kolinitō 15:22).