Fakaʻilekitulōnika Pē: Ngaahi Akonaki ʻa e Kau Taki ʻo e Siasí mei he Mītia Fakasōsialé
Meʻaʻofa ʻe 15 ke Fakakaukau ki ai ʻi he Kilisimasi Ko ʻEní
Sio ki he meʻa kuo akoʻi ʻe he kau palōfita moʻuí mo e kau taki kehe ʻo e Siasí ʻi he mītia fakasōsialé ʻo kau ki he Kilisimasí, ngaahi meʻaʻofa mei he Fakamoʻuí, mo e ngaahi meʻaʻofa te tau lava ʻo fefoakiʻakí.
Ko e ʻAloʻí, tā fakatātaaʻi ʻe Brian Call
ʻE lava ke hoko ʻa e fakafetongi meʻaʻofa mo e ngaahi ʻofaʻangá ko ha tukufakaholo fakafiefia ʻi he taimi Kilisimasí. ʻI heʻetau kau ki he ngaahi fakafiefia ʻo e faʻahitaʻú, ʻoku mahuʻinga ke tukutaha ʻetau tokangá ʻi he ʻuhinga totonu ʻoku tau fakamanatuá: ko hotau Fakamoʻui ko Sīsū Kalaisí. ʻI heʻetau fai iá, te tau fakatokangaʻi ʻoku mahuʻinga lahi ange ʻa e ngaahi meʻafoaki fakalaumālie kuo foaki mai maʻatautolu ʻi he ongoongolelei ʻo Sīsū Kalaisí ʻi ha toe faʻahinga meʻaʻofa fakamāmani.
Naʻe akoʻi ʻe Palesiteni Nalesoni ʻo pehē:
“Tau nofotaha muʻa ʻi he meʻaʻofa ʻe fā ʻi he ngaahi meʻaʻofa naʻe foaki ʻe Sīsū Kalaisi kiate kinautolu kotoa ʻoku loto fiemālie ke maʻu iá.
“ʻUluakí, naʻá Ne foaki mai ʻa e malava taʻefakangatangata ke ʻofá. ʻOku kau ai ʻa e malava ke ʻofa ʻi he niʻihi ʻoku ʻikai ʻofaʻí mo kinautolu ʻoku ʻikai ke nau ʻofa ʻiate koé ka ʻoku nau lolotonga fakatanga mo fai kovi atu kiate koe. …
“Ko e meʻaʻofa hono ua ʻoku foaki atu ʻe he Fakamoʻuí ko e malava ko ia ke fakamolemolé. Te ke lava fakafou ʻi Heʻene Fakalelei taʻefakangatangatá, ʻo fakamolemoleʻi ʻa kinautolu kuo nau fakamamahiʻi koe pea mahalo he ʻikai ke nau teitei tokanga ki heʻenau angakoví. …
“Ko e meʻaʻofa hono tolu mei he Fakamoʻuí ko e fakatomalá. …
“… Ko e fakatomalá ko ha meʻaʻofa maʻongoʻonga ia. Ko ha founga ia ʻoku ʻikai totonu ke ilifiaʻi. Ko ha meʻaʻofa ia ke tau maʻu ʻi he fiefia pea ke fakaʻaongaʻi—ʻo tali—ʻi he ʻaho takitaha ʻi heʻetau faifeinga ke hoko ʻo hangē ange ko hotau Fakamoʻuí. …
“Ko e meʻaʻofa hono fā mei hotau Fakamoʻuí ko ha talaʻofa moʻoni—ko ha talaʻofa ʻo e moʻui taʻengatá. … Ko e moʻui taʻengatá ko e faʻahinga mo e tuʻunga ia ʻo e moʻui ʻa e Tamai Hēvaní pea mo Hono ʻAlo ʻOfaʻangá. ʻI he taimi ʻoku ʻomi ai ʻe he Tamaí ʻa e moʻui taʻengatá, ʻoku hangē ʻokú Ne pehē mai, ‘Kapau te ke fili ke muimui ki hoku ʻAló—kapau ko hoʻo holí ke ke hoko moʻoni ʻo hangē ange ko Iá—te ke malava ʻi he fakalau ʻa e taimí ʻo moʻui hangē ko kimauá pea pule ki he ngaahi māmaní mo e ngaahi puleʻanga ʻo hangē ko kimauá.’”
Kuo vahevahe ʻe he kau taki ʻo e Siasí ha ngaahi pōpoaki ʻo kau ki he ngaahi meʻaʻofa ʻoku tau maʻu mei hono moʻui ʻaki ʻo e ongoongoleleí mo e ngaahi meʻaʻofa te tau lava ʻo fefoakiʻaki ʻi heʻetau feinga ke hoko ko ha kau ākonga lelei ange ʻa Sīsū Kalaisí. Fakakaukau ki he ngaahi meʻaʻofa naʻe fakamatalaʻi ʻe Palesiteni Nalesoni ʻi ʻolungá mo e ngaahi meʻaʻofa ko ʻení:
Naʻá Ne Foaki Mai Kiate Kitautolu ʻa e Meʻaʻofa ʻo ha Fakamoʻui, ko Hono ʻAlo Haohaoá
“Ko e māmá ʻa e taha ʻo e ngaahi fakataipe fakaʻofoʻofa taha ʻo hono ʻaloʻi ʻo Sīsū Kalaisi ki he māmani ko ʻení. Naʻe ʻomi ha maama ki ha māmani fakapoʻuli ʻi he hā mai ʻa e Mīsaia naʻe talaʻofa fuoloa maí.
“ʻOku lotua ʻe hamou tokolahi ʻa e mālohi ke kātekina e ngaahi faingataʻa ʻoku ʻahiʻahiʻi ai kimoutolu ʻo aʻu ki he tuʻunga ʻokú ke pehē ko ho ngataʻangá iá. ʻOku ʻafioʻi ʻe he ʻOtuá ʻetau fiemaʻu kotoa pē, ʻokú Ne ʻofa ʻiate kitautolu, pea ʻokú Ne tokangaʻi kitautolu. Naʻá Ne foaki mai ʻa e meʻaʻofa ʻo ha Fakamoʻui, ko Hono ʻAlo haohaoa. Ko Ia ʻa e Maama ʻo e Māmaní mo e maʻuʻanga pau ʻo e fakafiemālié, ʻamanaki leleí, melinó, mo e fiefiá.
“ʻOku ou fakahaaʻi atu ʻeku ʻofa kiate kimoutolu mo ʻeku fakaʻamu ke mou maʻu ha faʻahitaʻu Kilisimasi fakafiefia pea ongoʻi ʻa e ʻofa mo e maama ʻa Kalaisí—ʻi he taʻú ni pea maʻu ai pē.”
Palesiteni Henry B. Eyring, Facebook, 15 Tīsema 2023, facebook.com/henry.b.eyring.
Tau Manatuʻi Muʻa ʻa e Meʻaʻofa Maʻongoʻonga Taha Kuo Foaki Maí
“Kapau he ʻikai ke tau sio ki he ʻuhinga mo e fiefia kotoa ʻo e Kilisimasí—ʻa e kotoa ʻo e moʻui ʻa Kalaisí, Hono misiona mahuʻinga tahá, ʻa e ngataʻangá pea pehē ki he kamataʻangá—ʻe hoko pē ʻa e Kilisimasí ia ko ha toe ʻaho pē ʻe taha ʻo e mālōlō mei he ngāué ʻo maʻu meʻatokoni mo fiefia mo fai ha ngaahi meʻa fakafiefia.
“Ko e ʻuhinga moʻoní—ʻa e ʻuhinga makehe mo fakafiefia—ʻo hono ʻaloʻi ʻo Sīsū Kalaisí, naʻe ʻikai fakangatangata pē ia ki he ngaahi fuofua houa ʻi Pētelihemá ka ʻe fakatokangaʻi ia ʻi he moʻui te Ne tatakí pea pehē ki Heʻene pekiá, ʻi Heʻene feilaulau fakalelei tuʻuloá, pea mo ʻEne Toetuʻu naʻe malava ai ke tau ikunaʻi ʻa e mate fakasinó. Ko e ngaahi moʻoniʻi meʻa ʻeni ʻokú ne ʻai ke fakafiefia ai ʻa e Kilisimasí.
“Tau manatuʻi muʻa he taʻú ni ʻa e meʻaʻofa maʻongoʻonga taha kuo foaki maí: ko e Fakalelei mo e Toetuʻu ʻa e ʻEiki ko Sīsū Kalaisí.”
Palesiteni Jeffrey R. Holland, Facebook, 24 Tīsema 2023 , facebook.com/jeffreyr.holland.
ʻOku Tāpuekina Kotoa Kitautolu ʻaki ha Ngaahi Meʻafoaki Makehe
“ʻOku ou houngaʻia ʻi he faingamālie ke fakatupulaki mo tauhi e ngaahi vā fetuʻutaki mo kinautolu ʻo e ngaahi tui fakalotu kehé ʻi he ngaahi fonua ʻi he funga ʻo e māmaní. ʻI heʻetau hoko ko e fānau ʻa e ʻOtuá, ʻoku tāpuekina kotoa kitautolu ʻaki ha ngaahi meʻafoaki mo ha ngaahi talēniti makehe ke tau fai ai ha ngāue lelei lahi ange.”
ʻEletā Dieter F. Uchtdorf, Facebook, 10 Nōvema 2023 , facebook.com/dieterf.uchtdorf.
Meʻaʻofa ʻe Nima Te Tau Lava ʻo Fefoakiʻaki
“[Ko e ngaahi sīpinga ʻeni ʻo e] ngaahi meʻaʻofa ʻe nima te tau lava ʻo fefoakiʻakí:
-
Ko e meʻaʻofa ʻo e kātakí ʻi hono fakafisingaʻi ʻo e tāufehiʻá
-
Ko e meʻaʻofa ʻo hono tali leleí ʻaki hano fakafisingaʻi ke angakovi ki ha fuʻu kakai tokolahi koeʻuhi ko ha ngaahi tōʻonga ʻa ha niʻihi tokosiʻi
-
Ko e meʻaʻofa ʻo hono maʻu ha mahinó ʻo ʻikai ke fakamāuʻi ʻataʻata pē ʻa e niʻihi kehé mei he ngaahi ʻulungaanga ʻoku hā ki tuʻá
-
Ko e meʻaʻofa ʻo e anga fakaʻapaʻapá mo e anga totonú ʻaki hono fakasītuʻaʻi ke fakamalaʻiaʻi, lauʻikoviʻí, mo lea kovi ki he niʻihi kehe ʻoku ʻikai ke tau tui tataú
-
Ko e meʻaʻofa ʻo hono fakalakalaka ʻa e sosaietí ʻaki hono fakaʻapaʻapaʻi ʻa e kakai kotoa pē, tautautefito kiate kinautolu ʻoku kehe ʻenau fakakaukaú
“Naʻe hāʻele mai ʻa Sīsū ki māmani ko ha kiʻi pēpē loto-fakatōkilalo ka ko e Maama ia ʻo e Māmaní. Naʻá Ne hāʻele mai ke ʻomi ʻa e melinó, ʻofá, mo e fiefiá. ʻOku fakataipe ʻe he ngaahi maama takatakai ʻi he senitā takimamata ʻi Uāsingatoni D.C. ʻa ʻEne meʻaʻofa maʻongoʻonga mo e Tamaí maʻatautolú.”
ʻEletā Dale G. Renlund, Facebook, 1 Tīsema 2023, facebook.com/DaleGRenlund.
Te Tau Lava ʻo Maʻu ʻa e Meʻaʻofa Mahuʻinga ʻa Sīsū Kalaisí ko e Fakatomalá
“Ko ha tukufakaholo faka-Kilisimasi manakoa ʻa e fāmili Kongó ko hono lau leʻolahi fakafāmili ʻa e tohi ʻa Sālesi Tīkeni ko e ‘A Christmas Carol (Ko ha Hiva Kilisimasi).’
“ʻOku ou faʻa fifili ki he ʻuhinga ʻoku tau fakakaukau ai kia Sikulusi, pea tau fakakaukau maʻu pē ki ha tangata toulekeleka, ʻiteʻita mo nimamaʻu, ko ha taha ʻokú ne manukiʻi ʻa e Kilisimasí ʻo tala ko ha meʻa ‘hala lahi’?
“Ko e hā ʻoku ʻikai ke tau fakatokangaʻi lahi ange ai ʻa e Sikulusi foʻoú? ʻA e Sikulusi foʻou ko ē naʻá ne ʻave ʻa e pīpī lahi taha mei he falekoloá ko ha meʻaʻofa fakaʻohovale ʻi he Kilisimasí? ʻA e Sikulusi foʻou ko ē naʻe fakalelei mo hono ʻilamutu moʻui fiefia ko Feletí? ʻA e Sikulusi foʻou ko ē naʻá ne hiki hake ʻa e vāhenga ʻa Popi Kulasití mo tokangaʻi ʻa Timi Kití?
“ʻOku ʻi ai nai ha niʻihi ʻoku tau feohi, pe mahalo ko kitautolu tonu pē, ʻe lava ke hoko ko ha tokotaha makehe ʻo kapau pē ʻe tuku ʻetau fakamahamahaló pe fakamaauʻi pē kinautolu ʻi honau tuʻunga motuʻá?
“ʻOku ʻikai ha tokotaha pe ko ha fāmili ʻe haohaoa. ʻOku tau takitaha moʻona hotau ngaahi vaivai mo e tōnounou—ko ha ngaahi meʻa ʻoku tau fakaʻamu ke tau fakahoko lelei ange. ʻI he Kilisimasi ko ʻení, mahalo ʻe lava ke tau maʻu mai—mo foaki—ʻa e meʻaʻofa maʻongoʻonga ʻa Sīsū Kalaisi ʻo e liliú mo e fakatomalá, ʻo e fakamolemolé mo e fakangaloʻí, ki he taha kotoa mo kitautolu.
“Tau fakalelei muʻa mo e ngaahi meʻa naʻe hoko ʻi he taʻu kuo maliu atú. Tukuange ʻa e ngaahi mamahi mo e hohaʻa fakaelotó, ʻa e ngaahi fefūsiaki mo e meʻa launoa ʻoku nau fakafelefele ʻi heʻetau moʻuí. Fakatauange te tau fefoakiʻaki ha ngaahi faingamālie foʻou kae ʻikai tokanga ki hotau ngaahi fakangatangata ʻi he kuohilí. Tau ʻoange muʻa ki he Sikulusi foʻou ʻiate kitautolu taki tahá ha faingamālie ke fai ha liliu.”
ʻEletā Gerrit W. Gong, Facebook,10 Tīsema 2023, facebook.com/gerritw.gong.
ʻOku Foaki Mai ʻe he ʻOtuá Kiate Kitautolu ʻa e Meʻaʻofa ʻo e Manatú
“ʻI hoʻo fakakaukau ki he ʻngaahi meʻafoaki leleiʼ lalahi mo iiki kuo hoko mai ki hoʻo moʻuí, kuó ke mamata fēfē nai ki hono fakahaofi, fakamālohia, mo tokoniʻi koe ʻe he toʻukupu ʻo e ʻEikí?
“ʻOku foaki mai ʻe he ʻOtuá ʻa e meʻa-foaki ʻo e manatú ke ʻoua naʻa ngalo ʻiate kitautolu ʻa e Tokotaha Foakí, koeʻuhí ke tau ongoʻi ʻEne ʻofa taʻefakangatangata ʻiate kitautolú pea ako ke ʻofa foki kiate Ia. ʻOku naʻinaʻi mai ʻa Molonai ko e palōfita ʻi he kuonga muʻá ke tau manatuʻi ‘ʻoku tupu meia Kalaisi ʻa e meʻa-foaki lelei kotoa pē’ (Molonai 10:18). ʻOku foaki ʻe hotau Fakamoʻuí ha ngaahi meʻaʻofa ʻoku ʻikai hangē ko e foaki ʻa e māmaní—ʻo fakataimi, fakakonga, pea iku ʻo ʻauha ʻi he fakalau ʻa e taimí. ʻOku foaki ʻe Sīsū Kalaisi ha ngaahi meʻaʻofa tuʻuloa.”
Sisitā Tracy Y. Browning, Facebook, 13 Tīsema 2023, facebook.com/Primary2ndCounselor.