Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Ko e Fakatātā Palakū ʻo e ʻAloʻí

Fai ʻe Dalinda Dolly McMullin, Pilitānia Kolomupia, Kānata

Hili hono fakatau mai ha fakatātā ʻo e ʻAloʻí kuo maumau, naʻá ku maʻu ha mahino lahi ange ki he feilaulau ʻa e Fakamoʻuí maʻa ʻetau ngaahi angahalá.

ʻI he kei iiki ʻeku fānaú ʻi he ngaahi taʻu kuohilí, ne mau ʻalu atu ke fai haʻamau fakatau. Lolotonga ʻemau ʻalú, ne mau maʻu ha ʻū seti fakatātā maʻamaʻa ʻo e ʻAloʻí, ko e taha ʻo kinautolu naʻe faʻo ʻi ha kiʻi puha siʻisiʻi. Naʻe ʻikai fuʻu sai hono ngaohí, mahalo pē ko ha ngaohi mei ha maka ʻumeá, pea ko e kiʻi konga pē ʻe nima aí—ko Mele, Siosefa, ko ha tauhi-sipi, ko ha Tangata Poto, mo ha pēpē ko Sīsū.

ʻI hono fakaava hake ʻe hoku fohá ʻa e puhá, naʻe ʻasi hake ha konga ʻo tō ki he falikí, ʻo mafahi ua. Hili hono fakanonga hoku fohá ʻi heʻene fehalaākí, ne u pehē loto pē, “Mahalo te u fakatau ai pē ʻa e kiʻi seti fakatātā palakū ko ʻeni ʻo e ʻAloʻí.” Naʻe ʻikai ko ha fakatātā ia ʻo e ʻAloʻí ne u angamaheni ke fakaʻaliʻali ʻi hoku ʻapí, ka koeʻuhi ko hono maumauʻi ia ʻe hoku fohá, naʻá ku fakatau mai ia ʻo ʻomi ki ʻapi.

Hili e tākoto ʻa e fānaú ke mohé, naʻá ku toʻo hake ʻa e kiʻi seti fakatātā ʻo e ʻAloʻí ʻo fakakaukau ke laku ia ki tuʻa. Naʻe siʻisiʻi mo palakū ia ki he anga ʻeku fakakaukaú. Ka neongo ia, ko e konga naʻe mafahí, ko e pēpē ko Sīsuú. He ʻikai ke u lava ʻo laku ʻa e pēpē ko Sīsuú ki tuʻa! Ko ia, naʻá ku fakapipiki fakataha ʻa e kongá ʻaki ha kulū pea ʻi he taʻu kotoa pē talu mei ai, naʻá ku fakaʻataʻatā ha kiʻi feituʻu ʻi homau ʻapí ki he kiʻi fakatātā siʻisiʻi ko ia ʻo e ʻAloʻí.

ʻI he taʻu kuo ʻosí, ʻi heʻeku tuku ʻa e ʻū kongokonga fakatātā ʻo e ʻAloʻí ki ha fanga kiʻi laʻipepa ke maluʻi kinautolú, naʻá ku toe kiʻi sio hifo ki he pēpē ko Sīsuú. Pea naʻá ku sio leva ki he kiʻi puhá ʻi heʻeku faʻo ia ki lotó. Naʻá ku fakatokangaʻi kuo teʻeki ai ke u toʻo ʻa e fakaʻilonga ʻo e mahuʻingá: $1.25. Ko e totongi ia naʻá ku fai ke huhuʻi ʻaki e fehalaaki ʻa hoku fohá.

Naʻe hanga ʻe he fakakaukau ko iá ʻo ʻai ke u kiʻi fakalaulauloto ki hotau Fakamoʻuí. Naʻe hoko vave mai ki heʻeku fakakaukaú ʻa Sīsū Kalaisi, pea naʻá ku fakakaukau ki he mahuʻinga naʻe pau ke Ne totongi ke huhuʻi au mei heʻeku ngaahi angahalá. Ko ha kiʻi totongi siʻisiʻi moʻoni ia naʻá ku totongi ki he fehalaaki ʻa hoku fohá ʻi hono fakafehoanaki ki Heʻene feilaulau maʻa ʻeku ngaahi angahalá. Naʻá ku totongi ʻa e mahuʻinga ʻo e fakatātā ʻo e ʻAloʻí maʻa hoku fohá koeʻuhí ʻoku ou ʻofa ʻiate ia, pea naʻe totongi ʻe he Fakamoʻuí ʻa e mahuʻinga maʻatautolu koeʻuhí ʻokú Ne ʻofa ʻiate kitautolu (vakai, 1 Kolinitō 6:19–20).

Hangē ko ʻeku fakaleleiʻi ko ia e kiʻi pēpē Sīsū naʻe mafahí, te Ne lava ʻo fakaleleiʻi ʻetau moʻui fehalaākí. Naʻá ku fakakaukau ki he houngaʻia ʻoku ou maʻu koeʻuhi ko e Fakalelei ʻa Sīsū Kalaisi maʻaku mo e fānau kotoa ʻa e ʻOtuá, pea mo e ʻamanaki lelei te tau lava ʻo maʻu ʻi hotau Fakamoʻuí. ʻOku ʻikai ke toe palakū ʻa e kiʻi fakatātā palakū ko ia ʻo e ʻAloʻí kiate au he taimí ni.