ʻOku ʻOmi ʻe he Tuí ʻa e Ngaahi Maná

ʻOku aleaʻi ʻe he ʻEta 12 mo e Molonai 7 ʻa e ngaahi tāpuaki ʻoku lava ke maʻu ʻi heʻetau moʻuí ʻi he taimi ʻoku tau ngāue ʻaki ai ʻetau tui kia Sīsū Kalaisí. ʻOku vahevahe ʻe he ʻEta 12 ha ngaahi sīpinga ʻo kinautolu ne nau ngāue ʻaki ʻa e mālohi ʻo e tuí. Hangē ko ʻení:

“Vakai, ko e tui ʻa ʻAlamā mo ʻAmulekí naʻe ngaohi ai ʻa e fale fakapōpulá ke holo hifo ki he kelekelé.

“Vakai, ko e tui ʻa Nīfai mo Līhaí naʻe fakahoko ai ʻa e liliu ʻi he kau Leimaná …

“Vakai, ko e tui ʻa ʻĀmoni mo hono kāingá naʻe fakahoko ai ha fuʻu mana lahi pehē ʻi he kau Leimaná.

“ʻIo, pea ko kinautolu kotoa pē kuo nau fai ha ngaahi maná, naʻa nau fai ia ʻi he tuí” (ʻEta 12:13–16).

ʻOku ʻikai fakangatangata pē ʻa e ngaahi tāpuaki ʻo e tuí ki he kakai tangata mo fafine ʻi he folofolá—ʻoku tāpuekina kitautolu he ʻahó ni ʻe he ngāue ʻi he tuí. Ko ha ngaahi sīpinga ʻeni kimuí ni mai ʻo e tuí:

ʻI he Tuí, naʻe Vahevahe ai ʻe ha Mēmipa ʻi Kōlea Tonga ʻa e Ongoongoleleí mo ha Lauafe

Naʻe ngāue ha Fefine Siasi ko Huangi Kiuni ʻOki ʻi ha fale tauhi ʻo e fānau paeá ʻi Kōlea Tonga ʻi he 1960 tupú. ʻI he taimi naʻe ʻilo ai ʻe he niʻihi ʻoku nau fakapaʻanga e falé ko Sisitā Huangí ko ha mēmipa ia ʻo e Siasí, naʻa nau ʻoange ha fili ke ne fai: mavahe mei he Siasí pe fakafisi mei heʻene ngāué. Naʻá ne fakafisi. Hili ha taʻu ʻe nima mei ai, naʻá ne fakaava ha ʻapi foʻou maʻá e fānau fefine ʻi Soulú. ʻI heʻenau ngāue fakataha mo e kau faifekau ʻo e Kau Māʻoniʻoni ʻi he Ngaahi ʻAho Kimui Ní, naʻa nau fakahoko ai ha ngaahi koniseti ʻi he fonuá kotoa ʻa ia naʻe tokoni ki hono fakamafola ʻo e ongoongoleleí ki ha lauiafe.

Temipale Freiberg Germany

ʻI he Tuí, Naʻe Maʻu ai ʻe he Kāingalotu ʻi Siamane Hahaké ha Temipale

Lolotonga e ʻaʻahi ʻa Palesiteni Tōmasi S. Monisoni ki Siamane Hahake ʻi he 1968, lolotonga ʻene hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá he taimi ko iá, naʻá ne palōmesi ki he Kāingalotú, “Kapau te mou tuʻu maʻu mo faivelenga ʻi he ngaahi fekau ʻa e ʻOtuá, te mou maʻu ʻa e tāpuaki kotoa pē ʻoku maʻu ʻe ha mēmipa ʻo e Siasí ʻi ha toe fonua kehe.” ʻI he taimi ko iá, ko e temipale ofi tahá naʻe tuʻu ia ʻi Suisalani, ka naʻe puleʻi fefeka ʻe he puleʻangá ʻa Siamane Hahake. Naʻe ʻikai faʻa tali ha visa ʻa e Kāingalotu ʻo e Siasí ke nau fononga ki ai.

Naʻe faleʻi ʻe Palesiteni Sipenisā W. Kimipolo ʻa Henelī Pokihati, ko e palesiteni ʻo e misiona ʻa e Siasí ʻi Telesitení, ke fakakaungāmeʻa ki he kau ʻōfisa kominiusi ʻi he fonuá. Neongo naʻe faingataʻa ʻeni, ka naʻá ne ngāue ʻi he tui. Naʻe ʻaukai mo lotu ʻa e kāingalotú, pea naʻe kamataʻi ʻe Henelī ha feohi fakakaungāmeʻa mo ha kau ʻōfisa fakapuleʻanga tokolahi pea naʻá ne faʻa kole ke fakangofua ʻa e kāingalotu ʻo e Siasí ke nau fononga ki he temipalé. ʻI he 1978, ʻi heʻene toe kolé, naʻe talaange ʻe ha tokotaha ngāue fakaʻofisiale ʻe taha, “Ko e hā ʻoku ʻikai ke ke langa ai ha temipale hení?”

Naʻe ʻikai ha toe tatali fuoloa, naʻe langa ʻe he Siasí ha temipale ʻi Feleipoki, Siamane, ʻa ia naʻe fakatapui ʻi he 1985 ʻe Palesiteni Kōtoni B. Hingikelī.

Kāingalotu ʻo e Siasí ʻi ha fakataha lotu ʻi Tonga, Mē 2019

ʻI he Tuí, Naʻe Fakafanongo ʻa e Kāingalotu ʻi Tongá ki he Palōfitá ʻi he ʻUhá

Naʻe ʻaʻahi ʻa Palesiteni Lāsolo M. Nalesoni mo hono uaifí, Sisitā Uenitī Nalesoni, ki he ʻOtu Motu ʻo e Pasifikí ʻi he 2019, lolotonga ha vahaʻataimi ʻo e ʻuha lōvaí. Naʻe fakamatala kimui ʻe Palesiteni Nalesoni:

“Naʻe ʻaukai mo lotu e kāingalotú ke ʻalomālie ʻenau ngaahi fakatahaʻanga ʻi tuʻá.

“ʻI he kamata pē ko ia ʻa e ngaahi fakatahaʻangá ne tuʻu e ʻuhá ʻi Haʻamoa, Fisi, mo Tahiti. Ka naʻe ʻikai ke tuʻu e ʻuhá ia ʻi Tonga. Ne tō mai kimuʻa ha Kāingalotu faivelenga ʻe toko 13,000 ke maʻu hanau nofoʻanga, mo tatali fiemālie pē ʻi he fuʻu ʻuha lahí, pea tangutu pīponu ʻi ha fakataha houa ʻe ua.

“Naʻá ma mamata ki he tui mālohi ʻa e kakai ʻo e ʻotu motú—ko ha tui ne feʻunga ke ne taʻofi e ʻuhá, mo e tui ke matuʻuaki e ʻuhá ʻi he taimi ne ʻikai ke tuʻu aí.”