“Naʻe Hoko Homau Ngaahi Faingataʻaʻiá ko Homau Ngaahi Tāpuaki,” Liahona, Tīsema 2024.
Ngaahi ʻAta ʻo e Tuí
Naʻe Hoko Homau Ngaahi Faingataʻaʻiá ko Homau Ngaahi Tāpuaki
Neongo ʻemau ngaahi faingataʻaʻia lolotonga e ngaahi taimi faingataʻa ʻi Keniaá, ka naʻe ʻomi ʻe he ʻEikí ha ngaahi ʻaloʻofa ongongofua mahutafea kiate kimautolu.
Laʻitaá ʻi he angalelei ʻa e tokotaha naʻá ne faʻuʻa e talanoa ko ʻení
ʻOku malava he taimi ʻe niʻihi ke taʻemanonga ʻa e moʻuí ʻi Nailopi, ko e kolomuʻa ʻo Keniā ʻi ʻAfilika Hahaké. Ka ʻi heʻemau hoko ko ha fānau ʻo ha pule ʻi ha fale ngāué, naʻá ku maʻu mo hoku tokouá mo e tuofefiné ha meʻa lahi ke mau kai mo ha ʻapi ne ʻi ai e meʻa kotoa pē ne mau fiemaʻú.
Ka neongo iá, naʻe vave hono maumauʻi ʻa e fiemālie ʻo ʻemau tuʻunga moʻuí ʻe he fili fale alea naʻe fai ʻi he 2008, pea moveuveu ai ʻa e fonuá. Naʻe feʻaluʻaki holo ʻa e kau fakamoveuveú ʻi he loto halá ʻo kaihaʻasi e ʻū fale pisinisí. Naʻe fiemaʻu ha polisi ke fakafeʻao ʻeku tamaí he taimi naʻá ne ʻalu ai ki he ngāué.
Koeʻuhí ke mau malu, ne mau mavahe leva mei he koló ʻo hiki ki ha ʻapi naʻe lolotonga langa heʻemau tamaí ʻi Puisia, Keniā, naʻe kilomita ʻe 450 (maile ʻe 280) hono mamaʻó. Ka naʻa mo ia, naʻa mau lokaʻi homau matapaá.
Ko homau taimi faingataʻa tahá ʻa e taimi Kilisimasi ʻo e 2009, naʻe ʻikai toe fehuʻia ia. Ne mau tailiili ki heʻemau moʻuí ʻi he ʻaho kotoa pē ʻo e faʻahitaʻu ko iá. Naʻe toitoi holo pē ʻa e kakaí ʻi tuʻa ʻi homau ʻapí, vēkeveke mo mateuteu ke kaihaʻa. ʻI ha taimi ʻe taha, naʻe laka fakahangatonu mai ha kau kengi fakaehaua mo ha ʻū helepelu kiate kimautolu. Naʻa mau faʻa ilifia ke fakaava ʻa e matapaá. ʻOku ou ʻilo fakapapau naʻe hoko e ngaahi lotu tui faivelenga ʻemau faʻeé ke mau malu ai.
ʻI he taimi ko iá, naʻe ʻikai ha ngāue ʻeku tamaí. Naʻe faifai pea ʻosi ʻa e meʻakaí. Naʻe aʻu ʻemau maʻu meʻatokoni Kilisimasi ʻi he taʻu ko iá ki hono haka ʻa e laʻiʻakau ne paki mei he ngoue piini ne tō ʻe heʻeku faʻeé. Neongo homau ngaahi faingataʻaʻiá, ka naʻe tuʻu maʻu pē ʻeku tamaí, neongo naʻá ne ongoʻi loto-mamahi ʻaupito.
Naʻe fakaʻau ke mau ongoʻi ne lōmekina kimautolu ʻe he manavaheé pea meimei mole ʻemau ʻamanakí. Ne mau fehuʻi loto pē, “Ko e hā e ʻuhinga ʻoku hoko ai ʻení? Ko e hā e ʻuhinga ʻoku mau aʻusia ai ʻa e ngaahi faingataʻa pehē ʻi he hili pē ʻemau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?”
Ngaahi ʻAloʻofa Fisifisimuʻa
ʻI ha efiafi ʻe taha, naʻe haʻu ai ha ongo faifekau matuʻotuʻa loto-toʻa naʻá na ʻilo e tuʻunga fakatuʻutāmaki ne mau ʻi aí, ʻo ʻomi ha pōpoaki ʻo e melinó. Naʻa mau maʻu ha loto-toʻa ʻi heʻena lau ʻa e fakamoʻoni mo e palōmesi ʻa Nīfai ʻi he 1 Nīfai 1:20: “ʻOku ʻi he kakai kotoa pē kuo fili ʻe he ʻEikí ʻa ʻene ngaahi ʻaloʻofa ongongofuá, koeʻuhi ko ʻenau tuí, ke fakaiviʻi ʻa kinautolu ʻo aʻu ki heʻenau maʻu ʻa e mālohi ʻo e fakahaofí.”
Naʻa mau tui ki ai.
Naʻe tokoni mai ʻa e ongo faifekaú ke mahino kiate kimautolu, neongo ʻemau ngaahi faingataʻá, ka ʻoku finangalo ʻa e ʻEikí ke hokohoko atu ʻemau moʻui faivelengá. ʻOku ou manatuʻi lelei ʻa e nonga mo e fiemālie naʻá ne lōmekina au ʻi he pō ko iá. Naʻá ku ʻiloʻi, ʻo laka ange ʻi ha toe taimi kimuʻa, naʻe ʻafioʻi kimautolu ʻe he ʻEikí mo homau faingataʻaʻiá. ʻI he pō ko iá, pea ʻi he lolotonga ʻo e ngaahi taimi faingataʻá, ne u ʻiloʻi ai ʻoku fisifisimuʻa ʻa ʻEne ngaahi ʻaloʻofa ongongofuá.
ʻI he hokosia e taimi ke u ʻalu ai ʻo ngāue fakafaifekaú, naʻá ku ongoʻi ha holi ke tāpuakiʻi ʻa e kakai ʻi ʻIukanitaá ʻaki ʻa e ongoongoleleí, ka naʻá ku toe fie akoʻi foki ʻa e kakai ʻi Simipāpueé, ko e feituʻu ne nofo ai ʻa e faifekau naʻá ne papitaiso aú.
Naʻá ku lotu, ka ʻi hoku lotó, naʻe ʻikai ke u ʻilo ha founga te u lava ai ʻo ngāue ʻi ha fonua ʻe ua ʻoku vāmamaʻo ʻaupito. Ne ʻikai fuoloa mei ai, kuo maʻu hoku uiuiʻí ki Simipāpuē, ka ʻi heʻeku ʻi he senitā akoʻanga fakafaifekau ʻi Sōhenesipoki, Saute ʻAfiliká, naʻe tuai hono maʻu ʻeku visá. Naʻe vahe foʻou au ki ʻIukanitā, ʻa ia ne u ngāue ai ʻi ha māhina ʻe valu kimuʻa pea toki fakaʻatā mai ʻeku visa ki Simipāpueé.
Naʻá ku fakakaukau loto pē, “ʻOku ʻa e ʻEikí ʻa ʻEne ngaahi founga fakaofó.”
Ko ʻeku fuofua ʻēlia ʻi Simipāpueé ko Sīkanga Mutale. ʻI heʻeku vēkeveke ke kumi ʻa e fāmili ʻo e faifekau naʻá ne papitaiso aú, naʻá ku ako mo hoku hoá ʻa e tohi fakaʻēliá. Naʻe lahi ha ngaahi hingoa naʻe tatau mo hono hingoa fakafāmilí. Naʻá ma lotu, fai ʻema fili lelei taha ki he feituʻu ke ma ō ki aí, peá ma ō leva ki ai.
Ko e ʻuluaki matapā ne ma tukituki aí, naʻá ma ʻilo ai e fāmili ʻo ʻeku faifekaú. Ne ma fiefia ʻi he taimi pē ko iá. Naʻa mau fetāngihi mo fāʻofua ʻo hangē pē ha fāmilí. Lolotonga ʻeku huke ʻi he ʻalapama tā ʻo e fāmilí, naʻá ku maʻu ha ʻū tā ʻo hoku fāmilí ʻi homau papitaisó.
“Naʻa Mau Ongoʻi e Mālohi ʻo Langí”
Naʻá ku foki ki ʻapi ʻi he ʻosi ʻeku ngāue fakafaifekaú ʻo ʻilo ʻoku teʻeki ke fakalaka ki muʻa ʻa e ngaahi tūkunga ne ʻi ai hoku fāmilí. Naʻe kei taʻe-ngāue pē ʻeku tamaí. Naʻe fakaafeʻi au ʻe ha ongo tamaiki ʻoku ou tokoua ʻaki ke u nofo mo kinaua ʻi Kipela—ko e feituʻu faingataʻa taha ia ʻi Nailopí. Naʻá ku fokotuʻu ai ha feituʻu ʻe hoko ko hoku ʻapí.
Naʻe pule ʻa e kau kengí ʻi Kipela, ka naʻá ku fakamamaʻo mei he ngaahi feituʻu faihiá. Naʻá ku ongoʻi taʻelata, ka naʻe tokoni hoku ngaahi tokouá ke maluʻi au, ʻo fakapapauʻi naʻe ʻiloʻi ʻe he niʻihi kehé ko ha tokotaha lotu au pea naʻe pau ke nau fakaʻapaʻapaʻi au.
Naʻe ʻikai ha toe meʻakai kehe ʻi he feituʻú ka ko e vai pē mo ha kilimi sokoleti naʻe fakafuo ʻo hangē ha tōnatí. Naʻá ku fili ke u toki kai pē ʻi he poʻulí. ʻI he pongipongi kotoa pē, naʻá ku ʻā hake ʻoku ou fiekaia. ʻI he lotú, naʻá ku fai hoku lelei tahá ke malimali mo fiefia koeʻuhí ke ʻoua naʻa ʻilo ʻe he kāingalotú ʻeku fiekaiá.
Lolotonga e taimi ko ʻení, naʻá ku hoko ko ha palesiteni ʻo e kōlomu ʻo e kaumātuʻá ʻi he Kolo Langatá peá u ʻalu maʻu pē ki he akó ʻi he taimi ne malava aí. ʻI he hoʻatā Sāpaté, naʻá ku luelue ai mo e palesiteni fakakoló ke ʻaʻahi ki he kāingalotú, pea ne u ʻiloʻi naʻe hoko homa sote hiná ke faingofua hono ʻohofi kimaua ʻe he kau kengí. Ka naʻá ma ongoʻi e mālohi ʻo langí ʻi heʻema tokoni ki he niʻihi kehé, pea naʻe tokangaʻi kimaua ʻe hoku ngaahi tokouá ʻi heʻema lue ʻi he ngaahi hala efuá.
ʻOku pehē ʻe Brother ʻOmonitī, neongo ʻa e ngaahi taimi faingataʻá, ka “ʻi he faʻa lotú, ʻoku ou ongoʻi naʻe poupouʻi au pea naʻe ʻikai mole ʻeku ʻamanaki leleí. Naʻe fakapaleʻi ʻa e ʻamanaki lelei ko iá.”
Fakapaleʻi ʻo e ʻAmanaki Leleí
Ko ha taimi faingataʻa ʻeni, ka ʻi he faʻa lotú, ʻoku ou ongoʻi naʻe poupouʻi au pea naʻe ʻikai mole ʻeku ʻamanaki leleí. Naʻe fakapaleʻi ʻa e ʻamanaki lelei ko iá.
Hili ha kiʻi taimi siʻi mei ai, naʻe tali ke u ʻinitaviu ki ha ngāue. Naʻá ku feʻauhi mo ha niʻihi kehe ʻe toko hongofulu mā ua ki he foʻi ngāue ko iá, ʻa ia ne nau feʻunga ange kinautolu mo e ngāué koeʻuhi ko honau mataʻitohí mo e ʻū tohi fakamoʻoni akó. Ka naʻá ku ʻosi ngāue fakafaifekau, pea naʻá ku maʻu ʻa e tui mo e loto-falala ʻe tāpuakiʻi au ʻe he ʻEikí. Naʻá ku fai ha lotu peá u lue leva ki he haʻohaʻonga ʻo ha pēnolo ke nau sivisiviʻi au.
ʻI he fakaʻosinga ʻo ʻeku ʻinitaviú, naʻe fakafokifā pē ʻeku puʻaki atu, “Ko e fē taimi te u kamata aí?” Hili ha uike ʻe ua mei ai, naʻá ku kau ʻi he toko ua naʻá na maʻu ʻa e foʻi ngāué. Naʻe ʻikai fuoloa kuó u mavahe hake ko e tokotaha tuʻuaki lelei tahá, ʻa ia naʻá ne fakaava ha ngaahi matapā ki he fakalakalaká, kau ai ha telefoni mei ha ʻōfisa pule ke u ngāue ʻi haʻane kautaha lahi. ʻI he ʻaho ní, ʻoku ou maʻu ʻa e tāpuaki ʻo e hoko ko ha husepāniti mo ha tamai pea mo ha pīsope ʻo e Uooti Langatá.
“ʻI he ʻaho ní, ʻoku ou maʻu ʻa e tāpuaki ʻo e hoko ko ha husepāniti mo ha tamai pea mo ha pīsope.”
ʻOku ou manatu ki he Kilisimasi ʻo e 2009 mo e ngaahi faingataʻa ne hoko atu aí ko ha lēsoni fakangalongataʻa—ko ha taimi ne hoko ai homau ngaahi faingataʻaʻiá ko homau ngaahi tāpuaki pea naʻe foaki mai ʻe he ʻEikí ha ʻaloʻofa ongongofua mahutafea kiate kimautolu koeʻuhí ko ʻemau tuí.