“Ko e Meʻaʻofa ʻo ha Fakamoʻoni ʻe Taha ʻo Sīsū Kalaisi,” Liahona, Tīsema 2024.
Haʻu, ʻo Muimui ʻIate Au
Kilisimasi
Ko e Meʻaʻofa ʻo ha Fakamoʻoni ʻe Taha ʻo Sīsū Kalaisi
Ko Sīsū Kalaisi ʻa e laumālie ʻo e Kilisimasí, ko e maama ʻo e Kilisimasí, pea mo e meʻa ʻoku fakatefito ai ʻa e Kilisimasí. ʻOku ʻi loto ʻi he Tohi ʻa Molomoná ʻa e laumālié, māmá, mo e meʻa ʻoku fakatefito ai ʻa e Kilisimasí koeʻuhí ʻokú ne akoʻi fekauʻaki mo Sīsū Kalaisi mo e founga ke haʻu ai kiate Iá. Ko ha ongo founga pē eni ʻe ua ʻoku akoʻi mai ʻe he Tohi ʻa Molomoná ke tau ʻunuʻunu ai ke ofi ange kiate Iá.
Ko e Meʻaʻofa ʻo e Ngaahi Fuakavá
ʻOku ʻomi ʻe he Tohi ʻa Molomoná ha ʻilo lahi ange ki he ʻuhinga ʻo e maʻu ha vā fetuʻutaki fuakava mo e ʻOtuá (vakai ki ha sīpinga ʻi he, 1 Nīfai 15:18; Mōsaia 5:5; 18:13; 3 Nīfai 20:26). ʻOku pehē ʻi hono peesi talamuʻakí ko e taumuʻa ʻo e Tohi ʻa Molomoná, fakataha mo ha niʻihi kehe, ke tokoni ki he toenga ʻo e fale ʻo ʻIsilelí ke nau “ʻiloʻi ai ʻa e ngaahi fuakava ʻa e ʻEikí, ke ʻoua naʻa kapusi atu ʻa kinautolu ʻo taʻengata.” ʻOku ʻomi ʻe he Tohi ʻa Molomoná ʻa e ʻilo kuo toe fakafoki mai fekauʻaki mo e vā fakafuakava ʻe lava ke tau maʻu mo e Tamai Hēvaní ʻo fakafou ʻia Sīsū Kalaisi mo ʻEne Fakaleleí.
ʻI heʻetau fakahoko mo tauhi e ngaahi fuakava toputapú ʻo fakafou ʻi he papitaisó pea mo e temipalé, ʻoku tau ʻunu ʻo ofi ange ai ki he Tamai Hēvaní mo Sīsū Kalaisi ʻi ha founga ʻokú ne haʻi kitautolu kiate Kinaua, ʻi ha founga te ne lava ʻo fakafoki ai kitautolu kiate Kinauá.
Ko e Meʻaʻofa ʻo e ʻOfá
ʻOku tokoni ʻetau ako e Tohi ʻa Molomoná ke tau maʻu e mahino ko Sīsū Kalaisi ʻa e meʻaʻofa māʻolunga taha ʻo e ʻofá (vakai, 1 Nīfai 11:16–23) pea ʻokú Ne ʻofa fakataautaha ʻiate kitautolu.
Hili e Toetuʻu ʻa e ʻEikí, naʻá Ne fakaafeʻi e kau Nīfaí ke nau “tuʻu hake pea ʻunuʻunu mai kiate au, koeʻuhí ke mou ʻai homou nimá ki hoku vakavaká, pea ke mou ala foki ki he mataʻi faʻo ʻi hoku nimá mo hoku vaʻé, koeʻuhí ke mou ʻiloʻi ko au ko e ʻOtua ʻo ʻIsilelí, pea ko e ʻOtua ʻo e māmaní kotoa pē, pea kuo tāmateʻi au koeʻuhi ko e ngaahi angahala ʻa e māmaní.
“… [Pea naʻa] nau fai ʻeni, mo ʻalu atu taki taha” (3 Nīfai 11:14–15).
ʻOku fakahaaʻi mai ʻe he ngaahi veesi ko ʻení ko e finangalo ʻo e Fakamoʻuí maʻatautolu kotoa, ʻi he feituʻu kotoa pē pea ʻi he tūkunga kotoa pē, ke tau haʻu kiate Ia, ako ʻiate Ia, mo ongoʻi ʻEne ʻofá. Naʻe hōifua ʻa Sīsū ʻi Heʻene ʻofa taʻefakangatangatá ke feilaulauʻi Ia ke totongi ʻaki ʻetau ngaahi angahalá, ʻo ʻomi ai e faingamālie ke fakamaʻa kitautolu, ke tau fakalelei mo e ʻOtuá, pea ke tau iku ʻo foki ki he ʻao ʻo e ʻOtuá (vakai, ʻAlamā 34:13–17; Hilamani 14:15–17; 3 Nīfai 27:14–22).
Te tau lava ʻo fakahaaʻi ʻetau houngaʻia ʻi he meʻaʻofa ʻo e Tohi ʻa Molomoná ʻaki hono lau ia mo muimui ki he ngaahi akonaki ʻa e Fakamoʻuí. ʻI heʻetau fai iá, ʻoku tau tali ai ʻa e laumālie moʻoni ʻo e Kilisimasí, ʻo ʻomi ai ha maama ki heʻetau moʻuí ʻo ʻikai ngata pē ʻi Tīsema ka ʻi he taʻú kakato.
Tā ʻo e Tohi ʻa Molomoná ʻi he lea faka-Siōsiaá