Fakaʻilekitulōnika Pē: Kakai Lalahi Kei Talavoú
Ongoʻi Makehe mei he Kakai ʻOku Mou Feohí? Mahalo Ko ha Faingamālie ia ke Vahevahe Ai Hoʻo Māmá
ʻOku nofo ʻa e tokotaha naʻá ne faʻú ʻi ʻĀsenitina.
Mahalo ʻe faingataʻa ʻa e faikehekehé, ka ʻokú ne toe ʻomi foki ha ngaahi faingamālie ke tau fakamaama ai ʻa e māmaní.
ʻI hoʻo hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, mahalo te ke ongoʻi ʻokú ke kiʻi makehe mei he kakai ʻoku mou feohí.
Pea ʻe lava ke faingataʻa ʻi ha ngaahi taimi ʻe niʻihi. Kapau ko koe toko taha pē ʻa e mēmipa ʻo e Siasí ʻi homou feituʻú, mahalo he ʻikai te ke ongoʻi ʻoku fakakau koe ʻi he taimi ʻoku kau atu ai ho ngaahi kaungāmeʻá pe kau mēmipa ʻo e fāmilí ki ha ngaahi ʻekitivitī kehekehé. Mahalo te ke ongoʻi faikehe pe ngalikehe ʻi haʻo feinga ke fakamatalaʻi hoʻo tui fakalotú.
Ka ʻoku ʻikai totonu ke pehē. ʻOku ʻi ai ʻa e mālohi ʻi he “ʻikai [ke] mā ʻi he ongoongolelei ʻo Kalaisí” (Loma 1:16). Kuó u ako ʻe lava ke tokoni ʻetau fiemālie ʻi heʻetau makehé ke tau ongoʻi malu ʻi hotau tuʻunga fakalangí mo vahevahe ʻa e ongoongoleleí—pea mo e Maama ʻo Kalaisí—ʻi ha founga fakanatula ange.
Ko ha ngaahi meʻa ʻeni ʻe niʻihi ʻoku ou “makehe” ai peá ne toe ʻai ke faingofua moʻoni hono vahevahe ʻeku tuí mo e māmá:
1. ʻOku ou Tui ki he ʻOtuá—pea ʻi he Saienisí
Ko ha tokotaha ako ʻenisinia au, ko ia ʻoku ou feohi ai mo ha kakai tokolahi ʻoku nau tui ki he saienisí mo e fiká ka ʻoku ʻikai ke nau tui ki he ʻOtuá.
Neongo ʻoku ʻikai iku ʻa e kehekehe ko ʻení ki ha ngaahi fealēleaʻaki fakalotu ʻi he lotolotonga ʻo e kalasí, ka ʻoku ou maʻu ʻa e faingamālie ke hoko “ko e [faʻifaʻitakiʻanga ʻo e] kakai tuí” (1 Tīmote 4:12). ʻOku fakatokangaʻi ʻe hoku ngaahi kaungāmeʻa mei he ʻunivēsití ʻoku ʻikai ke u ʻalu ʻo paati mo kinautolu ʻi he ʻaho Sāpaté. ʻI heʻenau fie ʻilo pe ʻoku ou ʻalu au ki fē ʻi he ʻaho Sāpaté, ʻoku ou talaange ʻeku tukupā ke ʻalu ki he lotú pea ʻai ke nau ʻiloʻi ʻoku ʻikai ke hanga ʻe heʻeku akó mo e ʻiló ʻo taʻofi au mei heʻeku tui ki he ʻOtuá.
2. ʻOku Ou Moʻui ʻAki ʻa e Fono ʻo e Angamaʻá
ʻI he taimi ʻoku ʻiloʻi ai ʻe he kakaí ʻoku ou moʻui ʻaki mo hoku kaumeʻá ʻa e fono ʻo e angamaʻá pea ʻoku ʻikai ke ma nofo fakatahá, ʻoku lahi ʻaupito ʻenau ngaahi fehuʻí. Pea ʻi he taimi ʻoku nau ʻeke mai ai pe naʻe anga fēfē ʻema fetaulakí peá u talaange naʻá ma fetaulaki ʻi he temipalé, ʻoku toe lahi ange leva ʻenau ngaahi fehuʻí!
ʻOku kamata ke tala ia ʻe he māmaní ʻoku ʻolokuonga ʻa e malí. Pea ko ia ai ʻoku tokolahi ha kakai ʻi hoku toʻu tangatá ʻoku fuʻu ngalikehe kiate kinautolu ʻa e anga ʻeku moʻui pehení. Ka ʻoku ʻomi ʻe he faikehekehe ko ʻení ha faingamālie ke u vahevahe ai ʻeku fakamoʻoní ki he fakaʻofoʻofa ʻo e mali taʻengatá mo e anga hono faitāpuekina ʻeku moʻuí ʻi hono tauhi ʻa e fono ʻo e angamaʻá.
3. ʻOku ou Talanoa ʻo Kau ki he Ngāue Fakafaifekau ʻa Hoku Tokouá
ʻOku lolotonga ngāue fakafaifekau hoku kiʻi tehiná ʻi Silei, pea ʻi he taimi ʻoku ʻeke mai ai ʻe hoku ngaahi kaungāmeʻá ʻo kau ki hoku fāmilí, ʻoku faingofua ke talanoa ʻo kau kiate ia mo fakamatala ai pē ki heʻeku tui fakalotú. ʻOku ʻikai ke u fakavaveʻi pe ʻikai fai ha talanoa ki he kaveinga ko iá, ka ʻoku ou tala ki he kakaí ʻoku akoʻi hoku tehiná ʻo kau kia Sīsū Kalaisi. ʻOku ou fakamatalaʻi ange ʻeku ʻofa mo e poupou kiate ia pea mo e ngāue ʻokú ne fakahokó.
ʻOku ʻikai fiemaʻu ia ke u lea ʻaki ha fuʻu meʻa lahi pe fakaofo—ka ʻoku ou lea moʻoni pē. Ka ʻoku tokoni ia ke ʻiloʻi ai ʻe he kakaí ʻa e mahuʻinga ʻa e Siasí kiate au mo hoku tehiná.
4. ʻOku Ou Tauhi e Lea ʻo e Potó
Ko e taha ʻo ʻeku ngaahi taumuʻa fakataautaha ʻi he moʻuí ke fakamahino ki he kakaí te u lava pē ʻo fiefia taʻe-inu kava mālohí—neongo ʻenau fakakaukau ʻoku ʻikai malava iá!
Ka ʻi hono fai mai ʻo e ngaahi fehuʻi fekauʻaki mo e ʻikai ke u ʻinu kava mālohí—ʻa ia ʻoku faʻa hoko, koeʻuhí he ʻoku hoko ʻa e kava mālohí ko e konga pau ia ʻo e ngaahi meʻa fakasōsialé—ʻoku lava ke u vahevahe ange ʻoku ou fiefia mo moʻui fiefia ʻi he tuʻunga ʻoku ou ʻi aí. Te u lava ʻo tuku ke ulo atu meiate au ʻa e Maama ʻo Kalaisí mo fakamahino ki he kakaí ʻoku tokoni hono tauhi e Lea ʻo e Potó ke u fai ha ngaahi fili ʻoku leleí peá u maʻu ai mo e fiefiá.
Ko Hono Vahevahe ʻo e Māmá
ʻOku ʻi ai ha meʻa ʻe taha ʻoku faitatau ai e ngaahi sīpinga ko ʻení: “ke ʻi he kakai tuí ko e [faʻifaʻitakiʻanga] ʻi he lea, mo e ʻulungaanga, mo e ʻofa, mo e faianga, mo e tui, mo e māʻoniʻoni” (1 Tīmote 4:12). ʻOku ʻikai fuʻu fiemaʻu ha taukei lahi ki he moʻui faivelengá mo hono vahevahe e maama ʻa e Fakamoʻuí mo e māmaní (vakai, 3 Nīfai 18:24). Pea te u pehē, ko e meʻa pē ia ʻoku fiemaʻú ko hono fai hoku fatongia ke fakamaama ʻa e māmaní—ʻo moʻui ko ha sīpinga ʻo Sīsū Kalaisi.
Pea hangē ko e akonaki ʻa Palesiteni Tōmasi S. Monisoní (1927–2018): “Naʻa tau omi ki he māmaní kuo fakakoloa ʻaki kitautolu e Maama ʻo Kalaisí. ʻE ulo ʻa e maama ko iá ʻi loto ʻiate kitautolu mo huluhulu ʻa e halá ki he kakaí, ʻi heʻetau muimui he sīpinga ʻa e Fakamoʻuí mo moʻui hangē ko ia naʻá Ne fakahoko mo akoʻí.”
Neongo kapau he ʻikai ke liliu ʻe hoʻo feinga ke vahevahe hoʻo tui ki he ongoongoleleí e kakaí, ka ʻoku kei mahuʻinga pē hono vahevahe ʻa e meʻa ʻoku ʻi ho lotó. ʻE tāpuekina hoʻo moʻuí mo fakamālohia hoʻo fakamoʻoní ʻi hoʻo moʻui moʻoni ʻaki ʻa e ngaahi meʻa ʻokú ke tui ki aí. Ko e lahi ange hoʻo akoako ke vahevahe hoʻo māmá, ko e lahi ange ia e maama te ke ʻomi ki he moʻui ʻa e niʻihi kehé, ʻo tatau ai pē pe te nau fili ke maʻu ia pe ʻikai.
Pea ko hono moʻoní, he ko hai ia te ne taʻe-fiemaʻu ha maama lahi ange ʻi heʻenau moʻuí?