“Feituʻu ke Fekumi ai ki ha ʻAmanaki Lelei, Nonga, mo ha Taumuʻa ʻi he Taimi ʻoku Liliu ai ʻa e Moʻuí,” Liahona, Tīsema 2024.
Kakai Lalahi Kei Talavoú
Feituʻu ke Fekumi ai ki ha ʻAmanaki Lelei, Nonga, mo ha Taumuʻa ʻi he Taimi ʻoku Liliu ai ʻa e Moʻuí
ʻOku ʻomi ʻe he ʻilo ki he ongoongolelei mo e Fakalelei ʻa Sīsū Kalaisí ha ʻamanaki lelei, nonga, mo ha taumuʻa ʻi he faʻahitaʻu Kilisimasi ko ʻení.
Tā fakatātaaʻi ʻe Benedetta C. Vialli
Lolotonga ʻetau fononga ʻi he matelié, te tau fehangahangai kotoa mo ha ngaahi aʻusia ʻe lava ʻo tokoni ke tau hoko ko ha kau ākonga lelei ange ʻa Sīsū Kalaisi. Ka neongo ia, ʻe faʻa liliu hotau ngaahi tūkunga ʻi he moʻuí, pea ʻe lava ke fiemaʻu ai ke tau liliu ʻetau tōʻonga moʻuí.
Ka neongo ia, ʻoku ʻi ai e ʻamanaki lelei kiate kinautolu ʻoku nau “sio pē [kia Sīsū] ʻi he fakakaukau kotoa pē” (Tokāteline mo e Ngaahi Fuakava 6:36), pea ʻoku ʻi ai ʻa e “ʻamanaki fakapapau ki ha maama ʻoku lelei ange” pea mo ha kahaʻu lelei ange maʻanautolu ʻoku tui ki he ʻOtuá (ʻEta 12:4).
ʻOku akoʻi, ueʻi fakalaumālie, mo fakahaaʻi mai ʻe he folofolá ʻa e founga naʻe tali ai ʻe he niʻihi ʻi he kuohilí—kimuʻa, lolotonga, pea mo e hili e ngāue fakafaifekau mo e misiona ʻa Kalaisi ʻi he māmaní—ʻa honau ngaahi tūkungá. Hangē ko ʻení, naʻe fekauʻi ʻe he ʻEikí ʻa e palōfita ko Līhaí ʻi he Tohi ʻa Molomoná ke mavahe mei hono ʻapí mo ʻene koloá kotoa, hola mo hono fāmilí ki he feituʻu maomaonganoá, pea fononga ki ha feituʻu taʻeʻiloa. Lolotonga e fonongá, naʻe fehangahangai ʻa Līhai mo e fakafepakí, loto-mamahí, loto-hohaʻá, mamahí, mo e siva e ʻamanakí. Naʻe teuteuʻi ia mo hono fāmilí ʻe he ngaahi aʻusia ko ʻení ki he fonua ʻo e talaʻofá.
ʻOku fehangahangai ha tokolahi ʻo kitautolu mo ha ngaahi faingataʻa hangē ko Līhaí. Mahalo ʻe hohaʻa ha niʻihi fekauʻaki mo honau fāmilí, nofo-malí, akó, pe ngāue maʻuʻanga moʻuí. Mahalo ʻe ongoʻi ʻe ha niʻihi ʻoku nau mamaʻo mei he Tamai Hēvaní mo e Fakamoʻui ko Sīsū Kalaisí koeʻuhí ko ha ngaahi fili taʻefakapotopoto pe ongoʻi tuenoa koeʻuhí ko ʻenau hiki ki ha kolo pe ʻapiako ʻe taha.
ʻOku ʻomi ʻe he faʻahitaʻu Kilisimasi ko ʻení ha faingamālie makehe ke tau tokanga taha ai ki he melino ʻoku foaki mai ʻe Sīsū Kalaisi maʻatautolú. Tatau ai pē pe ko e hā e ngaahi meʻa ʻokú ke ongoʻí, ngaahi tūkungá, pe feituʻú, manatuʻi ʻoku lava ke hoko ha ngaahi mana ʻi hoʻo “vivili atu ki muʻa ʻi he tui mālohi kia Kalaisí” (2 Nīfai 31:20).
Ko ha Taimi ʻo e Taʻepauʻia mo e Moveuveu
Lolotonga ʻeku ngāue fakafaifekau ʻi he Misiona Côte d’Ivoire Abidjan ʻi he 1998, naʻá ku fanongo ai fekauʻaki mo e moveuveu fakapolitikale mo e tūkunga fakasōsiale ʻi hoku fonuá, ʻa e Lepapulika Fakatemokālati ʻo Kongokoú. Naʻá ku ʻalu mo hoku hoá he ʻaho kotoa pē ke malanga. ʻI heʻeku fakafeʻiloaki au peá u talaange ko au mei DR Kongokoú, naʻe talamai ʻe he kakaí fekauʻaki mo e mafatukituki ʻo e meʻa ʻoku hoko ʻi he vahaʻa ʻo e puleʻangá mo e ngaahi kulupu angatuʻu aí—tautautefito ki Kinisasa, ko e kolomuʻá, ʻa ia naʻe nofo ai hoku fāmilí. Naʻá ku loto-mamahi ʻi heʻeku fanongo ki he fiekaia ʻa e kakai ʻi hoku fonuá pea kuo tāmateʻi ha kakai tokolahi.
Naʻá ku fetuʻutaki ki heʻeku palesiteni fakamisiona ʻofa mo loto-tokangá ke ʻilo pe naʻá ne ʻilo lahi ange fekauʻaki mo e meʻa naʻe hokó pe naʻá ne maʻu nai ha faʻahinga fakamatala fekauʻaki mo hoku fāmilí. Naʻá ku ongoʻi kuo siva e ʻamanakí peá u tangi ʻi ha ngaahi houa lahi. Naʻá ku mei loto-foʻi. Naʻá ku ongoʻi kuo liʻaki ʻe he ʻEikí au mo hoku fāmilí.
Naʻe poupou mo tokanga hoku hoá mo e kau faifekau kehé kiate au lolotonga e taimi ko ʻení. ʻI he ʻamanaki ke u foʻí, naʻe vahevahe mai ʻe hoku kaungāmeʻa lelei ko ʻEletā Siosefa Uilá, ha potufolofola he ʻikai ke toe ngalo ʻiate au.
ʻI he 1830 naʻe maʻu ai ʻe he Palōfita ko Siosefa Sāmitá ha fakahā kau kia Tōmasi B. Māʻasi. Naʻe toki papitaiso pē ʻa Tōmasi pea fakanofo ko ha kaumātuʻa ʻi he Siasí. Naʻe ui foki ia ke malanga ʻaki ʻa e ongoongoleleí. ʻI he taimi ko iá, naʻe fiemaʻu ʻe Tōmasi ha fakapapau. ʻOku folofola ʻa e ʻEikí kia Tōmasi ʻo fakafou ʻi he Palōfitá:
“ʻE Tōmasi, ko hoku foha, ʻokú ke monūʻia koeʻuhi ko hoʻo tui ki heʻeku ngāué.
“Vakai, kuo hoko kiate koe ʻa e ngaahi mamahi lahi koeʻuhi ko ho fāmilí; ka neongo iá, te u tāpuakiʻi koe mo ho fāmilí, ʻio, ko hoʻo fānau īkí; pea ʻoku haʻu ʻa e ʻaho te nau tui ai mo ʻiloʻi ʻa e moʻoní pea kau fakataha mo koe ʻi hoku siasí.
“Hiki hake ho lotó pea fiefia, he kuo hokosia ʻa e houa ʻo hoʻo ngāué; pea ʻe vete ange ʻa ho ʻeleló, pea te ke fakahā ʻa e ongoongo fakafiefia ʻo e fiefia lahi ki he toʻu tangatá ni. …
“Ko ia, ʻai hoʻo hele tuʻusí ʻaki ho laumālié kotoa, pea ʻoku fakamolemoleʻi kiate koe ʻa hoʻo ngaahi angahalá, pea ʻe fakaheka ki ho tuʻá ʻa e ngaahi haʻinga uite, he ʻoku taau mo e tangata ngāué ke ne maʻu ʻa ʻene totongí. Ko ia, ʻe moʻui ʻa ho fāmilí” (Tokāteline mo e Ngaahi Fuakava 31:1–3, 5; tānaki atu hono fakamamafaʻí).
Ko e tali ʻeni ne u fekumi ki aí. Naʻá ku fakahoko e ngāue ʻa e ʻEikí, pea naʻe ʻomi ʻe he ʻilo mo e moʻoni ʻo e ongoongoleleí mo e Fakalelei ʻa Sīsū Kalaisí ha ʻamanaki lelei mo ha taumuʻa ki heʻeku moʻuí lolotonga e taimi taʻepau ko iá.
Ngaahi Tefitoʻi Moʻoni ʻe Fā ke Maʻu ʻa e Melinó
ʻE lava ke tokoniʻi koe ʻe he ngaahi tefitoʻi moʻoni ʻe fā ko ʻení ʻi he taimi ʻoku ʻikai ke ke ʻilo ai ʻa e feituʻu ke tafoki ki ai ke maʻu ai ʻa e ʻamanaki leleí, melinó, mo e taumuʻa ʻi hoʻo moʻuí:
1. Tui ʻoku ʻi ai ha ʻamanaki lelei mo ha founga ke fakaleleiʻi ʻaki ʻa e ongoʻi tuenoa pe loto-siʻi ʻokú ke maʻú. ʻOku maʻu ʻa e ʻamanaki leleí ʻia Sīsū Kalaisi, ko ʻEne Fakaleleí, mo ʻEne ongoongoleleí. Naʻe folofola ʻa e Fakamoʻuí, “Kuó u haʻu au ke nau maʻu ʻa e moʻuí, pea ke nau maʻu ia ʻo lahi ʻaupito” (Sione 10:10). ʻOkú ke maʻu maʻu pē ʻiate Ia ha ʻamanaki lelei ki he moʻui mahutafea ko iá.
2. Fiefia neongo pe ko e hā e ngaahi tūkunga pe faingataʻa ʻo hoʻo moʻuí. Kuo akoʻi kitautolu ʻe hotau palōfita ʻofeiná, Palesiteni Lāsolo M. Nalesoni:
“ʻOku siʻi ha kaunga e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá.
“ʻI hono tukutaha ʻetau tokangá he palani ʻo e fakamoʻuí pea mo e ʻOtua mo Sīsū Kalaisi mo ʻEne ongoongoleleí, te tau ongoʻi fiefia ʻo tatau ai pē ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu ʻa e fiefiá meiate ia pea koeʻuhí ko Ia.”
Naʻa mo e taimi te ke “tangi pea tangilāulāu [aí], … ʻe fiefia ʻa māmani” koeʻuhí ko Sīsū Kalaisi, pea “ko hoʻomou mamahí ʻe liliu ko e fiefia. … Pea ko hoʻomou fiefiá, ʻe ʻikai toʻo ʻe ha taha meiate kimoutolu” (Sione 16:20, 22).
3. Manavaʻofa pea tokoniʻi ʻa e niʻihi kehé. Ko e Fakamoʻui ko Sīsū Kalaisí “naʻe faʻa feʻaluʻaki ʻo fai lelei” (Ngāue 10:38). Lotu ke maʻu ha mālohi ke hoko ko ha tali ki he lotu ʻa ha taha kehe. Malimali, talanoa, mo ʻaʻeva mo kinautolu ʻoku mou feohí. Fakafanongo kiate kinautolu pea tuku ha taimi maʻanautolu. Poupouʻi, vahevahe ʻa e meʻa ʻokú ke ʻilo ʻoku moʻoní, pea fakamolemoleʻi ʻa e niʻihi kehé. ʻE ʻaonga lahi ʻa e ngaahi tōʻonga faingofua ko ʻení kiate koe mo e niʻihi kehé.
4. Fakatomala pea feinga ke tauhi hoʻo ngaahi fuakavá. Kuo akonaki ʻa Palesiteni Nalesoni ʻo pehē:
“Koeʻuhí kuo hanga ʻe he Fakamoʻuí ʻi Heʻene Fakalelei taʻefakangatangatá ʻo huhuʻi kitautolu mei he vaivaí, fehalaākí, mo e angahalá, … ʻo ka ke fakatomala moʻoni mo kolea ʻEne tokoní, te ke lava ʻo ikuʻi e māmani fakatuʻutāmakí ni. …
“Neongo e ngaahi takihala mo e ngaahi fakahohaʻa ʻoku nau ʻākilotoa kitautolú, ka te ke lava ʻo maʻu ha fiemālie moʻoni—ʻa ia ko ha fakafiemālie mo e nonga—naʻa mo e lotolotonga ʻo hoʻo ngaahi palopalema fakatuta tahá.”
Kapau te ke fakatomala mo feinga fakaʻaho ke tauhi ʻa e ngaahi fuakava kuó ke fai mo hoʻo Tamai Hēvaní mo Sīsū Kalaisi ʻi he papitaisó pea ʻi he temipalé, kuo akoʻi ʻe Palesiteni Nalesoni te ke maʻu ha “fakalahi … [ʻo] e mālohi ʻo Sīsū Kalaisí.” ʻOku “fakamālohia kitautolu [ʻe Heʻene mālohí] ke tau matuʻuaki lelei ange hotau ngaahi faingataʻá, ʻahiʻahí, mo e loto-mamahí. ʻOku fakafaingofuaʻi ʻe he mālohí ni ʻetau fonongá.”
Ko ha foha pe ʻofefine koe ʻo ha Tamai Hēvani ʻofa mo tokanga. ʻOkú Ne finangalo ke ke fakalakalaka mo maʻu ʻa e fiefiá, ʻa ia ʻoku toki malava pē ʻo fakafou ʻi Hono ʻAlo ko Sīsū Kalaisí, ʻa ia te tau lava ʻo feinga ke manatuʻi maʻu pē lolotonga e faʻahitaʻu Kilisimasi ko ʻení—pea mo e faʻahitaʻu kotoa pē kimui aí. ʻOku ou ʻilo ʻe lava ke ʻomi ʻe he ongoongolelei ʻo Sīsū Kalaisí mo ʻEne Fakaleleí ha ʻamanaki lelei, nonga, mo ha taumuʻa ki hoʻo moʻuí.