“ʻAʻeva mo e Kāingalotu Foʻoú ʻi he Fonongaʻanga ʻo e Tuʻunga Fakaākongá,” Liahona, Tīsema 2024.
ʻAʻeva mo e Kāingalotu Foʻoú ʻi he Fonongaʻanga ʻo e Tuʻunga Fakaākongá
ʻOku fiemaʻu ʻe he kāingalotu foʻoú ha ngaahi kaungāmeʻa ʻi he Siasí, ngaahi faingamālie ke ngāue tokoní, pea fafangaʻi ʻaki e folofola ʻa e ʻOtuá.
ʻOku fiemaʻu ʻe ha fakamoʻoni siʻisiʻi ʻoku kei fakatupulaki ha tanumaki ʻi he faʻa kātaki ʻi he taimi ʻoku hiki ai ʻa e kau papi uluí mei ha ʻātakai ʻo ha ngaahi kaungāmeʻa mo ha ngaahi aʻusia angamaheni ki he ngaahi founga moihū foʻoú mo e ngaahi ʻulungaanga ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻOku haʻu ʻa e kāingalotu foʻou ko ʻení mei ha ngaahi puipuituʻa kehekehe ʻi he moʻuí ke tali ʻa e ongoongolelei ʻo Sīsū Kalaisi kuo fakafoki maí. ʻOku nau fiemaʻu ha fakahinohino mo ha anga fakakaumeʻa ke tupulaki ʻi Heʻene māmá. Naʻe akoʻi ʻe ʻEletā ʻUlise Soalesi ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko kitautolu ko ia ʻoku tau ʻi ha ngaahi tuʻunga kehekehe ʻi he fononga lōloa ʻo e moʻui faka-ākongá, kuo pau ke tau fakaaʻu atu ha nima fakafeohi ki hotau ngaahi kaungāmeʻa foʻoú, tali kinautolu ʻi he tuʻunga ʻoku nau ʻi aí, pea tokoni, ʻofa, mo fakakau kinautolu ʻi heʻetau moʻuí,”
ʻOku fiemaʻu ʻi he taimi ʻe niʻihi ʻa e ongoʻingofuá, ʻiló, fakakaukaulotó, ki hono tokoniʻi ʻo e kāingalotu foʻoú ʻi heʻenau haʻu ki he Siasí. Naʻe pehē ʻe ʻEletā Soālesi, “ʻOku ou tui te tau lava pea ʻoku totonu ke tau fakahoko lelei ange hono talitali hotau ngaahi kaungāmeʻa foʻoú ki he Siasí. ʻOku ou fakaafeʻi kimoutolu ke mou fakakaukau ki he meʻa te tau lava ʻo fai ke tau toe fakakau, tali, mo tokoniʻi lelei ange kinautolú.”
“Naʻá ku ʻi ha ʻātakai foʻou ne fonu ʻi he ngaahi lea mo e ʻulungaanga kehekehe. Naʻá ku ongoʻi hangē ha tokotaha liʻekiná ʻi he lahitaha ʻo e ngaahi fepōtalanoaʻakí pea ne u fehuʻia hoku mahuʻingá.”
Ko ʻEimī Falahā, ʻoku ʻasi fakataha mo hono husepānití, Nētane, mo ʻena fānaú
Fakahaaʻi ha Tokanga Fakamaatoato
Naʻe ʻiloʻi ʻe ʻEimi Falahā naʻe moʻoni ʻa e Siasí ʻi he taimi naʻá ne hū atu ai ʻi he matapā ʻo e fale lotú. ʻOkú ne pehē, “Naʻe ʻikai ke u lava ʻo fakaʻikaiʻi ʻa e fakamoʻoni ne u maʻu mei he Laumālie Māʻoniʻoní, ko ia ne u fili ai ke u papitaiso.”
Hili ha taʻu nai ʻe taha mei heʻene kau ki he Siasí ʻi heʻene taʻu 19, naʻá ne maʻu ha uiuiʻi ke ngāue ʻi he Fineʻofá. Hili ha taʻu ʻe taha mei ai naʻe ui ia ke ne hoko ko e palesiteni Fineʻofa ʻo hono uooti ʻo e kau taautaha kei talavoú. ʻOkú ne pehē, “Naʻe fakatupulaki moʻoni ʻe he ngaahi aʻusia ko iá ʻa ʻeku moʻuí. Naʻá ku tukupā kakato.”
Naʻe ʻi ai ha ngaahi pole ʻi heʻene hoko ko ha mēmipa foʻou ʻo e Siasí ʻi he uiuiʻi ko ʻení. ʻOkú ne pehē, “Naʻá ku ʻi ha ʻātakai foʻou ne fonu ʻi he ngaahi lea mo e ʻulungaanga kehekehe. ʻI he lahi taha ʻo e ngaahi fepōtalanoaʻakí, naʻá ku ongoʻi hangē ha tokotaha liʻekiná pea ne u fehuʻia hoku mahuʻingá.”
Neongo ʻa e ngaahi faingataʻá, naʻe talitali lelei ia ʻe he kāingalotu ʻo e Siasí ʻaki ʻa e loto-māfana, hangē ko e kole ange ʻe ha fefine ʻe taha ke ne hoko ko hono kaungāmeʻa. ʻOku pehē ʻe Sisitā Falahā, “ʻOku hoko e ngaahi feohi peheé ke ne fakamaʻamaʻa ʻa e faingataʻa ʻo hono ako ha tōʻonga moʻui foʻoú. Ne u ongoʻi ʻoku ou kau ki ha haʻofanga kakai. Naʻe ʻikai ke fakamaauʻi au ʻe he kāingalotu ʻi he uōtí ʻi he ʻikai ke mahino kiate au ʻa e ʻulungaanga mo e tokāteline ʻo e Siasí.”
Hili ha taʻu ʻe nima mei heʻene kau ki he Siasí, naʻá ne mali. Naʻá ne nofo mo hono husepānití ʻi ha ngaahi uooti kehekehe ʻi he ngaahi taʻu lahi. Naʻe tali ʻe he uooti ʻe taha ʻene aʻusia ʻi he papi uluí, ʻo aʻu ki hono fakaafeʻi ia ke ne vahevahe ʻene talanoá ʻi heʻene hoko ko ha mēmipa ʻo ha pēnolo ʻi ha ʻekitivitī fakauooti.
ʻI he ngaahi uooti kehe naʻá ne ʻalu ki aí, naʻe vēkeveke ʻa ʻEimi ke kau ka naʻe ʻikai ke ne ongoʻi ʻoku fakakau ia. Naʻe kamata ke ne veiveiua ʻi hono tuʻunga ʻi he Siasí. ʻOkú ne manatuʻi, “Ko e taimi ʻe niʻihi, naʻe ʻikai lava ke makātakiʻi ʻa e ongoʻi tuēnoá. Naʻe hokohoko atu ʻeku ʻalu ki he houalotu sākalamēnití mo fua hoku fatongia ʻi he nesilií ka ne u faingataʻaʻia ʻi he hulufau ʻo e loto-hohaʻá.”
ʻI he taimi naʻe ʻikai ola lelei ai ʻene feinga ke kumi tokoni mei hono uōtí lolotonga ha taimi faingataʻá, naʻá ne kumi faleʻi ki heʻene palesiteni fakasiteikí. ʻI heʻene talanoa mo ia ʻi ha taimi ʻe taha, naʻá ne vahevahe ʻa e mamahi ʻo hono lotó. Naʻá ne tali vave peá ne kole ange ʻokú ne fie fanongo lahi ange. Naʻe lōloa ʻena talanoá peá na tukupā ke fakataha maʻu pē. ʻOkú ne manatuʻi, “Naʻe tokanga moʻoni mo fanongo ʻa e palesiteni fakasiteikí ki he meʻa kotoa naʻá ku talaangé. Ko e fuofua tokotaha ia ke ne ʻeke ʻa e fehuʻi faingataʻa fekauʻaki mo e meʻa ʻoku hokó.”
Naʻe tokoni ʻa hono faleʻi ia ʻe he palesiteni fakasiteikí mo ʻene maʻu ha faleʻi fakapalōfesinale kehé ke ne ongoʻi ai e ʻofa ʻa e Tamai Hēvaní, ko ha sitepu mahuʻinga ʻi hono fakamoʻui iá. ʻOkú ne pehē, “Naʻe moʻui ʻa e meʻa kotoa maʻaku. ʻOku ou ʻiloʻi hoku tuʻungá. Kuó u ako ʻoku ʻikai fiemaʻu ke u fakamāʻia ʻi heʻeku hoko ko ha papi uluí.”
ʻOkú ne fokotuʻu mai, “ʻOku mahuʻinga ki he kau takí ke nau fakatokangaʻi mo tokangaekina ʻenau kau mēmipa foʻoú. ʻEke ʻa e ngaahi fehuʻi faingataʻá mo feinga ke ʻiloʻi moʻoni pe ʻoku nau fēfē. ʻOku mahuʻinga foki ha uiuiʻi pe faitongia ʻoku taau mo e tuʻunga malava ʻo e mēmipa foʻoú, ke ne langaki ʻene loto-falalá. ʻOku ʻikai ko ha kaveinga ʻa e ngāue tokoní, ʻo hangē ko e tui ha kau taki ʻe niʻihi.”
Naʻe toki maʻu ʻe ʻEimi ha mataʻitohi MA ʻi he faleʻi moʻui lelei fakaeʻatamaí, pea ʻokú ne fakahoko ha ngaahi ako fakasiteiki ki he moʻui lelei fakaeʻatamaí mo tokoni ki he polokalama fakaakeake ʻa e Siasí mei he maʻunimaá.
“Kuo fiemaʻu ʻe Kalaisi ke tau hiki hake hotau kolosí ʻo muimui ʻiate Ia. Ki ha kāingalotu foʻou ʻe niʻihi, ʻoku fiemaʻu ke nau tukuange honau ngaahi kaungāmeʻá. ʻOku fiemaʻu ke nau tukuange ʻenau tōʻonga moʻuí. ʻOku nau tukuange ha ngaahi meʻa lahi koeʻuhí ka nau lava ʻo kamata ʻi ha fonongaʻanga foʻou, pea ʻoku nau fiemaʻu ha poupou lahi ʻaupito—ko e taimi ʻe niʻihi ko ha malimali pē mo ha lulululu angaʻofa.”
Ko Ka Pou Sani, fakataha mo hono uaifi ko Mailá, mo ʻena fānaú
Ko ha Faingamālie ke Tokoni ki he Niʻihi Kehé
Naʻe fāʻeleʻi ʻa Ka Po Sani ʻi Hongo Kongo pea hiki ki he ʻIunaiteti Siteití ʻi heʻene kei siʻí. Naʻá ne ako fekauʻaki mo e Siasí ʻi heʻene kei taʻu hongofulu tupú mei ha tokotaha naʻá na loki fakataha ʻi he kolisí ʻi he taimi naʻá ne ako mūsika ai ʻi Potileni, ʻOlikoní. Naʻe ongo kiate ia ʻa e ngaahi moʻoni ʻo e ongoongoleleí, pea naʻe papitaiso pea hilifakinima ia. Hili ha taimi nounou mei ai, naʻá ne foki ki ʻEsitōnia ke hoko atu ʻene akó.
Naʻe faingataʻa hono maʻu ʻo e Siasí ʻi ʻEsitōniá. Naʻe faifai pē pea ʻikai haʻane toe fetuʻutaki mo ha kāingalotu pea siʻisiʻi leva ʻa e mahino ki he lotú mo e folofolá, naʻe kamata ke mōlia atu ʻene tuí.
Lolotonga e taimi ko ʻení, naʻá ne fetaulaki ai mo Maila, ko ha finemui ʻi he akó. ʻOkú ne pehē, “Naʻe malama ʻa e meʻa kotoa pē fekauʻaki mo ia.” Naʻá ne kamata tangutu ʻi hono tafaʻakí, pea ʻikai fuoloa kuó na hoko ko ha ongo kaungāmeʻa.
Naʻe ʻikai ke kau ʻa Maila ki he Siasí pea naʻe ʻikai ke ne maheni mo e tui fakalotú. Ka ʻi he hokohoko atu ʻena feohí, naʻá ne pehē kapau ʻe mali, ko ʻene mali ia ki he taʻengatá.
Lolotonga ʻene akó, naʻe ongoʻi ʻe Ka Pou ha ueʻi fakalaumālie ke foki ki he lotú peá ne fekumi ki he kolo ʻi hono feituʻú. Ko e fuofua ʻekitivitī naʻá ne kau ki ai mo Mailá ko ha paati Kilisimasi fakakolo. Naʻá ne ongoʻi naʻe faikehe ʻa e ngaahi ʻekitivitií pea naʻe ongo kovi, ko ia naʻá ne fakapapau ai he ʻikai toe foki mai. Ka naʻe kei hokohoko atu pē ʻa e maʻulotu ʻa Ka Poú.
ʻI ha pongipongi ʻe taha he faʻahitaʻu failaú, naʻe talaange ʻe Maila kia Ka Pou kuo pau ke ne fili ʻiate ia mo e Siasí. Naʻá ne tali taʻeveiveiua ange, ʻokú ne fiemaʻu ʻa e Siasí peá ne kole ange ke na ʻalu ki he lotú.
Naʻe fakatupu ʻe heʻene tali hangatonú ke ne fifili pe naʻe mole nai ha meʻa meiate ia; naʻe vaivai hono lotó, peá ne loto-lelei ke na toe ʻalu. ʻI he Sāpate hono hokó, naʻe fakafeʻiloaki mai kiate ia ʻa e malimali ʻo ha faifekau fefine. Naʻá ne ongoʻi naʻe tohoakiʻi ia kiate ia, ʻo hangē pē naʻá na kaungāmeʻa fuoloá. Naʻe mole atu ʻene ongoʻi manavasiʻí, pea naʻe papitaiso mo hilifakinima ia hili ha uike ʻe ua.
Naʻe ʻikai mahino kia Ka Pou mo Maila ʻa e ongo ʻo e folofolá mo e ngaahi founga ngāue ʻo e ongoongoleleí, pea naʻe ʻikai ha meʻa ʻi heʻena aʻusia ʻi heʻena tui fakalotu foʻoú naʻá na maheni mo ia, naʻa mo e mūsiká. Ka naʻá na maʻulotu mo feinga ke ako ʻa e ongoongoleleí.
ʻI he taimi naʻe hiki ai ʻa e kau faifekaú, naʻe ʻikai ʻiloʻi lelei ʻe Maila ʻa e kāingalotú pea naʻá ne ongoʻi taʻepauʻia ʻi he ngaahi tūkunga foʻoú, hangē ko e Fineʻofá, ʻa ia naʻá ne fifili ai ʻi ha taimi ʻe taha pe ʻokú ne ʻi ha feituʻu hala nai. Naʻe ʻikai fuoloa kuo ueʻi fakalaumālie ʻa e kau pīsopelikí ke ui ia ke tā piano ʻi he Palaimelí. ʻOkú ne pehē, “Naʻe hoko ʻa e tā pianó ke u lata mo ongoʻi ʻoku ʻi ai haʻaku taumuʻa.”
Naʻe fakatokangaʻi ʻe Malī mo Sōmā naʻá na fai ha meʻa naʻe fepaki mo e angafakafonua mo e tukufakaholo Fakafinilaní ʻi he taimi ne na kau ai ki he Siasí. Ka naʻá na liliu hona hala ʻi he moʻuí pea ʻikai toe fai ha sio ki mui.
Fafanga ʻaki e Folofola Lelei ʻa e ʻOtuá
ʻOku ʻiloʻi ʻe Malī mo Sōmā ʻa e hala ki he uluí. ʻI he ngaahi taʻu talu mei heʻena kau ki he Siasí ʻi hona fonua tupuʻanga ko Finilaní, kuó na ngāue ʻi ha ngaahi fatongia kehekehe, kau ai hono uiuiʻi ʻo Malī ko ha tokoni metuloni temipale mo e uiuiʻi ʻo Sōmā ko e tokoni ʻi he fuofua kau palesitenisī fakatemipale ʻo e Temipale Helesingi Finilaní.
Kae hangē ko e kau ului tokolahi, naʻe pau ke nau taukapoʻi ʻenau tuí. ʻI he taimi naʻe feʻiloaki ai ʻa e kau faifekaú mo kinauá, naʻe ʻikai faingofua kia Malī ke ne maʻu ha fakamoʻoni ʻo hangē ko hono husepānití. ʻI he kamataʻangá, naʻe ʻikai ke ne ongoʻi fiemālie ʻi he Tohi ʻa Molomoná peá ne tekeʻi atu ia ke mamaʻo ʻaki pē hono tuhú.
Kimui angé, ʻi heʻene sio ki he tafe ʻa e loʻimatá ʻi he kouʻahe ʻo hono husepānití lolotonga ʻene lau ʻa e Tohi ʻa Molomoná, naʻá ne fakakaukau loto pē, “Kapau ʻoku ongo mālohi ʻa e tohí ni [ki hono husepānití], pau pē ʻoku mātuʻaki mahuʻinga ʻaupito ia.”
Naʻe fakaʻau ke molū māmālie hono lotó, pea kamata leva ʻene fekumi ki he moʻoní. Naʻe faifai kuo tō foki mo hono loʻimatá ʻi heʻene lau ʻa e Tohi ʻa Molomoná.
Naʻe fakatokangaʻi ʻe Malī mo Sōmā naʻá na fai ha meʻa naʻe fepaki mo e anga fakafonuá mo e tukufakaholó ʻi he taimi ne na kau ai ki he Siasí. Ka neongo ia, naʻá na liliu hona hala ʻi he moʻuí pea ʻikai toe fai ha sio ki mui. ʻOku pehē ʻe Malī, “Naʻe ʻomi ʻe he Siasí ha fiefia lahi ki heʻema moʻuí. ʻOku ou meimei fakakaukau naʻe fuʻu lelei ʻa e meʻa kotoa pē ke moʻoni. Naʻe talitali angaʻofa moʻoni kimaua ʻi he haʻofangá.”
ʻOkú ne pehē, “Naʻe lahi ha ngaahi meʻa foʻou ne hoko fakafokifā mai ki heʻema moʻuí.” Naʻe ʻikai ke toe hoko ʻa e Sāpaté ko ha taimi ʻataʻatā ka naʻe fonu ʻi he ngaahi fakatahaʻanga ʻa e Siasí, ʻa ia naʻe fakahoko tuʻo tolu ʻi he ʻaho Sāpaté ʻi he taimi ko iá. “Naʻe fiemaʻu ai heni hono teuteuʻi e fānaú ki he fakatahaʻanga takitaha pea taimiʻi ʻenau maʻumeʻatokoní mo e mālōloó.”
Ko e ʻaho kotoa pē ʻo e uiké naʻe fiemaʻu ki ai ha taimi ki ha ngaahi ʻekitivitī mo ha ngaahi fakataha fekauʻaki mo e ongoongoleleí, ʻo tatau ai pē pe ko e efiafi fakafāmili ʻi ʻapí, Fineʻofá, pe Palaimelí. ʻOku pehē ʻe Malī, “ʻI he Tokonakí, ʻokú ma teuteuʻi ʻa e meʻatokoni mo e vala ki he Sāpaté.”
Naʻe ʻikai ke fai ʻe he fāmili ʻAlakosikií ha fanongonongo fakatokolahi ʻi he taimi ne nau kau ai ki he Siasí, ka naʻe faifai pē pea ʻiloʻi ʻe honau fāmilí mo e ngaahi kaungāmeʻá. ʻOku manatuʻi ʻe Malī, “Naʻe ʻikai ke mahino ki he tokotaha kotoa ʻa ʻema filí. Naʻe ʻikai ke toe lea mai ha ngaahi kaungāmeʻa ʻe niʻihi kiate kimaua. Ka ko ha kiʻi meʻa siʻisiʻi ia ne pau ke ma foua ke maʻu ai e ngaahi meʻa pelepelengesi ne ʻomi ki heʻema moʻuí. ʻOku ʻikai ha meʻa pe ko ha taha te ne lava ke tākiekina kimaua ke ma liʻaki ʻa e Siasí. Hili hono ʻiloʻi ʻe heʻeku tamaí ʻa ʻema uluí, naʻá ne taʻofi ha faʻahinga loto-ʻita mai ʻaki ʻene pehē, ‘Tuku pē ke na fai e meʻa ʻokú na sio ʻoku leleí. Kuó na matuʻotuʻa feʻunga. ʻOkú na ʻiloʻi pē e meʻa ʻokú na loto ke faí.’”
Hili ha ngaahi taimi, naʻe loto ʻa e ongomeʻa malí ke na sila. Naʻá na palani, feilaulau, mo fononga pasi ʻi ha ʻaho ʻe ua pea heka vaka ʻi ha pō ʻe taha ʻo fou atu ʻi Suēteni mo Siamane. Naʻe faifai peá na tūʻuta ki he Temipale Peeni Suisalaní, ʻa ia ko e temipale pē ia ʻe taha ʻi ʻIulope ʻi he taimi ko iá.
ʻOku hoko ʻa e fāmili ʻAlakosikií ko ha sīpinga ʻo e niʻihi ʻoku nau maʻu ha fakamoʻoni ki he ongoongoleleí pea vilitaki atu ki muʻa, ʻo hangē ko Nīfaí, ʻo ʻikai ke nau tomuʻa ʻiloʻi ʻa e meʻa kotoa pē ka ʻoku nau muimui ʻi he Laumālié (vakai, 1 Nīfai 4:6). Naʻá na ako mei he tōʻonga ʻo e kāingalotu kehé ke na ako ʻa e tokāteliné mo e founga ke fakaʻaongaʻi e ongoongoleleí ʻi heʻena moʻuí. ʻI he taimi naʻe ʻikai ke na ʻilo ai ha meʻá, naʻá na ako pe kole ha fakahinohino lahi ange.
Faleʻi mei ha ʻAposetolo
“Kuo akonekina lahi kitautolu ki he founga ke tau tokoniʻi ai hotau ngaahi kaungāmeʻa foʻoú ke nau ongoʻi ʻoku talitali lelei mo ʻofaʻi kinautolu ʻi he Siasi ʻo Sīsū Kalaisi kuo toe fakafoki maí. ʻOku nau fiemaʻu ha meʻa ʻe tolu kae lava ke nau kei mālohi mo faivelenga ʻi he kotoa ʻo ʻenau moʻuí,” ko hono akoʻi mai ia ʻe ʻEletā Soālesi, ʻo molomolomuivaʻe mai ʻi he faleʻi meia Palesiteni Kōtoni B. Hingikelií (1910–2008).
Naʻe hoko atu ʻa ʻEletā Soālesi, “ʻUluakí, ʻoku nau fiemaʻu ha ngaahi tokoua ʻi he Siasí ʻoku nau tokanga fakamātoato kiate kinautolu, ko ha ngaahi kaungāmeʻa moʻoni mo falalaʻanga te nau lava maʻu pē ʻo tafoki ki ai, poupouʻi kinautolu, mo tali ʻenau ngaahi fehuʻí.
“Ko hono uá, ʻoku fiemaʻu ʻe he ngaahi kaungāmeʻa foʻoú ha uiuiʻi—ko ha faingamālie ke tokoniʻi e niʻihi kehé. … Ko ha founga ia ʻe lava ke tupu mālohi ange ai ʻetau tuí. …
“Tolú, kuo pau ke ‘fafanga [e ngaahi kaungāmeʻa foʻoú] ʻaki e folofola lelei ʻa e ʻOtuá’ [Molonai 6:4]. Te tau lava ʻo tokoniʻi kinautolu ke nau ʻofa pea maheni mo e folofolá ʻi heʻetau lau mo aleaʻi e ngaahi akonakí mo kinautolú, ʻoatu ha puipuituʻa ki he ngaahi talanoá mo fakamatalaʻi e ngaahi foʻi lea mamafá.”
ʻOku ʻomi ʻe hono tokoniʻi ʻo e kāingalotu foʻoú ha ngaahi tāpuaki fakalaumālie mo fakatuʻasino ki he kau uluí mo e kāingalotú fakatouʻosi ʻi he toenga ʻo ʻenau moʻuí. ʻOkú ne fakamālohia ʻa e Siasí ʻi ha ngaahi founga kehekehe. Naʻe akoʻi mai ʻe ʻEletā Soālesi, “ʻOku ʻomi ʻe hotau ngaahi kaungāmeʻa foʻoú ha ngaahi talēniti, loto-vēkeveke, mo e lelei faka-ʻOtua ʻi loto ʻiate kinautolú ki he Siasí. ʻE lava ke mafola atu ʻenau vēkeveke ki he ongoongoleleí, ʻo toe fakatupulekina ʻetau ngaahi fakamoʻoní. ʻOku nau ʻomi foki ha ngaahi fakakaukau foʻou ki heʻetau mahino ki he moʻuí mo e ongoongoleleí.”