Ko e Fakatahataha ke Ngāue ʻi Sēnaí

ʻI he efiafi ʻo e ʻaho 25 ʻo Tīsema 2004, naʻe fiefia ai ʻa e kāingalotu ʻo e Kolo Sēnai ʻUluakí ʻi he matāfanga fakahahake ʻo ʻInitiá ʻi ha ʻekitivitī faka-Kilisimasi. Naʻe ʻikai ke nau teitei ʻilo ʻe hoko ha mofuike lahi ʻi he ʻŌseni ʻInitiá ʻi he matāfanga ʻo Sumatalá ʻi he pongipongi hono hokó. Naʻe mafola atu ʻa e mālohi ʻo e ngalulu ʻa e mofuiké ʻi he tahí, ʻo tekeʻi mai ai ha fanga fuʻu peau lalahi ki he fonuá. Naʻe hake ha ʻū peau lalahi faufaua ʻi he ngaahi kolo lalahi mo e kolo iiki ʻi ʻInitia, ʻInitonēsia, Sulī Langikā, Malēsia, mo Tailení, ʻo tāfea ai e ngaahi halá mo fakaʻauha e tukui ʻapí mo e ʻū falé. Naʻe mole pe mate ha kakai tokolahi naʻe taʻefaʻalaua.

ʻI he taimi naʻe aʻu atu ai ʻa ʻEletā ʻAlauini Kilipeti mo Leveni Nelapele, ko e ongo faifekau naʻá na ngāue ʻi Sēnaí, ki he lotú kimui ange ʻi he pongipongi ko iá, naʻá na ongoʻi naʻe ʻi ai e meʻa ne hoko. ʻI he matātahí, naʻe fokotuʻu ʻe he kau ʻōfisa polisí ha ʻū ʻā fakangatangata ke taʻotaʻofi e kau fieʻiló pea ne nau heka hoosi takai ʻo leʻohi ʻa e feituʻú. ʻI he matātahí, naʻe fusi hake ʻe he kakaí ha ngaahi sino mei he loto tahí. Naʻe lava ke ʻiloʻi ʻe he ongo faifekaú kuo laka hake ʻi he vaeuaʻi mailé (0.8 km) ʻa e aʻu mai e vaí mo e fakaʻauhá ki he lotofonuá mei he matātahí.

ʻI he pō ko iá naʻe ʻoatu ʻe he Siasí ha ʻū uta koloa mei ha kolo naʻe meimei maile ʻe 400 (kilomita ʻe 640) hono mamaʻó ke tufaki ʻe he Kāingalotú kiate kinautolu naʻe faingataʻaʻia ʻi Sēnaí. ʻI he pongipongí, naʻe fakatahataha mai ʻa e kāingalotú mo e kau faifekaú ki he ʻapisiasi ʻo e Kolo Sēnai ʻUluakí ke tokoni ʻi ha ngāue ʻofa naʻe fokotuʻutuʻu ʻe he ongo kolo ʻe ua ʻo e Siasí ʻi he kolo lahí. ʻI he ʻaho ʻe ua hono hokó, naʻa nau fakatahatahaʻi mo fokotuʻutuʻu ha ʻū naunau tokoni naʻe ʻi loto ai ha vala, naunau ki he mohengá, ʻū meʻa fakahaisini, mo e naunau kai.

Talu mei he hake ʻa e peaukulá, mo hono tufaki ʻe he Kau Māʻoniʻoni ʻi he Ngaahi ʻAho Kimui Ní ʻi he fonuá ha ʻū koloa mei he Siasí maʻanautolu ne uesiatamakí. Hili hono fakafonu e ʻū lolí ʻaki ha ʻū naunau haisini mo ha ʻū naunau kehe ʻe laungeaú, naʻe fononga ʻa e kau faifekaú mo ha niʻihi kehe fakataha mo Palesiteni Peleni Ponihemi ʻo e Misiona ʻInitia Pangikaloá ke ʻave ia ki he Kolosi Kula ʻa ʻInitiá.

ʻI he Kolosi Kulá, naʻe fakatokangaʻi ʻe he tangata naʻá ne talitali kinautolú honau pine hingoá. Naʻá ne pehē ange, “ʻOi, ko kimoutolu mei he Siasí. Ko e hā e meʻa naʻa mou omi mo iá?”

Naʻa nau tali ange ʻoku ʻi ai ʻenau ʻū maama, naunau haisini, mo ha ʻū vala lahi fakaʻulia. Naʻe fiefia ʻa e ʻōfisá ʻi he ngaahi foakí peá ne talaange ke nau fakaʻuli mai ʻa e ʻū lolí ki loto ki he falé.

Naʻe ʻi loto ha kakai ne nau tuʻu takai ʻi ha ʻū fokotuʻuna vala lahi. Naʻe fakahifo foki ʻe he kakai mei he ngaahi tui fakalotu mo e ngaahi kautaha kehekehe, ha ʻū naunau, pea naʻe laulau houa hono fakahifo ʻe he kau faifekaú ʻa e utá mei lolí pea fetuku ia ki he feituʻu naʻe fiemaʻu ke ʻave ki aí.

ʻI he vakai ʻa ʻEletā Kilipeti ki he kakai mei ha ngaahi kulupu kehekehé, naʻá ne ofo ʻi heʻenau ngāue fakataha koeʻuhi ko ʻenau ʻofa ki honau kaungāʻapí. Naʻá ne fakakaukau, “ʻOku ʻi ai ha kakai lelei ʻi he feituʻu kotoa pē.”