Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

ʻIkai Ha Kilisimasi ia He Taʻu Ni?

Fai ʻe James Nowa, ʻIutā, USA

ʻI heʻemau fehuʻi fekauʻaki mo e Kilisimasí, naʻe pehē ʻe he faʻeé ko ha taimi faingataʻa ʻeni pea ʻe ʻikai maʻu ʻe he fāmilí ha meʻa ki he Kilisimasí ʻi he taʻu ko iá.

ʻOku ou kei lava pē ʻo sioloto atu ki he ʻapí ʻi he ʻaho momoko mo ʻaoʻaofia ko ia ʻo Tīsemá ʻi ʻIlinoisi, USA. Naʻe ʻi ʻolunga hono ʻató ʻi he kelekelé, ka ko e konga lahi ʻo e falé naʻe ʻi lalo ia ʻi he kelekelé. Naʻá ku pehē mo hoku hoá, “Mahalo ʻoku ʻikai nofo ha taha ia ai.”

Naʻá ma tukituki. Hili ha ngaahi momeniti siʻi, naʻe fakaava siʻisiʻi hake ʻe ha fefine ʻa e matapaá. Naʻá ma talaange ko e ongo faifekau kimaua mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea ʻoku ʻi ai haʻama pōpoaki mahuʻinga maʻana. Naʻá ne kiʻi momou ka naʻá ne fakahū kimaua ki loto.

Naʻá ne kamo mai ke ma tangutu ʻi ha ongo sea papa ne homohomo hono fakamaʻú. Naʻe poipoila e maama ʻi he lokí. ʻI he faifai pea feangai hoku matá mo e māmá, naʻá ku fakatokangaʻi naʻe faliki kelekele pē ʻa e ʻapí. Naʻe ʻikai tautau ha ʻū tā ʻi he holisí. Fakafokifā pē kuo ʻasi mai ha fānau loto-mamahi ʻe toko fā naʻa nau tui ha vala kuo mole honau lanú.

Naʻe toe pē ha uike ʻe ua pea hoko ʻa e Kilisimasí. Naʻe ʻi fē nai ʻa e pēpē ko Sīsuú ʻi he ʻaiʻanga kai ʻo e manú? Ko e fē nai ʻa e ʻū meʻa-teuteu fakalanulanú mo e fuʻu ʻakau Kilisimasí?

Hili ʻema fakahoko ʻema pōpoaki fekauʻaki mo hono Fakafoki Mai ʻo e Ongoongoleleí, naʻe fakaafeʻi kimaua ʻe he faʻeé ke ma toki foki mai ʻo talanoa ki hono husepānití. Kimuʻa peá ma mavahé, naʻá ma fehuʻi fekauʻaki mo e Kilisimasí. Naʻá ne pehē ko ha taimi faingataʻa ʻeni pea he ʻikai maʻu ʻe he fāmilí ha meʻa ki he Kilisimasí ʻi he taʻu ko iá.

Hili ʻema mavahé, naʻá ku kole mo hoku hoá ki ha tokoni mei he kāingalotu ʻo e uōtí. Naʻe hoko mai ai ha ngāue maʻongoʻonga ʻo e ʻofá. Naʻe foaki ʻe he kāingalotú ha meʻakai, vala, meʻavaʻinga, mo ha fuʻu ʻakau Kilisimasi mo hono meʻa-teuteu.

Naʻá ma foki ki he ʻapí hili ha ngaahi ʻaho siʻi mei ai. Naʻá ma tukituki, pea naʻe toe fakaava siʻisiʻi hake pē ʻa e matapaá. Naʻá ma fakalea, “Kilisimasi Fiefia,” ʻi heʻema fakafeʻiloaki ki he tamaí, faʻeé, mo e fānau ʻe toko fa naʻa nau mataʻi ʻohovalé.

Naʻá ma hiki atu ʻa e fuʻu ʻakaú, ʻū meʻaʻofá, pea mo e meʻakaí ki he ʻapí. Naʻe ʻohovale ʻa e fāmilí. Naʻá ma fokotuʻu ʻa e fuʻu ʻakaú, tuku e ʻū meʻaʻofá ʻi lalo ai, hili ʻa e meʻakaí ʻi he tēpilé, peá ma fiefia ʻi heʻema kiʻi ʻaʻahi taimi nounoú. ʻI heʻema teuteu ke mavahé, naʻá ku sio ki he fānaú. Naʻa nau fofonga malimali kotoa.

Naʻe hokohoko atu ʻema akoʻi e fāmilí, pea naʻe faifai pē pea nau kau mai ki he Siasí. ʻI hono fakatupulaki ʻe he maama ʻo e ongoongoleleí ʻa honau fāmilí, naʻe maʻu ʻe he tamaí ha tui pea mo ha mahino foʻou maʻa hono fāmilí. Naʻá ne maʻu ha ngāue lelei ange. Naʻe fakaʻau ke vāofi ange ʻa e fāmilí. Naʻe ʻikai fuoloa kuo nau hiki ki ha ʻapi foʻou.

Hili ha taʻu ʻe 60 tupu mei ai, ʻoku ou kei fakafetaʻi pē ki he ʻEikí ʻi heʻene tuku kimaua ke ma tāpuakiʻi ha toko ono ʻo ʻEne fānau pelé, mo fakamanatu mai ai kiate au “ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).