“Ko e Tauʻatāina ke Fili ʻa Kalaisí,” Liahona, Tīsema 2024.
Kakai Lalahi Kei Talavoú
Ko e Tauʻatāina ke Fili ʻa Kalaisí
Naʻe hangē maʻu pē ʻa e tui fakalotú ko ha meʻa naʻá ne taʻofi au mei hono fai ʻeku ngaahi filí.
Fakaikiiki mei he Sometimes They Come (Te Nau Omi ʻi ha Taimi), fai ʻe Brian Kershisnik, ʻikai lava ʻo hiki hano tatau
ʻI heʻeku kei pēpeé, naʻe papitaiso au ki he Siasi Orthodox ʻo ʻIukuleiní. ʻI heʻeku tupu haké, naʻá ku taʻefiemālie ʻi he ʻikai ko ia ke u fai e fili ke papitaisó. Naʻe kamata ke u fakakaukau naʻe ʻikai fakaʻatā ʻe he tui fakalotú ke u tauʻatāina ke fili maʻaku.
Ko ia ne faifai pea ʻikai ke u toe tui ki he ʻOtuá pe ko ha faʻahinga meʻa fakalaumālie pē.
ʻI ha ʻaho ʻe taha, ne u talanoa ai mo hoku kaungāmeʻa naʻe ʻi Sēkia ke fakahoko ha polokalama ako naʻe fengāueʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne fakaafeʻi au ke u kau ki he polokalamá. Naʻe ʻikai ke u saiʻia ai ʻi he kamataʻangá, ka ʻi he hili ha kiʻi taimi mei ai, naʻá ku fakakaukau ke u vakaiʻi ia.
Naʻá ku saiʻia ʻi he pōpoaki fakalūkufua ki he leleí, ko ia naʻá ku tukulolo leva ʻo u tohi kole ke u hū.
Ka naʻe ʻikai ke u teitei tokanga ki he taumuʻa ʻa e polokalamá kia Sīsū Kalaisí.
Pe ko e anga pē ia ʻeku fakakaukaú.
Ongoʻi Fepakipaki
Naʻe ʻai ʻe he akoʻanga ko ʻení ke kehe ʻeku moʻuí mei he meʻa naʻá ku anga ki aí. ʻUluakí, naʻá ku ʻilo naʻe ʻikai ngofua ke u inu kofi ʻi ʻapiako!
Naʻá ku ongoʻi naʻe ʻosi kamata māmālie ke mole ʻeku tauʻatāiná.
ʻIkai ngata aí, naʻe kamata ʻa e pongipongi kotoa ʻaki ha fakataha lotu pau. Naʻá ku mohe ʻi he meimei fakataha kotoa pē koeʻuhí naʻe ʻikai ke u fie kau ki ai. Naʻá ku ʻi aí pē ke ako pea moʻui ʻi he founga ne u fiemaʻú.
Ka ʻi he hili ha kiʻi taimi siʻi, naʻá ku fakatokangaʻi naʻe fakamātoato ʻaupito ʻa e tokanga e kakai ne mau feohí ki he ngaahi akonaki ʻa Sīsū Kalaisí. ʻI ʻIukuleiní, naʻe tokolahi ha kakai naʻa nau ʻalu ki he lotú he taimi pē ʻe niʻihi, ka ʻi hení, naʻe talanoa maʻu pē ʻa e tokotaha kotoa fekauʻaki mo Kalaisi. Naʻa nau angaʻofa, angalelei, mo fakatuʻamelie fekauʻaki mo e moʻuí.
Naʻe kamata ke u fifili pe ʻe fēfē nai ʻeku moʻuí kapau te u tui foki mo au kiate Ia. Taimi ʻe niʻihi naʻá ku faʻa fakakaukau ai, “ʻE fēfē nai e fakakaukau ʻa Sīsuú?”
Naʻe Moʻoni Nai ʻEni?
Naʻá ku ongoʻi puputuʻu. Naʻá ku talanoa ki ha taha ʻo hoku ngaahi kaungāmeʻa ʻi he akó fekauʻaki mo ʻeku ongoʻi faingataʻaʻiá. Naʻá ne fakaafeʻi au ke u feinga ke lotua ʻeku ngaahi ongó.
ʻI ha pongipongi kakapu ʻe taha, naʻá ku fakakaukau ke kumi ha feituʻu lōngonoa ʻi tuʻa ke u fakalaulauloto ai. ʻOku ʻikai ke u ʻilo pe ko e hā e meʻa ne hoko kiate aú, ka naʻe ʻikai ke u fakalaulauloto, ka naʻá ku tuku ha faingamālie maʻá e ʻOtuá. Naʻá ku pehē, “Sai, ta talanoa angé.”
Pea naʻá ku fai e lotu lōloa taha ʻo ʻeku moʻuí.
Naʻá ku fie ʻilo pe ʻoku moʻoni nai ʻa e ʻOtuá mo Sīsū Kalaisi.
Lolotonga ʻeku lotú, naʻe hulu mai e laʻaá ʻi he kakapú. Naʻá ku ongoʻi hono māfaná ʻi hoku kilí mo ha māfana ʻi hoku lotó. Naʻá ku ongoʻi hangē naʻe hili mai ha nima ʻo ha taha ʻi hoku umá, ʻo talamai ʻokú Na ʻi ai tonu pē mo au.
Naʻe mahino ʻa e pōpoakí: ʻOkú Na moʻui. Naʻá Na ʻafioʻi au.
Naʻá ku toe fakatokangaʻi foki mo ha meʻa kehe.
ʻI heʻeku vakai ki he niʻihi naʻa nau moʻui ʻaki e ongoongolelei ʻo Sīsū Kalaisí, naʻe ʻikai ke u sio ki hano fakamālohiʻi ha taha ke ne fai ha ngaahi meʻa naʻe ʻikai ke ne loto ke fai pe ongoʻi ʻoku fakangatangata ia ʻe heʻene tuí. Naʻá ku mamata ki heʻenau fili ke moʻui hangē ko Sīsū Kalaisí koeʻuhí he naʻa nau loto ki ai.
Naʻe ʻomi ʻe he palōfita ko Molonaí ʻi he Tohi ʻa Molomoná ʻa ʻene palōmesí ʻo fakafou ʻi ha fakaafe kae ʻikai ko ha fekau: “Kapau te mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní” (Molonai 10:4).
Naʻá ku fakatokangaʻi naʻá ku loto foki mo au ke u fili Ia.
Tuʻunga Fakaākonga ʻikai Haohaoa
Talu mei ai mo ʻeku ako fakammātoato kau kia Sīsū Kalaisi. Naʻá ku tali ʻa e ngaahi lēsoni fakafaifekaú. Naʻá ku ako ʻa e Tohi ʻa Molomoná. Naʻá ku lotu ʻi he ʻaho kotoa pē. Naʻá ku papitaiso foki! (ʻI he taimi ko ʻení ko ʻeku fili pē ʻaʻaku!) Naʻe foʻou kotoa ʻeni kiate au, ka naʻá ku ongoʻi ha liliu ʻi hoku lotó.
ʻOku kei lahi pē e meʻa ke u akó, pea ʻoku ʻikai ke u haohaoa, ka ʻoku ou pehē maʻu pē kiate au, “Te u feinga pē ke hangē ko Kalaisí he ʻahó ni. Toutou feinga pē.”
Naʻe akonaki fakaʻofoʻofa ʻa ʻEletā Soakeni E. Kositā ʻo e Kau Fitungofulú ʻo pehē: “Taimi ʻe niʻihi, ʻoku hangē ʻa e tui kia Sīsū Kalaisí ha meʻa ʻoku taʻemalavá, ʻo meimei faingataʻa ke maʻu. Mahalo te tau fakakaukau ko e haʻu ko ia kia Kalaisí ʻoku fiemaʻu ki ai ha ivi, mālohi mo e haohaoa ʻoku ʻikai ke tau maʻu, pea ʻoku ʻikai pē ke tau maʻu ʻa e ivi ke fakahoko kotoa iá. Ka … ʻoku maʻu ʻa e ivi ke kamata ʻa e fonongá ʻi he tui kia Sīsū Kalaisí.”
ʻE lava ke liliu kitautolu ʻe Sīsū Kalaisi kapau te tau ʻoange kiate Ia ha faingamālie pea toutou feinga pē. ʻOku ʻikai ke Ne fakangatangata ʻetau tauʻatāiná. Ka, ʻokú Ne foaki mai ha meʻa lahi ange ʻo fakafou ʻi Heʻene Fakaleleí: fiefiá, fakamoʻuí, mo e ʻamanaki leleí.
ʻOku tau maʻu ʻa e tauʻatāina ke fili Ia ʻi he ʻaho kotoa pē, pea ʻoku ou houngaʻia ʻi he ngaahi mana ʻoku ʻomi ki heʻeku moʻuí, koeʻuhí ko ʻeku fili ke muimui kiate Iá.
Ko e tokotaha faʻutohí mei Kievi, ʻIukuleini.