“ʻI Heʻetau Hoko ko e Kakai Fefiné, ʻOku Tau ʻi ha Feohi Fakatokoua Fakaemāmani Lahi ʻOku ʻIkai Faʻa Lea ʻAki,” Liahona, Tīsema 2024.
ʻI Heʻetau Hoko ko e Kakai Fefiné, ʻOku Tau ʻi ha Feohi Fakatokoua Fakaemāmani Lahi ʻOku ʻIkai Faʻa Lea ʻAki
ʻOku ʻomi ʻe he Fineʻofá ha ngaahi founga ki hono fakahoko ʻaki ʻa e fekau ʻa Sīsū Kalaisi ke ʻofa ki hotau kaungāʻapí ʻo hangē pē ko kitautolú.
Tautehina ʻe Toko Tolu, tā ʻa Kathleen Peterson
Naʻe akoʻi mai ʻe Palesiteni Lāsolo M. Nalesoni kuo “tāpuekina e houʻeiki fafiné ʻaki ha kāpasa makehe ʻo e angamaʻá” pea ʻoku maʻu ʻe he houʻeiki fafiné ha “meʻafoaki fakalaumālie mo e ivi tākiekina makehe” ke ongoʻi ʻa e ngaahi fiemaʻu e faʻahinga ʻo e tangatá, ke fakafiemālieʻi, akoʻi, mo fakamālohiá. ʻOku fakafalala hotau tukui koló ki he kakai fefiné ke nau fakahoko honau ngaahi fatongia makehe ko e kau taki, kau faiako, kau tauhi, kau faifakamoʻui, mo e kau faʻa fakalelei.
ʻI heʻetau hoko ko e kakai fefiné, ʻoku tau ʻi ha feohi fakatokoua fakaemāmani lahi ʻoku ʻikai faʻa lea ʻaki. ʻOku fakafehokotaki kitautolu ʻe he ngaahi feliliuaki hotau sinó pea mo e fakaemāmani lahi ʻo e founga ʻo ʻetau fanafanau mo lehilehiʻi e fānaú taʻe te tau feleaʻaki, neongo e ngaahi fakangatangata mo e ʻā vahevahe ʻi he ʻulungāngá mo e lea fakafonuá.
Kuó u mātā e meʻa ʻoku lava ʻe he houʻeiki fafiné ʻo fai ʻi he taimi ʻoku nau fehokotaki ai mo e niʻihi kehé ʻi he feohi fakatokouá. Kuó u mātā hono hiki hake ʻe he houʻeiki fafiné kinautolu ʻi he lotolotongá ʻo e masivesivá. Kuó u mātā ha houʻeiki fafine kuo nau tokangaʻi, fafanga, mo tauhi ha fānau ʻoku ʻikai haʻanautolu. Kuó u mātā ha houʻeiki fafine kuo nau tuʻu ke maluʻi e niʻihi kehé mei he ngaahi haʻahaʻa ʻo e taú. Ko e taimi ʻoku fakahoko ai ʻe he Fineʻofá hono taumuʻá, ʻokú ne ʻomi ha ngaahi founga faingofua ke fakahoko ai e fekau ʻa Sīsū Kalaisi ke ʻofa ki hotau kaungāʻapí ʻo hangē pē ko kitautolú.
Hangē ko ʻení, ʻi he taʻu ʻe hongofulu kuohilí, lolotonga e faingataʻaʻia ʻa e kau kumi hūfanga ʻi ʻIulopé, naʻe foaki ai ʻe he kāingalotu ʻo e Siasí ʻa honau taimí, talēnití, mo e koloá ke tokoniʻi ha kakai tukuhausia ne nau ʻaukolo ki ʻIulope. Naʻe tokoni ʻenau ngaahi ngāué ke fakafiemālieʻi ʻa e ngaahi tūkunga faingataʻa ʻi he ngaahi ʻapitanga hikifonuá.
ʻI he ʻOtu Filipainí, naʻe hohaʻa ʻa e houʻeiki fafine ʻo e Siasí fekauʻaki mo e fakautuutu e fasimanava ʻi honau tukui koló mo e founga naʻá ne uesia ai honau fāmilí. Naʻa nau ako lahi ange fekauʻaki mo e ngaahi tupuʻanga angamaheni taha ʻo e fasimanavá mo hono ngaahi nunuʻa fakamamahi ki he toenga ʻo e moʻuí. Naʻe fakalele ʻe he Fineʻofa ʻa e uōtí mo e siteikí ha ngaahi ako ki he meʻakai moʻui leleí ʻi he ngaahi fale ʻo e Siasí maʻá e ngaahi fāmili ʻo e kāingalotú mo honau kaungāʻapí pea akoʻi ʻa e ngaahi mātuʻá fekauʻaki mo e maʻu meʻatokoni leleí. Naʻa nau fakafetuʻutaki ʻa e niʻihi ne faingataʻaʻiá ki he ngaahi tokoni fakafaitoʻo fakalotofonuá mo e ngaahi tokoni fakakolo ʻoku nau lava ʻo fai ha faitoʻó.
Naʻe hoko mai e ivi tākiekina ʻo e kau fafine ko ʻení ʻi heʻenau ngāue maʻá e lelei ʻo e ngaahi fāmili ʻi honau tukui koló. ʻOku kei hokohoko atu pē hono fai e ngāue mahuʻinga mo ʻaonga taha ʻa e houʻeiki fafiné kiate kitautolú: ʻi he taimi ʻoku tau tokangaʻi ai ʻetau fānaú, akoʻi ha kaungāmeʻa ke laukonga, tokangaʻi ʻi he faʻa kātaki e ngaahi fiemaʻu ʻa ha kaungāʻapi toulekeleka, teuteu ha meʻatokoni maʻá e mahakí, pe tangi mo ha fefine ʻoku loto-mamahi.
ʻOku ou feinga ke hoko ko ha ākonga ʻa Sīsū Kalaisi pea muimui ki Heʻene sīpingá ʻi hono tokoniʻi e niʻihi kehé. Ko ʻEne haʻisia fakaʻaho ke tokoniʻi taha taha maʻu pē ki he niʻihi ʻoku mamahí: ʻi he talanoa fakataautaha ʻi he vaitupú mo e fefine Samēlia ne liʻekina ʻi he sōsaietí (vakai, Sione 4); tuku ha kiʻi taimi ke fakafiemālieʻi ʻa e fefine ʻau toto ʻi he uhouhonga ʻo e kakaí (vakai, Luke 8:43–48); fakamoʻui ʻi he lilo ʻa e ʻofefine kei siʻi ʻo Sailosí (vakai, Luke 8:51–55).
Neongo ʻoku kau ʻi heʻeku ngāue lolotongá ʻa e ngaahi ngāue ke fakaleleiʻi ʻa e ngaahi tuʻunga maʻá e houʻeiki fafine mo e fānau ʻi he funga ʻo e māmaní, ka ʻoku ou ʻiloʻi ko e fiemaʻu mahuʻinga taha ʻa Kalaisi maʻaku ʻi heʻeku hoko ko ʻEne ākongá, ke fakatokangaʻi ʻa e ngaahi fiemaʻu ʻa e niʻihi fakafoʻituitui ʻoku mau feohí pea fakafōtunga ʻi he faʻa kātaki mo e ʻofa.
He ʻikai lava ke aʻu ʻa e ngaahi kautahá ki he tokotaha kotoa pē ʻi he māmaní, ʻo tatau ai pē pe ko e hā e lahi hono fakapaʻanga ʻenau ngaahi polokalamá, faʻu lelei ʻenau ngaahi tuʻutuʻuní, pe maau ʻaupito ʻenau fokotuʻutuʻu fakavahaʻapuleʻangá. Ka ʻi heʻetau feohi fakatokoua fakaemāmani lahí, te tau lava ai ʻo aʻu ki he tokotaha kotoa pē.
Ko e moʻui ʻo hai te ke lava ʻo fakaleleiʻi ʻi he ʻahó ni ʻaki ha ngāue manavaʻofá? ʻOku ou tapou atu ke mou kiʻi tuʻu hifo ʻo fetuʻutaki mo ʻetau Tamai Hēvaní, ʻa e maʻuʻanga ueʻi fakalaumālie māʻolunga tahá, pea tatali fakalongolongo ki ha fakahinohino mei he Laumālie Māʻoniʻoní. ʻOku ou fakaafeʻi kimoutolu ke mou hiki ia pea fai ia. ʻOku ou fakatauange ʻe tokoni atu ʻa e kiʻi ngāue faingofua ko iá ke ke fakatokangaʻi ko ʻetau lavameʻa lahi tahá ʻe hoko ia ʻi heʻetau fakaʻaongaʻi ʻa e mālohi ʻo ʻetau feohi fakatokoua fakaemāmani lahí.