Disyembre

Ang mga Kasulatan Nagtudlo Kanako kabahin sa Pagkatawo sa Manluluwas ug sa Ikaduhang Pag-anhi

“Kay uban sa kahimayaan sa iyang Amahan moanhi ang Anak sa Tawo uban sa iyang mga manolunda; ug unya pagabalusan niya ang matag-usa sa tumbas sa iyang mga binuhatan” (Mateo 16:27).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang mga propeta nanagna kabahin sa pagkatawo ni Jesukristo.

Awhaga ang pagsabut niini: Bahina ang mga bata ngadto sa lima ka grupo. Hatagi ang matag grupo og usa sa mosunod nga mga kasulatan ug pipila ka mga props o yano nga costume nga magrepresentar sa tukma nga propeta: Isaias 7:14; 9:6 (Isaias); 1 Nephi 11:14–21 (Nephi); Mosiah 3:5, 8 (Haring Benjamin); Alma 7:9–10 (Alma); Helaman 14:2–6 (Samuel). Dapita ang matag grupo sa pagbasa ug sa paghisgot kon unsa ang gisulti sa propeta mahitungod sa pagkatawo ni Kristo. Ipagamit sa usa ka bata gikan sa matag grupo ang mga props o costume sa pagrepresentar sa propeta ug sultihi ang ubang mga bata kon si kinsa nga propeta ang iyang girepresentahan ug sa pagbasa o sa pagsaysay kon unsa ang gisulti niana nga propeta mahitungod sa pagkatawo ni Jesus. Kantaha ang “He Sent His Son” (CS, 34–35) o “Samuel Tells of the Baby Jesus” (CS, 36).

Mga kasulatan: Ang pagbasa gikan gayud sa mga kasulatan makatabang sa mga bata nga mobati og komportable sa mga pinulongan sa kasulatan. Siguroha ang pagpasabut sa lisud nga mga pulong o mga ideya. (Tan-awa sa PWLMT, 50–51.)

Semana 2: Si Jesukristo natawo.

Awhaga ang pagsabut niini: Manganta og dungan sa unang bersikulo sa “The Nativity Song” (CS, 52–53). Bahina ang mga bata ngadto sa upat ka grupo, ug i-assign ang matag grupo og usa sa nahibilin nga mga bersikulo (2–5). Hangyoa ang mga bata sa pag-drawing og mga litrato nga mohaum sa ilang bersikulo. Kantaha ang tibuok nga kanta, ug ipaisa sa mga bata ang ilang mga litrato kon moabut na sa ilang parte sa kanta.

Pahibalo: Ang Manluluwas kinahanglang dili ihulagway sa mga bata sa usa ka pag-drama gawas sa eksena sa pagkatawo.

Semana 3: Si Jesukristo mobalik sa yuta sa umaabut nga adlaw.

Ipaila ang doktrina: Isulat ang matag usa sa mosunod nga mga hugpong sa pulong diha sa ginagmay nga ginunting nga mga pulong: Kay uban sa, kahimayaan sa, Iyang Amahan, moanhi ang, Anak sa Tawo. (Ang ginunting nga mga pulong anaa sa sharingtime.lds.org.) Ipakita ang ginunting nga mga pulong nga dili magsunod diha sa pisara, ug dapita ang mga bata sa pagtabang kanimo sa pagporma og balik niini. (Mahimo kang maghimo og pipila ka set sa ginunting nga mga pulong ug patrabahoa ang mga bata nga magdungan nga maggrupo.) Kon ang mga bata nakaporma na sa hugpong sa mga pulong sa husto nga pagkahan-ay, ipasuta nila ang ilang tubag pinaagi sa pagbasa sa Mateo 16:27.

Awhaga ang pagsabut niini: Paghangyo og upat ka bata sa pag-adto sa atubangan sa kwarto ug pagpaisa og mga litrato ni Samuel nga Lamanite, sa pagkatawo ni Jesus, si Jesus nga nagtudlo, ug ang Ikaduhang Pag-anhi. Hisguti ang matag litrato kauban sa mga bata. Hangyoa ang mga bata nga naggunit sa mga litrato sa pagbarug nga dili magsunod. Dapita ang Primary sa pagsulti ngadto sa mga bata kon asa mobalhin aron ang mga litrato magsunod ang pagkahan-ay

Ang Paggamit og mga litrato o uban pang mga biswal makatabang sa mga bata nga makapahiluna og baruganan o doktrina sa usa ka imahe diha sa ilang hunahuna, nga makadugang sa ilang abilidad sa panabut ug mahinumdom kon unsa ang ilang mga nakat-unan.

Ang mga painting anaa sa sharingtime.lds.org

Awhaga ang paggamit niini: Paghimo og linya sa tunga sa pisara padulong sa ubos. Sa ibabaw sa pisara isulat ang “Si Jesukristo sa umaabut nga adlaw mobalik dinhi sa yuta.” Sa katunga sa pisara isulat ang mosunod nga mga pangutana. Sa lain nga katunga isulat ang mga pakisayran sa kasulatan bisan asa

• Unsa ang ubang mga kahibulongan nga mahitabo sa pag-anhi ni Kristo pag-usab? (Joseph Smith—Mateo 1:33, 36–37)

• Kanus-a man moanhi og balik ang Manluluwas? (Joseph Smith—Mateo 1:38–40)

• Nganong kinahanglan man kitang mangandam sa Ikaduhang Pag-anhi? (D&P 38:30)

• Unsa ka dugay magpuyo ang Manluluwas sa yuta? (D&P 29:11).

Hangyoa ang mga bata sa pagbuhat kauban sa ilang mga magtutudlo aron pagtugma sa mga pangutana ngadto sa mga tubag. Hisguti ang mga tubag. (Tan-awa usab sa Matinud-anon sa Tinuhoan [2004], 161–63.) Pangutan-a ang mga bata kon unsaon nila sa pagpangandam alang sa Ikaduhang Pag-anhi.

Nagkalain-laing mga edad: Planoha ang inyong mga panahon sa pagpakigbahin sa pagpaapil sa mga mas magulang ug mas manghod nga mga bata (tan-awa sa PWLMT, 110–17). Sama pananglit, ang ikaduhang kalihokan sa semana 3 mas maayo alang sa mas manghod nga mga bata tungod kay naggamit kini og mga litrato sa pagtudlo og yano nga mga konsepto. Alang sa unang kalihokan nianang semanaha, mahimo nimong hangyoon ang mas magulang nga mga bata sa pagtabang sa mas manghod nga mga bata sa pagporma og balik sa ginunting nga mga pulong.

Semana 4: Aron maandam alang sa Ikaduhang Pag-anhi, ako mosunod ni Jesukristo.

Awhaga ang pagsabut niini: Sutihi ang mga bata nga si Jesus sa kasagaran nagtudlo gamit ang sambingay, nga naggamit og pamilyar nga mga butang ug mga sitwasyon sa pagtudlo og mga espirituhanong kamatuoran. Sa daklit isaysay ang istorya sa napulo ka dalagang birhen (tan-awa sa Mateo 25:1–13; tan-awa usab sa “Ang Sambingay sa Napulo ka mga Birhen,” Ensign, Mar. 2009, 48–49). Ipasabut nga kini nga sambingay nagtandi sa Ikaduhang Pag-anhi ni Jesukristo ngadto sa usa ka kasal. Dapita ang pipila ka mga bata sa pag-drama sa sambingay. Hangyoa ang mga bata kinsa nagdula sa bahin sa maalamon nga mga birhen kon unsay bation sa pagkasayud nga sila andam, ug hisguti ang kaimportante sa pagpangandam alang sa pag-anhi og usab sa Manluluwas.

Awhaga ang paggamit niini: Pag-drawing og lampara sa pisara. Hisguti kon sa unsang paagi nga ang pagsunod ni Jesukristo pinaagi sa pagbuhat sa maayong mga butang matag adlaw susama sa pagbutang og lana sa atong mga lampara. Ingna ang mga bata sa pagngalan og pipila ka pamaagi nga sila makasunod ni Jesukristo, sama sa pagserbisyo sa uban, pagbayad sa ikapulo, ug sa pag-ampo. Ipasabut nga kini mao ang mga butang nga kinahanglan nilang buhaton nga sila lamang, ang ubang tawo dili makahimo sa pagbuhat niining mga butanga alang kanila. Hatagi ang matag bata og piraso nga papel nga gigunting nga porma og dako nga tinulo sa lana. Hangyoa sila (o ang ilang mga magtutudlo) sa pagsulat og “Sa pag-andam alang sa Ikaduhang pag-anhi, ako mosunod ni Jesukristo pinaagi sa ” diha sa ilang mga papel. Ingna ang mga bata sa pagsulat diha sa mga blanko o sa pag-drawing og litrato mahitungod sa pipila ka butang nga ilang mahimo sa pag-andam alang sa Ikaduhang Pag-anhi. Awhaga ang mga bata sa pagdala sa ilang mga papel sa pagpauli ug ipakigbahin ang ilang mga nakat-unan ngadto sa ilang mga pamilya.

Ang lampara ug ang tinulo sa lana anaa sa sharingtime.lds.org

Sa pagpangandam alang sa Ikaduhang Pag-anhi, ako mosunod nii Jesukristo pinaagi sa