Pebrero

Ang mga Kasulatan Nagtudlo sa Plano sa Langitnong Amahan

Kanta: “I Will Follow God’s Plan”

(CS, 164–65)

Kay tan-awa, “mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang Langitnong Amahan adunay plano alang kanako.

Ipaila ang doktrina: Ipakita ngadto sa mga bata ang litrato sa usa ka balay. Ipasabut nga ang mga tigtukod nagkinahanglan og plano sa dili pa nila sugdan ang pagtukod sa balay. Pangutan-a, “Nganong importante man ang paghimo ug pagsunod sa mga plano?” Guniti pataas ang mga kasulatan, ug sultihi ang mga bata nga kita makakita sa plano sa Langitnong Amahan alang kanato diha sa mga kasulatan. Isulat sa pisara “Ang Langitnong Amahan adunay plano alang kanako.” Basaha og dungan ang han-ay sa mga pulong.

Awhaga ang pagsabut niini: Isulat ang mosunod nga mga pangutana sa pisara:

• Kinsa ako?

• Diin ako gikan?

• Nganong ania ako dinhi?

• Unsa ang mahitabo kanako human ako mamatay?

Hatagi ang matag bata og usa ka piraso nga papel nga gisulatan og: kinsa, asa, ngano o unsa. Basaha og dungan ang unang pangutana nga anaa sa pisara, ug hangyoa ang tanang bata nga naggunit sa pulong nga kinsa sa pagbarug. Kantaha ang “I Am a Child of God” (CS, 2–3), ug hangyoa ang mga bata nga nagbarug kon unsaon nila sa pagtubag ang pangutana. Balika kini uban sa matag pangutana, nga maggamit sa mosunod nga mga kanta: asa: “I Lived in Heaven” (CS, 4); ngano: “I Will Follow God’s Plan” (CS, 164–65); unsa: “Did Jesus Really Live Again?” (CS, 64) Ipamatuod nga ang plano sa Langitnong Amahan maghatag kanato og kalipay.

Paglig-on sa ilang pagsabut: Kon ang mga bata makigbahin unsa ang ilang nakat-unan sa Primary ngadto sa uban, kini naglig-on sa ilang pagsabut ug pagpamatuod sa doktrina. Hunahunaa ang paghatag kanila og mga oportunidad sa pagbuhat niini diha sa klase, ug dasiga sila sa pagpaambit sa ilang nakat-unan sa panimalay.

Semana 2: Si Jesukristo ang milalang sa yuta alang kanako.

Awhaga ang pagsabut niini: Paghimo og mga ideya nga makapaukyab sa hunahuna sa mga bata sa mga butang nga ilang gipanghimo nga adunay pagkahan-ay alang kanila, sama sa paghigot sa liston sa sapatos o pag-andam alang sa pagkatulog. Ipasabut nga diha sa mga kasulatan atong nakat-unan nga si Jesus ang naglalang sa yuta sa piho nga pagkahan-ay. Bahina ang mga bata ngadto sa unom ka grupo ug hatagi ang matag grupo og pakisayran sa kasulatan nga naghulagway sa usa ka adlaw sa Paglalang (tan-awa sa Moises 2). Hangyoa ang matag grupo sa pag-drawing og mga litrato sa ilang adlaw. Ingna sila nga ipakita ang ilang mga litrato ngadto sa ubang mga bata ug mosulti kanila kon unsa ang gilalang nianang adlawa. Dapita ang mga bata sa pagbutang sa mga litrato sa husto nga pagkahan-ay diha sa pisara.

Awhaga ang paggamit niini: Pangutan-a ang mga bata, “Unsa ang usa ka butang nga gilalang ni Jesus nga importante alang kaninyo?” Hatagi ang matag bata og gamay nga minasa nga inasinang harina (tan-awa sa PWLMT, 165, alang sa resipe sa minasa nga inasinang harina ). Ipagamit sa mga bata ang minasa nga harina aron sa paghimo og butang nga importante kanila. (Kon walay minasa nga inasinang harina, ang mga bata mahimo ra hinoon nga mag-drawing og litrato niini.) Ipakigbahin sa mga bata diha sa mga grupo sa ilang klase kon unsa ang ilang gihimo og gi-drawing ug ngano nga importante kini alang kanila. Kantaha ang “My Heavenly Father Loves Me” (CS, 228–29).

Pagpamatuod: Ang mubo nga pagpamatuod makadapit sa Espiritu sa bisan unsa nga panahon atol sa leksyon. Mahimo nga yano kini sama sa pag-ingon, “Nasayud ako nga nga ang plano sa Langitnong Amahan mohatag kanamo og kalipay,” o mahimo nga usa kini ka pormal nga pagpamatuod nga naglakip og pinulongan sama sa “Gusto ko nga mopaambit sa akong pagpamatuod.” (Tan-awa sa PWLMT, 43–44.)

Semana 3: Ang mga Pamilya mao ang sentro sa plano sa Langitnong Amahan.

Ipaila ang doktrina: Isulat ang mosunod diha sa pisara: “Ang mga pamilya mao ang sentro sa plano sa Langitnong Amahan.” Hisguti kon unsay gipasabut niini nga han-ay sa mga pulong. Papasa ang han-ay sa mga pulong. Isulti ang nag-unang duha ka pulong, ug ipasulti kini pagbalik sa mga bata. Dayon isulti ang nag-unang upat ka mga pulong, ug ipasulti kini pagbalik sa mga bata. Padayon hangtud nga masulti og balik sa mga bata ang tibuok nga han-ay sa mga pulong.

Awhaga ang pagsabut niini: Hangyoa og una ang pipila ka mga bata sa pagrepresentar og mga pamilya gikan sa mga kasulatan. Pag-andam og pipila ka mga timailhan mahitungod sa matag pamilya (sama pananglit, si Adan ug si Eva: “Ang among pamilya mao ang unang pamilya sa yuta”; si Abraham ug Sarah: “Tigulang na kaayo kami una kami nakaanak”; ug si Lehi ug Sariah: “Among gitabok ang kadagatan aron makaabut sa gisaad nga yuta”), ug ihatag kini nga mga timailhan ngadto sa mga bata. Sangkapi og yano nga mga costume, kon mahimo. Hangyoa ang mga bata kinsa nagrepresentar sa anaa sa kasulatan nga mga pamilya sa pag-adto sa atubangan sa kwarto, usa ka grupo ra sa usa ka higayon. Ipabasa nila ang ilang mga timailhan ug ipatag-an sa laing mga bata sa Primary kon si kinsa ang ilang girepresentahan. Human mailhan ang matag pamilya, ipakita sa mga bata kon asa nila makat-unan ang mahitungod niini nga mga pamilya diha sa mga kasulatan. Sultihi ang mga bata kon giunsa sa matag pamilya sa pagsunod sa plano sa Langitnong Amahan alang kanila.

Awhaga ang paggamit niini: Hangyoa ang mga bata sa paghunahuna sa maayong mga kalidad nga anaa sa ilang mga pamilya. Dapita sila sa pagpakigbahin niini nga mga kalidad ngadto sa usag-usa sa grupo o sa tibuok Primary.

Ipahiangay ang mga kalihokan sa edad sa mga bata sa imong Primary (tan-awa sa PWLMT, 110–17). Sama pananglit, sa ikaduha nga kalihokan sa semana 3, ang mas magulang nga mga bata mahimong mangutana sa mga grupo og mga pangutana nga matubag og oo o dili kay sa pagpamati og mga timailhan mahitungod sa anaa sa mga kasulatan nga mga pamilya nga ilang girepresentahan.

Semana 4: Ako mosunod sa plano sa Dios.

Awhaga ang pagsabut niini: Pagpakita og pipila ka liso o gagmayng bato ug usa ka basiyo nga garapon nga may gi-drawing nga mapahiyumon nga nawong. Sultihi ang mga bata nga ang plano sa Langitnong Amahan naghatag kanato og kagawasan sa pagpili sa husto og sa sayop. Ipasabut nga ang maayong mga pagpili modala ngadto sa kagawasan ug kalipay, samtang ang dili maayong mga pagpili modala ngadto sa pagkaulipon ug kasub-anan (tan-awa sa 2 Nephi 2:27). Pangutan-a ang mga bata, “Unsa nga mga kasugoan ang inyong gituman samtang gisunod ninyo ang plano sa Dios?” Hatagi og liso ang matag bata nga nakatubag sa pangutana. Isulat ang ilang mga tubag sa pisara. Hangyoa ang matag bata nga adunay liso sa pagpaambit kon sa unsang paagi nga ang pagsunod sa mga kasugoan nga iyang gisulti modala ngadto sa kalipay. Dayon ipabutang sa bata ang iyang liso sulod sa garapon. Ipamatuod nga kita mopuno og kalipay sa atong kinabuhi kon pilion nato ang pagsunod sa plano sa Dios.

Ang bandera anaa sa sharingtime.lds.org

Ako mosunod sa plano sa Dios pinaagi sa:

Awhaga ang paggamit niini: Pag-andam og lapad nga piraso sa papel nga porma og bandera alang sa matag klase. Isulat diha sa matag bandera ang “Ako mosunod sa plano sa Dios pinaagi sa …” Ipasabut nga ang plano sa Langitnong Amahan naghatag kanato og kagawasan sa pagpili tali sa husto ug sa sayop, ug kon unsa man ang atong gipili sa matag adlaw importante alang sa atong kalipay. Patrabahoa nga magtinabangay ang tibuok klase sa pag-drawing o pagsulat diha sa ilang bandera sa mga butang nga ilang mahimo sa pagsunod sa plano sa Langitnong Amahan, ug dapita sila sa pagsulat sa ilang mga pangalan. Hangyoa ang matag klase sa pagpakigbahin kon unsa ang ilang gi-drawing o gisulat diha sa ilang bandera. Pamartsaha ang mga bata tuyok sa kwarto samtang naggunit sa ilang mga bandera ug manganta sa “I Will Be Valiant” (CS, 162). Ipakita ang mga bandera diha sa Primary room.

Hatagi og pagtagad ang enerhiya sa mga bata pinaagi sa tukma nga paglihok aron padayong aktibo sa ilang pag-apil.

Malipayon nga panagway anaa sa sharingtime.lds.org