Titema
Te haapii mai nei te mau papa‘iraa mo‘a ia’u no ni‘a i te fanauraa e i te Tae-piti-raa mai o te Faaora
« E tae mai hoi te Tamaiti a te taata ma tana ra mau melahi atoa, e te hanahana o to’na ra Metua, ei reira oia e faautua mai ai i te taata atoa ia au i ta’na ra ohipa » (Mataio 16:27).
A faananea i te mau mana‘o i horo‘ahia i ô nei ma te horo‘a’tu i to outou iho mana‘o. A faanahonaho i te mau rave‘a no te faaite i te haapiiraa tumu i te mau tamarii e a tauturu ia ratou ia taa maitai i te reira e ia faaohipa i te reira i roto i to ratou oraraa. A ui ia outou iho, « Eaha râ ïa ta te mau tamarii e rave no te haapii mai, e nahea vau i te tauturu ia ratou ia farii i te Varua ? »
Hepetoma 1 : Ua tohu te mau peropheta i te fanauraa o Iesu Mesia.
Tauturu ia taa maitai : A vahi te mau tamarii e pae pŭpŭ. A horo‘a i te pŭpŭ tata‘itahi i te mau papa‘iraa mo‘a i muri nei e te tahi mau tauhaa e aore râ hoê ahu ohie noa no te faahoho‘a i te peropheta e tano : Isaia 7:14 ; 9:6 (Isaia) ; 1 Nephi 11:14–21 (Nephi) ; Mosia 3:5, 8 (Arii Beniamina) ; Alama 7:9–10 (Alama) ; Helamana 14:2–6 (Samuela). A ani i te pŭpŭ tata‘itahi ia tai‘o e ia aparau eaha ta te peropheta i parau no ni‘a i te fanauraa o te Mesia. A ani i te hoê tamarii o te pŭpŭ tata‘itahi ia faaohipa i te mau tauhaa e aore râ te ahu no te faahoho‘a i te peropheta e ia parau i te tahi atu mau tamarii o vai te peropheta ta’na e faahoho‘a ra e ia tai‘o e aore râ ia parau eaha ta taua peropheta ra i parau no ni‘a i te fanauraa o Iesu. A himene « Il envoya son fils aime » (CPE, 20–21) e aore râ « Samuel a parle de l’enfant Jesus » (L’ami, Decembre 1992 api, A7).
Hepetoma 2 : Ua fanauhia Iesu Mesia.
Tauturu ia taa maitai : A himene amui i te irava matamua o te « C’est l’heureux temps » (CPE, 32–33). A vahi te mau tamarii i roto e maha pŭpŭ, e a horo‘a i te pŭpŭ tata‘itahi hoê o te mau irava e toe ra (2–5). A ani i te mau tamarii ia papa‘i hoho‘a no te faahoho‘a i ta ratou irava. A himene i te taatoaraa o te himene, e a ani i te mau tamarii ia afa‘i i ta ratou hoho‘a i ni‘a a tae ai ratou i ta ratou tuhaa himene.
Hepetoma 3 : E ho‘i faahou mai Iesu Mesia i te fenua nei i te hoê mahana.
A faaite i te haapiiraa tumu : A papa‘i oi te mau irava i muri nei i ni‘a i te mau api parau na‘ina‘i : E tae mai, hoi te Tamaiti, a te taata e, te hanahana, o to’na ra, Metua. (E roaa te mau api parau i ni‘a sharingtime.lds.org.) A tapiri i ni‘a i te tapura ereere te mau api parau na te mau vahi atoa, e ia ani i te mau tamarii ia tauturu ia outou ia ana‘i maitai te reira. (E nehenehe outou e faarahi te mau api parau e ia vahi i te mau tamarii ia ohipa amui i roto i te mau pŭpŭ). Ia ana‘i maitai ana‘e te mau tamarii i te mau irava, a ani ia ratou ia hi‘o i ta ratou pahonoraa na roto i te tai‘oraa Mataio 16:27.
Tauturu ia taa maitai : A ani e maha tamarii ia haere mai i mua i te piha e ia tape‘a i te mau hoho‘a o Samuela te Ati Lamana, te fanauraa o Iesu, Iesu e haapii ra, e te Tae-piti-raa mai. A aparau e te mau tamarii i te hoho‘a tata‘itahi. A ani i te mau tamarii e tape‘araa i te hoho‘a ia ti‘a na roto e rau huru ana‘iraa. A ani i te Paraimere ia parau i te mau tamarii i hea ratou e vai ai, ia nehenehe te mau hoho‘a ia ana‘ihia mai te au i te tuatapaparaa.
E tauturu te faaohiparaa i te mau hoho‘a e aore râ i te tahi atu mau tauhaa hi‘o i te mau tamarii ia tuati i te hoê parau tumu e aore râ i te hoê haapiiraa tumu i te hoê hoho‘a i roto i to ratou varua, no te faarahi atu â i to ratou ite ia taa maitai e ia haamana‘o noa i te mea o ta ratou i haapii mai.
E roaa te mau hoho‘a peni i ni‘a sharingtime.lds.org
Tauturu no te faaohiparaa : A reni i te hoê reni mai ni‘a haere ti‘a’tu i raro i ropu i te tapura ereere. I ni‘a roa i te tapura ereere a papa‘i « E ho‘i faahou mai Iesu Mesia i te fenua nei i te hoê mahana ». I ni‘a i te hoê afaraa o te tapura ereere a papa‘i i te mau uiraa i muri nei. I ni‘a i te tahi afaraa a papa‘i i te mau faahororaa o te papa‘iraa mo‘a na roto e rau huru ana‘iraa.
-
Eaha te mau ohipa maere e tupu ia ho‘i faahou ana‘e mai te Mesia ? (Iosepha Semita—Mataio 1:33, 36–37)
-
A hea te Faaora e ho‘i faahou mai ai ? (Iosepha Semita—Mataio 1:38–40)
-
No te aha e mea ti‘a ia tatou ia faaineine no te Tae-piti-raa mai ? PH&PF 38:30
-
E hia maororaa te Faaora e faaea ai i te fenua nei ? (PH&PF 29:11).
A ani i te mau tamarii ia ohipa e to ratou orometua no te faatano i te mau uiraa i te mau pahonoraa. A aparau amui i te mau pahonoraa. (A hi‘o atoa Mau Maite i te Faaroo [2004], 159–61.) A ani i te mau tamarii nahea ratou ia faaineine no te Tae-piti-raa mai.
Hepetoma 4 : No te faaineine i te Tae-piti-raa mai, e pee au ia Iesu Mesia.
Tauturu ia taa maitai : A parau i te mau tamarii e ua haapii pinepine noa Iesu na roto i te mau parabole, te faaohiparaa i te mau tauhaa e te mau huru oraraa matauhia no te haapii i te mau parau mau pae varua. A faati‘a poto noa i te aamu o na ahuru paretenia (a hi‘o Mataio 25:1–13 ; a hi‘o atoa « Te parobole o na ahuru aratenia » Ensign, Mati 2009, 48–49). A faataa e ua faaauhia teie parabole i te Tae-piti-raa mai o te Iesu Mesia i te hoê faaipoiporaa. A ani i te tahi mau tamarii ia hauti hoho‘a mai te parabole. A ani i te mau tamarii tei hauti i te tuhaa o te mau paretenia paari eaha ta ratou i farii i te iteraa e ua ineine ratou, e a aparau i te faufaa mau no te faaineineraa no te ho‘i-faahou-raa mai o te Faaora.
Tauturu no te faaohiparaa : A papa‘i hoho‘a i te hoê lamepa i ni‘a i te tapura ereere. A aparau e te peeraa ia Iesu Mesia na roto i te raveraa i te mau mea maitai i te mau mahana atoa e au mai te tuuraa i te hinu i roto i ta tatou lamepa. A ani i te mau tamarii ia faahiti mai te tahi mau rave‘a e nehenehe ai ratou e pee ia Iesu Mesia, mai te taviniraa ia vetahi ê, te aufauraa i te tuhaa ahuru, e te pureraa. A faataa e mea ti‘a ia ravehia teie mau mea e te taata tata‘itahi ; eita te tahi atu taata e nehenehe e rave i teie mau mea no ratou. A horo‘a i te tamarii tata‘itahi i te hoê api parau mai te hoho‘a o te hoê topata hinu rarahi. A ani ia ratou (e aore râ i to ratou orometua) ia papa‘i « No te faaineine i te Tae-piti-raa mai, e pee au ia Iesu Mesia na roto » i ni‘a i ta ratou api parau. A ani i te mau tamarii ia faaî i te mau vahi uouo e aore râ ia papa‘i hoho‘a i te mea ta ratou e nehenehe e rave no te faaineine i te Tae-piti-raa mai. A faaitoito i te mau tamarii ia faaho‘i i ta ratou api parau i te fare e ia faaite eaha ta ratou i haapii mai i to ratou utuafare.
E roaa te lamepa e te topata hinu i ni‘a sharingtime.lds.org
No te faaineine i te Tae-piti-raa mai, e pee au ia Iesu Mesia.