Tiunu
E horo‘a mai te mau parau tumu matamua e te mau oro‘a matamua o te Evanelia ia’u te rave‘a ia ora faahou i piha‘iho i te Atua
Himene ta outou i ma‘iti no roto mai i te Chants pour les enfants.
« Te ti‘aturi nei matou e, o teie te mau parau tumu matamua e te mau oro‘a matamua o te evanelia, te matamua ra, o te faaroo ïa i te Fatu ra ia Iesu Mesia ; te piti ra, o te Tatarahaparaa ïa ; te toru ra, o te bapetizo-utuhi-raa ïa ia matara te hara ; te maha ra, o te tuuraa Rima ïa no te horo‘araa a te Varua Maitai » (Te Mau Hiroa Faaroo 1:4).
A faananea i te mau mana‘o i horo‘ahia i ô nei ma te horo‘a’tu i to outou iho mana‘o. A faanahonaho i te mau rave‘a no te faaite i te haapiiraa tumu i te mau tamarii e a tauturu ia ratou ia taa maitai i te reira e ia faaohipa i te reira i roto i to ratou oraraa. A ui ia outou iho, « Eaha râ ïa ta te mau tamarii e rave no te haapii mai, e nahea vau i te tauturu ia ratou ia farii i te Varua ? »
Hepetoma 1 : E arata‘i te faaroo ia Iesu Mesia ia tatou ia here Ia’na, ia ti‘aturi Ia’na e ia haapa‘o i Ta’na mau faaueraa.
A faaite i te haapiiraa tumu e a tauturu ia taa maitai : A papa‘i « e arata‘i te faaroo ia Iesu Mesia ia tatou ia here Ia’na, ia ti‘aturi Ia’na e ia haapa‘o i Ta’na mau faaueraa » i ni‘a i te tapura ereere. A faaite i te mau tamarii i te tahi mau huero. A ui : « Eaha te mea e riro mai no teie mau huero ? » « Nahea outou e ite ai e e tupu teie mau huero ? » « Eaha ta tatou e ti‘a ia rave no te faatupuraa i te reira ? » A faataa e to tatou faaroo ia Iesu Mesia, mai te hoê huero ïa, e nehenehe e tupu rahi mai mai te mea e atuatu tatou i te reira. A aparau i te mau mea ta tatou e nehenehe e rave no te tauturu i to tatou faaroo ia tupu rahi, e ia faataa nahea teie mau mea e arata‘i ia tatou ia here e ia ti‘aturi ia Iesu Mesia e ia haapa‘o i Ta’na mau faaueraa. Himene « La foi » (CPE, 50–51). A aparima ohie noa no te irava matamua.
E roaa te hoho‘a i ni‘a sharingtime.lds.org
Hepetoma 2 : E hopoi mai te tatarahapa i te faaoreraa hara.
A faaite i te haapiiraa tumu : A ani i te mau tamarii ia iriti i ta ratou papa‘iraa mo‘a e ia tai‘o Te Parau Haapiiraa e te Mau Parau Fafau 58:42–43. A ani ia ratou ia faaite mai eaha te tupu ia tatarahapa ana‘e tatou i ta tatou mau hara. (Mai te mea e nehenehe, a ani i te mau tamarii ia tapa‘o i teie mau irava i roto i ta ratou papa‘iraa mo‘a) A parau poto noa i te mau tamarii no ni‘a ia Enosa (a hi‘o Enosa 1:1–4), e a ani i te hoê tamarii ia tai‘o Enosa 1:5–8. A faaite papû e na roto i te Taraehara a te Mesia e nehenehe ta tatou mau hara e faaorehia.
Tauturu ia taa maitai : A faataa e te feia o tei tatarahapa e o tei farii i te faaoreraa no ta ratou mau hara e hiaai ratou i te tavini i te Atua. A vahi te mau tamarii i roto e toru pŭpŭ, e a horo‘a i te pŭpŭ tata‘itahi hoê o te mau hoho‘a i muri nei e te mau faahororaa papa‘iraa mo‘a : Alama e bapetizo ra i roto i te pape no Moromona (Mosia 17:2–4 ; 18:1–17) ; Iona (Iona 1–3) ; te mau ati nephi lehi e huna ra i ta ratou ‘o‘e (Alama 23:4–18 ; 24:6–19). A faataa e teie mau aamu e parau ïa no te mau taata o tei tatarahapa i ta ratou mau hara e o tei tavini i te Fatu. A ani i te pŭpŭ tata‘itahi ia hi‘o faahou i te mau papa‘iraa mo‘a e ia faaineine e ia hauti mai i te hoê ti‘araa o te faaite mai nahea teie mau taata i te tatarahaparaa e i muri iho i te taviniraa i te Fatu (na roto i te haapiiraa i te evanelia, te taviniraa i te hoê misioni, e te hinaaro-ore-raa e tama‘i).
Hepetoma 3 : Ia bapetizohia vau, e rave au i te hoê fafauraa i te Atua.
Tauturu ia taa maitai : A ani i te hoê tamarii ia haere mai i mua i te piha e ia faatoro i to’na na rima i mua. I muri iho a tuu hoê buka i ni‘a i te rima tata‘itahi. A tai‘o Mosia 18:7–11. A faataa e te hoê o te mau fafauraa ta tatou e rave ia bapetizohia tatou « ia tauturu te tahi i te tahi i te hopoi i ta outou mau hopoi‘a, ia mâmâ te reira ». A ani i te tamarii e amo ra i te mau buka e ua paruparu anei to’na na rima. A ani e piti atu na tamarii ia tauturu ma te patururaa i to’na na rima. A aparau i te tahi mau hopoi‘a ta te mau tamarii e farii nei, mai te faaoooraa, ia ma‘ihia, te otahiraa, e aore râ te fariiraa i te mau fifi i te fare haapiiraa. A ani i te mau tamarii nahea ratou ia haamâmâ i te hopoi‘a te tahi i te tahi
Te faaohiparaa i te mau tamarii i roto i te faahi‘oraa e faatupu mai ïa i te anaanatae ia ratou e e faaineineraa ia ratou ia haapii mai. Ei hi‘oraa, te faaite ra teie ohiparaa i te mau tamarii i te haapiiraa no te amoraa i te hopoi‘a te tahi e te tahi.
Tauturu i te faaohiparaa : A parau i te mau tamarii e te bapetizoraa o te opani ïa e arata‘i i te e‘a no te ora mure ore (a hi‘o 2 Nephi 31:17). I te hoê pae o te piha a tuu i te hoê hoho‘a o te hoê tamarii e bapetizohia ra. I te tahi atu pae o te piha a tuu i te hoê hoho‘a o te Faaora, e a faataa e i roto i teie ohiparaa e faahoho‘a teie hoho‘a i te ora mure ore. A parau i te mau tamarii e vai noa tatou i ni‘a i te e‘a o te ora mure ore ia haapa‘o ana‘e tatou i ta tatou mau fafauraa no te bapetizoraa. A hi‘o poto faahou i teie mau fafauraa (haamana‘oraa ia Iesu Mesia, haapa‘oraa i te mau faaueraa, e te tautururaa ia vetahi ê) A horo‘a i te tamarii tata‘itahi i te hoho‘a o te paruru MTM A ani i te mau tamarii ia papa‘i i ni‘a i ta ratou hoho‘a hoê faaueraa o te tauturu ia ratou ia haapa‘o i ta ratou fafauraa no te bapetizoraa (e nehenehe ratou e papa‘i hoho‘a no te faahoho‘a i te faaueraa ta ratou i ma‘iti) A ani i te hoê tamarii ia tuu i ta’na hoho‘a i ni’a te tahua i ropu i na hoho‘a e piti. Mai te mea e nehenehe, a tauturu i te mau tamarii ia imi i te faaueraa i roto i ta ratou papa‘iraa mo‘a e ia tai‘o amui te reira. A tapiti faahou e tae roa ua hamani te mau tamarii i te hoê e‘a i ropu i na hoho‘a.
E roaa te tumu parau i ni‘a sharingtime.lds.org
Hepetoma 4 : E tamahanahana e e arata‘i te Varua Maitai ia’u.
Tauturu ia taa maitai : A tapŭpŭ te mau tamarii, e a horo‘a i te pŭpŭ tata‘itahi te hoê api parau e te mau papa‘iraa mo‘a i muri nei :
-
« Oia mau, oia mau, te parau atu nei au ia oe e, e tuu atu vau i ta to’u nei Varua ia oe na, o te haamaramarama mai i to oe feruriraa, o te faaî hoi i to oe aau » (PH&PF 11:13).
-
« Ua tae ana‘e outou i taua e‘a ra [te bapetizoraa], e farii hoi i te Varua Maitai, na te reira ia outou i te mau mea atoa ta outou e rave » (2 Nephi 32:5).
-
« Na te Faaa‘o râ, na te Varua Maitai ra… e mai ia outou i te mau mea atoa, e e faaite faahou mai hoi ia outou ta’u i parau atu ia outou na » (Ioane 14:26).
-
« A faatae atu i to oe ti‘aturiraa i te reira Varua o te faaarata‘i atu ia rave —oia ïa, ia rave i te parau-ti‘a, ia haere noa ma te haehaa, ia ; o te reira hoi to’u Varua » (PH&PF 11:12).
-
« E na roto i te mana o te Varua Maitai e ite ai outou i te mau mea atoa ra » (Moroni 10:5).
A ani i te mau tamarii ia imi i te mau papa‘iraa mo‘a e ia faaî te mau vahi uouo. I muri iho ia aparau ia ratou eaha ta teie mau papa‘iraa mo‘a e haapii mai nei e mea nahea te Varua Maitai ia tauturu ia tatou. A ani ia ratou ia faaite mai i te mau iteraa a tauturuhia ai ratou e te Varua Maitai.
Tauturu i te faaohiparaa : A parau i te mau tamarii e tauturu te Varua Maitai ia tatou na roto e rave rahi mau rave‘a. A himene « Le Saint Esprit » (CPE, 56). A ani i te mau tamarii ia afa‘i to ratou rima i ni‘a ia himene ana‘e ratou no ni‘a i te hoê rave‘a ta te Varua Maitai e tauturu ia ratou. A tape‘a te himene e a aparau eaha ta ratou i haapii mai no ni‘a i te Varua Maitai. A tamau i te himeneraa e i te aparauraa A faaite i te hoê taime a tamahanahana ai e aore râ a arata‘i ai te Varua Maitai ia outou.
E roaa te api parau i ni‘a sharingtime.lds.org