Te mau Arata‘iraa no te Taime Faaanaanataeraa e te Faanahoraa a te Mau Tamarii i te Pureraa Oro‘a
E te mau peresideniraa paraimere e te mau arata‘i himene e,
Te mau papa‘iraa mo‘a o te parau ïa a te Atua. Mai te mea e tai‘o outou i te mau papa‘iraa mo‘a ma te tauturuhia e te pure e ia faaohipa outou i te mau parau tumu i haapiihia i roto i te papa‘iraa mo‘a e i roto i teie faanahoraa, e faaineinehia outou i te pae varua no te haapii i te evanelia a Iesu Mesia i te mau tamarii i roto i ta outou Paraimere. E ite atoa outou i te faaohipa i te mau papa‘iraa mo‘a no te tauturu i te mau tamarii ia taa maitai i te parau tumu o te evanelia ta outou e haapii i teie matahiti, mai te faanahoraa a te Metua i te Ao ra, te misioni a Iesu Mesia, te ti‘araa o te mau peropheta, te faati‘a-raa-hia te Ekalesia, e te mau haamaitairaa o te hiero. E tauturu te mau papa‘iraa mo‘a ia outou ia ani manihini i te Varua i roto i te Paraimere e ia hamani i te hoê vahi i reira te mau tamarii e farii ai i te faaururaa o te Varua Maitai. E tauturu te reira faaururaa i te mau tamarii tata‘itahi o te Paraimere ia parau e. « Ua ite au e parau mau te mau papa‘iraa mo‘a »
Mauuruuru no ta outou taviniraa haapa‘o maitai. Te pure nei matou no outou e te ti‘aturi nei i roto i to outou paari no te here i te mau tamarii e ia haapii ia ratou i te evanelia a Iesu Mesia.
Te Peresideniraa Rahi no te Paraimere
Te mau arata‘iraa no te Taime Faaanaanataeraa
Haapiiraa Evanelia
A faaohipa i teie buka iti a faainene ai outou i te haapii i te hoê haapiiraa e 15 minuti i te hepetoma i roto i te taime faaanaanataeraa. E nehenehe ta outou e faaohipa i te tahi atu mau materia a te Ekalesia i roto i ta outou mau haapiiraa i te hepetoma, mai te Friend aore râ te Liahona. E tauturu te mau arata‘iraa i muri nei ia outou ia faaineine e ia horo‘a i te haapiiraa.
A here i te feia ta outou e haapii ra. A faaite i to outou here i te mau tamarii na roto i te tamauraa i to ratou mau i‘oa e ia haapa‘o i te mau mea ta ratou e au, ta ratou mau taleni, e to ratou mau hinaaro.
A Haapii i te Parau Tumu no te Evanelia na roto i te Varua. A faaineine ai outou i te mau haapiiraa, a pure ia arata‘ihia outou e a tutava ia haapuaihia to outou iteraa papû no te mau parau tumu ta outou e haapii atu. E tauturu te reira ia outou ia haapii na roto i te Varua.
A ani i te haapii mai Ua faaineinehia teie buka iti no te tauturu ia outou ia ite eiaha noa te mea e haapii atu e nahea atoa râ ia haapii atu e ia titau i te haapiiraa mai. E haapii outou ma te manuïa rahi a rave ai outou i teie mau mea e toru i muri nei i roto i te mau haapiiraa tata‘itahi :
-
A faaite i te haapiiraa tumu. Ma te maramarama maitai a faaite i te parau tumu ta te mau tamarii e haapii mai. A faaohipa i te mau rave‘a no te haapii i te reira na roto i te parauraa e te hi‘oraa. (No te tahi atu â mau hi‘oraa, a hi‘o i te mau haapiiraa no te hepetoma matamua no te ava‘e Mati e te hepetoma matamua no te ava‘e Tiurai)
-
A faaohie i te taa-maitai-raa. A haapapû e ua taa maitai i te mau tamarii te parau tumu na roto i te faaohiparaa i te mau rave‘a rau no te haapiiraa no te faaitoito ia ratou ia haapii, mai te himeneraa i te mau himene, te ha‘utiraa taata ora, e i te tai‘oraa i te mau papa‘iraa mo‘a.
-
A faaohie i te faaohiparaa. A horo‘a i te mau tamarii te mau rave‘a no te faaohipa i te parau tumu i roto i to ratou oraraa. A feruri e nahea ratou e nehenehe ai ia faaite i to ratou mau mana‘o aore râ ia faatupu i te hoê fâ e tano i te parau tumu.
Tei roto i teie buka iti te taato‘araa o te mau haapiiraa no te tahi mau hepetoma i roto i te matahiti. Te vai atoa ra te mau mana‘o, eiaha ra te taato‘araa o te mau haapiiraa, no te tahi atu mau hepetoma. A faananea i taua mau mana‘o ra ma te faaohipa atoa i to outou iho. E nehenehe e noaa mai te mau mana‘o na roto i te tai‘oraa i te tahi atu mau haapiiraa i roto i teie buka iti. I te pae no te sabati, a faaohipa i teie taime no te hi‘opo‘a-faahou-raa i te mau haapiiraa i ma‘iri. E nehenehe ta te Varua e arata‘i ia outou a faanahonaho e a faaineine ai outou i te mau haapiiraa.
A faaineine ai outou i ta outou mau haapiira a rave amui e te arata‘i himene. E tauturu te himeneraa i te mau himene ia haapapûraa i te mau parau tumu o ta outou e haapii atu. I te tahi mau taime e nehenehe ta outou e titau i te mau orometua e ta ratou mau piha ia tauturu ia outou i roto i te tahi mau tuhaa o te haapiiraa evanelia.
E titau te tahi o te mau haapiiraa i te mau taata ia haere mai i roto i te Paraimere. E ti‘a roa ia outou ia farii i te parau faati‘a no ô mai i to outou episekopo ra e aore râ i te peresideni amaa hou a titau ai i teie mau taata ia haere mai.
E apeehia te mau haapiiraa e rave rahi mau rave‘a no te haapiiraa o te tauturu ia outou ia haamaitai a‘e â i to outou aravihi no te haapii. Te vai atoa ra te mau hoho‘a i roto i te mau haapiiraa o te tauturu ia outou ia ite i te huru o te haapiiraa. Noa’tu e mea faufaa te faananearaa i te mau aravihi no te haapii, na te faaineineraa ia outou iho i te pae varua e te iteraa papû e titau i te Varua no te haapapû i teie mau parau tumu i roto i te aau o te mau tamarii.
Te taime no te himeneraa
E ti‘a i te pehe i roto i te Paraimere ia faatupu i te hoê huru tura, ia haapii i te evanelia, e ia tauturu i te mau tamarii ia ite i te mana o te Varua maitai e te oaoa e noaa mai na roto i te himeneraa. Ia horo‘ahia e 20 minuti i roto i te tatuhaaraa i te taime faaanaanataeraa no te himene e te haapiiraa i te pehe. E haapapû te reira e e nava‘i te taime no te haapii i te pehe apî e no te tauturu i te mau tamarii ia oaoa i te himeneraa
Te vai ra te hoê himene apî na te mau tamarii no te haapii i teie matahiti (a hi‘o api 28). Te vai atoa ra te hoê tuhaa « Nahea ia faaohipa i te Pehe i roto i te Paraimere » (a hi‘o te mau api 26–27) e te tahi atu â mau mana‘o no te haapiiraa i te mau himene i te mau tamarii (a hi‘o api 7).
Te mau Arata‘iraa no te Faanahoraa a te mau Tamarii i te Pureraa Oro‘a
I raro a‘e i te faatereraa a te episekopo aore râ a te peresideni amaa, e horo‘ahia te faanahoraa a te mau tamarii i te pureraa oro‘a i roto i na ava‘e hopea e toru o te matahiti. A farerei i te omuaraa o te matahiti i te tauturu o te episekoporaa aore râ o te peresideniraa amaa e haapa‘o nei i te Paraimere no te aparau no ni‘a i te faanahonahoraa matamua. A titau ia noaa mai te parau faati‘a no ô mai ia’na ra ia oti anae te mau faanahonahoraa.
A faanaho ia horo‘a te mau tamarii i te faanahoraa o te niuhia i ni‘a i te mau parau tumu o te taime faanaanataeraa i te mau ava‘e atoa. I roto i te roaraa o te matahiti, a papa‘i i te mau a‘oraa a te mau tamarii e te mau mea ta ratou i ite no te faaohipa paha i roto i te faanahoraa. A faanaho ai outou i te mau mea ta te mau tamarii e faaite o ta ratou i haapii mai no ni‘a i te parau tumu no teie matahiti, a feruri i te mau rave‘a ta ratou e nehenehe ai e tauturu i te amuiraa ia faatumu i ni‘a i te parau tumu o te evanelia ta ratou e haapii ra. E nehenehe i te hoê melo o te episekoporaa e faaoti i te pureraa na roto i te hoê mana‘o poto noa.
A faaineine ai outou i te faanahoraa, a haamana‘o i te mau arata‘iraa i muri nei :
-
Eiaha roa te mau haapiipiiraa ia faaere faufaa ore noa i te mau tamarii i ta ratou mau piha haapiiraa e i te mau utuafare.
-
Eita e ti‘a ia faaohipahia te mau hoho‘a, te mau ahu taa ê, e te faanahoraa no te ve‘a i roto i te pureraa oro‘a.
Te mau himene e faaohipahia i roto i te faaiteiteraa e nehenehe e himenehia e te hoê pŭpŭ rahi e aore râ na‘ina‘i, e te hoê taata e aore râ e piti taata, na te hoê utuafare e aore râ na roto i te mauhaa pehe taura. Ia papû e ua ite maitai te mau tamarii i te mau parau e e nehenehe e himene ma te aau.
Te mau rave‘a i faaohipahia i roto i teie buka iti
E faaohipahia te haapotoraa parau i muri nei i roto i te buka iti :
-
(CPE, 56)Chants pour les enfants
-
HAPTTe Haapiiraa, Aita e Piiraa Teitei A‘e
E rave rahi mau haapiiraa e vai ra i roto te mau mana‘o no te faaohiparaa i te mau hoho‘a. E itehia te mau hoho‘a i roto i te Buka no te mau hoho‘a no te evanelia, te Vairaa no te mau hoho‘a no te evanelia, te pute hoho‘a o te buka haapiiraa na te Paraimere, e te Mau Ve‘a a te Ekalesia e i ni‘a i te Itenati images.lds.org.
Te mau haapiiraa no te matahiti 2016
Te mau haapiiraa atoa
Piha Haapa‘oraa tamarii : A hi‘o na i ta outou mau tamarii rii ; Te mau hihi mahana : Paraimere 1 ; Ma‘iti i te Maitai 4–7 : Paraimere 2 ; Aau itoito 8–11 : Paraimere 4
Te haapiiraa tumu
Te mau hihi mahana : Paraimere 1 ; Ma‘iti i te Maitai 4–7 : Paraimere 2 ; Aau itoito 8–11 : Paraimere 4