Eperera
Te Haapii mai nei Iesu Mesia Ia’u ia Ma‘iti i te Maitai
« Ua horo‘a’tu na hoi au i te haapa‘oraa na outou, o ta’u i rave iho ia outou nei, ia na reira atoa hoi outou » (Ioane 13:15).
Himene : A ma‘iti i te hoê himene no ni‘a ia Iesu Mesia, i roto i te Chants pour les enfants
A faananea i te mau mana‘o i horo‘ahia i ônei ma te horo‘a’tu i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia outou iho, « eaha ta te mau tamarii e rave no te haapii mai, e nahea e nehenehe ai ia’u i te tauturu ia ratou ia farii i te Varua ? »
Hepetoma 1 : O Iesu Mesia to’u hi‘oraa maitai a‘e.
Tauturu ia taa maitai (tai‘oraa i te mau papa‘iraa mo‘a e te papa‘i-hoho‘a-raa) : A papa‘i i ni‘a i te hoê api parau rahi i te parau ra, « O Iesu Mesia to’u hi‘oraa maitai a‘e ». A tapu i te api parau i roto e maha tuhaa. A papa‘i i te hoê o te mau parau i muri nei i ni‘a i te tua o te tuhaa tata‘itahi :
-
Ua faaite mai Oia ia tatou i te huru no te bapetizoraa (a hi‘o Mataio 3:13–17).
-
Ua faaite Oia i te here no vetahi ê (a hi‘o Mareko 10:13–16).
-
Ua faaore Oia i te hapa a te feia tei hamani ino Ia’na (a hi‘o Luka 23:34).
-
Ua faaite mai Oia ia tatou nahea ia pure (a hi‘o Mataio 6:5–13).
Ia haapii ana‘e outou i te mau parau tumu o te evanelia, a tauturu i te mau tamarii ia imi i te mau rave‘a no te faaohipa i te reira mau parau tumu i roto i to ratou oraraa.
A himene « Jesus-Christ est mon modele » (CPE, 40–41). A ani i te mau tamarii ia faaite mai eaha ta te himene e haapii mai nei. A faaite i te hoê hoho‘a o te Mesia, e a parau i te mau tamarii e, ua haapii mai Oia ia tatou e rave rahi mau mea na roto i To’na hi‘oraa maitai a‘e. A vahi te mau tamarii i roto e maha pŭpŭ, e a horo‘a i te pŭpŭ tata‘itahi hoê tuhaa o te api parau, e i te tahi mau api parau uouo. A ani ia ratou ia tai‘o amui i te irava e ia papa‘i i te hoê hoho‘a no te faaiteraa e, nahea e ti‘a ai ia ratou ia pee i te hi‘oraa o te Mesia. A ani i te pŭpŭ tata‘itahi ia faataa mai i ta ratou irava e ta ratou hoho‘a, e ia tuu i ta ratou tuhaa api parau i ni‘a i te tapura ereere. Ia oti te mau tuhaa atoa i ta tahoêhia, a faahiti amui, « O Iesu Mesia to’u hi‘oraa maitai a‘e ».
Hepetoma 2 e te 3 : Ua haapii mai Iesu Mesia ia’u i te rave‘a ti‘a no te ora.
A faaite i te haapiiraa tumu (himeneraa) : Himene « Choisir le bien » (CPE, 82–83), e a ani i te afaraa o te mau tamarii ia faaroo e nahea tatou e oaoa ai, e i te tahi atu afaraa, ia faaroo e, eaha te mea e tauturu ia tatou e e faaite ia tatou i te e‘a. A aparau eaha te mau tamarii i haapii mai no roto mai i te himene.
Tauturu ia taa maitai (ha‘utiraa e te tai‘oraa i te papa‘iraa mo‘a) : A faaineine i te mau api parau e vai ra te mau ta‘o e te mau faahororaa o te mau papap‘iraa mo‘a i muri nei : tei po‘ia (Mataio 5:6) ; anaana (Mataio 5:16) ; here (Mataio 5:44) ; e pure (Mataio 6:6). Faaite i te hoê hoho‘a no te A‘oraa i ni‘a i te Mou‘a. A haamaramarama e, ua haere atu ra Iesu i ni‘a i te hoê mou‘a no te haapii i Ta’na mau pĭpĭ ; te mau mea Ta’na i haapii atu, ua piihia te reira, Te A‘oraa i ni‘a i te Mou‘a. A faaite i te hoê o te mau api parau i te afaraa o te mau tamarii, e a ani ia ratou ia aparima mai i te mau parau i ni‘a i te api parau, e na te tahi atu mau tamarii e imi i te reira. A tai‘o amui i te irava e au i te reira, e a tauturu i te mau tamarii ia haroaroa i te mea ta te Mesia i haapii e nahea e ti‘a ai ia tatou ia pee i To’na hi‘oraa. A na reira faahou no te tahi atu mau parau e mau papa‘iraa mo‘a.
E roaa te mau api parau i ni‘a sharingtime.lds.org
Tauturu no te faaohiparaa (aparauraa i te huru oraraa) : I ni‘a e maha api parau a papa‘i i te mau haapiiraa a Iesu i muri nei : (1) Te poia e te poiha o te parau-ti‘a, (2) Ia anaana to outou maramarama, (3) Here i to outou enemi, (4) Pure i te Metua i te Ao ra. (A faaohipa i te mau hoho‘a no te faahoho‘a i teie mau haapiiraa no te mau tamarii apî), A tuu i te mau api parau i tera e tera vahi o te piha. A faaineine i te mau huru oraraa (a hi‘o HAPT, 161–62) o te tauturu i te mau tamarii ia haroaroa nahea ia faaohipa i te reira mau haapiiraa. Ei hi‘oraa, « Te vai ra hoê taata e faaoo nei ia outou i te fare haapiiraa e ma te pii ia outou i te mau i‘oa rau. Eaha ta outou e rave ? » A hi‘o faahou i te mau papa‘iraa mo‘a i roto i te ha‘uti tuu piri tei faaitehia i ni‘a nei, e a faaite e, te mau api parau i tuuhia na roto i te piha, e mau api parau ïa e tuati i te mau papa‘iraa mo‘a. A tai‘o i te hoê huru oraraa i te mau tamarii, e a ani ia ratou ia ti‘a e ia hi‘o i te api parau o te haapiiraa o te tauturu ia ratou ia ma‘iti i te maitai. A ani i te tahi mau tamarii ia faaite mai eaha te ma‘itiraa ta ratou i rave.
Hepetoma 4 : E ite au i te here o to’u Faaora ia tamata ana‘e au ia riro mai ia Iesu Mesia ra.
Tauturu ia taa maitai (himeneraa e te ma‘itiraaa) : A himene « Je ressens son amour » (CPE, 42–43). A papa‘i e rave rahi mau huru oraraa o te faaite mai nahea e ti‘a ai i te hoê tamarii ia pee i te hoê o te mau haapiiraa a te Mesia. A faaô atoa i te hoê faahororaa papa‘iraa mo‘a i reira e itehia ai taua haapiiraa ra. Teie te tahi mau hi‘oraa i raro nei.
Ua ani o Sara i to’na tuahine teina eiaha e rave i ta’na mau peni tara, tera râ, aita to’na tuahine teina i faaroo. No te riro mai ia Iesu, e nehenehe ta Sara :
-
E riri i to’na tuahine teina.
-
E tahuna i ta’na mau peni tara.
-
E faaore i te hapa a to’na tuahine teina.
Te tu‘e ra o John i te popo e to’na mau hoa, e ua ite atu oia i te tahi tamaiti te ti‘a noa ra o’na ana‘e a hi‘o noa ai i te ha‘utiraa. No te riro mai ia Iesu te huru, e nehenehe o John :
-
E faaooo i te reira tamaiti no te mea o oia ana‘e i to’na vahi.
-
E tau‘a ore i te reira tamaiti e e tamau noa i te ha‘uti e to’na mau hoa.
-
E ani i te reira tamaiti ia haere mai e tu‘e i te popo e o ratou.
A ani i te hoê tamarii ia tai‘o i te hoê o te mau huru oraraa. I muri iho a ani ia’na ia tai‘o hoê hoê i te mau pahonoraa. A ani i te tahi atu mau tamarii ia ti‘a ia faaroo ana‘e ratou i te pahonoraa o te pee i te hi‘oraa o Iesu. A ani i te tahi mau tamarii ia tai‘o haapuai i te irava, e ia aparau i te mea ta Iesu i haapii. A aparau e nahea te peeraa i te hi‘oraa o Iesu i roto i teie mau huru oraraa e nehenehe e tauturu ia tatou ia ite i te here o te Faaora. A tapiti faahou no te huru oraraa tata‘itahi.
A ani i te mau tamarii ia tai‘o puai i te mau papa‘iraa mo‘a. E mea ti‘a ia outou ia ite i te aravihi o te tamarii tata‘itahi, e ia tauturu ia ratou tata‘itahi ia amui mai i roto i te ohiparaa.
Tauturu no te faaohiparaa : A ani i te mau tamarii ia rave i te mea ta Iesu e hinaaro ia rave ratou i teie hepetoma. A parau ia ratou e, i teie hepetoma i mua e ani outou i te tahi pae o ratou ia faaite mai i te mau mea ta ratou i rave, e mai te aha te huru to ratou iteraa i te here o te Faaora.
Te mau tauturu na te arata‘i himene
No te tauturu i te mau tamarii ia haapii i te hoê himene apî, a feruri i teie i muri nei :
-
A ani i te mau tamarii ia faaite mai ia himene ana‘e ratou i te hoê ta‘o taa ê e aore râ, ia tai‘o i ni‘a i to ratou manimani rima ehia taime ratou i te himeneraa i te hoê ta‘o. Ei hi‘oraa, a himene« Il envoya son fils aime » (CPE, 20–21), e a ani ia ratou ia tai‘o i ni‘a i to ratou mau manimani rima ehia taime to ratou himeneraa i na ta‘o ra, « son fils ».
-
A ma‘iti i te hoê hoho‘a e i te hoê ta‘o o te faahoho‘a i te pereota tata‘itahi i roto i te hoê himene, e a tuu i te reira i ni‘a i te hoê api parau. Ei hi‘oraa, ia himene ana‘e outou e, « Il envoya son Fils aimé » (CPE, 20–21), a faahoho‘a i te pereota ra « Comment le Père a-t-il donné son amour, sa tendresse ? » e te hoê hoho‘a o te mafatu e te ta‘o ra marû. No te parau ra, « Il envoya son premier ne, l’enfant de la promesse », a faaite i te hoê hoho‘a no te fanauraa o Iesu e te ta‘o ra hau. E nehenehe outou e faaohipa i te tamarii ma te ani ia ratou ia tape‘a i te mau hoho‘a a himene noa ai ratou.