Me
E Ma‘iti au i te Maitai ia Bapetizohia vau e ia Haamauhia ei Melo no te Ekalesia
« E tatarahapa, e ia bapetizohia outou atoa i roto i te i‘oa o Iesu Mesia ia matara te hara, e horo‘ahia mai ïa te Varua Maitai ia outou » (Te Ohipa 2:38).
A himene : « Le jour de mon baptême »
(CPE, 53)
A faananea i te mau mana‘o i horo‘ahia i ônei ma te horo‘a’tu i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia outou iho, « eaha ta te mau tamarii e rave no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1 : Mai te mea e tatarahapa vau, e faaorehia ta’u hapa.
Tauturu ia taa maitai (amuiraa mai i roto te haapiiraa tao‘a) : A horo‘a i te hoê ofa‘i na‘ina‘i i te tamarii tata‘itahi. A ani i te mau tamarii ia tuu i te ofa‘i i roto i to ratou tiaa, e a ani ia ratou ia ti‘a e ia haere. A ani i te mau tamarii e aha te huru ia haere e te ofa‘i i roto i to ratou tiaa. A ani ia ratou e mea nahea te hara e riro ai mai te ofa‘i te huru. (E ere i te mea maitai ; eita tatou e oaoa), A ani ia ratou ia tatara i te ofa‘i, e a ani e nahea te tatarahapa e te fariiraa i te faaoreraa hara a te Metua i te Ao ra e riro ai mai te iritiraa i te ofa‘i i rapae i to tatou tiaa. A faataa e, na roto ia Iesu Mesia, e nehenehe tatou e tatarahapa e e farii i te faaoreraa i ta tatou mau hara. A faaite papû e, te tatarahapa o te hoê ïa haamaitairaa faahiahia roa no ô mai i te Metua i te Ao ra ra, e e horo‘a mai te reira i te oaoa ia tatou.
Hepetoma 2 : Ia bapetizohia vau e ia haamauhia, te pee ra ïa vau i te hi‘oraa o Iesu.
Tauturu ia taa maitai (ha‘utiraa mana‘o e te tai‘oraa i te papa‘iraa mo‘a) : A tapiri i te hoho‘a no Ioane Bapetizo te bapetizo ra ia Iesu, e te hoê hoho‘a o te hoê tamarii e bapetizohia ra. A vaiiho i te mau tamarii ia hi‘o i te mau hoho‘a e 20 tetoni te maoro. I muri iho, a tapo‘i i te mau hoho‘a e a ani i te mau tamarii ia faaite mai ia outou i te mau mea tei aifaito i roto i na hoho‘a e piti. E nehenehe outou e papa‘i i ta ratou mau pahonoraa i ni‘a i te tapura ereere.
A ani i te mau tamarii ia tai‘o Te Parau Haapiiraa e te Mau Parau Fafau 20:72–74 no te ite e, o vai te nehenehe e bapetizo i te hoê taata, e e mea nahea te raveraa i te bapetizoraa. A ani i te mau tamarii ia faaite mai i te mau mea tei itehia ia ratou. A haapapû e, te taata e rave i te bapetizoraa, e mea ti‘a ia’na ia mau i te mana autahu‘araa, e te taata e bapetizohia ra, e mea ti‘a ia’na ia utuhihia, e aore râ, ia tomo hope roa i raro i te pape. A faaite faahou i na hoho‘a. A faaite e, ua bapetizohia o Iesu e te tamarii, na roto i te utuhiraa, e te hoê taata tei mau i te mana autahu‘araa.
Tauturu no te faaohiparaa (faaûraa e te himeneraa) : A nene‘i i te api 111 o te buka no te piha haapa‘oraa tamarii, A Hi‘o na i ta Outou mau Tamarii rii, na te tamarii tata‘itahi no te faaûraa. A himene « Baptême » (CPE, 54–55), e a faaitoito i te mau tamarii ia bapetizo ia ratou mai ia Iesu i bapetizohia. A ani i te hoê tamarii no bapetizo-noa-hia a‘e nei, ia faaite i te tahi atu mau tamarii no ni‘a i to’na bapetizo-raa-hia.
E roaa te buka haapiiraa no te piha haapa‘oraa tamarii i ni‘a sharingtime.lds.org
Hepetoma 3 : E nehenehe te Varua Maitai e tauturu ia’u.
A faaite i te haapiiraa tumu (hi‘oraa i te haapiiraa tao‘a) : A ani i te hoê tamarii ia ti‘a i piha‘iho i te opani. A tapo‘i i te mata o te reira tamarii, e a ani ia’na ia tamata i te imi i to’na parahiraa ma te tauturu-ore-hia, e ia parahi. A tapiti faahou te ohiparaa, tera râ, i teie taime, a ani i te tahi atu tamarii ia arata‘i i te tamarii tei tapo‘ihia te mata, na roto i te tape‘araa i to’na rima e te arata‘iraa ia’na. A aparau e te mau tamarii no te aha e mea ohie a‘e no te tamarii ia ite i to’na parahiraa i te piti o te taime. A faataa e, e nehenehe te Varua Maitai e tauturu ia tatou na roto i te horo‘araa mai i te arata‘iraa i roto i to tatou oraraa. A ani i te mau tamarii ia parau e, « e nehenehe te Varua Maitai e tauturu ia’u ».
Te faaohiparaa i te mau tamarii i roto i te mau faaiteiteraa hi‘o, e apo mai te reira i to ratou ara-maitai-raa e e tauturu i te haapiiraa mai.
Tauturu ia taa maitai (himeneraa e te hautiraa) : A papa‘i i te ta‘o ra tauturu i ni‘a i te tapura ereere. A himene « Le Saint-Esprit » (CPE, 56), e a ani i te mau tamarii ia tai‘o i te mau mea i faahitihia i roto i te himene ta te Varua Maitai e rave no te tauturu ia tatou.
E roaa te tapa‘o MTM i ni‘a sharingtime.lds.org
Hou te Paraimere, a faaineine 10 api parau i papa‘ihia te tapa‘o MTM i ni‘a iho. I muri i te api parau tata‘itahi, a papa‘i i te hoê o teie na pereota e 5 o te faaite nei i te huru no to te Varua Maitai tautururaa ia tatou : e tamahanahana te Varua Maitai ia tatou, e faaite papû te Varua Maitai no Iesu Mesia, e haapii te Varua Maitai ia tatou, e faaite mai te Varua Maitai ia tatou eaha te ohipa e rave e aore râ eiaha e rave, e e tauturu te Varua Maitai ia tatou ia rave i te maitai (tei ni‘a te pereota tata‘itahi e piti api parau taa ê). A tuu i te mau api parau i ni‘a i te tabula ma te naho ore e ma te tapa‘o MTM i mua i te mau tamarii. A ani i te hoê tamarii ia huri hoê o te mau api parau. A faahiti amui i te mau parau i muri i te api parau. A ani i te tahi atu tamarii ia huri i te tahi atu api parau e a tamata ia faatuati. A faahiti amui i te mau parau i muri i te api parau. Mai te mea e, e tuati na api parau, a tatara i te reira. Mai te mea e, aita raua e tuati, a faahuri faahou ia raua. A tapiti faahou ia tuati pauroa’tu te mau api parau.
Tauturu no te faaohiparaa (aparauraa i te mau papa‘iraa mo‘a) : A tapŭpŭ i te mau tamarii. A horo‘a i te pŭpŭ tata‘itahi i te hoê o teie mau irava i muri nei : Ioane 14:26 ; Ioane 15:26 ; 2 Nephi 32:5 ; PH&PF 11:12. A ani i te pŭpŭ tata‘itahi ia tai‘o i ta ratou irava e ia aparau eaha te auraa o te reira. A ani i te mau tamarii e i ta ratou mau orometua ia faaite mai i te mau hi‘oraa no ni‘a i te huru o to ratou iteraa i te faaururaa a te Varua Maitai.
Hepetoma 4 : Ia amu vau i te oro‘a mo‘a, te faaapî ra ïa vau i ta’u mau fafauraa no te bapetizoraa.
Tauturu ia taa maitai (aparauraa i te mau fafauraa e te tai‘oraa i te mau papa‘iraa mo‘a) : A faataa e, te hoê fafauraa o te hoê ïa euheraa te tahi e te tahi i rotopu ia tatou e i te Metua i te Ao ra ; e euhe tatou e, e rave tatou i te tahi mau mea, e mai te mea e, e na reira tatou, e fafau mai Oia e, e haamaitai oia ia tatou. A faahaamana‘o i te mau tamarii e, e rave tatou i te hoê fafauraa e te Metua i te Ao ra ia bapetizo-ana‘e-hia tatou, e a faataa e, e faaapî tatou i te reira fafauraa ia rave ana‘e tatou i te oro‘a mo‘a. A hamani i te mau api parau e te mau irava o te mau pure oro‘a mo‘a, o te faataa ra eaha ta tatou e euhe a rave ai tatou i te oro‘a mo‘a, e eaha ta te Metua i te Ao ra e fafau mai ia tatou (a hi‘o Te Parau Haapiiraa e te Mau Parau Fafau 20:77, 79). A horo‘a i te mau api parau i te tahi mau tamarii ra, e a ani ia ratou ia ti‘a i roto i te ana‘iraa ti‘a, a tai‘o puai ai outou i te mau irava.