Novema
E Nehenehe Ta’u e Ma‘iti ia Riro ei Misionare i Teie Nei
« E ua parau maira ia ratou, e haere outou e ati noa a‘e te mau fenua atoa, e faaite haere i te evanelia i te taata atoa » (Mareko 16:15).
A faananea i te mau mana‘o i horo‘ahia i ônei ma te horo‘a’tu i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia outou iho, « eaha ta te mau tamarii e rave no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1 : E nehenehe au e riro ei misionare na roto i te taviniraa ia vetahi ê.
Tauturu ia taa maitai (ha‘utiraa taata ora) : A tai‘o Mataio 25:34–40, e a faaite e ia tavini ana‘e tatou ia vetahi ê te tavini atoa ra ïa tatou i te Metua i te Ao ra (a hi‘o Mosia 2:17) e e horo‘a mai te taviniraa i te oaoa, e e tauturu te reira ia tatou ia ora faahou i piha‘iho i te Atua. A ani e rave rahi tamarii ia ha‘uti teata taata ora mai i te tahi mau ohipa taviniraa, mai te horo‘araa i te maa na te hoê taata tei po‘ia, te faahoaraa i te hoê taata otahi, e aore râ, te haereraa e farerei i te hoê taata tei roohia i te ma‘i. A vaiiho i te tahi atu mau tamarii ia imi eaha te ohipa e tupu ra i roto i te ha‘utiraa tata‘itahi. A faaite i te hoê hoho‘a o te mau misionare. A ui e mea nahea to te mau misionare taviniraa i te Atua. A faataa e ia tavini ana‘e tatou ia vetahi ê, te riro atoa ra ïa tatou ei misionare.
Tauturu no te faaohiparaa (ha‘utiraa) : A hamani i te hoê tapura ha‘uti te vai ra i ni‘a iho hoê e‘a e ono û e haere ti‘a’tu ra i te hoho‘a o Iesu. A faaineine i te hoê huira taviri e ono tuhaa û ia tano i ni‘a i te mau û i ni‘a i te tapura ha‘uti. I ni‘a i te û tata‘itahi a papa‘i i te i‘oa o te hoê taata ta te mau tamarii e nehenehe e tavini, mai te hoê metua, te hoê hoa, e te hoê taata tapiri mai te faaearaa. A ma‘iti i te hoê tamarii ia taviri i te huira taviriraa e ia parau e mea nahea oia ia tavini i te taata i tanohia i te taviri. I muri iho a ani i te reira tamarii ia faanuu i te hoê tapa‘o i ni‘a i te afata i muri iho, tei tuati i ni‘a i te û i ni‘a te huira taviri. A na reira faahou i ni‘a i te tahi atu mau tamarii e tae roa’tu i te taime e tae te tapa‘o i ni‘a i te hoho‘a o te Faaora. A faahamana‘o i te mau tamarii e ia tavini ana‘e tatou ia vetahi ê, te tavni ra ïa tatou i te Atua. A himene « Nous aidons tous avec joie » (CPE, 108).
E roaa te tapura ha‘utiraa e te taviriraa i ni‘a sharingtime.lds.org
Hepetoma 2 : E nehenehe au ia riro ei misionare na roto i te faaiteraa i te hoê hi‘oraa maitai.
A faaite i te haapiiraa tumu ( hi‘oraa i te hoê haapiiraa tao‘a) : Hou te haamataraa o te Paraimere, a hamani i te hoê apaparaa raau, e a tapoi i te reira eiaha te tamarii ia ite (Mai te mea e, aita e raau, e nehenehe ta outou e papa‘i hoho‘a i ni‘a i te tapura ereere e a tapoi te hoho‘a i te hoê api parau), A haamaramarama i te tamarii i te hoho‘a ta outou i papa‘i. E i muri iho, a horo‘a i te tahi mau tamarii ra i te tahi mau raau e a ani ia ratou ia tamata i te hamani atoa i te hoê tao‘a ia tuati i ni‘a i te mea ta outou i hamani. Ia oti ana‘e ta ratou, a faaite i te mea ta outou i hamani, e a faaite i te mau taa-ê-raa i rotopu i na mea e piti. A ani i te mau tamarii ia hamani faahou i ta ratou tao‘a a hi‘o noa ai ratou i ta outou hoho‘a. A parau e rave rahi mau mea ohie ia pee ana‘e outou i te hoê hi‘oraa.
A faaohipa i te mau taime ohiparaa no te faaitoito i te mau tamarii ia feruri. Ia faaohipa outou i to ratou feruriraa na roto i te mau uiraa e te mau ha‘utiraa, na te reira e faaitoito i te aporaa mai i te ite.
Tauturu ia taa maitai e no te faaohiparaa (faarooraa i te mau aamu e te himeneraa) : A tapiri i te tahi mau hoho‘a e a faati‘a poto noa i te tahi mau aamu no roto i te papa‘iraa mo‘a tei faaite mai i te hi‘oraa maitai o te tahi mau taure‘are‘a (ei hi‘oraa, Daniela e to’na mau hoa i te pato‘iraa ia inu i te uaina a te arii [a hi‘o Daniela 1:5–16] ; Sedaraka, Meseka, e o Abede-nego [a hi‘o Daniela 3:4–29] ; e o Daniela i roto i te apoo o te mau liona [a hi‘o Daniela 6]). A faaite i te hoê hoho‘a o te mau misionare, e a ani i te mau tamarii e mea nahea te mau misionare ia riro ei mau hi‘oraa maitai. A faataa e ia faaite ana‘e tatou i te hoê hi‘oraa maitai, te riro ra ïa tatou ei misionare i te mea e, e nehenehe to tatou hi‘oraa e tauturu ia vetahi ê ia faatupu i te hinaaro ia haapii rahi atu no ni‘a ia Iesu Mesia. A faaite i te tahi mau taime a ite ai outou i te mau tamarii i roto i ta outou paroita e aore râ, amaa i te riroraa ei hi‘oraa maitai.
A ani i te mau tamarii ia himene « Petite est la lumiere en moi » (CPE, 96). A himene ai ratou, a horo‘a ia ratou i te hoê hoho‘a mahana hamanihia i te api parau, e a faahaere i te reira e ati noa a‘e te piha. Ia mau ana‘e te pehe, a ani i te tamarii e tape‘a ra i te mahana ia faaite mai e, e mea nahea oia e ti‘a ai ia riro ei hi‘oraa maitai (ei hi‘oraa, na roto i te hamani-maitai-raa, te faaiteraa i te parau mau, e aore râ, te aniraa i te mau hoa ia haere mai i te Paraimere).
A ani i te mau tamarii tata‘itahi ia hamani i ta ratou iho hoho‘a mahana i ni‘a i te api parau e ia papa‘i i teie mau ta‘o « E Nehenehe au ia Riro ei Hi‘oraa Anaana » A ani i te mau tamarii afa‘i i ta ratou mahana i ni‘a a himene ai ratou e « Vois l’etoile au ciel » (CPE, 84), « Brillant pour lui » (CPE, 38–39), e aore râ, « Petite est la lumiere en moi » (CPE, 96).
Hepetoma 3 : E nehenehe ta’u e haapii i to’u mau hoa no ni‘a ia Iesu Mesia e i Ta’na Ekalesia.
A faaite i te haapiiraa tumu (hi‘oraa i te hoê faaiteiteraa) : A faahautiuti i te rima o te hoê tamarii e aore râ, hau atu, e a faaha‘uti teata taata ora ia ratou e ani nei ia ratou ia haere mai i te Paraimere e ia haapii no ni‘a ia Iesu. A haapii ia ratou tei farii i te hoê aniraa ia ani ia vetahi ê e hope roa’tu te mau tamarii paatoa i te anihia. A faataa e te hinaaro nei te Fatu ia tatou paatoa ia riro ei misionare na roto i te haapiiraa i to tatou mau hoa no ni‘a ia Iesu Mesia e Ta’na Ekalesia.
Tauturu ia taa maitai (faarooraa i te hoê aamu) : A faati‘a i te aamu i faati‘ahia e te peresideni Spencer W.Kimball no ni‘a i te hoê tamaiti iti no te Paraimere tei riro ei misionare maitai : I ni‘a i te pereoo auahi, ua ani maira te hoê taata i te tamaiti ra no ni‘a i te Ekalesia Momoni. Ua faati‘a atu ra taua tamaiti ra i te taatoaraa o te mau Hiroa Faaroo. Ua faahiahia roa taua taata ra i te mea e, ua ite teie tamaiti apî roa eaha ta’na ti‘aturiraa, no reira, ua haere atu ra oia i Roto Miti no te haapii mai no ni‘a i te Ekalesia (a hi‘o Conference Report, Atopa1975, 117–19 ; e aore râ, Ensign, Novema1975, 77–79). A faataa e nehenehe te tamau-aau-raa i te Hiroa Faaroo e tauturu ia tatou ia riro ei misionare i teie nei.
Tauturu no te faaohiparaa (hi‘o-faahou-raa i te Hiroa Faaroo) : A faaineine 13 api parau e hoê numera mai te 1 e tae atu i te 13 i ni‘a iho i te api parau tata‘itahi. A tapŭpŭ te mau tamarii. A ani i te pŭpŭ tata‘itahi ia ma‘iti i te hoê api parau e ia rave amui no te tamau i te hiroa faaroo e tuati i ni‘a i te numera. Ia ineine ana‘e te pŭpŭ tata‘itahi, a ani ia ratou ia faahiti mai i te reira i mua i te tahi atu mau tamarii, e i muri iho, ia rave i te tahi atu api parau. A na reira noa ia au i te taime e toe ra.
Hepetoma 4 : E nehenehe au e faaineine ia’u i teie nei no te tavini i te hoê misioni rave tamau.
A faaite i te haapiiraa tumu (hi‘oraa i te i te mau tao‘a e tuati i ni‘a i te ohipa misionare) : A faaineine i te hoê pute na‘ina‘i e aore râ, i te hoê afara vairaa ahu e vai ra i roto te mau tao‘a e faaohipahia e te mau misionare, mai te tiaa no te sabati, hoê taamu arapoa, e te mau papa‘iraa mo‘a. A ani i te tahi mau tamarii ia huti mai i te mau ohipa i rapae i te pute e ia faaite i te toe‘a o te mau tamarii. A ani i te mau tamarii e, no te aha i teie noa mau tao‘a e vai nei ia ratou eita te reira e faaineine i te hoê taata ia riro ei misionare. A tai‘o Te Parau Haapiiraa e te Mau Parau Fafau 84:62, e a ani i te mau tamarii ia faaroo mai i te tahi atu mea e titauhia i te mau misionare atoa (te iteraa papû). A faaite papû i te faufaa rahi o te roaraa te iteraa papû o te taata iho.
A faanaho i te mau rave‘a no te apo mai i te ara maitai o te mau tamarii i te omuaraa o te ohiparaa. Ei hi‘oraa, i roto i teie ohiparaa e anaanatae te mau tamarii ia ite ratou e, eaha ta ratou e huti mai i rapae i te pute.
Tauturu ia taa maitai (hi‘oraa i te mau hoho‘a e te pahonoraa i te mau uiraa) : A tauturu i te mau tamarii ia maramarama i te mau tuhaa faufaa roa o te hoê iteraa papû. A faaite i te mau hoho‘a e faahoho‘a ra i te tahi pae o taua mau tuhaa ra (ei hi‘oraa, ua here te Metua i te Ao ra ia tatou, o Iesu Mesia to tatou Faaora, e peropheta o Iosepha Semita, te Ekalesia a Iesu Mesia i te Feia Mo‘a i te Mau Mahana Hopea Nei, e Ekalesia mau ïa na te Fatu, e te arata‘ihia nei tatou e te hoê peropheta ora). A ui e rave rahi uiraa no ni‘a i te hoho‘a tata‘itahi, mai teie : Eaha teie, e aore râ, o vai teie ? Eaha to outou iteraa no ni‘a i teie ? Nahea e ti‘a ai ia outou ia haapuai i to outou iteraa papû no ni‘a i teie ? A ani i te mau tamarii ia faaite i te i‘oa o te mau taata o ta ratou e nehenehe e faaite atu i to ratou iteraa papû. A faaite papû e, ia faaite ana‘e te mau tamarii i ni‘a ia vetahi ê i te mea ta ratou i ite, e tupu to ratou iteraa papû i rahi e te faaineine ra ïa ratou ia ratou ia tavini i te hoê misioni.