Tenuare
Te Ti‘amâraa o te Horo‘a ïa no te Ma‘iti no Tatou Iho
« No reira, e mea tiamâ te mau taata… ia rave i te tiamâ e te ora mure ore, na roto i te Arai rahi o te taata atoa » (2 Nephi 2:27).
A himene: « Ei Tama na te Atua »
(api 28 i roto i teie arata‘iraa)
A faananea i te mau mana‘o i horo‘ahia i ô nei ma te tuu atoa mai i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) ia tauturu ia ratou ia faaohipa i te reira i roto i to ratou oraraa. A ui ia outou iho, «Eaha ta te mau tamarii e rave no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1 e 2 : Te Ti‘amâraa o te horo‘a ïa no te ma‘iti no tatou iho.
A faaite i te haapiiraa tumu (faaha‘uti i te hoê ha‘uti tuu piri): A parau i te mau tamarii e, te feruri nei oe i te hoê ta‘o, e a horo‘a ia ratou i te tahi mau tapa‘o no te tauturu ia ratou ia imi eaha taua ta‘o ra. A ani ia ratou ia afa‘i i to ratou rima i ni‘a ia ite-ana‘e-hia ia ratou te pahonoraa. Teie te tahi mau tapa‘o tauturu : Ua farii tatou i te reira hou a haere mai ai tatou i te fenua nei. E horo‘a te reira no ô mai i to tatou Metua i te Ao ra ra. E tuhaa faufaa te reira no te faanahonahoraa a to tatou Metua i te Ao ra no tatou. Ua hinaaro o Satane ia iriti ê atu i te reira ia tatou nei. E faaohipa tatou i te reira ia rave ana‘e tatou i te ma‘itiraa. E horo‘a te reira o te faati‘a ia tatou ia ma‘iti no tatou iho. E haamata te reira na ni‘a i te reta T. Ia ite-ana‘e-hia i te tamarii te pahonoraa, a parau amui ana‘e e, « Te Ti‘amâraa e horo‘a ïa no te ma‘itiraa no tatou iho ».
Tauturu ia taa maitai (hi‘oraa e te aparauraa i te hoê haapiiraa tao‘a) : A faaite i te mau tamarii i te hoê raau tei papa‘ihia te parau ra ma‘iti i ni‘a i te tahi hopearaa, e te parau ra te mau hopearaa tei papa‘ihia i ni‘a i te tahi atu hopearaa. A faaite e, te hoê hopearaa, o te ohipa ïa e tupu maite mai na roto i te hoê ma‘itiraa ta tatou i rave ; ei hi‘oraa, mai te mea e, e ma‘iti tatou ia haapii i te ha‘uti i te hoê mauhaa upaupa, e ite ïa tatou i te ha‘uti i te reira, e mai te mea e, e faaoti tatou ia tape‘a i te auahi, e paapaa ïa tatou. A rave i te raau e a faaite i te mau tamarii e, i te mau taime atoa e rave outou i te raau, e farii ïa outou i na mea toopiti, te ma‘itiraa e te hopearaa o te ma‘itiraa. A ani i te hoê tamarii paari a‘e ia tai‘o 2 Nephi 2:27. A ani i te tahi atu mau tamarii ia faaroo e, eaha te hopearaa o te raveraa i te ma‘itiraa maitai (te ti‘amâ e te ora mure ore) e eaha te mau hopearaa no te raveraa i te ma‘itiraa hape (te tîtî e te oto). A papa‘i i te hoê reni i ni‘a i te tabula mai teie i faaitehia i ônei.
A tauturu i te mau tamarii ia ite e, ia rave ana‘e tatou i te mau ma‘itiraa maitai, e ti‘amâraa e te oaoa te roaa mai, e ia rave ana‘e tatou i te mau ma‘itiraa ino, e tîtî e te oaoa ore te roaa mai.
A ani e piti tamarii ia haere mai i mua i te piha, e a ani i te tamarii tata‘itahi ia tape‘a i te hoê hopearaa o te raau. A ani i te tamarii e tape‘a ra i te hopearaa o te « ma‘itiraa » ia faaite mai i te hoê hi‘oraa no te hoê ma‘itiraa maitai (ei hi‘oraa, paraparau marû i ni‘a ia vetahi ê). A ani i te tahi atu tamarii ia faaite mai i te mau hopearaa no taua ma‘itiraa ra (ei hi‘oraa, e vai maoro te hoaraa). A tapiti faahou e e rave rahi atu mau tamarii.
A haapapû i te ite o te mau tamarii na roto i te haapiipii-tamau-noa-raa A tape‘a noa i te raau « ma‘itiraa e hopearaa ». Te vai ra â te tahi atu taime e titauhia ia faaohipa faahou i te reira raau i roto i te taime faaanaanataeraa i roto i te roaraa o te matahiti.
Tauturu ia taa maitai (haapiiraa mai i te mau aamu o te papa‘iraa mo‘a) : I roto i na hepetoma matamua o te ava‘e, a haapii atu i te tahi mau aamu no roto mai i te mau papa‘iraa mo‘a o te faaite e, e nahea te raveraa i te mau ma‘itiraa maitai i te horo‘a mai i te ti‘amâraa e te oaoa, e e nahea te raveraa i te mau ma‘itiraa ino i te horo‘a mai i te tîtîraa e te oto. A faaohipa i te mau aamu no te papa‘iraa mo‘a no ni‘a i te Faaora e o Satane (a hi‘o Mose 4:1–4) ; Nephi e Lamana e Lemuela (a hi‘o 1 Nephi 2–4, 7, 18) ; Shadara, Meseka, e o Abedenego (a hi‘o Daniela 3) ; e aore râ, Alama e te Arii Noa (a hi‘o Mosia 17–19). Ia oti ana‘e te hoê aamu i te haapiihia, a ani e piti tamarii ia tape‘a te tahi i te hopearaa « ma‘iti » e te tahi i te hopearaa « te mau hopearaa ». A ani i te hoê tamarii ia faataa mai i te mau ma‘itiraa i ravehia e te mau taata i roto i te aamu, e i te tahi atu tamarii ia faataa mai i te mau hopearaa o taua mau ma‘itiraa ra.
Tauturu no te faaohiparaa (faarooraa i te hoê aamu) : A tuu i te hoê hoho‘a o Iesu Mesia i ni‘a i te tapura ereere. A papa‘i hoho‘a i te mau taahiraa e tae roa’tu i te hoho‘a. A papa‘i hoho‘a i te hoê raau i ni‘a i te api parau, e a tuu i raro i te mau taahiraa. A faati‘a i te hoê aamu poto noa no ni‘a i te mau ma‘itiraa ta te hoê tamarii e rave i roto i te roaraa o te hoê mahana. No te ma‘itiraa tata‘itahi, a ani i te mau tamarii ia faaite mai e, e ma‘itiraa maitai anei e aore râ, e ma‘itiraa ino anei na roto i te ti‘araa i ni‘a no te hoê ma‘itiraa maitai, e na roto i te parahi-noa-raa no te hoê ma‘itiraa ino. Ei hi‘oraa : « Ua rave o Jane i te hoê tao‘a ha‘uti a to’na teina aiû, e ua haamata oia i te ta‘i. A ani ai te mama o Jane ia’na e, no te aha to’na teina i ta‘i ai, ua parau o Jane e, aita oia i ite ». No te ma‘itiraa tano tata‘itahi, a faanuu i te hoho‘a o te raau hoê taahiraa i ni‘a e tae atu ai ia Iesu ra. A tamau noa i te faati‘a i te aamu no te tahi atu mau ma‘itiraa e tae roa’tu i te hoho‘a o te Faaora ra. A aparau e nahea te mau ma‘itiraa maitai i te horo‘a mai i te oaoa ia tatou e i te tauturu ia tatou ia haafatata atu i te Faaora.
Hepetoma 3 : I roto i te oraraa hou teie oraraa, ua ma‘iti au ia pee i te faanahoraa a te Atua.
Tauturu ia taa maitai (himeneraa) : A aparau poto noa i ni‘a i teie mau parau tumu i muri nei, i muri iho a himene e te mau tamarii i te mau himene e au i te reira : Hou a haere mai ai au i ni‘a i te fenua nei, i ora na vau i te ra‘i ra (« J’habitais dans les cieux » [l’Ami, avril 1999 api, A5]). Ua ma‘iti au ia haere mai i te fenua nei e ua farii au i te hoê tino (« Je suis enfant de Dieu » [CPE, 2–3] ; « Je demeure dans un temple » [CPE, 73]). E bapetizohia vau e e farii au i te horo‘a o te Varua Maitai (« Le jour de mon baptême » [CPE, 53] ; « Le Saint-Esprit » [CPE, 56]). E nehenehe au e faaineine no te haere i te hiero (« Oh j’aime voir le temple » [CPE, 99] ; « Ensemble a tout jamais » [CPE, 98]). E ti‘afaahou vau (« Il envoya son fils aime » [CPE, 20–21]).
Hepetoma 4 : Ua hamani Iesu Mesia i te fenua nei ei vahi i reira vau e haapii ai ia ma‘iti i te maitai.
A faaite i te haapiiraa tumu (hi‘oraa e te aparauraa i ni‘a i te hoê haapiiraa tao‘a) : A faaite i te mau tamarii i te hoê faarii penitara ua rau te û. A faaite ia ratou i te piti o te faarii hoê ana‘e û. A ani i te mau tamarii : « Mai te mea e, e peni outou i te hoê hoho‘a, eaha ïa te faarii ta outou e faaohipa ? No te aha ? » A faataa e te fariiraa e rave rau mau ma‘itiraa, ua riro ïa ei haamaitairaa. A faaite papû e, ua here te Metua i te Ao ra e o Iesu Mesia ia tatou, e te hinaaro nei Raua ia rave tatou i te mau ma‘itiraa ti‘a.
I roto i teie ohiparaa, e nehenehe outou e faaite i te mana‘o e, e haamaitairaa te ma‘itiraa na roto i te mau penitara, te mau penitara ua rau te û, te mau hotu rau, e aore râ, te tahi atu mau mea ua matauhia e te mau tamarii.
Tauturu ia taa maitai (faaûraa) : A vaiiho i te mau tamarii ia faaû i te hoê hoho‘a i ni‘a i te api 35 o te buka haapiiraa a te piha haapa‘oraa tamarii, A hi‘o na i ta Outou mau Tamarii rii, e aore râ, a ani ia ratou ia papa‘i hoho‘a mai te reira te huru e taua â faahitiraa parau. A aparau e na vai i hamani i te mau mea i papa‘ihia i roto i te hoho‘a, e no te aha ratou i hamanihia ai. A haapii i te mau tamarii e, te hinaaro nei te Metua i te Ao ra ia aupuru tatou i teie ao ta Ta’na Tamaiti i hamani no tatou. A ani i te mau tamarii ia faaite i te mau rave‘a e ti‘a ai ia ratou ia ma‘iti no te aupuru i te fenua e i te mau mea atoa i ni‘a iho. A ani i te mau tamarii ia ta‘ita‘i i ta ratou hoho‘a i te fare e ia ani i to ratou metua ia hamani i te hoê buka iti no te reira.