Atopa
E Roaa te mau Haamaitairaa o te Autahu‘araa i te mau Taata Atoa
« E teie atoa o ratou atoa o te farii i teie autahu‘araa nei, e farii atoa mai ïa ia’u, te na reira maira te Fatu » (PH&PF 84:35).
A faananea i te mau mana‘o i horo‘ahia i ônei ma te horo‘a’tu i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia outou iho e, « eaha ta te mau tamarii e rave no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1 : E farii te mau tamaroa ti‘amâ i te autahu‘araa ia tae‘ahia to ratou matahiti i te 12.
A faaite i te haapiiraa tumu (hi‘oraa i te hoê hoho‘a) : A faaite i te mau tamarii i te hoê hoho‘a o Iesu Mesia i te faati‘araa i te oro‘a mo‘a. A faaite e ua horo‘a mai te Mesia i te oro‘a mo‘a i Ta’na mau Aposetolo ra e i Ta’na mau pĭpĭ i roto i te Buka a Moromona, e ua ani atu ra Oia ia ratou ia tamau noa i te haamaitai e i te opere i te oro‘a mo‘a noa’tu e, ua reva Oia. A tai‘o amui 3 Nephi 18:5–6. A ani i te mau tamarii i te mau uiraa mai teie : Na vai e haamaitai i te oro‘a mo‘a i to tatou nei anotau ? Na vai e opere i te oro‘a mo‘a ? Eaha te mana e titauhia i te hoê taata ia mau no te haamaitai e no te opere i te oro‘a mo‘a ?
Tauturu ia taa maitai (aparauraa i te haapiiraa tumu) : A faataa e te autahu‘araa o te mana ïa o te Atua no te tavini e no te haamaitai i te mau taata i ni‘a i te fenua nei. I te anotau hopea nei ua haapii mai te Mesia ia tatou e, e nehenehe te mau huru taata atoa e farii i te autahu‘araa mai te mea e, e haapa‘o oia e piti titauraa. Te matamua o te tae‘a-raa-hia ïa te matahiti i faataahia. A ani i te mau tamarii ia ti‘a i ni‘a ia faaroo ana‘e ratou ia outou ia parau i te matahiti e ti‘a ai i te hoê tamaiti ia farii i te autahu‘araa. A tai‘o marû noa mai te hoê e tae atu i te ahuru ma piti. A parau i te mau tamarii e te tahi atu titauraa o te riroraa ïa te tamaiti ei taata ti‘amâ. A faataa eaha te auraa no te parau ia ti‘amâ, e a faataa e nehenehe te mau tamaroa e te mau tamahine e faaohipa i « Ta’u mau Ture no te Evanelia » no te tauturu ia ratou ia ite e, nahea ia ora ma te ti‘amâ.
Tauturu no te faaohiparaa (faaôraa mai i roto i te hoê ohiparaa pae tino) : A tapŭpŭ i te mau tamarii. A horo‘a i te pŭpŭ tata‘itahi hoê ture no roto mai i « Ta’u mau Ture no te Evanelia » A ani i te pŭpŭ tata‘itahi ia feruri i te hoê ohipa ohie roa no te faahoho‘a i ta ratou ture. A faahiti i te tahi mau ta‘o no te faaite i te hoê ture, e a ani i te pŭpŭ i faataahia ia ti‘a mai i ni‘a e ia faaite mai i ta ratou ohipa. A na reira faahou e tae noa’tu ua ohu pauroa te mau pŭpŭ. A faataa e mai te mea e, e haapa‘o ratou i teie mau ture, e tauturu te reira i te mau tamaroa ia vai ti‘amâ noa no te farii i te autahu‘araa e no te farii i te mau oro‘a o te autahu‘araa, e e tauturu hoi i te mau tamahine ia vai ti‘amâ noa no te farii i te mau oro‘a o te autahu‘araa, mai te bapetizoraa e te mau oro‘a no te hiero.
Hepetoma 2 : E farii tatou i te mau oro‘a no te faaoraraa na roto i te autahu‘araa.
E nehenehe e faaohipa i te mau haapiiraa tao‘a no te faatupu i te anaanatae, no te faatumu i te ara maitai o te mau tamarii, e aore râ, no te faaô i te hoê parau tumu o te evanelia.
A faaite i te haapiiraa tumu (hi‘oraa i te hoê haapiiraa tao‘a) : A ani i te hoê tamarii ia iriti i te fare amarara. A ani i te tahi mau tamarii ia ti‘a i raro a‘e. A faaau i te fare amarara mai te autahu‘araa te huru. A parau e, mai te mea e te ûa ra, pauroa te mau tamarii i raro a‘e i te fare amarara o te farii i te haamaitairaa o te oreraa e rari, eiaha o te tamarii ana‘e o tape‘a ra i te reira. Mai te reira atoa te Atua, e horo‘a mai Oia, na roto i Ta’na Autahu‘araa, i te hoê rave‘a ia haamaitaihia Ta’na mau tamarii paatoa. Na roto i te autahu‘araa e farii tatou i te mau oro‘a o te faaoraraa o te faati‘a ia tatou ia ho‘i atu e ia ora faahou i piha‘iho i te Atua.
Tauturu ia taa maitai (faatuatiatiraa te mau tuhaa tapupuhia) : A papa‘i i te mau ta‘o tata‘itahia i ni‘a i te hoê api parau : bapetizoraa, haamauraa, faatoro‘araa i te autahu‘araa, (no te mau tane), oro‘a hiero, e taatiraa hiero. Tapupu i te mau api parau i roto e rave rahi tuhaa. A faaite poto noa i te mau tamarii eaha te hoê oro‘a (te hoê faanahoraa e aore râ, te hoê ohipa mo‘a e auraa pae varua to’na), e a parau i te mau tamarii e, e titauhia te tahi mau oro‘a autahu‘araa no tatou no te ho‘i faahou e ora i piha‘iho i to tatou Metua i te Ao ra. A papa‘i hoho‘a e pae taahiraa avae i ni‘a i te tapura ereere, e a tuu i te hoê hoho‘a no Iesu Mesia i ni‘a i te taahiraa avae teitei roa. A vahi i te mau tamarii i roto e pae pŭpŭ, e a horo‘a i te pŭpŭ tata‘itahi te hoê tuhaa api parau ta outou i hamani. A ani ia ratou ia tapiri i ta ratou tuhaa tapupuhia e ia faaite mai i mua i te toe‘a o te Paraimere eaha ta ratou i haapii mai no ni‘a i te oro‘a. A ani i te mau pŭpŭ ia tuu i ta ratou mau tuhaa tapupuhia i ni‘a i te taahiraa tano i ni‘a i te tapura ereere.
Hepetoma 3 : E roaa ia’u te puai na roto i te mau haamaitairaa autahu‘araa.
A faaite i te haapiiraa tumu (aparauraa i te haapiiraa tumu) : A ani i te mau tamarii ia afa‘i i to ratou rima i ni‘a e ia hi‘o i te reira. A ani ia ratou nahea to ratou na rima i te tauturu ia ratou ia ha‘uti, ia rave i te ohipa, e ia faaineine ia ratou no te haere i te pureraa. A ani ia ratou ia ha‘uti vava mai i te pahonoraa tata‘itahi. I muri iho a ani ia ratou nahea e ti‘a ai i te taata ia faaohipa i to ratou mau rima no te tauturu ia vetahi ê. A faataa e nehenehe te autahu‘araa e faaohipa i to ratou rima no te horo‘a i te mau haamaitairaa o te tauturu e o te faaitoito ia tatou.
Tauturu ia taa maitai e no te faaohiparaa (hi‘oraa i te mau hoho‘a e te faaiteraa i te mau iteraa raa) : A tuu i te mau hoho‘a o te oro‘a mo‘a, te bapetizoraa, te haamauraa, te haamaitairaa aiû, e te haamaitairaa i te taata ma‘i na ni‘a i te papa‘i o te piha haapiiraa, e a faataa i te ohipa e faaitehia ra i ni‘a i te hoho‘a tata‘itahi. A ani i te mau tamarii ia papa‘i i te hoho‘a o to ratou na rima i ni‘a i te hoê api parau e a tapupu i te reira. A ani ia ratou ia papa‘i i to ratou i‘oa i mua i te hoho‘a rima tata‘itahi. A ani ia ratou ia tapiri i te hoê o to ratou hoho‘a rima i piha‘iho i te hoê hoho‘a e faaite ra i te hoê haamaitairaa e aore râ, i te hoê oro‘a ta ratou i farii na roto mai i te rima o te hoê taea‘e tei mau i te autahu‘araa. A ma‘iti i te tahi mau rima, e a ani i te reira mau tamarii ia faaite mai i to ratou mau mana‘o no ni‘a i te huru o to te autahu‘araa haamaitairaa e faaitoitoraa ia ratou. A faati‘a i te aamu o Iesu i te haamaitairaa i te mau tamarii i roto i te 3 Nephi 17:11–25. A tuu i te hoê hoho‘a o Iesu e te mau tamarii i mua i te piha haapiiraa, e a ani i te tamarii tata‘itahi ia tapiri i te piti o to ratou rima i piha‘iho i te hoho‘a. A faaite e, e mana to te mau taea‘e tei mau i te autahu‘araa ia rave i te ohipa na roto i te i‘oa o Iesu Mesia ; e nehenehe ratou e haamaitai ia tatou mai ta Iesu e na reira ahiri Oia tei ônei.
Te tautururaa i te mau tamarii ia faaroo maite i te haapiiraa, na te reira e tauturu ia ratou ia apo papû mai i te haapiiraa tumu e haapiihia ra.
Hepetoma 4 : E nehenehe ta’u e haere i te hiero no te farii i te mau oro‘a no to’u mau tupuna ia paari a‘e au.
A faaite i te haapiiraa tumu e a tauturu ia taa maitai (faaûraa) : A faahaamana‘o i te mau tamarii e, ua titauhia ia tatou ia farii i te tahi mau oro‘a no te autahu‘araa hou a ti‘a ai ia tatou ia ho‘i faahou i piha‘iho i te Metua i te Ao ra. A ani ia ratou ia faaite mai i te tahi o taua mau oro‘a ra. A faataa e rave rahi taata tei pohe ma te ore e farii i te reira mau oro‘a, e te titau nei ratou i ta tatou tautururaa. A faati‘a i te mau tamarii no te hoê o to outou mau tupuna tei pohe hou a farii ai i teie mau oro‘a. A horo‘a i te tamarii tata‘itahi i te hoê hoho‘a tapupuhia o te hoê taata i ni‘a i te api parau. A ani ia ratou ia papa‘i hoho‘a i to ratou iho hoho‘a i ni‘a i te hoê pae o te api parau e hoê hoho‘a o te tupuna ta outou i paraparau ia ratou i te tahi atu pae. (Mai te mea e, te ite ra te mau tamarii i te hoê o to ratou mau tupuna tei pohe ma te farii ore i te mau oro‘a o te autahu‘araa, e nehenehe ta ratou e papa‘i hoho‘a i taua taata ra), A ani ia ratou ia faahiti faahou i te tumu parau o teie hepetoma a tape‘a ai ratou i ta ratou hoho‘a taata papie i mua ia ratou. A ani ia ratou ia faaite i to ratou iho hoho‘a ia parau ana‘e ratou i te ta‘o ra « o vau » e i te hoho‘a o te tupuna ia parau ana‘e ratou i te ta‘o ra « tupuna ».