Te Haapiiraa i te mau Tamarii Huma

Ua haapii mai te Faaora e, « E te mau tamarii atoa na oe ra, e haapiihia ïa e te Fatu; e e hau rahi to te mau tamarii na oe ra » (3 Nephi 22:13).

E hopoi‘a faufaa roa ta te feia faatere no te Paraimere i te haapiiraa i te evanelia a Iesu Mesia i te mau tamarii paatoa, e tae noa’tu i te huma. Te Paraimere o te hoê ïa vahi i reira te mau tamarii paatoa e faarii-poupou-hia ai, e herehia ai, e faaamuhia ai, e e haapa‘ohia ai. I roto i te reira huru raveraa, e mea ohie a‘e ïa na te mau tamarii paatoa ia haroaroa i te here o to tatou Metua i te Ao ra e to Iesu Mesia e ia ite i te mana o te Varua Maitai.

E mea faufaa te tamarii tata‘itahi i te Atua. Te titau nei te tamarii tata‘itahi i te here, te faatura e te patururaa.

A paraparau e o vetahi ê no te faaauraa i te mau hinaaro o te mau tamarii i roto i ta outou Paraimere e huma to roto.

A paraparau i te mau metua o te tamarii. Ua hau a‘e te ite o te mau metua i ta ratou mau tamarii i te tahi atu taata. E nehenehe ratou e haapii mai ia outou nahea ia faaau i to’na mau hinaaro, to’na huru anaanatae, e te mau rave‘a maitai a‘e no te haapii mai. Ei hi‘oraa, te vai ra te tahi mau tamarii e mea maitai roa ratou i roto i te himene, te tahi atu i roto ïa i te aamu, te hoho‘a, te mau papa‘iraa mo‘a, e aore râ, te ha‘utiraa. A faaohipa i te mau rave‘a haapiiraa rau, ma te ite papû i te mau rave‘a e apo maitai a‘e ai te tamarii.

E mea maitai roa te tahi mau tamarii huma i mua i te tapa‘o hi‘ohi‘o. A faaohipa i te mau tapa‘o mai teie mau tapa‘o i faaitehia i ô nei no te faaite e, ua tae i te taime no te pure, no te muhu ore, e aore râ, no te himene.

Hoho‘a e vai ra i ni‘a i te itenati sharingtime.lds.org
A paraparau i te tahi atu feia faatere e te mau orometua o te Paraimere. A pure e a rave amui i te ohipa no te iteraa i te mau rave‘a no te tauturu i te tamarii tata‘itahi ia apo i te evanelia a Iesu Mesia e ia ite e, ua herehia oia.

No te tahi atu mau haamaramaramaraa no ni‘a i te tautururaa i te mau tamarii e hinaaro taa ê to ratou, a hi‘o Te Haapiiraa, Aita e Piiraa Teitei a‘e, 38–39, e i ni‘a i te itenati disabilities.lds.org.
A paraparau i te apooraa paroita. Te vai ra paha te mau mana‘o o te Autahu‘araa e o te tahi atu feia faatere pŭpŭ tauturu no ni‘a i te huru no te tautururaa i te mau tamarii e hinaaro taa‘e to ratou. I roto i te hoê paroita, ua farii te pŭpŭ tahu‘a rahi ia ma‘iti ho‘e « papa ruau no te Paraimere » i te mau hepetoma atoa no te parahi i piha‘i iho i te hoê tamaiti e ma‘i autisme to’na. (To’na tanoraa, e mea maiai a‘e ia tape‘a i taua taata noa ra i te hepetoma tata‘itahi), Na te reira e tauturu i te tamaiti ia faatumu i ni‘a i te haapiiraa e ia ite e, ua herehia oia.

Ua haapii mai o Elder M. Russell Ballard e, « E mea papû maitai e, tatou tei horo‘ahia mai te mau tamarii faufaa rahi, ua horo‘a-atoa-hia mai ïa te hoê tiaauraa mo‘a e te teitei, i te mea e, o tatou ta te Atua i ma‘iti no te auahaati i te mau tamarii i teie mahana ma te here e te faaroo puai e te iteraa e, o vai ratou » (« Great Shall Be the Peace of Thy Children », Ensign, Eperera 1994, 60).