Tiurai
E Ma‘iti au i te Maitai na roto i te Oraraa i te mau Parau Tumu o te Evanelia
« E tena na, ia itoito tatou i te haapa‘o i te mau faaue a te Fatu » (1 Nephi 3:16).
A himene: « Le sage et le fou »
(CPE, 132) e aore râ, hoê himene ta outou i ma‘iti i roto i te Chants pour les enfants
A faananea i te mau mana‘o i horo‘ahia i ônei ma te horo‘a’tu i to outou iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia outou iho, « eaha ta te mau tamarii e rave no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1 : E nehenehe te haapaeraa maa e te pure e haapuai i to’u iteraa papû.
A faaite i te haapiiraa tumu (hi‘oraa i te hoê haapiiraa tao‘a) : A faaineine e piti api parau i papa‘ihia : Haapaeraa maa e Pure. A ani e piti tamarii ia ti‘a te tahi i piha‘i iho i te tahi, e a horo‘a i te tamarii tata‘itahi hoê api parau. A ani i te tahi atu tamarii ia haere na ropu ia raua. A ani i na tamarii matamua e piti ia tape‘a maitai i to raua rima, e a ani i te tahi atu tamarii ia tamata i te haere faahou na ropu ia raua. A faaite e, e mea puai roa te mau tamarii mai te mea ua tape‘a-amui-hia ratou. A faataa e, e mea puai atu â te haapaeraa maa e te pure mai te mea e, e faaohipa amui tatou i te reira. A papa‘i « E nehenehe te haapaeraa maa e te pure e haapuai i to’u iteraa papû » i ni‘a i te tapura ereere, e a ani i te mau tamarii ia tai‘o amui faahou i te reira.
E roaa te mau api parau i ni‘a sharingtime.lds.org
A faaohie te taa-maitai-raa (faarooraa i te papa‘iraa mo‘a e te amuiraa mai i roto i te haapiiraa tao‘a) : A ani i te mau tamarii ia faaroo i te mau mea ta te mau tamaiti a Mosia i rave no te riro mai ei mau taata puai i roto i te evanelia, a tai‘o ai outou Alama 17:2–3. A ani i te mau tamarii ia haapaari i to ratou uaua i te mau taime atoa e faaroo ai ratou i te hoê mea tei tauturu i te mau tamaiti a Mosia ia riro ei mau taata puai.
A arata‘i i te hoê aparauraa no ni‘a i te haapaeraa maa na roto i te uiraa e rave rahi uiraa mai te « Eaha te haapaeraa maa ? » « No te aha tatou e haapae ai i te maa ? » « Eaha te taime e haapae ai tatou i te maa ? » e, « No te aha tatou e pure ai ia haapae ana‘e tatou i te maa ? » (a hi‘o Joseph B.Wirthlin, « The Law of the Fast », Ensign, Me 2001, 73–75). A vaiho i te tamarii tata‘itahi ia faahiti mai i te hoê mana‘o i roto i te aparauraa, a faatape‘a ia’na i te hoê hopearaa o te tuaina. A tape‘a i te tahi hopearaa o te tuaina tata‘itahi i roto i to outou rima. Ia hope te aparauraa, a ani i te mau tamarii e tape‘a ra i te tuaina ia haere mai i ropu i te piha haapiiraa e ia ruru i ta ratou mau tuaina no te hamani hoê taura paari. A parau e, na te tuaina tata‘itahi ta tatou i amui i hamani i te taura paari. A tauturu i te mau tamarii ia ite e, mai te reira atoa tatou, i te mau taime atoa e haapae e e pure tatou, te tuu ra ïa tatou i te puai i roto i to tatou iteraa papû.
E tauturu te hoê faaiteiteraa hi‘o i te mau tamarii ia haroaroa i te mau haapiiraa faahoho‘a-ore-hia.
Hepetoma 2 : Te riroraa ei taata maitai, o te raveraa ïa e te parauraa i te mau mea maitai i ni‘a ia vetahi ê.
A faaite i te haapiiraa tumu (tai‘o-aau-raa i te hoê irava) : A papa‘i « Ia hamani maitai outou ia outou iho » (Ephesia 4:32) i ni‘a i te tapura ereere e te hoê numera mai te 1 e tae atu i te 7 i papa‘ihia i te ta‘o tata‘itahi. A horo‘a hoê numera na te tamarii tata‘itahi mai te 1 e tae atu i te 7. A haamata na roto i te aniraa i te mau numera 1 ia ti‘a e ia parau e, « Ia » I muri iho a ani i te mau numera 2 ia ti‘a e ia parau e, « hamani » A na reira noa no te toe‘a o te pereota. A tapiti faahou e rave rahi taime. I muri iho a ani i te mau tamarii atoa ia faahiti amui i te taatoaraa o te pereota.
Tauturu ia taa maitai (faarooraa i te hoê aamu e te himeneraa) : A faati‘a i te mau tamarii i te hoê aamu no ni‘a i te maitai, mai te « Standing Up for Caleb » (Friend, Mati 2009, 4–5). A ani ia ratou ia faati‘a to ratou manimani rima rahi i ni‘a ia faaroo ana‘e ratou i te hoê ohipa hamani maitai i roto i te aamu, e ia huri i raro ia faaroo ana‘e ratou i te hoê ohipa e ere i mea hamani maitai. A himene « Soyons gentils » (CPE, 83). A ani i te mau tamarii ia ti‘a ia himene ana‘e ratou no ni‘a i te taata ta tatou e hamani maitai. A himene faahou, e a ani ia ratou ia huri i na manimani rima rahi i ni‘a ia ratou iho ia himene ana‘e ratou e, « A moi d’abord de me montrer gentil ».
Ia faaohipahia te mau tamarii i roto i te faaiteiteraa hi‘o, na te reira e faaô mai i te mau tamarii e e tauturu atoa te reira ia tape‘a noa i te anaanatae o te tahi atu mau tamarii.
Tauturu no te faaohiparaa (faaiteraa i te mau rave‘a no te hamani maitai) : A faaite e rave rahi taata i roto i te oraraa o te mau tamarii (mai te metua tane, te metua vahine, te tuahine, te taea‘e, te papa ruau, te hoa, e aore râ, te orometua) ma te papa‘i i ni‘a i te hoê api parau, te hoê hoho‘a, e aore râ, te tahi noa tapa‘o, (mai te taamu arapoa no papa, e aore râ, te turutootoo a papa ruau). A horo‘a i te reira mau tao‘a i te tahi mau tamarii ra, e a ani ia ratou ia haere mai i mua i te piha haapiiraa. A ani i te hoê tamarii ia faaite mai i te hoê ohipa maitai e nehenehe ta ratou e parau e aore râ, e rave no te taata ta ratou e tape‘a ra te tao‘a. I muri iho, a ani ia ratou ia horo‘a i ta ratou api parau papa‘ihia, ta ratou hoho‘a, e aore râ, ta ratou tao‘a i te tahi atu mau tamarii. A na reira faahou mai te mea e taime.
Hepetoma 3 : Te faatura o te auraro rahi ïa e te here i te Atua.
A faaite i te haapiiraa tumu (himeneraa) : A faaineine e rave rahi taura fifi arapoa e a faatautau i te hoê hoho‘a mafatu api parau i ni‘a iho. A papa‘i i te hoê ta‘o e aore râ, te hoê pereota tumu mai roto mai i te himene ra « Le recueillement, c’est l’amour » (CPE, 12) i ni‘a i te mafatu tata‘itahi (ei hi‘oraa, parahi ma te maniania ore, feruri, farii i te mana‘o i roto i te aau, e te vai atu ra). A ani e rave rahi tamarii ia oomo i te fifi arapoa. A himene « Le recueillement, c’est l’amour », e a ani i te mau tamarii e fifi arapoa to ratou ia haere mai i mua i te piha haapiiraa ma te faatura, ia himene-ana‘e-hia te ta‘o i papa‘ihia i ni‘a i ta ratou mafatu. A ani i te mau tamarii e fifi arapoa to ratou ia ti‘a i ni‘a ma te ana‘i ia ratou, e ia himene faahou i te himene.
E roaa te mau mafatu i ni‘a sharingtime.lds.org
Tauturu no te faaohiparaa (aparau i ni‘a i te faatura) : A faaineine i te mau api parau e aore râ, a papa‘i hoho‘a ohie noa i te mata, te rima, te avae, te tari‘a, te vaha e te feruriraa. A tapŭpŭ i te mau tamarii, e a vaiiho i te pŭpŭ tata‘itahi ia ma‘iti hoê e aore râ, e piti api parau e aore râ, hoho‘a. A ani i te pŭpŭ tata‘itahi ia faaite mai (i te mau ta‘o e te aparimaraa) e rave rahi rave‘a e nehenehe ai i teie tuhaa o to ratou tino e faatura na roto i te faaiteraa i te auraro e te here i te Atua.
E roaa te mau hoho‘a i ni‘a sharingtime.lds.org
Hepetoma 4 : Te haavare ore o te parauraa ïa i te parau mau noa’tu te mau hopearaa.
Tauturu ia taa maitai (aparauraa i ni‘a i te mau hopearaa) : A faaineine e rave rahi hi‘oraa (a hi‘o HAPT, 161–62) i reira te mau tamarii e ma‘iti ai eiaha e haavare e aore râ, e haavare. Ei hi‘oraa, « Ua tupai oe i to oe taea‘e, e ia ui mai to oe mama no te aha oia i ta‘i ai ». A ui, « Eaha te mau hopearaa o te haavare ore ? » I muri iho, a ui, « Eaha te mau hopearaa o te haavare ? » A tauturu i te mau tamarii ia ite e, e riro paha te mau hopearaa taime poto o te haavare ore ei mea teimaha, area râ i te tau roa e arata‘i te mau hopearaa i te hau e te oaoa.
Tauturu no te faaohiparaa (a hamani i te pehepehe) : A ani i te piha tata‘itahi (ma te tauturuhia e to ratou orometua) ia hamani i te hoê pereota hoê reni te roa e aore râ, te hoê pehepehe no ni‘a i te haavare ore. Ei hi‘oraa, « Mai te mea e parau mau ta’u e parau ra, eita ïa vau e hape ! » A ani i te piha haapiiraa tata‘iitahi ia faaite mai i ta ratou pereota i te tahi atu mau tamarii. A faaitoito ia ratou ia faahiti faahou i te reira pereota i te mau taime atoa e faahemahia ratou ia haavare.