ខែ មិនា
ព្យាការីដែលនៅរស់បង្រៀនខ្ញុំឲ្យជ្រើសរើសត្រឹមត្រូវ
« ឱ កូនប្រុសរបស់ឪពុកអើយ ចូរចងចាំ ហើយឲ្យចេះមានប្រាជ្ញានៅក្នុងយុវវ័យរបស់កូនចុះ មែនហើយ ចូររៀននៅក្នុងយុវវ័យរបស់កូន ឲ្យចេះកាន់តាមបញ្ញត្តិទាំងឡាយនៃព្រះ » ( អាលម៉ា 37:35 ) ។
ចម្រៀង៖ « ហាននឹងធ្វើត្រូវ »
( ទំនុកដំកើងព្រះ និងចម្រៀងកុមារ ទំព័រ 64--65 )
សូមបំពេញបន្ថែមគំនិតដែលបានផ្តល់ឲ្យនៅទីនេះ ជាមួយនឹងគំនិតរបស់អ្នកផ្ទាល់ខ្លួនខ្លះ ៗ ។ ជារៀងរាល់សប្តាហ៍ សូមដាក់ផែនការដើម្បី (1) សម្គាល់មើលអំពីគោលលទ្ធិ (2) ជួយកុមារយល់អំពីគោលលទ្ធិនោះ ហើយ (3) ជួយពួកគេអនុវត្តគោលលទ្ធិនោះនៅក្នុងជីវិតរបស់ពួកគេ ។ សូមសួរខ្លួនអ្នកថា « តើកុមារត្រូវធ្វើអ្វីខ្លះ ដើម្បីរៀនចេះ ហើយតើខ្ញុំអាចជួយពួកគេឲ្យទទួលអារម្មណ៍ពីព្រះវិញ្ញាណដោយរបៀបណា ? »
សប្តាហ៍ទី 1 ៖ ព្រះមានបន្ទូលតាមរយៈព្យាការីដែលនៅរស់ ។
កំណត់សំគាល់គោលលទ្ធិ ( សូមមើលការចង្អុលបង្ហាញ និងទន្ទេញបទគម្ពីរ ) ៖ អញ្ជើញកុមារម្នាក់ឲ្យឡើងមកខាងមុខក្តារខៀន ។ សូមប្រាប់ឲ្យកុមារផ្សេងទៀតធ្វើតាមការណែនាំរបស់គាត់ ឬនាង ។សូមខ្សឹបប្រាប់ការណែនាំងាយ ៗដល់កុមារ ដូចជា « ប្រាប់ពួកគេឲ្យទះដៃបីដង » ឬ « ប្រាប់ពួកគេឲ្យក្រោកឈរ និងដើរទៅកាន់កន្លែងមួយ » ។ សូមទុកឱកាសឲ្យកុមារពីរបីនាក់ ធ្វើជាអ្នកដឹកនាំ ។ សូមពន្យល់ថា ទោះបីជាពួកគេទាំងអស់គ្នាមិនបានស្តាប់ឮការណែនាំរបស់អ្នកក្តី ក៏ពួកគេអាចធ្វើតាមសេចក្តីណែនាំរបស់អ្នកបានដែរ ដោយសារពួកគេបានដឹងថាតើពួកគេត្រូវដើរតាមនរណា ។ សូមសួរថា តើយើងគួរតែធ្វើតាមនរណា ដើម្បីដឹងថាព្រះវរបិតាសួគ៌ចង់ឲ្យយើងធ្វើអ្វី ។ សូមបង្ហាញរូបភាពមួយរបស់ព្យាការីបច្ចុប្បន្នរបស់សាសនាចក្រ ។ សូមឲ្យកុមារនិយាយជាមួយគ្នាថា « ព្រះមានបន្ទូលតាមរយៈព្យាការីដែលរស់នៅ » ។ សូមអាន អេម៉ុស 3:7 និងសូមពន្យល់ពាក្យណាដែលកុមារមិនយល់ ។ សូមជួយកុមារឲ្យទន្ទេញនូវបទគម្ពីរ ( សូមមើល TNGC ទំព័រ 171–72 ) ។
សប្តាហ៍ទី 2 ៖ គណៈប្រធានទីមួយ និងពួកសាវកដប់ពីរនាក់គឺជាព្យាការី ។
សម្គាល់មើលអំពីគោលលទ្ធិ សូមសរសេរនៅលើក្តាខៀន « គណៈប្រធានទីមួយ និងពួកសាវកគឺជាព្យាការី » ។ សូមប្រាប់កុមារថា នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងត្រូវបានដឹកនាំដោយប្រធាននៃសាសនាចក្រ ព្រមទាំងទីប្រឹក្សាទាំងពីររូបរបស់លោក នៅក្នុងគណៈប្រធានទីមួយ និងពួកសាវកដប់ពីរនាក់ ។ សូមពន្យល់ថា គណៈប្រធានទីមួយ និងពួកសាវកដប់ពីរនាក់គឺជាព្យាការី ។
សូមលើកទឹកចិត្តឲ្យមានការអនុវត្តន៍( លេងល្បែងផ្គូរផ្គង ) ៖ សូមស្វែងរករូបថតនៃសមាជិកនៅក្នុងគណៈប្រធានទីមួយ និងកូរ៉ុមនៃពួកសាវកដប់ពីរនាក់ឲ្យបានចំនួនប្រាំមួយសន្លឹក ហើយសូមសរសេរឈ្មោះរបស់ពួកគាត់នៅលើក្រដាសមួយសន្លឹកផ្សេង ។ សូមផ្កាប់មុខក្រដាស និងរូបភាពនៅលើក្តាខៀន ។ សូមឲ្យកុមារម្នាក់បើករូបភាពឡើង ហើយសូមអញ្ជើញកុមារម្នាក់ទៀត ឲ្យបើកក្រដាសដែលមានឈ្មោះឡើង ។ ប្រសិនបើរូបភាព និងឈ្មោះមិនត្រូវគ្នាទេ សូមដាក់វាផ្កាប់មុខវិញ ហើយសុំឲ្យកុមារពីរនាក់ទៀតមកជ្រើសរើស ។ ប្រសិនបើក្រដាសត្រូវគ្នា សូមខ្សឹបប្រាប់ដល់កុមារពីរនាក់ទៀតនូវគោលការណ៍ដំណឹងល្អដែលអ្នកដឹកនាំទើបបានបង្រៀននៅ ក្នុងសន្និសីទទូទៅនាពេលថ្មី ៗ ( សូមមើលទស្សនាវដ្តីសន្និសីទដែលចេញថ្មី ៗបំផុតនៅក្នុង Ensign ឬ លីអាហូណា ) និងសូមឲ្យពួកគេសម្តែងជាកាយវិការដែលពួកគេអាចរស់នៅតាមគោលការណ៍ដំណឹងល្អ ។ សូមអញ្ជើញកុមារផ្សេងទៀតធ្វើការទស្សន៍ទាយនូវអ្វីដែលពួកគេកំពុងធ្វើ ។
សប្តាហ៍ទី 3 ៖ ព្យាការី និងសាវករបស់ព្រះនិយាយមកកាន់យើងនៅក្នុងសន្និសីទទូទៅ ។
សូមលើកទឹកចិត្តឲ្យមានការយល់ដឹង និងការអនុវត្តន៍( លេងល្បែង ) ៖ សូមសរសេរនៅលើក្រដាសមួយសន្លឹកនូវប្រយោគខ្លីៗមួយ ដែលដកស្រង់ចេញពីសារលិខិតនៅក្នុងសន្និសីទ មកពីសមាជិកនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។ សូមបិទក្រដាសនោះនៅលើក្តាខៀន ព្រមជាមួយនឹងរូបថតរបស់ពួកអ្នកដឹកនាំ ។ សូមពិភាក្សាពីសារលិខិតនីមួយៗ ។ សូមអញ្ជើញកុមារមួយក្រុមឲ្យទៅខាងក្រៅបន្ទប់ ។ សូមដកយកសារលិខិតមួយចេញពីក្តាខៀន ។ សូមអញ្ជើញកុមារឲ្យត្រឡប់មកវិញ ហើយធ្វើការសម្រេចចិត្តទាំងអស់គ្នាថាតើសារលិខិតណាមួយដែលបានបាត់ ។ កុមារឲ្យជ្រើសរើសចម្រៀងកុមារមួយបទ ដែលទាក់ទងនឹងសារលិខិត ហើយសូមច្រៀងទាំងអស់គ្នា ។ សូមអញ្ជើញកុមារឲ្យផ្តល់ជាយោបល់នូវវិធីទាំងឡាយដែលពួកគេ អាចអនុវត្តតាមសារលិខិត ។ សូមធ្វើសារឡើងវិញជាមួយនឹងសារលិខិតផ្សេងទៀត ។
សូមសម្របសម្រួលសកម្មភាពរបស់អ្នកទៅតាមអាយុ និងសមត្ថភាពរបស់កុមារដែលអ្នកបង្រៀន ។ នៅក្នុងសកម្មភាពនៅក្នុងសប្តាហ៍ទី 3 អ្នកអាចប្រើប្រាស់រូបភាពបន្ថែម ដើម្បីធ្វើជាសាក្សីដល់សារលិខិតសរសេរ ។
សប្តាហ៍ទី 4 ៖ ខ្ញុំទទួលបានពរជ័យនៅពេលដែលខ្ញុំជ្រើសរើសដើម្បីធ្វើតាមព្យាការី ។
សម្គាល់មើលអំពីគោលលទ្ធិ( ច្រៀងចម្រៀង ) ៖ សូមច្រៀងឃ្លាទីប្រាំបួន និងឃ្លាបន្ទរនៃបទ « Follow the Prophet » ( ស. ច. ក. ទំព័រ 110–11 ) ។ សូមអញ្ជើញកុមារឲ្យស្តាប់ពីមូលហេតុដែលយើងធ្វើតាមព្យាការី ។ សូមឲ្យកុមារនិយាយព្រមគ្នាថា « ខ្ញុំបានទទួលពរជ័យនៅពេលដែលខ្ញុំធ្វើតាមព្យាការី » ។
សូមលើកទឹកចិត្តឲ្យមានការយល់ដឹង ( សូមសម្តែងតាមសាច់រឿងនៅក្នុងបទគម្ពីរ ) ៖ សូមប្រាប់ដល់កុមារនូវរឿងរបស់អេលីយ៉ា និងស្ត្រីមេម៉ាយ សារិបតា ( សូមមើល ពង្សាវតារក្សត្រទី 1 17:8–16 ) ហើយសូមអញ្ជើញកុមារឲ្យសម្តែងតាមសាច់រឿងនោះ ។ ឧទាហរណ៍ ៖ « ព្រះអម្ចាស់បានប្រាប់ដល់ព្យាការីអេលីយ៉ា ឲ្យត្រឡប់ទៅកាន់ទីក្រុងដែលហៅថា សារិបតា ( ដើរនៅមួយកន្លែង ) ។ នៅពេលដែលគាត់ទៅដល់ទីក្រុង គាត់បានឃើញស្រ្តីម្នាក់កំពុងប្រមូលដំបង ( សូមសម្តែងជាកំពុងតែរើសដំបងឡើង ) ។ អេលីយ៉ា បានសុំទឹកស្ត្រីនោះទទួលទាន ( សូមសម្តែងជាឲ្យទឹកដល់នរណាម្នាក់ផឹក ) និងនំបុ័ងមួយដុំ ។ ស្រ្តីរូបនោះបានប្រាប់ដល់អេលីយ៉ាថា គាត់មានម្សៅធ្វើនំតែបន្តិច និងប្រេងដើម្បីធ្វើនំបុ័ងតែសម្រាប់កូនប្រុសរបស់គាត់តែបន្តិចទេ ( សូមគ្រវីក្បាលដែលបញ្ជាក់ថាអត់មាន ) ។ អេលីយ៉ា បានប្រាប់ដល់នាងឲ្យធ្វើនំបុ័ងខ្លះសម្រាប់គាត់ជាមុន ហើយព្រះនឹងប្រទានឲ្យនាងមានម្សៅ និងប្រេងធ្វើនំថែមទៀត ។ ស្រ្តីរូបនោះបានធ្វើតាមអេលីយ៉ា ( សូមសម្តែងជាកំពុងច្របាច់ម្សៅនំបុ័ង ) ។ ស្រ្តីរូបនោះបានមានម្សៅ និងប្រេងសម្រាប់ធ្វើនំគ្រប់គ្រាន់សម្រាប់ជាច្រើនថ្ងៃ ( សម្តែងជាបរិភោគ ) ។» សូមធ្វើសកម្មភាពឡើងវិញជាមួយដំណើររឿងរបស់ម៉ូសេ និងពស់លង្ហិន ( សូមមើល ជនគណនា 21:5–9 ) និងនីហ្វៃ ហើយនិងផ្ទាំងមាស ( សូមមើល នីហ្វៃទី 1 3–4; 5:21–22 ) ។ សូមសុំឲ្យកុមារចែកចាយពីរបៀបដែលតួអង្គនៅក្នុងសាច់រឿង បានទទួលពរជ័យពីព្រោះតែពួកគាត់ធ្វើតាមពាក្យទូន្មានរបស់ព្យាការី ។
សូមលើកទឹកចិត្តឲ្យមានការអនុវត្តន៍( ពិភាក្សាពីការបង្រៀនរបស់ព្យាការី ) ៖ សូមសួរកុមារថា « តើនរណាជាព្យាការីរបស់យើងសព្វថ្ងៃនេះ ? » ។ សូមបង្ហាញរូបថតរបស់ប្រធាននៃសាសនាចក្រសព្វថ្ងៃ ។ សូមពន្យល់ថា លោកគឺត្រូវបានហៅដោយព្រះ ។ សូមឲ្យកុមារពិភាក្សានៅក្នុងក្រុមតូចៗអំពីរបៀបដែលពួកគេអាចធ្វើតាមទ្រង់ ។ សុំឲ្យកុមារពីរបីនាក់នៅក្នុងក្រុមនីមួយៗចែកចាយពីគំនិតរបស់ពួកគេ ។ សូមអញ្ជើញកុមារឲ្យជ្រើសរើសវិធីណាមួយដែលពួកគេអាចធ្វើតាមព្យាការី នៅក្នុងសប្តាហ៍នេះ ។ សូមបង្កើតការរំឭកមួយដល់ពួកគេ ដើម្បីពួកគេយកទៅផ្ទះ ហើយចែកចាយជាមួយនឹងក្រុមគ្រួសាររបស់ពួកគេ ។ សូមរំឭកដល់កុមារថា ពួកគេអាចស្តាប់ឮពាក្យសំដីរបស់ព្យាការីនៅអំឡុងពេលសន្និសីទទូទៅ និងសូមលើកទឹកចិត្តពួកគេឲ្យមើល ឬស្តាប់សន្និសីទទូទៅជាមួយនឹងក្រុមគ្រួសាររបស់ពួកគេ ។ នៅក្នុងសប្តាហ៍បន្ទាប់ពីសន្និសីទ សូមឲ្យកុមារមួយចំនួនឲ្យចែកចាយពីបទពិសោធន៍ទាំងឡាយដែលពួកគេបានមាន នៅពេលដែលពួកគេបានស្តាប់ និងធ្វើតាមការបង្រៀនរបស់ព្យាការី ។
សូមបំបែកកុមារទៅជាក្រុមៗ ដែលអនុញ្ញតឲ្យកុមារកាន់តែច្រើនចូលរួមក្នុងសកម្មភាព ។ អ្នកអាចបង្កើតជាក្រុមៗតាមវិធីជាច្រើន ។ ឧទាហរណ៍ អ្នកអាចប្រាប់កុមារឲ្យធ្វើការរួមគ្នាជាក្រុមក្នុងថ្នាក់ ឬអ្នកអាចចាត់កុមារធំ ៗឲ្យនៅជាមួយកុមារតូច ៗ ។ គួរមានមជ្ឈឹមវ័យម្នាក់មើលខុសត្រូវនៅក្នុងក្រុមនីមួយ ៗ ។