Taahiraa 12

Taviniraa

Parau Tumu Faufaa : No te mea ua roaa ia outou te hoê araraa i te pae varua na roto i te Taraehara a Iesu Mesia, a faaite i te reira poro‘i ia vetahi ê, e a faaohipa i te reira mau parau tumu i roto i te mau mea atoa ta outou e rave.

Etauturu te taviniraa ia outou ia tupu i te rahi i roto i te maramarama o te Varua i roto i te roaraa o to outou oraraa. I roto i te taahiraa 10, ua haapii mai outou ia hi‘opo‘a i to outou oraraa i te mau mahana atoa e ia amo i te hopoi‘a o ta outou mau ohipa i rave. I roto i te taahiraa 11, ua haapii outou ia haamana‘o i te Faaora i tera e tera taime ia roaa ho‘i ia outou te arata‘iraa tamau a te Varua Maitai. I roto i te taahiraa 12 o te parau ïa no te toru o te tutau—te taviniraa ia vetahi ê— na te reira e haapapû i te hoê faaoraraa tamau e te hoê matararaa o te hara.

Ia haere outou i rapae ia outou iho e ia tavini e ti‘a ai, ei reira outou e vai ti‘amâ noa ai i te faatîtîraa. Ta te araraa i te pae varua e faatupu o te hinaaro tauturu ïa ia vetahi ê.

E poro‘i no te tia‘i ta outou no te tahi atu mau taata i roto i te faatîtîraa, no te mau taata atoa tei oto e tei pe‘ape‘a e o tei hinaaro ia feruri ia faaohipa i te rave‘a a te varua no te taui i to ratou oraraa, e no te mau taata atoa e titau nei i te parau mau e te parau ti‘a. Teie taua poro‘i ra, oia ho‘i, e Atua semeio te Atua, mai te matamua mai â (a hi‘o Moroni 7:29). Te faaite nei to outou oraraa i te reira. Te riro nei outou ei taata apî na roto i te Taraehara a Iesu Mesia. E mea maitai a‘e ta outou faaiteraa i teie poro‘i na roto i ta outou mau tautooraa no te tavini ia vetahi ê. A tavini ai outou, e haapuaihia e e faahohonuhia ïa to outou haroaroa e to outou ite.

Te faaiteraa i to outou iteraa papû no ni‘a i To’na maitai e To’na aroha, o te hoê ïa o te mau taviniraa faufaa roa ta outou e nehenehe e horo‘a. Te amoraa i te hopoi‘a a vetahi ê na roto i te mau ohipa maitai e na roto i te taviniraa horo‘a noa, e tuhaa ïa te reira no to outou oraraa apî ei pĭpĭ na te Mesia ra (a hi‘o Mosia 18:8).

Ua haapii mai te peresideni Ezra Taft Benson e : « Te mau tane e te mau vahine o te faafariu i to ratou oraraa i te Atua ra, e ite ïa ratou e, e rahi atu â te mau mea Ta’na e nehenehe e rave i roto i to ratou oraraa i ta ratou iho e nehenehe e rave. E faarahi Oia i to ratou oaoa, e faaaano i ta ratou hi‘oraa, e horo‘a i te anaanatae i to ratou feruriraa, e faaetaeta i to ratou mau uaua, e faateitei i to ratou varua, e faarahi i to ratou mau haamaitairaa, e faarahi i ta ratou mau rave‘a, e tamahanahana i to ratou varua, e faatupu i te hoa, e e ninii mai i te hau. O tei horo‘a i to’na ora no te tavini i te Atua ra e itehia ïa ia’na te ora mure ore » (« Jesus Christ—Gifts and Expectations », Ensign, Titema 1988, 4).

A imi na roto i te pure i te mau rave‘a no te tavini, ma te titau tamau noa ia arata‘ihia outou e te Varua Maitai. Mai te mea e, e hinaaro mau to outou, e itehia ïa ia outou e rave rahi mau rave‘a no te faaite i te mau parau tumu varua tei apohia mai e outou. E itehia ia outou te mau rave‘a no te faaite i to outou iteraa papû ia vetahi ê e tae noa’tu i te mau rave‘a no te tavini ia ratou na roto i te tahi atu mau rave‘a e rave rahi. A tavini ai outou ia vetahi ê ra, e vai noa ïa te haehaa i roto ia outou na roto i te faatumuraa i ni‘a i te mau parau tumu o te evanelia e i ni‘a ho‘i i te mau ohipa ta outou i apo mai. I reira ana‘e outou e ite papû ai e, e mea maitai ta outou mau opuaraa e te faaururaa. A haapapû i te horo‘a hua noa ma te ore e tia‘i i te hoê hopea taa ê. A faatura i te ti‘amâraa o vetahi ê. A haamana‘o e ua ino na te rahiraa o tatou hou a ineine ai tatou i te tai‘o e i te faaohipa i teie nei mau parau tumu. E parau atoa te reira no te rahiraa o te feia e hinaaro i te tauturu.

Ia ite ana‘e outou i te tahi atu mau taata te ora nei i roto i te faatîtîraa e aore râ, te mau taata tei herehia e ratou, e hinaaro paha outou e faaite ia ratou i teie buka arata‘i e i te LDS Family Services Addiction Recovery Program (Ohipa Taviniraa a te Utuafare Feia Mo‘a i te mau Mahana Hopea nei, Faanahoraa No te Ora i te Faatîtîraa). Mai te mea e, e hinaaro ratou e paraparau, a vaiiho ia ratou ia paraparau. A faati‘a i te tahi mau aamu to outou no te faaite ia ratou e, ua taa maitai outou i te mau mea ta ratou e parau ra. Eiaha e a‘o e aore râ, e tamata i te faaafaro ia ratou. A faaite noa ia ratou i te faanahonahoraa e i te mau parau tumu pae varua tei haamaitai i to outou oraraa.

E ite paha outou e, mai te mea e, aita te hoê taata faatîtîhia i ineine no te farii ia pee i teie mau parau tumu no te pae varua, penei a‘e te hoê ïa melo o te utuafare e aore râ, te hoê hoa o te taata faatîtîhia o te farii. E nehenehe e parau e, te mau taata atoa e ora nei i roto i teie anotau ati rahi e o te haapii e o te faaohipa i te mau parau tumu o te evanelia, e maitai ïa ratou. I te tahi taime e riro paha outou i te faauruhia ia horo‘a na te hoê taata i teie buka arata‘i e tae noa’tu i te Buka a Moromona. Mai te mea e, e na reira outou, te horo‘a ra ïa outou i te mau mauhaa tei tauturu ia outou ia patu faahou i to outou oraraa na roto i te haereraa mai i te Mesia ra.

Ia rave ana‘e outou i te hoê ohipa no te tahi atu taata e aore râ, ia faaite ana‘e outou i te poro‘i o te tia‘i e te faaoraraa, eiaha outou e faati‘a i te hoê taata ê atu ia turu‘i rahi roa mai i ni‘a ia outou. Ta outou hopoi‘a o te faaitoitoraa ïa ia vetahi ê o te rohi nei no te fariu ti‘a i ni‘a i te Metua i te Ao ra e i te Faaora no te ani i te arata‘iraa e i te mana. Taa ê noa’tu te reira, eiaha outou e faataupŭpŭ i te faaitoito ia ratou ia fariu ti‘a atoa i ni‘a i te mau tavini o te Fatu i haamanahia. E nehenehe te mau haamaitairaa rahi e fariihia mai ô mai i te Fatu ra na roto i te feia tei mau i te mau taviri o te autahu‘araa.

A tamata ai outou i te tauturu ia vetahi ê, e mea ti‘a ïa ia outou ia ite e, e mea fifi roa no ratou ia vai noa i roto i te faaoraraa mai te mea e, aita te mau melo o te utuafare e paturu mai ia ratou e aore râ, aita ratou e ite e, e taime roa to taua faaoraraa ra. Tera râ, e ora te mau huru taata atoa, noa’tu te huru o vetahi ê—noa’tu e, e mau taata fatata roa.

A hopoi ai outou i te poro‘i o te faaoraraa na roto i te mau parau tumu o te evanelia, e faaoroma‘i e e marû to outou e ti‘a ai. Aita e parahiraa i roto i to outou oraraa apî no te tau‘a ia outou ana‘e e aore râ, no te mana‘o faateitei. Eiaha e haamo‘e e, e mea nahea mai outou te haereraa mai, e e mea nahea to outou faaora-raa-hia i te aroha o te Atua. E na reira atoa o Iesu Mesia i ni‘a i te mau huru fifi atoa no te feia e tatarahapa e e fariu ti‘a Ia’na ra (Mosia 29:20).

I roto i to outou oaoa ia tauturu ia vetahi ê, a ara maitai ia vai noa te au maite i rotopu i ta outou ohipa faaiteraa i te poro‘i e ta outou ohiparaa i ni‘a i ta outou iho faanahonahoraa. Ta outou ohipa matamua o te tamau-noa-raa ïa outou iho i te faaohipa i teie mau parau tumu. Ia aifaito noa te maitai o ta outou mau tautooraa no te faaite i teie mau mana‘o ia vetahi ê, e te tape‘anoa-raa outou i te faaoraraa.

Teie mau parau tumu ta outou i apo mai e i faaohipa no te upooti‘a i ni‘a i to outou faatîtîraa o te mau parau tumu atoa ïa o te arata‘i ia outou i roto i te mau huru faito atoa o to outou oraraa no te haa ia au i te faanahoraa a te Fatu. Na roto i te faaohiparaa i teie mau parau tumu o te evanelia, e nehenehe ïa outou e tamau noa e tae roa’tu i te hopea mai ta te Fatu i faaue mai ra, e e nehenehe ta outou e rave i te reira ma te oaoa.

Te mau Taahira Ohipa

A faaite i te iteraa papû i mua i te taata ; a faananea i te mau piiraa e te mau tareni na roto i te taviniraa ia vetahi ê ; a faatere i te pô utuafare e te pure utuafare ; a faaineine no te haere i te hiero e ia haamori i reira

E ere to outou iteraa papû no ni‘a i te here e te maitai o te Metua i te Ao ra e o Ta’na Tamaiti Here o Iesu Mesia, i te hoê noa haapiiraa. Ua riro mai ra te reira ei ohipa mau. Ua tamata outou iho i te reira. A ite a‘e ra outou i To’na here ia outou, ua ite a‘e ra atoa outou i To’na here ia vetahi ê.

Ua haapii mai te peresideni Howard W. Hunter e, « o tatou o tei rave i te Taraehara, tei raro a‘e tatou i te faaueraa ia faaite i te iteraa papû haavare ore no ni‘a i to tatou Fatu e te Faaora » (« The Atonement and Missionary Work », haapiiraa na te mau peresideni misioni apî, 21 no tiunu, 1994, 2).

A faaite i to outou iteraa papû i to outou utuafare na roto i te parau e na roto i te ohipa i roto i to outou iho utuafare. A faaite i te iteraa papû i roto i te mau pô utuafare tamau, te pure utuafare, e te tai‘oraa i te mau papa‘iraa mo‘a e te utuafare. A faaite i te iteraa papû ia amui ana‘e outou i to outou utuafare i roto i te mau ohipa taviniraa e ia ora ho‘i outou i to outou oraraa mai te au i te Mesia ra. E nehenehe atoa ta outou e faaite i te iteraa papû i roto i te mau pureraa a te Ekalesia, mai te mau pureraa haapaeraa maa e te iritiraa mana‘o e aore râ, i roto i te mau piha haapiiraa e aore râ, a rave ai outou i te ohipa na te Ekalesia.

A faananea i te mau piiraa o te Ekalesia ta outou i farii. Mai te mea e, aita ta outou e hopoi‘a i roto i ta outou paroita e aore râ, i te tĭtĭ, a faaite i to outou episekopo e, ua ineine outou no te tavini. E nehenehe atoa ta outou e haamaitai ia vetahi ê na roto i te haaraa i roto i te ohipa aamu utuafare e na roto i te faaineineraa ia haamori e ia tavini i roto i te hiero e ia rave i te mau fafauraa i reira e te Fatu. Ua haapii mai te peresideni Gordon B. Hinckley e, « Te ohipa o te hiero o te hotu ïa o ta tatou mau haapiiraa e te ohiparaa » (i roto i te Conference Report, Atopa 2005, 3 ; e aore râ, Ensign, Novema 2005, 4). Na te mau parau tumu i haapiihia i roto i teie buka arata‘i e arata‘i ia outou i te hiero ; na te reira e faarahi i to outou hinaaro ia tavini i reira.

Noa’tu e ua mana‘o paha outou na mua‘e e eita te reira e tupu, i teie nei râ, e nehenehe ta outou e feruri e, e tomo outou na te mau uputa o te hiero mo‘a, ma te farii i te hau rahi i reira, e ma te haafatata roa i te Fatu i roto i To’na ra fare. I roto i te hiero, e itehia ïa ia outou te puai varua no te tamau noa i te haere i roto i to outou faaoraraa. Ua faaite papû mai o Elder Joseph B. Wirthlin no te Pŭpŭ no te Tino Ahuru Ma Piti e : « E nehenehe te rave-tamau-raa i te ohipa hiero e horo‘a mai i te puai i te pae varua. E nehenehe te reira e riro ei tutau i roto i te oraraa i te mau mahana atoa, ei pû no te arata‘iraa, no te parururaa, no te hau e no te heheuraa » (i roto i te Conference Report, Eperera 1992, 123 ; e aore râ, Ensign, Me 1992, 88).

A tavini ia vetahi ê o te rohi nei i roto i te faatîtîraa na roto i te faaiteraa ia ratou i te mau parau tumu o te faaoraraa ; a faaohipa i teie mau parau tumu i roto i te mau huru faito atoa o te oraraa

Te horo‘a nei te The LDS Family Services Addiction Recovery Program (Ohipa Taviniraa a te Utuafare Feia Mo‘a i te mau Mahana Hopea nei, Faanahoraa No te Ora i te Faatîtîraa) i te mau rave‘a faahiahia no te tavini. E nehenehe ta outou e tavini ia vetahi ê na roto i te haereraa i te mau pureraa e te faaiteraa i to outou mau iteraa, te faaroo e te tia‘i. E nehenehe ta outou e paturu ia vetahi ê e ia faaitoito ia ratou.

A faaohipa ai outou i te mau parau tumu o te evanelia, ua haapii mai outou e, no te mau huru faito oraraa atoa te Taraehara. Ua faaite papû mai te peresideni Boyd K. Packer no te Pŭpŭ no te Tino Ahuru Ma Piti Aposetolo e : « No te tahi mau tumu te feruri nei tatou e, i te hopea ana‘e o te oraraa tahuti nei e faaohipahia ai te Taraehara a te Mesia, no te faaora i te hi‘araa, i te pohe varua. Ua hau roa’tu ïa i te reira. E mana te reira no te mau taime atoa o te titauhia i te mau mahana atoa o te oraraa. Ia mauiui tatou e aore râ, ia ahoaho e aore râ, ia ati roa i te hara e aore râ, i te teimaha o te pe‘ape‘a, e nehenehe Ta’na e faaora ia tatou » (i roto i te Conference Report, Eperera 2001, 28 ; e aore râ, Ensign, Me 2001, 23).

E nehenehe ta outou e faaite i teie poro‘i ia vetahi ê na roto i to outou hi‘oraa maitai e ta outou mau parau faaitoito. Ia farerei ana‘e outou i te taata i roto i te hoê mahana, a aroha ia ratou ma te mata ataata. A faaite i te mauruuru ia ratou no te ohipa ta ratou e rave ra. Ia tae i te taime au, a faaite i te iteraa papû no te tia‘iraa e roaa mai na roto i te Taraehara a Iesu Mesia.

Te Haapiiraa e te Haroaroaraa

E tauturu te mau papa‘iraa mo‘a e te mau haapiiraa a te feia faatere o te Ekalesia ia outou ia tamau noa i to outou faaoraraa. A tai‘o i teie mau irava e teie mau faahitiraa parau i muri nei. A faaohipa i te reira no te feruri hohonu na roto i te pure, no te haapii ia outou iho, e no te aparauraa i roto i te pŭpŭ.

Faafariuraa e te faaoraraa

« Te auraa o te parau faafariuhia, o te fariu-ê-raa ïa i te hoê ti‘aturiraa e aore râ, i te hoê ohipa e ia fariu atu i ni‘a i te tahi. Te faafariuraa o te hoê ïa tauiraa i te pae varua e i te pae morare. Aita te faafariuraa e titau ia farii ia Iesu e Ta’na mau haapiiraa i roto noa i te mana‘o, e titau atoa râ te reira i te hoê faaroo puai i roto Ia’na e i Ta’na evanelia—te faaroo o te faatupu i te tauiraa, te tauiraa te hoê taata i to’na haroaroaraa i te auraa o te oraraa, e i to’na haapa‘o i te Atua i roto i te maitai, i te mana‘o e i te huru » (Marion G. Romney, i roto i te Conference Report, Guatemala Area Conference 1977, 8).

• Ua a‘o te Faaora ia Petero e, ia faafariuhia mai oia ra, e faaitoito oia i to’na mau taea‘e (a hi‘o Luka 22:32). A papa‘i i te tatararaa a te peresideni Romney no ni‘a i te faafariuraa e e mea nahea te reira i te tu’ati i ni‘a i to outou iteraa i roto i te faaoraraa.

• Eaha to outou mana‘o no ni‘a i te faaitoitoraa ia vetahi ê i roto i to ratou faaoraa mai roto mai i te faatîtîraa ?

Haereraa rahi i mua na roto i te mau taahiraa ha‘iha‘i

« No reira eiaha e rohirohi i roto i te ohipa maitai, no te mea te haamau atu nei outou i te niu no te hoê ohipa rahi roa. E na roto i te mau mea iti nei e tupu mai ai tei rahi roa ra » (PH&PF 64:33).

• A papa‘i i to outou mau mana‘o a feruri ai outou ia haapa‘o i teie mau parau tumu i roto i te mau huru faito atoa o to outou oraraa. Nahea te iteraa e, na roto i te mau taahiraa iti nei e oti ai te mau ohipa rarahi, i te tauturu ?

Faaitoitoraa ia vetahi ê

« O teie ïa to‘u oaoaraa, peneia‘e o te riro vau ei mauhaa i te rima o te Atua e arata‘ihia’i te hoê taata i te tatarahapa ; o te reira ïa to‘u oaoaraa.

« E inaha, ia ite au i to‘u ra mau taea‘e e rave rahi i te aau tatarahapa mau ra, e i te haereraa mai i te Fatu i to ratou Atua, ua î roa to‘u aau i te oaoa i reira; e ua haamana‘o ho‘i au i ta te Fatu i rave mai ia‘u ra ; oia ïa, ua faaroo mai oia i ta‘u ra pure ; e i reira ho‘i au i haamana‘o ai i to’na ra rima aroha i faatorohia mai ia‘u nei ra » (Alama 29:9–10).

• Ua haapii mai tatou e, e mea faufaa roa no te faaoraraa ia vai to tatou hinaaro e faaite i to tatou iteraa papû no ni‘a i teie mau parau tumu. Nahea te faaiteraa i to outou iteraa i te tauturu ia outou ia vai paari noa i roto i to outou faaoraraa ?

« (E teie nei, no te mea) ua au ia outou ia oto, a oto ai te feia oto ra ; oia ïa, e ia haamahanahana ia ratou i tei au ia haamahanahanahia ra, e ia ti‘a ei ite o te Atua i te mau mahana atoa, e i te mau mea atoa, e i roto i te mau vahi atoa ta outou e parahi ra, e ia tae noa’tu i te poheraa, ia faaorahia outou e te Atua, e ia amuihia i roto i to te ti‘a-faahou-raa matamua, ia noaa te ora mure ore ia outou—

« E teie nei, te parau atu nei au ia outou e, mai te mea i hinaarohia teie e to outou aau, eaha te mea e ore e au ai ia outou ia bapetizohia i te i‘oa o te Fatu ei faaite i mua ia’na e, i faaau outou i te hoê faufaa ia’na ra, ia haamori atu outou ia’na, e ia haapa‘o i ta’na ra mau faaue, ia rahi atu ta’na niniiraa mai i to’na Varua i ni‘a ia outou ? » (Mosia 18:9–10).

• E tauturu to outou iteraa i te faatîtîraa ia outou ia faaitoito i te feia e aro nei i te faatîtîraa ; na to outou iteraa i roto i te faaoraraa e tauturu ia outou ia tamahanahana ia ratou. A papa‘i i to outou hinaaro rahi e i to outou aravihi ia riro ei ite no te Atua mai te taime a pee ai outou i te mau taahiraa o te faaoraraa.

Taviniraa na roto i te tautururaa a te Fatu

« Ua ma‘iti te Faaora i te mau taata paruparu no te haapii i te e‘a e tae atu ai i te maitai roa ra. Ua na reira oia i tahito ra ; e te na reira ra oia i teie nei » (Thomas S. Monson, i roto i te Conference Report, Eperera 2004, 19 ; e aore râ, Ensign, Me 2004, 20).

• I te tahi taime e uiui tatou e, ua ineine anei tatou no te faaite i te faaoraraa ia vetahi ê no te mea aitâ tatou i faaohipa maitai atu ra i teie mau parau tumu. Nahea te iteraa outou e, e ohipa te Faaora na roto i te mau taata paruparu, i te tamarû i to outou mata‘u ?

Te mana o te Atua no te faaoraraa

« Aore ho‘i au i haama i te evanelia o te Mesia ra : no te mea, o te mana ïa o te Atua, ia ora te feia atoa i faaroo ra » (Roma 1:16).

• A papa‘i i to outou mau mana‘o e to outou mau feruriraa a hi‘o ai outou i muri e a feruri ai e, e titauhia te iteraa pae varua no te tauturu ia outou ia upooti‘a i ni‘a i to outou faatîtîraa. A papa‘i i te tahi mau feruriraa haaparuparu o ta outou paha e parau ia vetahi ê e, ua ora outou na roto i to outou faaohiparaa i te mau parau tumu o te evanelia a te Mesia.

« A haere oe i ta oe haereraa i te vahi ta‘u i hinaaro ra, e e horo‘ahia’tu ia oe e te Faaa‘o i te ohipa ta oe e rave e i te vahi ho‘i ta oe e haere ra.

« A pure tamau noa, oi tomo atu ai oe i roto i te faahemaraa e e mo‘e atu ai to oe ra utu‘a.

« A faaitoito noa oe e tae noa’tu i te hopea, e inaha, tei piha‘i iho ïa vau ia oe na. E ere teie nei mau parau i ta te hoê taata e a ore râ i ta te mau taata’toa, no‘u nei râ, oia o Iesu Mesia, to oe nei Faaora, na roto i te hinaaro o te Metua » (PH&PF 31:11–13).

• Ua î roa te mau papa‘iraa mo‘a i te arata‘iraa no te feia e hinaaro e tape‘a noa i te huru oraraa pae varua o te faaho‘i ia ratou i mua i te Atua. Eaha te arata‘iraa papû maitai ta outou e ite nei i roto i teie mau irava ?