Taahiraa 5

Faîraa

Parau Tumu Faufaa : Ia farii outou iho, i mua i to outou Metua i te Ao ra na roto i te i‘oa o Iesu Mesia, i mua i te mana autahu‘araa, e i mua i te tahi atu taata, i te huru mau o ta outou mau hapa.

Te tahi huru i matauhia e te rahiraa o te mau taata tei topa i roto i te faatîtîraa maori râ, te faaearaa i te hiti. Noa’tu tei roto i te rahiraa taata aore râ, tei tomo mai i roto i te mau faaoaoaraa i reira vetahi e mana‘o ai eita e tano no matou teie vahi. A amui ai matou i roto i te mau apooraa faaoraraa, ua haamata matou i te haere mai i rapae i te faataa-ê-raa ia matou i te hiti, e na reira ho‘i te faatîtîraa i te tupuraa mai. I te haamataraa, e rave rahi o matou tei parahi noa no te faaroo, i te pae hopea râ ua tupu mai te mana‘o hau e ua paraparau matou. Noa’tu râ i te reira, ua tape‘a matou i te rahiraa o te mau parau na matou iho—e mau parau haamâ, e te au ore, e mau mea mauiui no te mafatu, e mau mea tei haaparuparu ia matou.

I roto i te taahiraa 4 ua rave matou i te tahi tuatapaparaa papû e te hohonu, tei riro ei iteraa na matou iho. Ua vai noa matou matou ana‘e e to matou haamâ i te huru o to matou oraraa tahito. I to matou raveraa i te taahiraa 5, i reira to matou tapuraa i te mau ruuruuraa o ta matou mau ohipa huna o te faataa-ê-raa e ia farii i te tahi hi‘oraa atea no matou iho e to matou oraraa tahito. Na roto i te faîraa ua haamata matou i te faaite i to matou tatarahapa i mua i to matou mau hoa, te utuafare e ia vetahi ê. E tuhaa te reira no te tata‘iraa e no te haamau-faahou-raa i te mau auraa tei mutu. Na roto atoa i te faîraa ua titau atoa matou i te faaoreraa hapa a te Fatu na roto i te pure e na roto ho‘i i te feia faatere o te autahu‘araa.

Ua ite matou e, e mea maitai a‘e ia rave i te taahiraa 5 i muri noa‘e te faaotiraa te taahiraa 4. Te faataereraa, e au ra ïa e, o te iteraa i te hoê pepe tei haapê e aita i tamâhia. E au ra e ua riro te taahiraa 5 ei taahiraa teimaha roa, i to matou râ aniraa i te tauturu i te Fatu, ua horo‘ a mai ïa Oia i te itoito e te puai ia matou. I muri a‘e i te hi‘opo‘araa i ta matou mau tuatapaparaa, ua haere matou e faî i mua i to matou episekopo i te mau mea ti‘a ore atoa e aore râ i te hoê hara e aore râ i te hoê ohipa tano ore tei tape‘a ia matou ia ore ia farii i te hoê parau faati‘a no te hiero. Ua riro teie faaiteraa ta matou i mua i te mana autahu‘araa ei tuhaa faufaa roa no te faaoraraa e te ora.

Ua ma‘iti atoa matou i te tahi taata ti‘aturihia ei ia’na ra hoi matou i faaite ai i te huru mau o ta matou mau ohipa ti‘a ore. Ua tamata matou i te ma‘iti i te hoê taata tei rave i te taahiraa 4 e te 5 e tei paari maitai i roto i te evanelia. Ua haamata matou i te apooraa na roto i te pure no te ani i te Varua, e i muri iho, ua tai‘o puai matou i ta matou mau tuatapaparaa. Ua tauturu pinepine mai te mau taata e faaroo mai ra ia matou ia ite i to matou mau vahi fifi e vai rii noa ra â. Ua tauturu ratou ia matou ia faatiti‘aifaro i to matou oraraa e ia haapae i te faarahi e aore râ i te faaiti i ta matou hopoi‘a.

Ua riro te papa‘iraa i ta matou mau tuatapaparaa mai te papa‘iraa e rave rahi hanere tuhaa ohipa tei tupu i roto i to matou oraraa. I roto i te taahiraa 5, ua ti‘a ia matou ia ite i to matou oraraa tei hohorahia, mai tera tuhaa e tera tuhaa, na roto i te mau parau i papa‘ihia. A na reira ai matou, ua haamata matou i te ite i te mau e‘a o te mau ino tei arata‘i i ta matou mau ma‘itiraa. Ua haamata matou i te ite i to matou hinaaro ia faatupu i te mau mana‘o e te mau feruriraa ti‘a ore (te hinaaro puai, te mata‘u, te te‘ote‘o, te pohehae, te faati‘araa ia’na iho, te riri, te inoino, te hiaai e te hinaaro vî ore, e te vai atu ra). Ua riro mau teie mau mana‘o e teie mau feruriraa ei tumu mau o to matou mau ino.

I to matou faaotiraa i te taahiraa 5, ua faaite matou i mua i te Atua, ia matou iho e i te tahi atu ite, i ta matou fafauraa no te hoê oraraa apî tei niu-papû-hia i ni‘a i te faaiteraa e i te oraraa i te parau mau. Noa’tu e ua riro te taahiraa 5 ei hoê o te mau taahiraa teimaha roa ia rave, ua roaa te itoito ia matou na roto i te a‘oraa a te peresideni Spencer W. Kimball : « E ore e tupu te tatarahapa maori râ ia iriti te taata i to’na aau e ia farii i ta’na mau ohipa i rave ma te otohe ore e aore râ ma te marôraa ore… Te mau taata tei ma‘iti i te faaruru i te fifi e tei taui i to ratou oraraa, e feruri ïa ratou i te taime matamua e, e mea teimaha te tatarahapa, e ite râ ratou e, o te e‘a au roa a‘e ïa i te taime a amu ai ratou i to’na ra mau hotu“ » (« The Gospel of Repentance », Ensign, Atopa 1982, 4).

Ua ite matou i te mea ta te peresideni Kimball i haapii mai. Ia hope te taahiraa 5 i te ravehia e matou ma te ti‘a e te afaro maitai, ua vai noa matou aore hoê mea huna. Ua faaite papû matou i to matou hinaaro ia « haapae atu (matou) i ta (matou) atoa ra hara » (Alama 22:18) ia ti‘a ho‘i ia matou ia farii i te hoê ite rahi a‘e no te here o te Atua e te here e te patururaa a te mau taata maitai e rave rahi tei tauturu mai ia matou.

Te mau Taahiraa Ohipa

A haamata i te titau i te faaoreraa hara ; a farerei i te episekopo mai te mea e titauhia ; ia vai parau mau i mua i te Atua, ia outou iho e ia vetahi ê

Te « hopoi‘a a te mau taata atoa o te faîraa ïa i ta ratou mau hara atoa i mua i te Fatu » (Bible Dictionary, « Confession », 649). E mea ti‘a ia faîhia te mau hara rarahi i mua i te mau faatere autahu‘araa ti‘a, mai te episekopo : « Te Fatu ana‘e te ti‘a ia faaore i te hara, tera râ e ohipa faufaa rahi roa ta teie mau faatere autahu‘araa i roto i te faanahoraa no te tatarahapa. E tape‘a huna ratou i ta outou mau faîraa, e e tauturu ratou ia outou i roto i te taatoaraa o te faanahoraa o te tatarahapa. Ia faaite outou i te parau mau ia ratou. Mai te mea e, e faaite outou i te tahi noa tuhaa, ma te faaite noa i te mau hape na‘ina‘i, eita ïa e noaa ia outou i te faatiti‘aifaro i te hara rahi i hunahia. Ia haamata oioi ana‘e outou i teie tuhaa ohipa, e ite-oioi-atoa-hia ïa ia outou te hau e te oaoa o te tupu mai na roto i te semeio o te faaoreraa hara » (True to the Faith : A Gospel Reference [2004], 134).

A haapa‘o maitai e a faaohipa i te paari ia ma‘iti ana‘e outou i te hoê taata taa ê atu i te hoê taata faatere autahu‘araa no te faaite i ta outou mau ohipa ti‘a ore. Eiaha e faaite i te mau mea fifi i te mau taata ta outou e mana‘o ra e, eita ratou e horo‘a mai i te mau arata‘iraa ti‘a, te horo‘a mai i te mau parau hape, e aore râ e mea fifi no ratou ia tape‘a i te parau huna. Te mau taata ta outou e faaite i ta outou tapura hi‘opo‘a, ei mau taata ti‘aturi-papû-hia i roto anei i te parau e i te ohipa.

A vaiiho i te hau ia tae mai i roto i to outou oraraa

Ua faaara mai te peresideni Brigham Young i te mau melo eiaha e faaite faufaa ore noa i te mau hara : « Ia ani ana‘e matou i te mau taea‘e, mai ta matou e na reira pinepine nei, ia paraparau i roto i te mau pureraa oro‘a, e titau matou ia ratou, mai te mea e, ua faaino ratou i to ratou mau taata tupu, ia faî i ta ratou mau ohipa ino ; eiaha râ e faaite i to outou huru haapa‘oraa ore aita te taata i ite maori râ o outou ana‘e. A faaite i te taata i te mau mea i au ia ratou ia faaroo. Mai te mea e, ua hara outou i te taata, a tatarahapa i mua ia ratou. Mai te mea e, ua hara outou i te hoê utuafare e aore râ, i te taata e faaea ra i te tahi a‘e pae i ô outou, a haere e farerei ia ratou e a tatarahapa i mua ia ratou. Mai te mea e, ua hara outou i te mau melo o te paroita, a tatarahapa i mua i te Paroita. Mai te mea e, ua hara outou i te hoê taata, a rave mai i taua taata ra, e a tatarahapa i mua ia’na. E mai te mea e, ua hara outou i mua i to outou Atua, e aore râ, ia outou iho na, a tatarahapa i mua i te Atua, e a tape‘a te reira na outou iho, no te mea aita vau e hinaaro ia ite i te reira » (Discourses of Brigham Young, ma‘itihia e John A. Widtsoe [1954], 158).

I te tahi taime e ite outou i te tahi mau taata i roto i te mau apooraa faaoraraa e aore râ i te tahi atu vahi, i te faahiti-tamau-noa-raa i ta ratou mau hara e to ratou mau paruparu e aore râ te mau hara ta vetahi ê i rave i ni‘a ia ratou. E tamau noa ratou i te faî e aita e rave‘a e itehia ai ia ratou te hau.

E ere te taahiraa 5 ei taahiraa no te haamana‘o tamau noa i te mau mea tano ore. E mea taa ê roa te taahiraa 5. E rave tatou i te taahiraa 5 eiaha no te tape‘a tamau i te mau mea ta tatou i tatarahapa, no te haamata râ i te ite i te ino i te maitai no tatou iho e no te ma‘iti i te maitai.

Te Haapiiraa e te Haroaroaraa

E riro teie mau irava e te mau faahitiraa parau a te feia faatere o te Ekalesia ei tauturu ia outou ia rave i te taahiraa 5. A faaohipa i te reira no te feruri hohonu, no te haapii e no te papa‘i. Ia vai parau mau noa outou e te papû maitai i roto i ta outou mau papa‘iraa.

Faîraa i mua i te Atua

« O vau, o te Fatu, te faaore atu nei au i te mau hara a ratou o tei faî mai i ta ratou ra mau hara i mua ia‘u nei e ia ani mai ho‘i i te faaoreraa » (PH&PF 64:7).

• Nahea te faîraa i ta outou mau hara i mua i te Atua i te tauturu ia outou ia rave i te mau tauiraa maitai i roto i to outou oraraa ?

• Te ri‘ari‘a nei te rahiraa o tatou e aita e hinaaro ia rave i te taahiraa 5. Nahea te faîraa i ta outou mau hara i mua i te Atua i te horo‘a mai i te itoito e te puai ia outou no te faî i mua i te tahi atu taata ?

Faîraa i mua ia vetahi ê

« E faî i ta outou mau hapa, te tahi i te tahi, e pure ho‘i te tahi i te tahi, ia faaorahia outou » (Iakobo 5:16).

• E riro outou i te mata‘u o te faaru‘e mai te hoê taata ia outou no te mea ua ite oia i to outou mau ino e to outou mau fifi atoa. Area te ti‘a faatere no te autahu‘araa e aore râ te hoê hoa rahi tei ite eaha mau te tereraa o te faaoraraa, e pahono mai ïa oia ma te ite e ma te aroha. Nahea taua huru pahonoraa ra i te tauturu ia outou ia ora ?

Tamataraa ia riro ei taata maitai i mua ia vetahi ê

« Eiaha e vaiiho i te hoê taata ia faaite i to’na iho parau ti‘a… ia faî oioi oia i ta’na mau hara, ei reira ta’na hapa e faaorehia ai, e rahi atu ïa to’na hotu » (Joseph Smith, in History of the Church, 4:479).

• Te mana‘ona‘oraa rahi a te mau taata e rohi nei i roto i to ratou faatîtîraa o te hinaaro rahi ïa ia riro ei taata maitai i mua ia vetahi ê. Nahea teie hinaaro ia tape‘a ia outou ia maitai e ia « rahi atu te hotu » (e aore râ te ohipa maitai) ?

• Nahea to outou huru e taui ai mai te mea e e haapa‘o noa outou ia riro ei taata maitai i mua i te Atua ?

Te Aau tae

« A haere, e tei hara ia‘u ra, e haava oe ia’na mai te au i te mau hara ta’na i rave ra ; e ia faî mai oia i ta’na mau hara ia oe e ia‘u atoa, e ia tatarahapa ma to’na aau atoa, e faaore oe i ta’na ra mau hara, e e na reira atoa ho‘i au » (Mosia 26:29).

• Ei aau tae to outou a faî ai outou i ta outou mau hara. Ia huna outou i te tahi tuhaa o ta outou faîraa a feruri na i te ino ta te reira e faatupu i ni‘a i ta outou mau tautooraa ma to outou aau atoa. Eaha te tuhaa o ta outou tapura hi‘opo‘a, mai te mea te vai ra, o ta outou i huna ?

• Eaha tei roaa ia outou a tamau noa ai outou i te huna i te reira tuhaa o ta outou tapura hi‘opo‘a ? Eaha ta outou i ere ?

A Faî oioi i te mau hara i te taime iho a ite ai outou i te reira

« Tei taua matahiti ihora, ua itea ta ratou hape, e ua faî i ta ratou ra hape » (3 Nephi 1:25).

• Ua riro teie irava ei hi‘oraa no te mau taata tei ore i haroaroa i te faî i ta ratou mau hape i te taime iho, a faaitehia mai ai te reira ia ratou. Eaha te mau maitai i te raveraa i te taahiraa 5 i muri noa iho i te hoperaa te taahiraa 4 ?

• Eaha te mau fifi o te faataereraa i te taahiraa 5 ?

Tamarûraa i te pe‘ape‘a e te iteraa i te hau

« Aita vau i hinaaro ia parau noa i ta oe mau hara ia faaahoaho i to oe aau na, ahiri aita te reira e maitai no oe » (Alama 39:7).

• E parau te tahi mau taata e te faateimaha roa nei tatou i ni‘a i te mau mea au ore i roto i te oraraa na roto i te raveraa i te taahiraa 4 e te 5 e na roto i te reira e rahi roa’tu to tatou pe‘ape‘a. I roto i teie irava, te haapiihia mai nei tatou e, te hi‘oraa i to tatou mau hape e riro te reira ei maitai no tatou, eiaha râ no te « faaahoaho » (e aore râ haape‘ape‘a) i to tatou aau. E mea nahea te taahiraa 4 e te 5 i te tamarû i to outou pe‘ape‘a e ia horo‘a mai i te hau ?

Haapaeraa i te hara

« Na roto i teie nei mea e ite ai outou e mai te mea ua tatarahapa te taata i ta’na ra mau hara—inaha, e faî mai oia i te reira e e haapae ê roa’tu ho‘i » (PH&PF 58:43).

• Te auraa no te parau e haapae roa i te hoê mea o te faaru‘eraa ïa i te reira e hope roa. Nahea outou i te faaite i to outou hinaaro ia haapae ê roa i ta outou mau peu tahito i roto i te taahiraa 5 ?