ការនិយាយជាមួយសមាជិកអំពីភេទ

ពេលខ្លះ សមាជិកមានសំណួរទាក់ទងទៅនឹងអារម្មណ៍របស់ពួកគេអំពីភេទ ។ ពួកគេអាចមានសមាជិកគ្រួសារ ឬមិត្តភក្តិដែលកំពុងប្រឈមមុខទៅនឹងសំណួរបែបនេះ ។ ឬពួកគេប្រហែលជាឆ្ងល់អំពីសារលិខិតដែលពួកគេបានស្ដាប់ឮនៅក្នុងពិភពលោកនេះ ដែលទាក់ទងទៅនឹងភេទ ។

ប្រសិនបើសមាជិកមករកអ្នក ដើម្បីស្វែងរកដំបូន្មានអំពីបញ្ហាដែលទាក់ទងទៅនឹងភេទ សូមអធិស្ឋានស្វែងរកការណែនាំមកពីព្រះវិញ្ញាណ ។ សូមជួយពួកគេឲ្យពិចារណាអំពីសំណួររបស់ពួកគេ តាមទស្សនវិស័យនៃសេចក្ដីពិតដ៏អស់កល្បជានិច្ចនៃផែនការរបស់ព្រះវរបិតាសួគ៌សម្រាប់បុត្រាបុត្រីរបស់ទ្រង់ ។ ការស្តាប់ដោយសេចក្តីស្រឡាញ់ និងសេចក្តីអាណិតអាសូរ ជួយពួកគេឲ្យពឹងផ្អែកទៅលើព្រះអង្គសង្គ្រោះ ដើម្បីទទួលបានការយល់ដឹង និងកម្លាំងខាងវិញ្ញាណ ។

នៅពេលអ្នកព្យាយាមយល់ និងជួយដល់បុគ្គលទាំងនេះ សូមគិតអំពីតម្រូវការដើម្បីគាំទ្រដល់គ្រួសារនេះ និងប្រើប្រាស់ធនធានដែលមាន ។ សូមមើល « បុគ្គលប្ដូរភេទ ៖ ការគាំទ្រមនុស្សដទៃ » នៅក្នុងប្រធានបទ ជួយដល់ជីវិត ក្នុងបណ្ណាល័យដំណឹងល្អ ។

ចំណាំ ៖ ភេទ គឺមិនដូចគ្នាទៅនឹងទំនោរខាងផ្លូវភេទទេ ។ មនុស្សមួយចំនួនដែលចាត់ទុកខ្លួនឯងថាជាបុគ្គលប្ដូរភេទ មិនមានបទពិសោធន៍ប្រតិព័ទ្ធភេទដូចគ្នានោះទេ ។ ស្រដៀងគ្នានេះដែរ អ្នកដែលមានបទពិសោធន៍ប្រតិព័ទ្ធភេទដូចគ្នា មិនចាំបាច់សួរអំពីភេទរបស់ពួកគេឡើយ ។ សម្រាប់ជំនួយនៅក្នុងការសន្ទនាអំពីទំនោរខាងផ្លូវភេទ សូមមើល « ការប្រតិព័ទ្ធភេទដូចគ្នា » នៅក្នុងធនធានការប្រឹក្សា ។

សេចក្តីពិតដ៏អស់កល្បជានិច្ច

យើងគឺជាបុត្រា និងបុត្រីដ៏ស្ងួនភ្ងានៃព្រះមាតាបិតាសួគ៌—នេះគឺជាអត្តសញ្ញាណដ៏សំខាន់បំផុតរបស់យើង ។

យើងបានរស់នៅជាមួយព្រះ មុនពេលយើងបានចាប់កំណើត ។ ក្នុងនាមជាបុត្រាបុត្រីរបស់ទ្រង់ យើងមានសក្តានុពលដើម្បីប្រែក្លាយដូចជាទ្រង់ ។

អត្តសញ្ញាណរបស់យើងជាបុត្ររបស់ព្រះ គឺជាអាទិភាពដ៏ខ្ពស់បំផុតរបស់យើង ។

សូមមើលផងដែរ រ័សុល អិម ណិលសុន « ការជ្រើសរើសដែលជះឥទ្ធិពលលើភាពអស់កល្បជានិច្ច » ( ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី ១៥ ខែ ឧសភា ឆ្នាំ ២០២២ ) នៅលើបណ្ណាល័យដំណឹងល្អ; ជាពិសេសនៅផ្នែកដែលមានចំណងជើងថា « ដំបូង ស្គាល់សេចក្ដីពិតអំពីខ្លួនអ្នកជានរណា » ។

រូបកាយជាប្រុស និងស្រីរបស់យើង ត្រូវបានបង្កើតឡើងតាមរូបអង្គនៃព្រះ ។

ភាពខុសគ្នារវាងបុត្រីរបស់ព្រះវរបិតាសួគ៌ និងបុត្រារបស់ទ្រង់ គឺមានសារៈសំខាន់នៅក្នុងផែនការដ៏អស់កល្បជានិច្ចរបស់ទ្រង់ ។ ភាពខុសគ្នាទាំងនោះ អនុញ្ញាតឲ្យយើងបង្កើតជីវិត ព្រមទាំងមានក្រុមគ្រួសារមានសុភមង្គល និងនៅដ៏អស់កល្បជានិច្ចផងដែរ ។ ដោយហេតុនេះហើយ ទ្រង់បង្គាប់ឲ្យយើងចាត់ទុករូបកាយរបស់យើង និងអំណាចនៃការបង្កើតកូន ជាអំណោយទានដ៏ពិសិដ្ឋ តាមរយៈការគោរពតាមច្បាប់ព្រហ្មចារីភាព ។

សូមមើលផងដែរ លោកុប្បត្តិ ១:២៧; កូរិនថូស ទី១ ១១:១១ ។

ពួកយើងម្នាក់ៗមានរូបកាយផង និងវិញ្ញាណផង ហើយរូបកាយរបស់យើងមានលំនាំតាមរូបរាងនៃវិញ្ញាណរបស់យើង ។

« ភេទប្រុសស្រី គឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ( « ក្រុមគ្រួសារ ៖ ការប្រកាសដល់ពិភពលោក » ) ។

អត្ថន័យនៃពាក្យ ភេទ នៅក្នុងការប្រកាសដល់ក្រុមគ្រួសារគឺជា « ជីវសាស្ត្រភេទនៅពេលកើតមក » ។

មនុស្សមួយចំនួនមានអារម្មណ៍ថា អត្តសញ្ញាណភេទរបស់ពួកគេ ( អារម្មណ៍ដែលគេមាននៅក្នុងខ្លួន ) និងភេទខាងជីវសាស្ត្ររបស់ពួកគេមិនត្រូវគ្នាទេ ។ អារម្មណ៍បែបនេះ ពុំមែនជាអំពើបាបនោះទេ ទោះបីជាអារម្មណ៍បែបនេះ អាចបណ្ដាលឲ្យមានទុក្ខលំបាកចំពោះអស់អ្នកដែលមានអារម្មណ៍នេះក្ដី ។

ប្រធាន ដាល្លិន អេក អូក បានបង្រៀនថា ភាពច្របូកច្របល់អំពីអត្តសញ្ញាណភេទ « អាចកើតមានក្នុងទម្រង់ផ្សេងៗគ្នា នៅពេលផ្សេងៗគ្នាក្នុងជីវិតរបស់មនុស្សម្នាក់ » ។ អស់អ្នកដែលមានសំណួរ គួរតែ « គិតឲ្យបានវែងឆ្ងាយ ហើយព្យាយាមពឹងផ្អែក និងធ្វើតាមគោលការណ៍ដ៏អស់កល្បជានិច្ច » ( « ឈរការពារសេចក្ដីពិត » [ ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី ២១ ខែ ឧសភា ឆ្នាំ ២០២៣ ] នៅលើគេហទំព័រ newsroom.ChurchofJesusChrist.org ) ។ ពួកគេមិនគួរអនុញ្ញាតឲ្យសាតាំងប្រើភាពច្របូកច្របល់អំពីភេទ ដើម្បីទាញពួកគេចេញពីព្រះអង្គសង្រ្គោះ ឬធ្វើឲ្យសេចក្ដីជំនឿរបស់ពួកគេទៅលើផែនការរបស់ព្រះវរបិតាសួគ៌សម្រាប់សុភមង្គលដ៏អស់កល្បជានិច្ចរបស់ពួកគេ ធ្លាក់ចុះខ្សោយឡើយ ។

សេចក្ដីសុខសាន្ដនៅក្នុងចិត្ត កម្លាំងខាងវិញ្ញាណ និងទស្សនវិស័យដ៏អស់កល្បជានិច្ច អាចរកបាននៅក្នុងព្រះយេស៊ូវគ្រីស្ទ ដំណឹងល្អរបស់ទ្រង់ និងសាសនាចក្ររបស់ទ្រង់ ទោះបីជាសំណួរមួយចំនួន មិនអាចឆ្លើយតបបានយ៉ាងពេញលេញនៅក្នុងជីវិតនេះក៏ដោយ ។

« បើក្មួយ សមាជិកគ្រួសារម្នាក់ ឬមិត្តម្នាក់ កំពុងពុះពារនឹងបញ្ហានៃការភាន់ច្រឡំអត្តសញ្ញាណទាំងនេះ ខ្ញុំសូមជំរុញក្មួយៗឲ្យអនុវត្តតាមច្បាប់នៃដំណឹងល្អផង និងសេចក្ដីស្រឡាញ់ និងសេចក្ដីមេត្តាករុណារបស់ព្រះអង្គសង្គ្រោះ និងព្រះប្រោសលោះផង ដែលវានឹងជួយ ហើយណែនាំក្មួយៗ ប្រសិនបើក្មួយៗដើរនៅលើផ្លូវរបស់ទ្រង់ដោយអត់ធ្មត់ ។ ព្រះយេស៊ូវគ្រីស្ទ … បង្រៀនយើងពីផ្លូវដែលយើងត្រូវធ្វើតាម ដើម្បីស្គាល់ពរជ័យដ៏ជម្រើសបំផុតរបស់ព្រះវរបិតាសួគ៌យើង ។ … ទ្រង់ស្រឡាញ់យើង ហើយនឹងដឹកនាំយើង នៅពេលយើងខិតខំដើរទៅកន្លែងដែលទ្រង់ដឹកនាំយើងឲ្យទៅ » ( ដាល្លិន អេក អូក « ឈរការពារសេចក្ដីពិត » ) ។

សូមមើលផងដែរ អេធើរ ៣:១៦; គោលលទ្ធិ និងសេចក្តីសញ្ញា ៧៧:២; ៨៨:១៥ ។

ព្រះទ្រង់ស្រឡាញ់បុត្រាបុត្រីរបស់ទ្រង់ទាំងអស់ ហើយមនុស្សគ្រប់គ្នាគឺស័ក្ដិសមនឹងទទួលបានសេចក្ដីស្រឡាញ់ និងការគោរព ។

មនុស្សដែលមានសំណួរអំពីអារម្មណ៍របស់ពួកគេទាក់ទងទៅនឹងភេទ ជារឿយៗឆ្ងល់អំពីទំនាក់ទំនងរបស់ពួកគេជាមួយព្រះអម្ចាស់ ឬស្ថានភាពរបស់ពួកគេនៅក្នុងសាសនាចក្ររបស់ទ្រង់ ។ ទោះបីជាយើង « មិនយល់ន័យនៃរឿងទាំងអស់នោះ » ក៏ដោយ ក៏យើងអាចទុកចិត្តព្រះ ហើយ « ដឹងថាព្រះអង្គទ្រង់ស្រឡាញ់កូនចៅរបស់ទ្រង់ » ដែរ ( នីហ្វៃទី១ ១១:១៧ ) ។

មនុស្សទាំងអស់ ត្រូវបានស្វាគមន៍ឲ្យមកកាន់សាសនាចក្រ ។ មិនថាយើងមានអារម្មណ៍យ៉ាងណាអំពីភេទនោះទេ យើងទាំងអស់គ្នាត្រូវការមិត្តភក្តិល្អ ដែលជាគំរូនៃសេចក្ដីស្រឡាញ់ដូចជាព្រះគ្រីស្ទ ។ យើងត្រូវបានបង្រៀនដូចខាងក្រោមនេះ អំពីការស្រឡាញ់បុត្រាបុត្រីរបស់ព្រះទាំងអស់ ៖

« អ្នកណាក៏ដោយដែលមិនប្រព្រឹត្តចំពោះបុគ្គលដែលប្រឈមមុខនឹងឧសបគ្គអំពីអត្តសញ្ញាណភេទដោយសេចក្តីស្រឡាញ់ និងសេចក្តីថ្លៃថ្នូរ គឺមិនបានធ្វើតាមការបង្រៀននៃបទបញ្ញត្តិធំទីមួយ និងទីពីរឡើយ ។ ដូច្នេះ លើប្រធានបទនៃក្រឹត្យវិន័យរបស់ព្រះ យើងត្រូវចាំថា ព្រះបានបើកសម្តែងម្តងហើយម្តងទៀតថា ទ្រង់បានបង្កើតមនុស្សប្រុស និងស្រី ។ ហើយទាក់ទងនឹងប្រធានបទនៃកាតព្វកិច្ចរបស់យើងក្នុងការស្រឡាញ់អ្នកជិតខាងរបស់យើង យើងត្រូវចាំថា ព្រះបានបញ្ជាយើងឲ្យស្រឡាញ់សូម្បីតែអ្នកដែលមិនបានកាន់តាមបទបញ្ញត្តិទាំងអស់ក៏ដោយ ។ …

« … ត្រូវចាំថា មិនថាយើងមានការប្រែប្រួលយ៉ាងណាទេ នៅក្នុងភាពចម្រុះនៃការបង្កបង្កើតរបស់ព្រះវរបិតាសួគ៌ គឺទ្រង់ស្រឡាញ់យើងទាំងអស់គ្នា ហើយផែនការនៃសុភមង្គលដ៏ល្អឥតខ្ចោះរបស់ទ្រង់ គឺមានកន្លែងមួយសម្រាប់មនុស្សទាំងអស់ ។ យើងបង្ហាញសេចក្ដីស្រឡាញ់របស់យើងចំពោះទ្រង់ដោយការរក្សាបទបញ្ញត្តិរបស់ទ្រង់ រួមទាំងស្រឡាញ់បុត្រាបុត្រីរបស់ទ្រង់ផងដែរ » ( ដាល្លិន អេក អូក « ឈរការពារសេចក្ដីពិត » ) ។