« តើខ្ញុំអាចគាំទ្រដល់ការផ្លាស់ប្ដូរយ៉ាងដូចម្ដេច ? » ធនធានការប្រឹក្សា ( ឆ្នាំ ២០២០ ) ។

« តើខ្ញុំអាចគាំទ្រដល់ការផ្លាស់ប្ដូរយ៉ាងដូចម្ដេច ? » ធនធានការប្រឹក្សា ។

ធនធានការប្រឹក្សា

តើខ្ញុំអាចគាំទ្រដល់ការផ្លាស់ប្ដូរយ៉ាងដូចម្ដេច ?

ប៊ីស្សពមានការទទួលខុសត្រូវដ៏ពិសិដ្ឋដើម្បីធ្វើជាចៅក្រមនៃអ៊ីស្រាអែល ដើម្បីជួយសមាជិកពង្រឹងទំនាក់ទំនងរបស់ពួកគេជាមួយនឹងព្រះ ហើយធ្វើជាគ្រូបង្រៀនខាងវិញ្ញាណ ។ បុគ្គលម្នាក់ៗមានការទទួលខុសត្រូវដើម្បីពង្រឹងទំនាក់ទំនងរបស់ពួកគេជាមួយនឹងព្រះតាមរយៈការប្រែចិត្ត និងការអភ័យទោស ។ ពុំមែនជាថ្នាក់ដឹកនាំសាសនាចក្រទេ តែជាបុគ្គលម្នាក់ៗដែលមានការទទួលខុសត្រូវដើម្បីរុករកនូវអ្វីដែលអាចតម្រូវឲ្យមាន ដើម្បីធ្វើការផ្លាស់ប្ដូរឥរិយាបទដែលពុំល្អរបស់ពួកគេ ។ ( សូមមើល « Identifying and Understanding Influences » នៅត្រង់វគ្គ « Addressing Pornography » នៃ ChurchofJesusChrist.org ) ។ ការណ៍នេះអាចតម្រូវឲ្យមានវិវរណៈផ្ទាល់ខ្លួនដែលទទួលបានតាមរយៈការសិក្សា និងការអធិស្ឋាន ។ សមាជិកក៏មានការទទួលខុសត្រូវដើម្បីយល់ដឹង និងថ្លែងពីរបៀបដែលការប្រើប្រាស់ការណ៍អាសគ្រាមរបស់ពួកគេបានបណ្ដាលឲ្យមានការឈឺចាប់លើខ្លួនគេ និងអ្នកដទៃ ។

នៅពេលអ្នកជួយសមាជិកឲ្យព្យាយាមទទួលបានការអភ័យទោស សូមផ្ដោតទៅលើការបង្រៀន និងការគូសបញ្ជាក់ដូចតទៅនេះ ៖

គោលលទ្ធិ
សិទ្ធជ្រើសរើស និង ការទទួលខុសត្រូវ
ការអនុវត្តសេចក្ដីជំនឿដោយខ្ជាប់ខ្ជួន
ការតស៊ូ

គោលលទ្ធិ

គោលលទ្ធិនៃដង្វាយធួនរបស់ព្រះយេស៊ូវគ្រីស្ទគឺសំខាន់ចំពោះការយល់ដឹងពីរបៀបដើម្បីប្រែចិត្ត និងទទួលបានការអភ័យទោស ។ ការជួយសមាជិកឲ្យយល់ដឹងអំពីព្រះយេស៊ូវគ្រីស្ទ និងតួនាទីរបស់ទ្រង់ក្នុងជីវិតរបស់ពួកគេ គឺមានសារៈសំខាន់ក្នុងការផ្លាស់ប្ដូរ ។ អ្នកនឹងត្រូវបានដឹកនាំឲ្យដឹងពីរបៀបដ៏ល្អបំផុតដើម្បីបង្រៀនពីសេចក្ដីពិតទាំងនេះ និងសេចក្ដីពិតដទៃទៀត ។ គោលគំនិតដូចគ្នាទាំងនេះ គឺសំខាន់ផងដែរនៅក្នុងការងារបម្រើចំពោះស្វាមីភរិយា និងអ្នកដទៃទៀតដែលបានរងគ្រោះដោយឥរិយាបទនោះ ។ សូមពិចារណាធ្វើការមើលទំព័រដូចខាងក្រោមនៅក្នុងប្រធានបទដំណឹងល្អ ៖

ដង្វាយធួនរបស់ព្រះយេស៊ូវគ្រីស្ទ
ការអភ័យទោស
ការប្រែចិត្ត

សិទ្ធជ្រើសរើស និង ការទទួលខុសត្រូវ

សូមលើកទឹកចិត្តដល់បុគ្គលម្នាក់ៗឲ្យមានការទទួលខុសត្រូវចំពោះជម្រើសរបស់គាត់ ឬនាង ។ បុគ្គលម្នាក់ៗចាំបាច់ត្រូវយល់ដឹងថាពេលណាចាំបាច់ត្រូវធ្វើការសារភាព ។ ការសារភាពចំពោះប្ដី ឬប្រពន្ធរបស់គាត់ ឬនាង ចំពោះឪពុកម្ដាយ ( ប្រសិនបើអនីតិជនរស់នៅក្នុងផ្ទះ ) ឬប៊ីស្សព ជាញឹកញាប់ជួយឲ្យវាមានការឆ្ពោះទៅមុខ ។ វាអាចនឹងត្រូវធ្វើការព្យាយាមចែកចាយជាច្រើនដង ពីមុនបុគ្គលម្នាក់បានត្រៀមខ្លួនដើម្បីបើកចិត្តទាំងស្រុង និងប្រាប់ត្រង់ៗអំពីទង្វើកាលពីអតីតកាលរបស់ពួកគេ ។ សូមអនុវត្តការអត់ធ្មត់អំឡុងដំណើរការនេះ ដោយបង្ហាញនូវការយកចិត្តទុកដាក់ខ្ពស់ សេចក្ដីស្រឡាញ់ និងភាពកក់ក្ដៅ ដើម្បីបំផុសគំនិត និងលើកទឹកចិត្តដល់បុគ្គលនោះឲ្យមានភាពស្មោះត្រង់ទាំងស្រុង ។ សូមកុំធ្វើឲ្យនរណាម្នាក់អៀនខ្មាស ឬបង្ខំនរណាម្នាក់ឲ្យសារភាពពីមុនគាត់ ឬនាងត្រៀមខ្លួនរួចរាល់ឡើយ ។

ប៊ីស្សព និងប្រធានសាខាគួរតែមើល ក្បួនខ្នាតទូទៅ ៣២.៨.២ សម្រាប់ជំនួយបន្ថែម ។ សូមជួយបុគ្គលម្នាក់ៗឲ្យយល់ថា គាត់ ឬនាងគឺជាកូនរបស់ព្រះ ហើយថាការប្រើការណ៍អាសគ្រាម គឺជាឥរិយាបទមួយដែលពុំត្រូវតាមអត្តសញ្ញាណដ៏ទេវភាពរបស់ពួកគេនោះទេ ។

ការអនុវត្តសេចក្ដីជំនឿ

ការអធិស្ឋាន និងការសិក្សាព្រះគម្ពីរជាទៀងទាត់ គឺសំខាន់ក្នុងការអភិវឌ្ឍសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ ការអនុវត្តសេចក្ដីជំនឿទៅលើព្រះយេស៊ូវគ្រីស្ទ គឺចាំបាច់ដើម្បីទទួលបទពិសោធន៍នៃការផ្លាស់ប្ដូរដួងចិត្តដ៏ធំ ។ ការអធិស្ឋានដោយស្មោះអស់ពីចិត្ត អាចនាំឲ្យបុគ្គលនោះស្វែងរកការអភ័យទោសពីព្រះ និងពីមនុស្សដែលពួកគេបានធ្វើឲ្យរងគ្រោះ ។ បុគ្គលម្នាក់ៗអាចទទួលបានកម្លាំងកាន់តែខ្លាំងផងដែរ តាមរយៈការសិក្សាការបង្រៀនមកពីសន្និសីទទូទៅ និងអត្ថបទនានានៅក្នុងទស្សនាវដ្ដីសាសនាចក្រដែលថ្លែងអំពីប្រធានបទទាំងនេះ ។

បុគ្គលម្នាក់ៗត្រូវតែជឿថា គាត់ ឬនាងអាចផ្លាស់ប្ដូរបាន ។ សូមមានភាពវិជ្ជមាន ហើយមើលគោលការណ៍នានានៃសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ សូមលើកទឹកចិត្តឲ្យធ្វើការថ្វាយបង្គំនៅថ្ងៃឈប់សម្រាក បម្រើអ្នកដទៃ និងមានឥរិយាបថផ្សេងៗទៀតដែលត្រូវទៅនឹងបុគ្គលិកលក្ខណៈរបស់ព្រះគ្រីស្ទ ។

ការតស៊ូ

បុគ្គលម្នាក់ៗគួរតែស្វែងរកវិវរណៈផ្ទាល់ខ្លួន នៅពេលបង្កើតផែនការដើម្បីដោះស្រាយបញ្ហាការប្រើប្រាស់ការណ៍អាសគ្រាមដែលគេមាននោះ ។ បុគ្គលម្នាក់ៗគួរតែពិចារណាអំពីតម្រូវការពិសេសរបស់គាត់ ឬនាង នៅក្នុងពេលកំណត់អំពីដំណោះស្រាយ និងវិធានការណ៍ដែលត្រូវចំណាត់ការ ។ ខណៈពេលដែលការឈប់ប្រើប្រាស់ការណ៍អាសគ្រាម គឺជាគោលដៅដ៏សំខាន់មួយ នោះសូមលើកទឹកចិត្តដល់បុគ្គលនោះឲ្យផ្ដោតទៅលើការព្យាយាមមានគុណលក្ខណៈដូចជាព្រះគ្រីស្ទ ហើយក្លាយជាសិស្សដែលប្រែចិត្តជឿរបស់ព្រះយេស៊ូវគ្រីស្ទ ។ ទំព័រដូចខាងក្រោមនេះដែលមាននៅលើគេហទំព័រស្ដីអំពីការថ្លែងអំពីការណ៍អាសគ្រាម អាចនឹងជាប្រយោជន៍ដល់សមាជិកនៅក្នុងដំណើរការនេះ ៖

សូមរំឭកដល់សមាជិកជាបន្ដបន្ទាប់ថា ការផ្លាស់ប្ដូរគឺជាដំណើរការមួយដែលនឹងត្រូវការពេលវេលា ។ អ្នកក៏អាចនឹងចាំបាច់ត្រូវចង្អុលបង្ហាញថា ការទទួលខុសត្រូវផ្ទាល់ខ្លួន ការខិតខំដោយខ្ជាប់ខ្ជួន និងការទទួលស្គាល់ការឈឺចាប់ដែលកើតមានមកពីការប្រើប្រាស់ការណ៍អាសគ្រាម គឺជាអ្វីៗទាំងអស់ដែលចាំបាច់ដើម្បីបង្កើតទំនុកចិត្តជាមួយនឹងប្ដី ឬប្រពន្ធរបស់គាត់ ឬនាង ឪពុកម្ដាយ ឬសមាជិកគ្រួសារដទៃទៀតឡើងវិញ ។ វាពុំមែនជារឿងចម្លែកទេដែលត្រូវជួបនឹងការបរាជ័យនោះ ។ សូមលើកទឹកចិត្តដល់បុគ្គលម្នាក់ៗឲ្យមានភាពស្មោះត្រង់នៅក្នុងការរាយការណ៍អំពីការបរាជ័យទាំងនេះទៅកាន់ប្ដី ឬ ប្រពន្ធ ឬឪពុកម្ដាយរបស់ពួកគេ ដើម្បីរៀនពីពួកគេ ហើយត្រឡប់ទៅកាន់ទម្លាប់ល្អវិញភ្លាម ។