« តើខ្ញុំអាចគាំទ្រដល់អ្នកដទៃទៀត នៅពេលពួកគេបង្កើតផែនការដោយរបៀបណា ? » ធនធានការប្រឹក្សា ( ឆ្នាំ ២០២០ ) ។

« តើខ្ញុំអាចគាំទ្រដល់អ្នកដទៃទៀត នៅពេលពួកគេបង្កើតផែនការដោយរបៀបណា ? » ធនធានការប្រឹក្សា ។

ធនធានការប្រឹក្សា

តើខ្ញុំអាចគាំទ្រដល់អ្នកដទៃទៀត នៅពេលពួកគេបង្កើតផែនការដោយរបៀបណា ?

ក្នុងនាមជាអ្នកដឹកនាំសាសនាចក្រ អ្នកមានឱកាសពិសេសមួយដើម្បីផ្ដល់ជំនួយទៅបុគ្គលដែលមានបញ្ហានឹងការប្រើប្រាស់ការណ៍អាសគ្រាម ព្រមទាំងស្វាមីភរិយា ឪពុកម្ដាយរបស់ពួកគេ និងអ្នកដទៃទៀតដែលបានជាប់ពាក់ព័ន្ធផងដែរ ។ ការគាំទ្ររបស់អ្នកអាចនឹងជួយសម្រាលភាពខ្មាសអៀន ដែលជាញឹកញាប់ទាក់ទងនឹងការប្រើប្រាស់ការណ៍អាសគ្រាម ( សូមមើល វិនឌី អូលរីច « It Isn’t a Sin to Be Weak » Ensign ខែ មេសា ឆ្នាំ ២០១៥ ទំព័រ ៣០–៣៥ ) ។

បុគ្គលជាច្រើនទទួលបានភាពជោគជ័យតាមរយៈការបង្កើត និងការធ្វើតាមផែនការផ្ទាល់ខ្លួនដើម្បីយកឈ្នះលើការណ៍អាសគ្រាម ។ ទាំងបុគ្គលដែលមើលការណ៏អាសគ្រាម និងស្វាមី ឬភរិយា ឬសមាជិកគ្រួសាររបស់គាត់ ឬនាងអាចនឹងត្រូវការផែនការផ្សេងៗគ្នាដើម្បីទទួលបានការព្យាបាល ។ វាគឺជាការទទួលខុសត្រូវរបស់បុគ្គលម្នាក់ៗដើម្បីស្វែងរកវិវរណៈផ្ទាល់ខ្លួន ស្វែងរកចម្លើយ និងអភិវឌ្ឍ ហើយធ្វើតាមផែនការរបស់គាត់ ឬនាង ។ ក្នុងនាមជាអ្នកដឹកនាំ អ្នកអាចលើកទឹកចិត្ត និងគាំទ្រដល់បុគ្គលម្នាក់ៗ នៅពេលពួកគេបង្កើតផែនការ ប៉ុន្តែការទទួលខុសត្រូវដើម្បីធ្វើផែនការ និងវាយតម្លៃអំពីប្រសិទ្ធភាពផែនការនោះ គឺជារឿងរបស់បុគ្គលម្នាក់ៗ ។

តាមរយៈការសន្ទនាដ៏បំផុសគំនិតជាមួយនឹងបុគ្គលម្នាក់ៗ និងស្វាមីភរិយា ឬគ្រួសាររបស់ពួកគេ អ្នកអាចលើកទឹកចិត្តពួកគេដើម្បីឲ្យបង្កើតផែនការនានាដើម្បីយកឈ្នះលើឧបសគ្គដ៏លំបាកនេះ ។ នៅពេលបុគ្គលម្នាក់ៗបង្កើតផែនការដើម្បីផ្លាស់ប្ដូរ អ្នកអាចគាំទ្រពួកគេតាមរបៀបដូចខាងក្រោម ៖

ផ្តោតទៅលើព្រះគ្រីស្ទ ។
ឲ្យអ្នកដទៃទៀតចូលរួមចំណែក ។
ប្រើធនធានត្រឹមត្រូវ ។

ផ្តោតទៅលើព្រះគ្រីស្ទ

ថ្វីដ្បិតតែមានវិធីជាច្រើនដើម្បីជួយដល់បុគ្គលម្នាក់ៗឲ្យឆ្ពោះទៅមុខ ក៏តួនាទីរបស់អ្នកក្នុងនាមជាអ្នកដឹកនាំ គឺត្រូវជួយអ្នកដទៃទៀតឲ្យមករកព្រះគ្រីស្ទ ស្វែងរកការព្យាបាលខាងវិញ្ញាណ ហើយព្យាយាមផ្សះផ្សារនឹងព្រះ និងអ្នកទាំងឡាយដែលពួកគេធ្វើឲ្យឈឺចាប់តាមរយៈឥរិយាបថរបស់ពួកគេ ។

នៅពេលអ្នកលើកទឹកចិត្តដល់បុគ្គលម្នាក់ៗឲ្យបង្កើតផែនការ សូមព្យាយាមជួយពួកគេឲ្យបង្កើនសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ សូមជួយអ្នកដទៃឲ្យទទួលស្គាល់ពរជ័យដែលកើតមានមកពីការគោរពប្រតិបត្តិតាមព្រះវរបិតាសួគ៌ ។ សូមលើកទឹកចិត្តពួកគេឲ្យអនុវត្តពរជ័យនៃដង្វាយធួនរបស់ព្រះយេស៊ូវគ្រីស្ទ និងធ្វើតាមសេចក្ដីសញ្ញារបស់ពួកគេ ។ សូមអញ្ជើញពួកគេឲ្យស្វែងរកការដឹកនាំពីព្រះវិញ្ញាណ នៅពេលពួកគេអនុវត្ត និងសម្រិតសម្រាំងផែនការរបស់ពួកគេ ។

សូមព្យាយាមជួយបុគ្គលម្នាក់ៗឲ្យងាកទៅរកព្រះអង្គសង្គ្រោះ ។ ទ្រង់គឺជាប្រភពនៃកម្លាំង ហើយមានប្រាជ្ញាដ៏ខ្ពស់បំផុត ។ ទ្រង់ស្គាល់ ហើយស្រឡាញ់បុគ្គលម្នាក់ៗ ។ នៅពេលបុគ្គលម្នាក់ៗងាកទៅរកព្រះអម្ចាស់ នោះពួកគេនឹងត្រូវបានដឹកនាំឲ្យស្គាល់របៀបដើម្បីឆ្លើយតបចំពោះបញ្ហានេះ ហើយទ្រង់នឹងផ្ដល់ការងារបម្រើដល់ពួកគេ ។ សូមស្វែងរកការបំផុសគំនិតអំពីរបៀបដើម្បីជួយដល់បុគ្គលម្នាក់ៗ និងស្វាមីភរិយាពួកគេ និងរបៀបដើម្បីជួយពួកគេស្ថាបនាទំនាក់ទំនងរបស់ពួកគេជាមួយនឹងព្រះអង្គសង្គ្រោះ ។

ឲ្យអ្នកដទៃទៀតចូលរួមចំណែក

ការណ៍អាសគ្រាមរីកចម្រើននៅក្នុងទីអាថ៌កំបាំង ហើយជាញឹកញាប់បង្កើតឲ្យមានភាពខ្មាសអៀន ។ ការលើកទឹកចិត្តបុគ្គលម្នាក់ៗឲ្យទាក់ទងជាមួយអ្នកដទៃទៀត អាចនឹងជួយពួកគេឲ្យមានអារម្មណ៍រឹងមាំឡើង ។ វាសំខាន់ដែលបុគ្គលម្នាក់ៗ និងស្វាមីភរិយារបស់ពួកគេបង្កើតប្រព័ន្ធជំនួយមួយដែលមានមនុស្សនៅចាំលើកទឹកចិត្តពួកគេ និងការរីកចម្រើនរបស់ពួកគេ ។

ទំហំ និងលក្ខណៈនៃជំនួយដែលត្រូវការ គឺអាស្រ័យទៅលើកត្តាជាក់លាក់ចំពោះបុគ្គលម្នាក់ៗ ។ បុគ្គលម្នាក់ដែលមើលការណ៍អាសគ្រាមតែពីរបីដង អាចនឹងត្រូវការពេល និងជំនួយពីខាងក្រៅតែបន្ដិចបន្ដួចដើម្បីលុបបំបាត់ចោលបញ្ហានេះ ។ រឿងនេះក៏ជាការពិតចំពោះស្វាមី ឬភរិយារបស់គាត់ ឬនាងផងដែរ ។ ទោះជាយ៉ាងណាក៏ដោយ បុគ្គលម្នាក់ដែលបានមើលការណ៍អាសគ្រាមរយៈពេលយូរមកហើយ ដែលស្វាមី ឬភរិយាពុំបានដឹង ឬដែលបានដុះស្នឹមខ្លាំងនៅក្នុងការមើលការណ៍អាសគ្រាម នឹងប្រហែលជាត្រូវការពេលវេលា និងជំនួយកាន់តែច្រើន ។ ស្វាមី ឬភរិយារបស់គាត់ ឬនាងក៏អាចនឹងត្រូវការពេលវេលា និងជំនួយកាន់តែច្រើនផងដែរ ។

ក្រុមគ្រួសារ

សេចក្ដីស្រឡាញ់ ការគាំទ្រ និងការណែនាំអាចកើតមានមកពីសមាជិកគ្រួសារ ។ សូមលើកទឹកចិត្តដល់បុគ្គលម្នាក់ៗឲ្យទាញយកកម្លាំងមកពីស្វាមីភរិយា ឪពុកម្ដាយ ឬគ្រួសារសាច់ញាតិរបស់ពួកគេដើម្បីប្រឈមមុខនឹងបញ្ហាការណ៍អាសគ្រាម ។ ទោះជាយ៉ាងណា បុគ្គលម្នាក់ៗគួរតែពិចារណាអំពីការឈឺចាប់របស់សមាជិកគ្រួសារដែលមានផងដែរ ។ សូមលើកទឹកចិត្តបុគ្គលម្នាក់ៗឲ្យស្វែងរកជំនួយមកពីសមាជិកគ្រួសារដែលត្រៀមខ្លួនដើម្បីជួយគាំទ្រពួកគេ ។ តាមធម្មតា ការប្រើប្រាស់ការណ៍អាសគ្រាមរីកចម្រើនក្នុងទីអាថ៌កំបាំង ហេតុដូច្នោះហើយ ការបើកបង្ហាញដោយប្រុងប្រយ័ត្នអាចនឹងជាចំណែកមួយដ៏មានប្រយោជន៍ក្នុងការជាសះស្បើយឡើងវិញ។ ។ ក្នុងករណីដែលបានរៀបការ បានភ្ជាប់ពាក្យ ឬបានតាំងចិត្តនឹងគ្នា នោះការប្រាប់ឲ្យគ្នាដឹងគឺជារឿងចាំបាច់មួយ ។

ប្រើធនធានត្រឹមត្រូវ

ជាញឹកញាប់ វាមានកត្តាជាច្រើនដែលនាំឲ្យបុគ្គលនោះប្រើប្រាស់ការណ៍អាសគ្រាម ។ ថ្នាំខាងវិញ្ញាណ ថ្វីដ្បិតតែវាសំខាន់ តែវាពុំអាចជាជំនួយតែមួយគត់ចំពោះតម្រូវការរបស់បុគ្គលម្នាក់ៗនោះទេ ។ ពួកគេអាចនឹងចាំបាច់ត្រូវដោះស្រាយកត្តាដទៃទៀតនៅក្នុងជីវិតរបស់ពួកគេ ដូចជាឥទ្ធិពលខាងជីវសាស្ត្រ ខាងចិត្តសាស្ត្រ និងខាងសង្គម ។ សូមលើកទឹកចិត្តបុគ្គលម្នាក់ៗដោយត្រឹមត្រូវដើម្បីគិតពិចារណាអំពីប្រភេទជំនួយដែលពួកគេអាចនឹងត្រូវការ ដើម្បីដោះស្រាយឥទ្ធិពលដទៃទៀតទាំងនេះនៅក្នុងជីវិតរបស់ពួកគេ ។ ការណ៍នេះអាចរួមមានទាំងការស្វែងរកជំនួយមកពីធនធាននានា ដូចជាគេហទំព័រដែលជឿទុកចិត្តបាន និងអ្នកមានវិជ្ជាជីវៈខាងវេជ្ជសាស្ត្រ និងខាងសុខភាពផ្លូវចិត្ត ។

អ្នកមានវិជ្ជាជីវៈ

អ្នកមានវិជ្ជាជីវៈខាងវេជ្ជសាស្ត្រ និងសុខភាពផ្លូវចិត្តអាចនឹងត្រូវការ ជាពិសេសនៅពេលដែលបុគ្គលម្នាក់ៗមានជោគជ័យតិចតួចបំផុត ទោះជាខិតខំយ៉ាងច្រើននៅក្នុងការប៉ុនប៉ងដើម្បីលុបបំបាត់ការណ៍អាសគ្រាមចេញពីជីវិតរបស់ពួកគេក្ដី ។ ស្វាមីភរិយាក៏អាចនឹងត្រូវការជំនួយប្រភេទនេះផងដែរ នៅពេលពួកគេប្រឈមមុខនឹងការក្បត់ទំនុកចិត្តរបស់ពួកគេ ។ នរណាក៏ដោយដែលពួកគេជ្រើសរើសឲ្យចូលរួមចំណែកនៅក្នុងផែនការរបស់ពួកគេដើម្បីយកឈ្នះលើការណ៍អាសគ្រាម គួរតែមានអារម្មណ៍ល្អនឹងបទដ្ឋាននៃដំណឹងល្អ ។

បច្ចេកវិទ្យា

ឧបករណ៍តាមអនឡាញផ្សេងៗជាច្រើនអាចនឹងជួយបុគ្គលម្នាក់ៗឲ្យទប់ទល់នឹងការល្បួងក្នុងការមើលការណ៍អាសគ្រាមបាន ។ ឧបករណ៍មួយចំនួនទាំងនេះផ្ដល់ជាព័ត៌មានដ៏មានប្រយោជន៍ ដូចជាវគ្គ « Addressing Pornography » នៅលើគេហទំព័រ ChurchofJesusChrist.org, មគ្គុទេសន៍ជំនួយ ៖ ជំនួយដល់ស្វាមីភរិយា និងគ្រួសារនៃអ្នកដែលស្ថិតក្នុងការព្យាបាលជាសះស្បើយ ប៉ុស្ដិ៍ប្រព័ន្ធផ្សព្វផ្សាយរបស់សាសនាចក្រ fightthenewdrug.org និងអ្វីៗជាច្រើនទៀត ។ ធនធានឌីជីថលមួយចំនួនផ្ដល់អន្ដរាគមន៍ដូចជា តម្រងដែលត្រួតពិនិត្យ ឬបិទការចូលមើល ហើយធនធានដទៃទៀត ដូចជា fortify.com ផ្ដល់ជាការធ្វើអន្តរាគមន៍ដែលមានរចនាសម្ព័ន្ធមួយ ។

ធាតុផ្សំនៃផែនការដែលមានប្រសិទ្ធភាពមួយ

នៅពេលបុគ្គលម្នាក់ៗបង្កើតផែនការ សូមលើកទឹកចិត្តពួកគេឲ្យពិចារណា ៖

សរសេរផែនការរបស់ពួកគេ ដោយចែងពីសកម្មភាពជាក់លាក់ និងគោលដៅច្បាស់លាស់ ហើយបន្ទាប់មកចែកចាយ វាយតម្លៃ និងកែសម្រួលផែនការតាមចាំបាច់ ។
ស្គាល់ពីរបៀបដើម្បីរក្សាការតាំងចិត្ត ទោះជាពេលដែលពួកគេជួបនឹងការបរាជ័យក្ដី ។
បង្កើតផែនការទទួលខុសត្រូវមួយ ដែលពួកគេអាចរាយការណ៍អំពីការរីកចម្រើនរបស់ពួកគេទៅកាន់សមាជិកគ្រួសារ មិត្តភក្ដិ ឬថ្នាក់ដឹកនាំសាសនាចក្រដែលជាទីទុកចិត្ត ។ របាយការណ៍អំពីការទទួលខុសត្រូវពុំចាំបាច់ត្រូវធ្វើឡើងជាមួយប៊ីស្សពនោះទេ ។
អញ្ជើញស្វាមី ឬភរិយា ឪពុក ឬម្ដាយ សមាជិកគ្រួសារដទៃទៀត ឬមនុស្សដទៃទៀតឲ្យវាយតម្លៃ និងតាមដានផែនការនានា ។ វាអាចមានប្រយោជន៍ដើម្បីរាយការណ៍ទៅកាន់នរណាម្នាក់ទៀតជាទៀងទាត់ថាផែនការដំណើរការល្អយ៉ាងណាដែរ ។ ( សូមមើល « What do I need to focus on to overcome my pornography habit? » )