ពេលណាត្រូវគិតសុំជំនួយមកពីអ្នកមានវិជ្ជាជីវៈ

ថ្នាក់ដឹកនាំទាំងឡាយរបស់សាសនាចក្រពុំរំពឹង ឬលើកទឹកចិត្តឲ្យធ្វើជាអ្នកជំនាញខាងសុខភាពផ្លូវចិត្តនោះទេ ។ ប៉ុន្តែបុគ្គលទាំងឡាយដែលរងទុក្ខមកពីស្ថានភាពដូច្នេះ ជាញឹកញាប់ងាកទៅរកថ្នាក់ដឹកនាំរបស់ពួកគេឲ្យជួយដើម្បីដឹងថាត្រូវធ្វើយ៉ាងណា ។

ខណៈដែលស្ទើរតែមនុស្សគ្រប់រូបនឹងជួបនូវទិដ្ឋភាពមួយចំនួននៃការមានបញ្ហាសុខភាពផ្លូវចិត្តក្នុងគ្រាផ្សេងៗនៅក្នុងជីវិត នោះបញ្ហានានាអាចនឹងធ្វើឲ្យមានភាពទន់ខ្សោយ ។ មនុស្សដែលមានបញ្ហាមួយចំនួនក្នុងកម្រិតមធ្យម ជាញឹកញាប់នឹងឆ្លើយតបចំពោះយោបល់ដែលមានចែងនៅក្នុងការបោះពុម្ពផ្សាយអំពី ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( កូនសៀវភៅ ឆ្នាំ ២០១៣ ) ។ ទោះជាធនធាននេះត្រូវបានរៀបចំឡើងសម្រាប់ពួកអ្នកផ្សព្វផ្សាយសាសនាក្ដី ក៏វាជួយប្រាប់ពីរបៀបនានាដែលមនុស្សគ្រប់រូបអាចឆ្លើយតបទៅនឹងបញ្ហាទាំងឡាយផងដែរ ។ បន្ថែមពីលើនោះ ការគាំទ្រដោយការយល់ចិត្តពីរូបអ្នក សមាជិកគ្រួសារ និងអ្នកដទៃទៀត អាចជួយដល់បុគ្គលនោះឲ្យឆ្លងកាត់បញ្ហាសុខភាពផ្លូវចិត្តបាន ។

ទោះជាយ៉ាងណាក៏ដោយ បើបុគ្គលនោះមិនឆ្លើយតបទៅនឹងមធ្យោបាយទាំងនេះទេ នោះអាចចាំបាច់ត្រូវមានអ្នកមានវិជ្ជាជីវៈខាងសុខភាពផ្លូវចិត្ត ដើម្បីផ្ដល់នូវរោគវិនិច្ឆ័យត្រឹមត្រូវ ។

ខាងក្រោមនេះ គឺជាបញ្ហាសុខភាពផ្លូវចិត្តមួយចំនួនដែលអាចនឹងតម្រូវឲ្យមានការវាយតម្លៃមកពីអ្នកមានវិជ្ជាជីវៈសុខភាពផ្លូវចិត្ត ហើយដែលថ្នាក់ដឹកនាំសាសនាចក្ររបស់សមាជិកនោះ អាចនឹងជួបប្រទះនៅក្នុងវួដ ឬសាខារបស់ពួកគេ ៖

គំនិត ឬការប៉ុនប៉ងសម្លាប់ខ្លួន
អារម្មណ៍ធ្លាក់ទឹកចិត្តអូសបន្លាយយូរអង្វែង
ពុំអាចធ្វើកិច្ចការសំខាន់ៗប្រចាំថ្ងៃបាន
អស់សង្ឃឹម ឯកោ ស្អប់ខ្លួនឯង
អារ កាត់ ធ្វើបាបខ្លួនឯង
ខ្លាចឡើងទម្ងន់ខ្លាំង ស្រកទម្ងន់ ឬឡើងទម្ងន់ខ្លាំងជ្រុលហួស
ការនិយាយ ឬឥរិយាបទដដែលៗ ឬមានអារម្មណ៍ពុំអាចគ្រប់គ្រងបាន
គំនិត ឬចិត្តកើតឡើងដដែលៗ ឬគិតមមៃ
សារភាពកំហុសតូចតាចដដែលៗ
ភ័យខ្លាច តក់ស្លុត ឬគំនិតអន្ទះសារពុំអាចគ្រប់គ្រងបាន
នៅឯកោ
អារម្មណ៍ ឬបុគ្គលិកលក្ខណៈប្ដូរលឿនខ្លាំង
ជំងឺប្រសាទ គំនិតគិតរវើរវាយផ្ដេសផ្ដាស ស្ដាប់ឮសំឡេងនានា
ឥរិយាបទមានអារម្មណ៍ផ្លូវភេទខ្លាំង
ឥរិយាបទឆេវឆាវ ( ខឹង, ហឹង្សា, ឈ្លោះ )

នៅក្នុងស្ថានភាពគួរឲ្យបារម្ភទាំងនេះ និងស្ថានភាពគួរឲ្យបារម្ភដទៃទៀត សូមពិចារណាធ្វើការប្រឹក្សាជាមួយនឹងអ្នកមានវិជ្ជាជីរៈជាជម្រើសដែលអាចធ្វើទៅបាន ( សូមមើល « Professional Counseling and Therapy » ក្បួនខ្នាតទូទៅ ៣១.២.៦ ) ។ ថ្នាក់ដឹកនាំទាំងឡាយរបស់សាសនាចក្រអាចពិភាក្សាជាមួយនឹងសេវាកម្មគ្រួសារ ( នៅកន្លែងដែលមាន ) ឬការិយាល័យប្រចាំតំបន់ដើម្បីដឹងពីរបៀបជួយដល់បុគ្គលនោះ និងស្វែងរកធនធាននានា ។