O Le Amataina—Taimi Aofai: 15 Minute

Fai se tatalo amata.

Faailoa atu outou lava. Ia faaaoga e outou taitoatasi se minute se tasi e faasoa atu ai lou igoa ma se mea e uiga ia te oe.

Susu Mai i le Tatou Vaega o le Ola Tutoatasi!

Faitau:O le fuafaatatau mo le sailiga galuega faamanuiaina o le:

Faatino i le Faatuatua + Galue Malosi + Galue ma le Poto = Famanuiaina

Faatasi ai ma lau vaega, ma le lagolagoina e le taitaiga a le Agaga, o le a e aoaoina ai le mafuaaga ua avea ai le faatuatua o se faavae o se sailiga galuega, ma o le a lu’iina foi oe e te galue malosi. O le a e aoaoina ai foi tomai e manaomia e galue ai ma le poto, e pei o upega fesootai, faafetauia o ou tomai i manaoga o le falefaigaluega, faamatalaga malosi, anomea tusitusia, tomai mo faatalanoaga, ma isi mau mea. I le amataga o feiloaiga taitasi, o le a e toe iloiloina ai se mataupu faavae o le talalelei o le a fesoasoani i itu uma o lou olaga.

E Faapefea Ona Faagaoioi Lenei [Vaega]?

Faitau:O vaega o le ola tutoatasi e galulue e tai pei o se aufono. E leai se faiaoga po o se tagata atamai faapitoa. Nai lo o lena, e te mulimuli tonu i anomea e pei ona tusiaina. Faatasi ai ma le taitaiga a le Agaga, o le a outou fesoasoani ai i le tasi ma le isi faapenei:

Ia saofaga tutusa i talanoaga ma gaoioiga. E leai se tasi, ae maise lava o le tagata e faagaoioia, e tatau ona pule i le talanoaga.
Alofa ma lagolago i le tasi ma le isi. Faaali atu le fiailoa, fai fesili, ma aoao e uiga i le tasi ma le isi.
Faasoa atu ni manatu faaalia lelei ma talafeagai.
Fai ma tausia tautinoga.

Na aoao mai Elder M. Russell Ballard, “E leai se faafitauli i le aiga, uarota po o le siteki e le mafai ona foia pe afai tatou te vaavaai mo ni fofo i le ala a le Alii e ala i le faufautua—faufautua moni—ma le tasi ma le isi” (Counseling with Our Councils, rev. ed. [2012], 4).

Maimoa:“My Self-Reliance Group,” o loo maua i le srs.lds.org/videos. (A e a pe a le maua le vitio? Alu i le “Without a Teacher, How Will We Know What to Do?” i le itulau 4.)

Talanoa: O le a le mea na matuai faamanuiaina ai le vaega o loo i le vitio? O a ni mea e mafai ona tatou faia o se vaega ia maua ai se aafiaga e suia ai le olaga?

A Aunoa ma se Faiaoga, O Le A Faapefea Ona Tatou Iloa le Mea e Fai?

Faitau:E faigofie. Tau lava o le mulimuli i anomea. O vaega taitasi o le tusigaluega ua i ai ni vaega tai ono:

Lipoti: Talanoa i le alualu i luma na e faia i le aluga o le vaiaso i au tautinoga.
Faavae: Toe faamanatu se mataupu faavae o le talalelei o le a taitai atu ai i se ola tutoatasi faaleagaga sili atu.
Aoao: Aoao ni tomai moni o le a taitai atu ai i le ola tutoatasi faaletino sili atu.
Mafaufau Loloto: Faalogo i le Agaga Paia e tuuina mai musumusuga.
Tautino: Folafola atu e faatino tautinoga i le aluga o le vaiaso, o le a faapea ona fesoasoani ai i lou alualu i luma.
Galue: I le aluga o le vaiaso, faataitai mea na e aoaoina.

Auala e Faaaoga ai le Tusigaluega Lenei

A E Vaaia Faamanatu Nei, Mulimuli i Faatonuga Nei
Faitau	Maimoa	Talanoa	Mafaufau Loloto	Gaoioiga
E toatasi le tagata e faitau leotele mo le vaega atoa.	E maimoa le vaega atoa i le vitio.	E faasoa atu e tagata o le vaega o latou manatu mo le lua i le fa minute.	E mafaufau, manatunatu, ma tusitusi filemu tagata taitoatasi mo le lua i le tolu minute.	E galulue taitoatasi tagata o le vaega pe faatasi foi ma isi mo le taimi atofaina.

Tusi Faamaonia o le Faamaeaina

Faitau:O tagata o vaega o e auai i fonotaga ma tausia a latou tautinoga o le a agavaa e maua se tusi faamaonia mo le ola tutoatasi mai le Kolisi Faapisinisi a le AAG. Tagai itulau 251.