Aoao—Taimi Aofai: 45 Minute

apefai

Faitau:O se sailiga galuega faamanuiaina e mulimuli i le fuafaatatau faigofie lenei:

Faatino i le Faatuatua + Galue Malosi + Galue ma le Poto = Faamanuiaina

O tomai o faatalanoaga e fesoasoani e te galue ai ma le poto. Talu ai o faatalanoaga e taua tele, o le a tatou faaalu ai isi mataupu e tolu e sosoo ai e aoao ai ma faataitai ia tomai mo faatalanoaga.

Sailiga Galuega a Iosia

Faitau:Nisi tala lelei. Na telefoni atu Julie mai le ABC Marketing ia Iosia ina ua ia taulimaina lana faamatalaga otooto ma le tusi apalai. Sa ia faatulagaina se faatalanoaga ma ia i le isi lua aso mai le taimi nei mo le galuega enisinia mo le laulau fesoasoani. Sa masani ona atuatuvale Iosia i le taimi o faatalanoaga mo galuega ma e popole i fesili e ono fesili atu ai Julie ia te ia. Ua fai si ona talitonu e lei lelei lana faatinoga i ona faatalanoaga e lua ua mavae, ae na te le o mautinoa po o le a le mea e mafai ona ia faaleleia. Ua manao Iosia e saunia.

Talanoa: O faapefea ona e pei o Iosia?

Maimoa:“The Interview,” o loo maua i le srs.lds.org/videos. (A e a pe a le maua le vitio? Faitau le itulau 109

aikona o le vitio

Faitau:O faatalanoaga o se tasi o laasaga mulimuli lava o le mauaina o se galuega. O le faamoemoega o se faatalanoaga o le maua o se galuega. Ua folafola mai le Alii, “Afai ua saunia outou o le a outou le matatau ai lava” (MF&F 38:30). Pe a outou saunia lelei, e mafai ona outou suia le atuatuvale i le talitonu mautinoa.

I le mataupu lenei, o le a e aoaoina ai e galue ma le poto e ala i le atina’eina o tomai nei mo faatalanoaga:

1. Saunia a o lei oo i le faatalanoaga.

2. Amata lelei le faatalanoaga.

3. Faaaoga au O A’u i le 30 Sekone.

4. Faaaoga faamatalaga malosi.

1. Saunia A o Lei O’o i le Faatalanoaga

Faitau:Mata e le manaia le iloa po o a fesili o le a fesili mai ai i se faatalanoaga?

E mafai.

O le tele o le au faifaatalanoaga o le a faia se suifefiloi o fesili masani o faatalanoaga ma fesili patino i le galuega. Ua uma ona e iloa le ala e faailoa ai manaoga o le falefaigaluega, o lea la e mafai ai ona e faaaoga lena tomai e fua i ai mea o le a fesili atu ai le falefaigaluega. Mo se faataitaiga, ua fai si talitonu o Iosia o le a fesili atu e uiga i le tautuaina o tagata, foiaina o faafitauli, ma le talanoaina o mea faaenisinia i ni faaupuga faigofie.

Gaoioiga _{(3 minute)}

Vaavaai i le faamatalaga o le galuega na e sau ma oe, pe mafaufau e uiga i le galuega e te manao ai. Tusi ni fesili se lua e te manatu e ono fesiligia ai oe e se faifaatalanoaga, ona faasoa atu lea i le vaega.

1.

2.

2. Amata Lelei le Faatalanoaga

Faitau:A e amataina se faatalanoaga, e i ai ni mea faigofie e mafai ona e faia ia maua ai se uluai uunaiga lelei tele. I le avea ai ma se vaega, ia auauai i le faitauina o le lisi o mea e fai ma mea e aua le faia o loo i lalo.

Mea e Fai	Mea e Aua le Faia
Fai ou lavalava ia i luga atu teisi o tulaga faatulagaina o lavalava o le kamupani.	Fai ou ofu fale masani.
Ia taunuu i le 5-10 minute a o lei oo i le taimi.	Ia tuai pe sili atu i le 10 minute e vave ai.
Faaaoga le gagana lelei o le tino.	Faaaoga gagana e le lelei o le tino.

Gaoioiga _{(3 minute)}

Faatusatusa ata o loo i lalo. I ata uma e lua, o le tagata o i le itu tauagavale o loo i ai iina mo se faatalanoaga. I le avea ai o se vaega, talanoaina po o le a le ituaiga o uunaiga o loo faia e le au saili galuega i ata taitasi.

le saunia mo le faatalanoaga

saunia mo le faatalanoaga

3. Faaaoga Lau O A’u i le 30 Sekone

Faitau:E tele taimi o se tasi o fesili muamua o faatalanoaga o le a fesili atu ai ia te oe, “Faamatala mai ia te au e uiga ia te oe lava.” O se O A’u i le 30 Sekone e fetuunai i se tulaga faalefaatalanoaga o se tali lelei tele lea i lenei fesili. O se O A’u i le 30 Sekone mo se faatalanoaga e fai si eseesega. Mo se faataitaiga, e te le tau faaaogaina lou igoa. Ma nai lo le fesili atu e faasino mai ni tagata e pei ona e faia i le upegafesootai, e te tapunia e ala i le faaali atu o lou naunau i le kamupani po o le tulaga.

Gaoioiga _{(4 minute)}

Tatou faitau i faataitaiga e lua o tagata na tali atu i fesili amata o le faatalanoaga. Filifili ia matafaioi ma faatino mea nei.

O Le Faataitaiga Leaga

Faifaatalanoaga: ”Ae ta te lei amata, faamolemole fai mai sina faamatalaga itiiti e uiga ia te oe lava.”

Sue Galuega: “Ia, sa ou ola ae i Kansas o se vaega o se aiga toatele. Ua ou faaipoipo ma e toatolu la’u fanau ma se tamai taifau. Matou te fiafia lava e faimalaga, ma e tele so matou taimi e faaalu i le vaituloto pe a mafai. O le tausaga na te’a nei na faatau ai se matou vaa fou. Sa fai lava si taugata, ma o se vaega lea ua sue ai sa’u galuega E tele o’u poto masani e galulue ai ma tagata. Sa ou amata i le 20 tausaga talu ai, ina ua 19 o’u tausaga o se talitupe i se faletupe. O lea sa ou aoao teisi ai e uiga i tupe ma mea tautupe. Mo se faataitaiga, sa ou aoaoina e le umiaina e le faletupe au tupe; e na ona latou aveina ona toe nono atu lea ina ia maua ai se tului. Ae, sa ou faia lena mea mo ni tausaga, ona ou alu ai lea i le kolisi. Sa ou le lelei tele i le a’oga. O le mea moni ou te le fia suesue. Sa maua se galuega i le pisinisi tau maketi a sa’u uo. E tele lava i mea tau faafoe sa ou faia---ua e silafia, e pei o le taliina o telefoni, meli, fonotaga, mea faapena. Ae o le faigaluega ma uo e le lelei i taimi uma, o lea sa ou tuua ai lena galuega ae sailiili mo se mea sili atu. Se’i tilotilo i ai sa ou faigaluega i nai nisi nofoaga, ae ou te le o manatuaina igoa. Oi, o le galuega sili sa ou i ai o le tulaga tautua i tagata lea sa ou faigaluega ai mai le fale. Sa mafai ona ou faigaluega i o’u ofumoe, tali le telefoni, ma faigaluega i la’u komepiuta. Sa ese le manaia. Ae, oute fiafia e faigaluega, ma ou te fiafia i tagata. O le a ou faia se galuega lelei mo oe.”

O Le Faataitaiga Lelei

Faifaatalanoaga: ”Ae ta te lei amata, faamolemole fai mai sina faamatalaga itiiti e uiga ia te oe lava.”

Sue Galuega “Ia, o la’u matata faalegaluega i le 20-tausaga sa tele i mea tautupe ma le teuina o tupe. Sa ou amata o se talitupe i se faletupe i le lotoifale ona agai atu ai lea i luma i le pulega. I se taimi na muamua atu, sa ou iloaina ai le taua o le aoga ma sa faamaeaina ai se faailoga tikeri i mea tautupe. Ou te lelei tele i le faafoeina o tagata, tau, ma le ausiaina o sini o le faatauina atu. Mo se faataitaiga i lo’u tulaga talu ai, sa ou vaaia se lala sa faaletonu, ma i totonu o le ono masina sa sili mamao atu le mea na matou ausia nai lo a matou sini o le faatauina atu. Ou te fiafia i le tulaga lenei aua e foliga mai atonu o se luitau faapena foi.”

Talanoa: Aisea na sili atu ai le faataitaiga lona lua?

Gaoioiga _{(4 minute)}

Vaavaai i le faamatalaga o le galuega na e sau ma oe, pe mafaufau e uiga i le galuega e te manao ai. Manatu faapea ua i ai sau faatalanoaga i le lua aso mo lena tulaga. I le avanoa o i lalo ifo, tusi ai se O A’u i le 30 Sekone e tali atu ai i le talosaga, “Faamatala mai ia te au e uiga ia te oe lava.” Ona fai paga lea ma faasoa atu i lau soa galue.

4. Faaaoga Faamatalaga Malosi

Faitau:E ao ona faaaoga faamatalaga malosi e tali ai le tele o fesili o faatalanoaga. E manatua pea ma e mamana ma o le a fesoasoani ia te oe e amata ai o se filifiliga manino.

Manatua e mulimuli i le fuafaatatau o le faamatalaga malosi:

fuafaatatau o faamatalaga malosi

Gaoioiga _{(4 minute)}

Tatou toe faitau i nei faataitaiga o faatalanoaga mai le mataupu 4. Filifili ia matafaioi, ma faatino mea nei.

O Le Faataitaiga Averesi

Faifaatalanoaga: “Faamatala mai se taimi na e tuuina atu ai se tautua lelei tele i tagata.”

Saili Galuega 2: ”O le tautuaina o tagata e matuai taua lava ia te au. O tagata tatou te tautuaina o le ki lea i le faamanuiaina faifai pea. Ou te iloaina i taimi uma afai e sa’o ma lelei lou faia o tagata, o le a latou tauia oe i pisinisi faifai pea. “E tele ni o’u poto masani i le tautuaina o tagata, ma ou te lelei ai tele. E mananao tagata ia talia o latou manatu ma e fia iloa tatou te faalogo atu ia i latou. E taua lo tatou faia o le mea sili e faasa’o ai i le taimi muamua ma ia vave ona faasa’o i le mea sili pe a tatou faia se mea sese. Ou te talitonu i le anavatau faapea o taimi uma lava e sa’o ai le tagata tatou te tautuaina.

O Le Faataitaiga Lelei

Faifaatalanoaga: “Faamatala mai se taimi na e tuuina atu ai se tautua lelei tele i tagata.”

Saili Galuega 3: “Ou te tomai tele i le tautuaina o tagata. Mo se faataitaiga, a o ou faigaluega i le Yazaki, sa i ai le matou tagata sa matou tautuaina mo se taimi umi, sa i ai se taimi, e lei maua ai le mea sa ia okaina. Ina ua valaau mai ia te au, sa lei fiafia ma sa faamata’u mai e faaleaogaina uma ana pisinisi ma i matou. Sa ou faaaluina se taimi e faalogologo atu ai ma le malamalama i lona tulaga ona avatu ai lea o se faaiuga sa lelei mo le tagata. O le taunuuga, sa lei gata ina matou faatumauina pea le matou faiga paaga ae sa ia faateleina ana oka mai ia i matou i le 200 pasene. Ou te talitonu mautinoa e mafai ona ou faaaogaina nei tomai faaletautua i tagata ia aoga foi mo outou.”

Talanoa: Na faapefea i le faaaogaina o se faamatalaga malosi ua sili atu ai le lelei o le faataitaiga lona lua?

Gaoioiga _{(6 minute)}

Manatu faapea ua e i ai i le loloto o le faatalanoaga. Atonu o le a fai atu e le faifaatalanoaga ni fesili masani o faatalanoaga ia te oe. Tusi faamatalaga malosi mo fesili taitasi o i lalo.

O le a se tasi o ou malosiaga?

O le a sau ausiaga faapolofesa aupito silisili?

Aisea e tatau ai ona matou faafaigaluegaina oe?

Gaoioiga _{(6 minute)}

Faatasi ai o se vaega, faitau faatonuga uma, ona amata loa lea o le gaoioiga.

Laasaga 1: Ia tutu i luga tagata uma ma agai atu i se avanoa taalaelae mo se faataitaiga o le saoasaoa. E tatau i tagata taitasi ona faasaga atu i se isi tagata.

Laasaga 2: Ia fai atu e le tagata muamua se tasi o fesili e tolu mai le Itulau 105.

Laasaga 3: O le tagata lona lua e tali i le fesili e faaaoga ai le faamatalaga malosi.

Laasaga 4: Tuuina mai ni manatu faaalia:

• Pe na faasoa mai e le tagata se faataitaiga ma se taunuuga?

• Pe sa faagaeetiaina oe?

Laasaga 5: Fesuiai matafaioi ma toe fai.

Laasaga 6: Sui ia paga ma toe fai faalima le gaoioiga.

Faaiuga

Talanoa: O a nisi o mea aupito anoa sa e aoaoina mai lenei mataupu?

Faitau:Ua amata ona e aoaoina ni nai tomai mo faatalanoaga ia o le a fesoasoani ia te oe e te galue ai ma le poto.

Faatino i le Faatuatua + Galue Malosi + Galue ma le Poto = Faamanuiaina

Afai e te saunia, o le a e le fefe lava. Tatalo mo se fesoasoani, ona sauniuni ai lea ma faata’ita’i i le tele e te mafaia. I le mataupu e sosoo ai, o le a tatou aoao atili ai i ni tomai mo faatalanoaga.