Aoao—Taimi Aofai: 45 Minute

Faitau:O se sailiga galuega faamanuiaina e mulimuli i le fuafaatatau faigofie lenei:

Faatino i le Faatuatua + Galue Malosi + Galue ma le Poto = Faamanuiaina

I le mataupu talu ai sa e aoaoina ai se tomai e fesoasoani ia te oe ia e galue ma le poto: o le ala e faafetauia ai ou tomai i manaoga o le falefaigaluega. I le mataupu lenei, o le a e aoaoina ai se isi tomai o le “galue ma le poto: faamatalaga malosi.”

Sailiga Galuega a Iosia

Faitau:Ua iloa nei e Iosia e fetaui lelei o ia mo le tulaga o le laulau fesoasoani i le ABC Marketing. Ae ua fai lava foi si ona mautinoa e ono i ai foi nisi tagata e tutusa o latou agavaa. O le mea moni lava ua fesoasoani ia te ia e tulaga ese ai o mea ua ia ausia, ae e fai si ona le mautinoa pe faapefea ona talanoa e uiga i ai. O loo taumanatunatu pe o le a se mea e mafai ona ia faia ia tu matilatila atu o se filifiliga manino.

Talanoa:O faapefea ona e pei o Iosia?

1. Faia Faamatalaga Malosi

Faitau:O le ala sili e faaali atu ai ua e talafeagai ma manaoga o le kamupani o le i ai o se faamatalaga malosi. O se faamatalaga malosi e faamatala puupuu atu ai ou poto masani talu ai ma mea ua e ausia e ala i le faasoa atu o se faataitaiga ma se taunuuga patino. Mafaufau i ai o ni nai tala laiti. O isi tagata e ono i ai foi agavaa faapena, ae e lei faia e se isi ni mea e tutusa lelei. O lea la nai lo le faia o se lisi o tomai masani, faaaoga se faamatalaga malosi.

Gaoioiga _{(4 minute)}

Filifili ia matafaioi ma faatino ia faataitaiga nei e tolu. A o e faia lenei mea, mafaufau ia te oe lava, “O ai e tu matilatila mai o se filifiliga manino?

O Le Faataitaiga Leaga

Faifaatalanoaga: “Faamatala mai se taimi na e tuuina atu ai se tautua lelei tele i tagata.”

Saili Galuega 1: “Ou te fiafia lava e tautuaina tagata, ma ou te manatu e lava si o’u lelei ai. Sei vagana ai pe a fia ululeaga tagata. Ou te le manao e faapena ona fai au. Faatali, e ululeaga au tagata e te tautuaina?”

O Le Faataitaiga Averesi

Faifaatalanoaga: “Faamatala mai se taimi na e tuuina atu ai se tautua lelei tele i tagata.”

Saili Galuega 2: ”O le tautuaina o tagata e matuai taua lava ia te au. O tagata tatou te tautuaina o le ki lea i le faamanuiaina faifai pea. Ou te iloaina i taimi uma afai e sa’o ma lelei lou faia o tagata, o le a latou tauia oe i pisinisi faifai pea. “E tele ni o’u poto masani i le tautuaina o tagata, ma ou te lelei ai tele. E mananao tagata ia talia o latou manatu ma e fia iloa pe tatou te faalogo atu ia i latou. E taua lo tatou faia o le mea sili e faasa’o ai i le taimi muamua ma ia vave ona faasa’o i le mea sili pe a tatou faia se mea sese. Ou te talitonu i le anavatau faapea o taimi uma lava e sa’o ai le tagata tatou te tautuaina.

O Le Faataitaiga Lelei

Faifaatalanoaga: “Faamatala mai se taimi na e tuuina atu ai se tautua lelei tele i tagata.”

Saili Galuega 3: “Ou te tomai tele i le tautuaina o tagata. Mo se faataitaiga, a o ou faigaluega i le Yazaki, sa i ai le matou tagata sa matou tautuaina mo se taimi umi, sa i ai se taimi, e lei maua ai le mea sa ia okaina. Ina ua valaau mai ia te au, sa lei fiafia ma sa faamata’u mai e faaleaogaina uma ana pisinisi ma i matou. Sa ou faaaluina se taimi e faalogologo atu ai ma le malamalama i lona tulaga ona avatu ai lea o se faaiuga sa lelei mo le tagata. O le taunuuga, sa lei gata ina matou faatumauina pea le matou faiga paaga ae sa ia faateleina ana oka mai ia i matou i le 200 pasene. Ou te talitonu mautinoa e mafai ona ou faaaogaina nei tomai faaletautua i tagata ia aoga foi mo outou.”

Talanoa:Aisea na sili atu ai le faataitaiga lona tolu?

Faitau:O le saili galuega lona tolu sa ia faaaogaina le faamatalaga malosi, lea na mafai ai e ia ona talanoa e uiga i se mea sa ia faia moni lava i se ala manaia, e mafai ona manatua, ma tulaga ese atoatoa. Sa pei o se tala moni puupuu. Sa fesoasoani ai i le sailiga galuega lona tolu e tu matilatila mai ai o le filifiliga manino.

2. Mulimuli i le Fuafaatatau o le Faamatalaga Malosi

Faitau:O faamatalaga malosi e mulimuli i se fuafaatatau faigofie:

O se vaega o le malosi i se faamatalaga malosi o le puupuu. O le tuuina atu o se faamatalaga malosi e le tatau ona silia ma le 30 i le 45 sekone.

Sailiga Galuega a Iosia

Faitau:Tatou vaavaai i se faamatalaga malosi a Iosia na tuu faatasia ina ua uma ona toe iloilo le faamatalaga o le galuega i le ABC Marketing. Sa ia vaaia e manaomia e le kamupani se tagata e lelei ni tomai e foia ai faafitauli tau komepiuta. Matau lona faaaogaina o le fuafaatatau e fatu ai se faamatalaga malosi.

➀ “Ou te lelei tele i le foiaina o faafitauli. ➁ Mo se faataitaiga, o le avea ai o se enisinia i le IT World, sa ou amataina se faiga faigofie e faailoa mai ai faafitauli tau enisinia komepiuta masani. ➂ O le taunuuga, i tausaga e lua sa mafai ona ou foiaina le silia ma le 1,000 atugaluga i le tusa ma le afa o le taimi na faia ai e a’u paaga faigaluega. ➃ E mafai foi ona ou faaogaina lenei lava poto masani ia aoga mo outou.”

Talanoa:E mafai faapefea ona fesoasoani le faamatalaga malosi a Iosia ia te ia e tu matilatila ai o se filifiliga manino?

Faitau:O nisi nei o faataitaiga o faamatalaga malosi mo se faifeautalai ua maea lana misiona, o se tagata faipisinisi laitiiti, ma se tina, o i latou uma o loo saili ni galuega. Sa latou faaaogaina laasaga e fa ma sa faaaofia ai faamatalaga patino e faamalolosia ai a latou faamatalaga malosi. Ia feauauai i le faitauina o faamatalaga taitasi.

➀ Faailoa mai se tomai po o se poto masani (“O a’u … ,” “E mafai ona ou …,” po o le “Ua ou … ,”)	➁ Tuu atu se faataitaiga (“Mo se faataitaiga … ”)	➂ Tuu atu se taunuuga (“O le taunuuga … ,”)	➃ Faafetaui le tomai ma manaoga o le falefaigaluega.
Faifeautalai ua Taliu Mai le Misiona E mafai ona ou fausia ma uunaia ni vaega.	Mo se faataitaiga, i le avea ai ma se volenitia e faigaluega tumau mo la’u ekalesia, sa talosagaina a’u e taitaia se vaega o volenitia e toavalu o e lei lotogatasi ma sa lei ausia ia sini. Sa ou faailoaina manaoga ma atina’e se soloaiga patino o aoaoga ma tautinoga e fesoasoani ai ia i latou ia faaleleia atili.	O se taunuuga, sa amata ona ausia e le vaega mea ona ua maualuga atu nai a latou sini.	E mafai ona ou fesoasoani i la outou vaega ina ia lotogatasi e ausia ma maualuluga atu nai a latou sini.
Pule o Pisinisi Laiti E mafai ona ou foiaina faafitauli.	Mo se faataitaiga, i le pisinisi o le matou aiga, sa matou manaomia se faiga e tulimata’ia ai tupe faaalu. Sa ou atina’eina se faiga e tulimata’ia ai ma faailoa se kamupani sa ova lo latou piliina o i matou.	O le taunuuga o la’u faiga, sa mafai ona ou faasa’oina pili sa ova ma sefe mai ai le silia ma le $5,000 o le matou pisinisi i le tausaga.	Ou te iloa e mafai ona ou faaaogaina nei foi tomai o le foiaina o faafitauli mo outou.
Tina E i ai ou tomai malolosi faalefaalapotopotoga.	Mo se faataitaiga, i le avea ai ma se tina, e manuia lava lo’u faamaopoopoa o meaaoga ma gaoioiga a le fanau e toatolu. Ua ou aoao e faafoe ma le mata’itu le faasologa o a matou mea e fai.	O le taunuuga, e seasea misi e la’u fanau se meaaoga e fai pe tuai i se gaoioiga.	E mafai ona ou faaaogaina nei lava tomai faalefaalapotopotoga e faamautinoa ai e te le misia se taimi faatonuina.

Gaoioiga _{(5 minute)}

Faaaoga ni nai minute e faaaoga ai le siata lea e fatu ai ni nai faamatalaga malosi a oe lava ia. Ona vaai lea o lau soa galue, ma faasoa atu ia te ia.

Mulimuli i le Fuafaatatau:

➀ Faailoa mai se tomai po o se poto masani (“O a’u … ,” “E mafai ona ou …,” po o le “Ua ou … ,”)	➁ Tuu atu se faataitaiga (“Mo se faataitaiga … ,”)	➂ Tuu atu se taunuuga (“O le taunuuga … ,”)	➃ Faafetaui le tomai ma manaoga o le falefaigaluega.

Talanoa:O le a se mea na e aoaoina mai le faasoa atu o au faamatalaga malosi?

Faitau:O faamatalaga malosi o se tomai o sailiga galuega o le a fesoasoani ia te oe e galue ai ma le poto. O le a e iloaina o loo sa’o ona e faia pe afai o au faamatalaga malosi e taitai atu ai ina naunau atili mai le falefaigaluega. O faamatalaga malosi i talaaga e tatau ona oo atu ai i faatalanoaga. O faamatalaga malosi i fesootaiga e oo atu ai i faamatalaga aoga po o avanoa. O faamatalaga malosi foi i faatalanoaga e tau atu ai i avanoa faigaluega. Afai e te le o maua nai taunuuga, galue ia faaleleia atili le tomai lenei.

O le faata’ita’i ma isi ma maua mai manatu faaalia o le a fesoasoani ai ia te oe e faaleleia atili. Tatou amata nei loa!

Gaoioiga _{(5 minute)}

Laasaga 1: Tutulai tagata uma ma vaelua i ni laina se lua e faafesagai.

Laasaga 2: Faasoa atu au faamatalaga malosi i le tagata lena lua te fesagai.

Laasaga 3: Ia vave ona tuu atu e le tasi i le isi ni manatu faaalia:

• O le a le tomai sa fai mai lau soa o ia te ia?

• O le a le faataitaiga a lau soa?

• O le a le taunuuga?

• Na faapefea ona faafetaui e lau soa i manaoga o se falefaigaluega?

• Pe sa faagaeetiaina oe?

Laasaga 4: Ona aveese lea o se tagata e toatasi mai le laina e tasi. Faasolo mai le tagata o i le faaiuga i le amataga o le laina. O le isi laina aua nei minoi. Toe fai laasaga 1--3 seia uma ona faasoa mai a outou faamatalaga malosi i tagata uma ma maua mai ni manatu faaalia.

Talanoa:E mafai faapefea ona fesoasoani ia faamatalaga malosi e avea o se filifiliga manino?

Faaiuga

Maimoa:“The Power of Power Statements,” o loo maua i le srs.lds.org/videos (A e a pe a le maua le vitio? Faitau le itulau 70.)

Talanoa:O a ni mea aupito taua sa e aoaoina mai lenei mataupu?

Faitau:O faamatalaga malosi o se tomai o sailiga galuega o le a sili ona faatosina e mafai ona e aoaoina. O mea ia e tatau ai mo le galue ma le poto.

Faatino i le Faatuatua + Galue Malosi + Galue ma le Poto = Faamanuiaina

O faamatalaga malosi o le a fesoasoani e te tu matilatila ai o le filifiliga manino e sili nai lo se isi lava mea e mafai ona e faia. Faaaoga i au talaaga, fesootaiga, ma faatalanoaga. Faataitai nei tomai. Sauniuni ni mau faamatalaga malosi. Tatalo mo le fesoasoani a le Tama Faalelagi, ma o le a e vaai i le faamanuiaina sili atu.