Punaoa

Auala e Faatumu Moni ai Galuega

Faalogologo a o faamatala mai e le falefaigaluega le ala e faatumu moni ai tulaga.

“O le mea sese a le tele o le au sue galuega o le alu o lo latou taimi i le auina atu o o latou faamatalaga otooto, ae sa tatau ona faaalu lo latou taimi e fai ai upegafesootai, faafesootai tagata autu ia latou kamupani ma fausia ni mafutaga.

“I le avea ai o se e su’e maia tagata faigaluega, sa ou fesoasoani i le matou kamupani e faatutumu le toetoe atoa le 1,000 avanoa i le tausaga na te’a nei. O le ala lea sa faatutumu ai.

“Matou te lei faasalalauina le tele o o matou avanoa. Ae, sa i ai se tagata na mafaufau i ai le pule e faafaigaluegaina tagata, pe o se tasi o lana ‘au na faasino atua se tasi ia te ia. Na te faafesootai maia au ma faailoa mai e i ai se tagata ua ia manao e faafaigaluega ma sa na ona ou faagaoioia loa lava mai iina.

“Mo tulaga e faasalalau, e tele taimi e le itiiiti ifo ma le toaselau tagata e talosaga mo le avanoa. E masani ona ou maua ni telefoni mai pule e faafaigaluegaina e fai mai ai e aveese mai ni talosaga patino mo tagata latou te mananao e faatalanoa. O tagata nei sa latou iloa, o e sa faasino atu ia i latou, pe o e ua uma ona faafesoota’i maia i latou. Talu ai ua uma ona iloa e le pule e uiga i nei tagata, o lea ua iloa ai o le a fetaui lelei lava. O tagata nei e masani lava ona latou mauaina le galuega. Sa matou faafaigaluegaina ni nai tagata mai le lisi lautele o tagata sa talosaga mai, ae pe tusa na o le 25 pasene o le taimi.

“O la’u fautuaga: Upega fesootai. Atiina ae lau upega fesootai Ia faatumauina lau upega fesootai. Fesootai ma tagata e faia faaiuga o le faafaigaluegaina pe tuusa’o pe ala atu i isi. Afai o le a faia e tagata sue galuega lenei mea, o le a latou maua ia galuega.”

Toe foi i le itulau 26.

Na Maua La’u Galuega i le Pasiketipolo [Basketball Got Me a Job]

Tatou faitauina le ala na taitai atu ai Reupena e lana O A’u i le 30 Sekone i se galuega lelei tele mai lana upega fesootai.

“O au o se tagata faigaluega malosi tele i taimi uma, ae o nisi taimi e le lava. Sa leai sa’u galuega ona ua faaitiitia le paketi, ma sa ou manatu talu ai o au o se tagata faigaluega malosi, o le a faigofie ona maua sa’u galuega. O le faafitauli, sa tele ni a’u papupuni i lo’u talaaga sa faigata ai ona maua ni faatalanoaga. Sa foliga mai sa leai lava se isi mea i talaatu o tusi talosaga. Sa tele vaiaso ua mavae, ma sa ou le fiafia ma ua lotovaivai. Ona ou aoaoina ai lea e uiga i le upega fesootai ma ou mafaufau ai atonu o le ki lea mo a’u e maua ai se avanoa. Sa ou faata’ita’ia faafia la’u O A’u i le 30 Sekone ma sa amata ai ona ou talanoa atu i tagata uma---ma faailoa atu ai o loo ou sailia ni avanoa mo le pulega o galuega faufale ma o’u tomai ma lo’u poto masani.

“I se tasi afiafi sa ou taalo pasiketipolo ai ma ni nai uo. Sa ou iloa ai sa tofu iloa e i latou se mau tagata ma atonu e mafai ai ona fesoasoani ia te au e sue sa’u galuega, o lea sa ou faasoa atu ai la’u O A’u i le 30 Sekone ia i latou. Sa faateia au, ina ua fai mai se tasi o i latou sa faigaluega lona toalua mo se kamupani faufale ma e auina atu i ai lo’u faamatalaga otooto. Sa ou faia ma tulitatao atu i le aso na sosoo ai. Sa ia fai mai o le a ia pasi atua i se vaega o le kamupani e i ai foi ma ia. E le’i tele tele ni aso mulimuli ane ae telefoni mai se tagata ou te le iloaina. Sa ia taulimaina lo’u faamatalaga otooto ma sa fia talanoa mai ia te au. Sa ia pulea se kamupani faufale tele. O le iuga na taitai atu ai au i se galuega lelei tele. Sa lei tuuina i luga se faasalalauga lautele mo la’u galuega, ma sa maua mai se tasi e lua pe tolu ia atufola le loloto i la’u upega fesootai. Semanu ou te le mauaina lava lenei avanoa pe ana ou le tatalaina lo’u gutu ma faasoa atu la’u O A’u i le 30 Sekone. E tofu tagata uma ma lana upega fesootai; faaaoga e faasalalau atu ai le tala.”

Toe foi i le itulau 32.