Aoao—Taimi Aofai: 45 Minute

Faitau:O se sailiga galuega faamanuiaina e mulimuli i le fuafaatatau faigofie lenei:

Faatino i le Faatuatua + Galue Malosi + Galue ma le Poto = Faamanuiaina

I le mataupu talu ai, sa e aoao ai o le upega fesootai o le ala sili lea e sue ai galuega. Ae a e maua loa lava se faamatalaga e uiga i se avanoa faigaluega, o le a le mea e tatau ona e faia muamua? Faafetaui ou tomai i manaoga o le falefaigaluega. O se tasi o tomai o le sailiga galuega e mafai ai e oe ona e galue ma le poto.

Sailiga Galuega a Iosia

Faitau:Ina ua amata e Iosia lana suega galuega, sa ia faafoua lana faamatalaga otooto e faaaofia uma ai ona poto masani ona faapipii lea i ai o ana tusi talosaga mo galuega. E ui ina tele galuega sa talosaga i ai, o le tele lava o taimi na te le faalogo ai i se tala. Pe le mafai e nei falefaigaluega ona iloa lona lelei i le galuega? Pe i ai se isi mea e mafai ona ese lona faiga?

Talanoa: O faapefea ona e pei o Iosia?

Faitau:E toatele le au saili galuega e faaleagaina ia avanoa mai le amataga i lo latou le iloaina muamua o manaoga o le falefaigaluega ona faafetaui lea i ai o o latou tomai i na manaoga. Na ona latou auina atu lava o faamatalaga lava e tasi e uiga ia i latou lava ma mafaufau e faitalia lava le falefaigaluega ma faavasega. Ae paga lea, e le faapena ona fai. Talitonu i ai pe leai, e faapei lava o le okaina o se pizza.

Manatu faapea sa e mafaufau i le pizza peperoni i le aso atoa. E te le manao lava i se isi ituaiga pizza---na o le peperoni lava. O lea na e okaina ai loa le pizza peperoni mai lou fale pizza masani. Ua e matelaina i le fiaai ma ua tau le mafai ona faatali i le taunuu mai. Ua tatagi le logo o le faitotoa ma ua e tatalaina le faitotoa, totogi le tagata na tiliva maia, ma ave le pusa o le pizza e lei tatalaina i le umukuka. Ua e tuuina i luga o le laulau ma tatala ai, ma o le mea lea na e vaaia:

Talanoa: O le a le umi ae e faatoa iloaina e le o le mea lea na e okaina?

Faitau:Afai e te le faaaogaina se taimi e faailoa muamua ai manaoga o le falefaigaluega, atonu o le a vave ona latou tuuese oe e pei ona e faia i le oka sese o le pizza. O se vaega lea o le faafitauli a Iosia. Sa na leiloaina pe faapefea ona tulimatai manaoga o le falefaigaluega. Sa ia auina atu ia faamatalaga otooto ma tusi talosaga ma faamatalaga sa lei fia manao ai le falefaigaluega. O le au saili galuega faamanuiaina e faaalu se taimi ia malamalama ai i le mea sa okaina e le falefaigaluega; ona latou aumaia lea o le talosaga lelei atoatoa, faamatalaga otooto, po o le faatalanoaga e fetaui ma manaoga o le falefaigaluega.

1. Faailoa Manaoga o le Falefaigaluega

Faitau:E tele punaoa e mafai ona e faaaogaina e faailoa ai manaoga o le falefaigaluega.

• Uepisaite ma lipoti o le kamupani

• Initoneti

• Ala o faasalalauga faaleagafesootai

• Tagata faigaluega i matafaioi faapena

• Faamatalaga o le Galuega

Talanoa: E mafai faapefea e nei punaoa ma isi foi ona faailoa mai manaoga o se falefaigaluega?

Sailiga Galuega a Iosia

Faitau:O e manatua i le mataupu talu ai le ala na valaau ai Iosia i lona uncle o Tavita? Ia, na fesoasoani moni lava Uncle Tavita ia te ia. Sa ia faasino atu Iosia i sana uo e igoa ia Julie, o se pule i se falefaigaluega tele, o le ABC Marketing.Sa telefoni Iosia ia Julie ma faailoa atu ia lava ma faaaoga ai lana O A’u i le 30 Sekone. Sa faagaeetiaina Julie! Sa tau atu e Julie ia Iosia o loo latou sailia se fesoasoani lelei mo komepiuta, ae e lei faasalalauina le avanoa ona o loo pisi tele i latou. Sa ia auina atu ia Iosia le faamatalaga o le galuega ma sa fai atu ia te ia e auina atu ia te ia lana faamatalaga otooto. A o lei talosagaina le avanoa, sa tonu ia Iosia e faamautinoa ua ia iloa le mea tonu e moomia e le falefaigaluega.

Gaoioiga _{(4 minute)}

O le faamatalaga lea o le galuega na auina atu e Julie ia Iosia. O le a tatou iloiloina faatasi.

Laasaga 1: O le a faitauina leotele e se tagata e toatasi le faamatalaga o le galuega. A o faitau lena tagata, o le a vasevase e tagata o le vaega, maka, pe maka ia tomai autu ma agavaa latou te faalogo i ai.

Laasaga 2: Ona, talanoa lea o se vaega, mea sa outou makaina ma pe aisea.

Faitau:Faatusatusa la’ia o mea na outou makaina ma lea. Pe o outou lalata i ai, pe na outou misia ni nai mea? Afai e tele ni mea na misi, saga faataitai pea ma o le a iu ina lelei.

Gaoioiga _{(5 minute)}

Vaavaai i le faamatalaga o le galuega na e sau ma oe, pe mafaufau e uiga i le galuega e te manao ai. Faaalu ni minute se lima e fai ai le mea lava e tasi sa e faia i le faamatalaga o le galuega a Iosia.

Laasaga 1: Faailoa mai manaoga o le falefaigaluega i le vaseina, makaina pe maka tomai taua ma ausiaga.

Laasaga 2: Iloilo ma lau soa galue ma faasino i ai mea ua e manatu o manaoga ia o le falefaigaluega.

Motugaafa:O le kamupani ma le faamatalaga o le galuega na e maua o punaoa.

2. Faafetaui Ou Tomai

Faitau:A e maua loa mea e manao ai le falefaigaluega, o le isi laasaga e te faia o le faavasega pe fetaui ou tomai ma le poto masani. E faigofie lava pe a e fesili ifo ia te oe lava, “Pe o ia te au lena tomai?” po o le “O le a se poto masani o ia te au e faia ai lena mea?” O le tele o faataitaiga po o ausiaga e mafai ona e mafaufau i ai, o le lelei foi lena.

Sailiga Galuega a Iosia

Faitau:O le ala lea na amata faafetaui ai e Iosia ona tomai i manaoga o le falefaigaluega. Na makaina le fuaiupu lenei i le faamatalaga o le galuega:

• Foia faafesagai o faafitauli faainisinia a paaga a le kamupani ma luga o le telefoni.

Sa ia mafaufau ifo ia te ia lava, “Ou te lelei tele i le mea lena. I la’u galuega talu ai, sa i ai sa’u faiga e foia ai, ma sa faaluaina galuega sa ou faia e pei o isi enisinia.” Sa ia vaaia foi isi mau tomai autu ma mea faigofie e manaomia e fetaui ma ia. Sa ia li’oina tomai uma po o poto masani sa ia lagonaina e fetaui ma ia. Sa ia tusia foi ni tusigamanatu e uiga i ona poto masani ma ausiaga e fesootai i ai.

Gaoioiga _{(3 minute)}

O le faamatalaga lea o le galuega ina ua uma ona faafetaui e Iosia ona tomai ma tusigamanatu faaopoopo.

Laasaga 1: I se minute pe itiiti foi, iloilo e tagata taitoatasi le ala na maka ai e Iosia lana faamatalaga o le galuega.

Laasaga 2: Talanoaina o se vaega po o le a le mea e te fiafia ai i le ala na faafetaui ai e Iosia ona tomai i manaoga o le falefaigaluega.

Faitau:Ia manatua o le tele o faamatalaga o le galuega o se lisi moomoo taualuga lava lena a se falefaigaluega. E le afaina pe a le fetaui tomai uma po o agavaa o loo ta’ua. Aua e te pepelo pe faatupuina ni mea ina ia tau ai ina maua se faatalanoaga po o se galuega. Afai e te iloiloina se avanoa o se galuega ma mafaufau e te fetaui i ai e le itiiti ifo ma le 50 pasene o mea e manao ai le falefaigaluega, e tatau ona e talosaga. Afai e fetaui le 75 pasene, atonu o oe o se tagata talosaga malosi.

Gaoioiga _{(5 minute)}

Vaavaai i le faamatalaga o le galuega, pe mafaufau e uiga i le galuega e te manao ai. Faaalu se 5 minute e fai ai le mea sa faia e Iosia i le li’oina po o a ou tomai o i ai ma fai ni tusigamanatu o le a fesoasoani. Ona vaai lea o lau soa galue, ma faasoa atu ia te ia.

Talanoa: E faapefea e le faafetauia o tomai i lea ala ona fesoasoani ia te oe i lau sailiga galuega?

Faaiuga

Maimoa:“The 16th Time Is the Charm,” o loo maua i le srs.lds.org/videos. (A e a pe a le maua le vitio? Faitau le itulau 54.)

Talanoa: O a ni mea aupito taua sa e aoaoina mai lenei mataupu?

Faitau:Faafetaui ou tomai i manaoga o le falefaigaluega o le galue ma le poto.

Faatino i le Faatuatua + Galue Malosi + Galue ma le Poto = Faamanuiaina

Faafetaui ou tomai a o lei talosaga mo se tulaga, tusi se faamatalaga otooto, pe fai se faatalanoaga. Afai e te faia, o le a e iloaina le faaamanuiaina sili atu i lau sailiga galuega.