Aoao—Taimi Aofai: 45 Minute

Faitau:O se sailiga galuega faamanuiaina e mulimuli i le fuafaatatau faigofie lenei:

Faatino i le Faatuatua + Galue Malosi + Galue ma le Poto = Faamanuiaina

I le mataupu talu ai, sa tatou aoaoina ai tomai nei mo faatalanoaga:

• Saunia a o lei oo i le faatalanoaga.

• Amata lelei le faatalanoaga.

• Faaaoga au faamatalaga O Au i le 30 Sekone.

• Faaaoga faamatalaga malosi.

I le mataupu lenei, o le a tatou faataitaia ai nisi tomai mo faatalanoaga e fesoasoani ai ia tatou galulue ma le poto.

Sailiga Galuega a Iosia

Faitau:Sa faamoemoeina e Iosia ni nai fesili ma sa saunia ni nai faamatalaga malosi mo lana faatalanoaga i le ABC Marketing. Sa ia saunia se O Au i le 30 Minute mautu e amata lelei ai le faatalanoaga. E fia manao Iosia ia lava lana sauniuniga, ma sa tonu ai e valaau i lona uncle o Tavita e fesili i ai mo ni fautuaga mo faatalanoaga.

Ua ta’u atu e Uncle Tavita ia Iosia o le mea masani lava e fesili atu se faifaatalanoaga i le saili galuega e uiga i se vaivaiga. O le faamoemoega autu o lenei fesili o le talanoaina o ni popolega e ono i ai e uiga i le saili galuega. Ua ia fautuaina mai ni nai fesili e fai i le faaiuga o le faatalanoaga ma avatu ia Iosia ni nai fautuaga i le tapunia lelei o le faatalanoaga.

Talanoa:O le a sou manatu i le fautuaga a Uncle Tavita?

Faitau:O le tele o lou faaleleia o ou tomai faatalanoaga, o le tele foi lea o le a faamanuiaina ai oe. O le a e iloaina o loo lelei ona faatalanoa oe pe a avatu ia te oe ni galuega. I le mataupu lenei, o le a tatou aoaoina ai ma faata’ita’i ia tomai nei mo faatalanoaga:

1. Liliu mea le lelei i mea lelei

2. Fai fesili.

3. Faaiu lelei le faatalanoaga.

1. Liliu mea le Lelei i mea lelei

Faitau:Atonu e i ai ni atugaluga o se falefaigaluega faamoemoeina e uiga i le faafaigaluegaina o oe. E mafai ona ala mai nei mea mai lou talaaga faaletagata faigaluega, poto masani, matua, po o nisi mea. O le a tele ina fesili atu ia te oe ni fesili e uiga i nei mea i se faatalanoaga. Mo se faataitaiga, atonu e fesili atu i ni fesili faapea

• Aisea na e tuua ai lou tulaga talu ai?

• Faamatala mai se taimi na oulua le galulue faatasi ai ma se tasi na lua faigaluega.

• O le a se tasi o ou vaivaiga?

Pe a feagai ma nei ituaiga o fesili, taumafai e foia le popolega e ono i ai i le faaaogaina o faaupuga faamaoni ma le manaomia, ae sili ai se faataitaiga.

Sailiga Galuega a Iosia

Faitau:Ua taumanatunatu Iosia pe o le a popole le falefaigaluega ona e laitiiti o ia ma atonu e le lava lona poto masani. Sa ia faaaogaina se siata faigofie e saunia ai sana tali.

Vaivaiga e Ono I Ai	Popolega Moni o le Falefaigaluega	Pe Na Faapefea ona Ou Faatoilaloina (Pe o le a Ou Faatoilaloina)
E talavou	Atonu e le lava le malamalama po o le poto masani	E lua tausaga o lo’u poto masani sa tuuina atu ai le lagolago faakomepiuta ma e tele ni o’u tusipasi faainisinia. I la’u galuega mulimuli o se inisinia mo le laulau fesoasoani, sa ou atinae ai se meafaigaluega faigofie e foia ai faafitauli lea na mafai ai ona vave ona ou tagofia ma foia ia manaoga Faa-Tekinolosi o le mau tagata matou te tautuaina i aso taitasi. O le taunuuga, sa ou foiaina le silia ma le 1,000 faafitauli i le lua tausaga, o se averesi o le afa o mea sa faia e a’u paaga faigaluega. Ou te mautinoa e mafai e o’u poto masani ma tomai ona faaopoopo se taua i la outou kamupani.

Talanoa:O le a se mea na e maitauina i le ala na taulimaina ai e losia le popolega sa ono i ai i le falefaigaluega?

Gaoioiga _{(6 minute)}

Tatou faata’ita’ia ona liliu mea le lelei i mea lelei.

Laasaga 1: Toeiloilo ia faataitaiga, ona faailoa mai lea ma tusi se tali i se tasi o ou vaivaiga e ono i ai.

Vaivaiga e Ono I Ai	Popolega Moni o le Falefaigaluega	Pe Na Faapefea ona Ou Faatoilaloina (Pe o le a Ou Faatoilaloina)
Faataitaiga 1 E talavou	Atonu e le lava le faatagata matua po o le poto masani	E silia ma le lima tausaga o lo’u poto masani e faatatau tonu i ai.
Faataitaiga 2 O galuega eseese i se taimi puupuu lava	E ono tuua le tulaga i se taimi vave.	I le taimi sa ou a’oga ai, sa tele a’u galuega sa mafai ona ou faia e latalata i le lotoa a le aoga e lagolago ai lo’u aiga. O lea ua fai lo’u faailoga tikeri, o loo ou sailia se galuega tumau e mafai ai ona ou tumau mausali mo le isi 5 i le 10 tausaga.

Laasaga 2: Fai paga ma lau soa galue. Feauauai e tali le fesili “O le a se tasi o ou vaivaiga?”

Faitau:I le gasologa o le vaiaso, tagai i le itulau 214 i le faaopoopoga mo nisi faataitaiga e liliu se mea le lelei i se mea lelei.

2. Fai ni Fesili

Faitau:I se mea e lata i le faaiuga o se faatalanoaga, e masani o le a fesili atu ai pe i ai ni au fesili. E tatau ona i ai ni nai au fesili e sauniuni e fesoasoani ai ia te oe ia e maua atili ni faamatalaga ma faaalia ai lou naunau moni i le avanoa. O nisi nei o faataitaiga:

• E faapefea ona saofaga lenei tulaga i le faalapotopotoga?

• E faape’i aoaoga mo lenei matafaioi?

• O fea e te vaai i ai i le kamupani i le isi lima tausaga?

Pe e te fesili e uiga i tupe, faamanuiaga, po o taimi faigaluega i le taimi lea o le faatalanoaga? Aua e te talanoa e uiga i mea nei seia aumai lava e le kamupani i luga pe a tuuina atu se ofo. Ina ia aoao atili e uiga i feutagaiga, tagai itulau 215-17 i le faaopoopoga i le vaiaso lenei, e oe lava ia.

Gaoioiga _{(5 minute)}

Manatu faapea ua e lata i le faaiuga o le faatalanoaga mo le faasalalauga o le galuega na e sau ma oe po o se galuega o e fiafia i ai. Tusi e le tagata lava ia ni fesili se lua e mafai ona e fesili ai, ma faasoa atu i lau soa galue.

1.

2.

3. Faaiu Lelei le Faatalanoaga

Faitau:O lau tala e fai ma lau mea e fai i le faaiuga o lau faatalanoaga e mafai ona i ai se aafiaga tumau i le lelei o e manatuaina e le faifaatalanoaga o la oulua talanoaga. Mulimuli i taiala nei:

• A oo ina e tu i luga e alu ese, ia faafetaui o oulua mata, ataata, ma toe faatalofa (pe afai e talafeagai lena mea ma la outou aganuu).

• Ta’u le igoa o le faifaatalanoaga.

• Toe faafetai i le faifaatalanoaga mo lona taimi ma lona naunau mai.

• Mafaufau i le laasaga e sosoo ai i le faagasologa ma pe faapefea ona e tulitataoina. Atonu e te fai atu se mea faigofie e pei o le, “O a isi laasaga, ma e mafai faapefea ona ou toe tulitataoina?”

• Ta’u atu lou lava naunau i le fai atu o se mea e pei o le, “Sa ou fiafia lava i le ta talatalanoaga ma o le a faatalitali mai i lau susuga,” pe fai atu foi, “Ou te talitonu e mafai ona ou faia se aafiaga lelei iinei.”

Talanoa:E faapefea ona fesoasoani le faia o nei mea ia te oe ia faamanuiaina au faatalanoaga?

Faaiuga

Maimoa:“Amy Nails Her Interview,” o loo maua i le srs.lds.org/videos. (A e a pe a le maua le vitio? Faitau le itulau 126.)

Talanoa:O a ni mea aupito taua sa e aoaoina mai lenei mataupu?

Faitau:O le taimi nei ua tele ni tomai mo faatalanoaga ua e maua e fesoasoani ai ia e galue ma le poto.

Faatino i le Faatuatua + Galue Malosi + Galue ma le Poto = Faamanuiaina

Ua folafola mai le Alii, “Afai ua saunia outou o le a outou le matatau ai lava” (MF&F 38:30). Sauniuni e tatalo mo se fesoasoani ma faata’itai i le tele e mafai ai.