« បព្វជិតភាពម៉ិលគីស្សាដែក » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
បព្វជិតភាពម៉ិលគីស្សាដែក
អំណាច និងសិទ្ធិអំណាចរបស់ព្រះដើម្បីប្រទានពរដល់បុត្រាបុត្រីរបស់ទ្រង់
ព្រះវរបិតាសួគ៌បានត្រៀមជាស្រេចដើម្បីជួយអ្នកឲ្យទទួលបានអំណាចខាងវិញ្ញាណ និងដឹកនាំអ្នកនៅតាមផ្លូវទៅកាន់ជីវិតដ៏អស់កល្បជានិច្ច ។ បព្វជិតភាពរបស់ព្រះអាចធ្វើឲ្យបុត្រាបុត្រីរបស់ព្រះទាំងអស់ដែលជ្រើសរើសមករកទ្រង់ ទទួលបានពរជ័យទាំងនោះ ។ ព្យាការី យ៉ូសែប ស្ម៊ីធ បានបង្រៀនថា ៖ « បព្វជិតភាពម៉ិលគីស្សាដែក … គឺជារបៀបដែលគ្រប់ចំណេះដឹង គោលលទ្ធិ ផែនការនៃសេចក្តីសង្រ្គោះ និងគ្រប់រឿងសំខាន់ៗទាំងអស់ត្រូវបានលាតត្រដាងមកពីឋានសួគ៌ » ។ តាមរយៈអំណាចរបស់បព្វជិតភាពម៉ិលគីស្សាដែក នោះបុត្រា និងបុត្រីរបស់ព្រះទាំងអស់អាចធ្វើសេចក្តីសញ្ញា និងទទួលពិធីបរិសុទ្ធដែលជួយពួកគេឲ្យប្រែក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ ( សូមមើល គោលលទ្ធិ និងសេចក្ដីសញ្ញា ៧៦:៥២-៦០; ៨៤:១៩-២២ ) ។
តើអ្វីទៅជាបព្វជិតភាពម៉ិលគីស្សាដែក ?
បព្វជិតភាពគឺជាអំណាច និងសិទ្ធិអំណាចដ៏អស់កល្បជានិច្ចដែលព្រះបានបង្កើត និងគ្រប់គ្រងស្ថានសួគ៌ និងផែនដី ។ មានបព្វជិតពីរនៅក្នុងសាសនាចក្រនៃព្រះយេស៊ូវគ្រីស្ទ ៖ អើរ៉ុន និងម៉ិលគីស្សាដែក ។ បព្វជិតភាពម៉ិលគីស្សាដែកគឺជាបព្វជិតភាពខ្ពស់ជាង ឬធំជាង ហើយតែងតែត្រូវបានប្រទានទៅឲ្យអ្នកបម្រើរបស់ព្រះនៅពេលដែលភាពពេញលេញនៃដំណឹងល្អមាននៅលើផែនដី ។ តាមរយៈកូនសោរបព្វជិតភាព និងសិទ្ធិអំណាចបព្វជិតភាពដែលបានប្រគល់ឲ្យ នោះអ្នកបម្រើរបស់ព្រះត្រូវបានអនុញ្ញាតឲ្យផ្សាយដំណឹងល្អ ធ្វើពិធីបរិសុទ្ធនៃសេចក្ដីសង្គ្រោះ និងភាពតម្កើងឡើង និងគ្រប់គ្រងនគរព្រះនៅលើផែនដី ។
ទិដ្ឋភាពទូទៅនៃប្រធានបទ ៖ បព្វជិតភាពម៉ិលគីស្សាដែក
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ បព្វជិតភាពអើរ៉ុន, កូនសោរបព្វជិតភាព, ការស្តារបព្វជិតភាពឡើងវិញ
ផ្នែកទី ១
ព្រះប្រគល់អំណាច និងសិទ្ធអំណាចបព្វជិតភាពដល់អ្នកបម្រើរបស់ទ្រង់
ក្នុងប្រវត្តិសាស្ត្រ ព្រះបានប្រគល់សិទ្ធិអំណាចបព្វជិតភាពដល់អ្នកបម្រើរបស់ទ្រង់ ដើម្បីធ្វើសកម្មភាពក្នុងព្រះនាមរបស់ទ្រង់ ហើយជួយដល់សេចក្តីសង្គ្រោះ និងភាពតម្កើងឡើងរបស់បុត្រាបុត្រីរបស់ទ្រង់ ។ យ៉ូសែប ស្ម៊ីធ បានបង្រៀនថា « ព្យាការីទាំងអស់មានបព្វជិតភាពម៉ិលគីស្សាដែក » ។
កាលពីបុរាណ បព្វជិតភាពត្រូវបានគេហៅថា « បព្វជិតភាពដ៏បរិសុទ្ធ តាមរបៀបនៃព្រះរាជបុត្រានៃព្រះ ។ ប៉ុន្តែមកពីការគោរពកោតក្រែង ឬកភក្ដីភាពដល់ព្រះនាមនៃព្រះដ៏ខ្ពស់បំផុត គឺដើម្បីកុំឲ្យប្រើព្រះនាម [ របស់ព្រះអម្ចាស់ ] ញឹកញាប់ពេក » ទើបសាសនាពីសម័យបុរាណបានហៅបព្វជិតភាពតាមលោកម៉ិលគីស្សាដែក « ឬបព្វជិតភាពម៉ិលគីស្សាដែក » ( គោលលទ្ធិ និងសេចក្ដីសញ្ញា ១០៧:៣–៤ ) ។ ម៉ិលគីស្សាដែកគឺជាសង្ឃជាន់ខ្ពស់ និងជាព្យាការីដ៏សុចរិតម្នាក់ក្នុងអំឡុងពេលព្រះគម្ពីរសញ្ញាចាស់ ។ នៅក្នុងភាសាហេព្រើរឈ្មោះ ម៉ិលគីស្សាដែក មានន័យថា « ស្ដេចនៃសុចរិតភាព » ( សេចក្ដីណែនាំដល់បទគម្ពីរទាំងឡាយ « ម៉ិលគីស្សាដែក » នៅលើបណ្ណាល័យដំណឹងល្អ ) ។
នៅក្នុងព្រះគម្ពីរសញ្ញាថ្មី យើងរៀនថាព្រះយេស៊ូវបានតែងតាំងពួកសិស្សរបស់ទ្រង់ ហើយបានប្រទានសិទ្ធអំណាចបព្វជិតភាពដល់ពួកគេ ( សូមមើល លូកា ៩:១-២; យ៉ូហាន ១៥:១៦; ហេព្រើរ ៥:១-១០ ) ។ នៅលើភ្នំប្រែរូប ពេត្រុស យ៉ាកុប និង យ៉ូហាន បានទទួលកូនសោបព្វជិតភាព ។ ជាមួយនឹងកូនសោទាំងនោះ ពួកសាវកមានសិទ្ធិអំណាចក្នុងការបន្តកិច្ចការរបស់សាសនាចក្ររបស់ព្រះគ្រីស្ទបន្ទាប់ពីទ្រង់យាងទៅស្ថានសួគ៍វិញ ( សូមមើលសេចក្តីណែនាំដល់បទគម្ពីរទាំងឡាយ« Transfiguration » នៅលើបណ្ណាល័យដំណឹងល្អ ។ សូមមើលផងដែរ ម៉ាថាយ ១៦:១៥-១៩; ១៧:១–៩; កិច្ចការ ១:២១-២៦; អេភេសូរ ៤:១១-១៣ ) ។
នៅក្នុងសតវត្សក្រោយពីការស្លាប់របស់ពួកសាវករបស់ព្រះអម្ចាស់ សិទ្ធអំណាចបព្វជិតភាពត្រូវបានបាត់បង់ពីលើផែនដី ។ នៅសម័យយើង បព្វជិតភាពម៉ិលគីស្សាដែកត្រូវបានស្ដារឡើងវិញតាមរយៈពេត្រុស យ៉ាកុប និង យ៉ូហាន ទៅកាន់ព្យាការី យ៉ូសែប ស៊្មីធ និង អូលីវើរ ខៅឌើរី ( សូមមើល គោលលទ្ធិ និងសេចក្ដីសញ្ញា ២៧:១២-១៣; យ៉ូសែប ស្ម៊ីធ—ប្រវត្តិ ១:៧២ ) ។ ក្រោយមកសារទូតពីស្ថានសួគ៌ផ្សេងទៀតបានប្រគល់នូវកូនសោរបព្វជិតភាពដល់ពួកលោកនៅក្នុងព្រះវិហារបរិសុទ្ធខឺតឡង់ក្នុង រដ្ឋអូហៃអូ សហរដ្ឋអាមេរិក ( សូមមើល គោលលទ្ធិ និងសេចក្តីសញ្ញា ១១០:១១-១៦ ) ។
រឿងទាំងឡាយដែលត្រូវពិចារណា
-
ប្រធាន ដាល្លិន អេក អូក បានប្រកាស « បព្វជិតភាពជាអំណាច និងសិទ្ធិអំណាចមកពីព្រះដែលកាន់ដោយការទុកចិត្តថាបានប្រើប្រាស់សម្រាប់កិច្ចការរបស់ព្រះ ដើម្បីជាប្រយោជន៍ដល់បុត្រាបុត្រីរបស់ទ្រង់ទាំងអស់ ។ បព្វជិតភាព មិនមែនជាអ្នកដែលត្រូវបានតែងតាំងក្នុងតំណែងបព្វជិតភាព ឬអ្នកដែលអនុវត្តសិទ្ធិអំណាចនេះទេ ។ បុរសដែលកាន់បព្វជិតភាពគឺពុំមែនជាបព្វជិតភាពនោះទេ ។ ខណៈយើងមិនគួរហៅបុរសដែលបានតែងតែងនោះថាជា បព្វជិតភាព នោះវាសមរម្យដើម្បីហៅពួកគេថាជា អ្នកកាន់ បព្វជិតភាព ។ ហេតុអ្វីវាសំខាន់ក្នុងការបែងចែករវាង បព្វជិតភាព និង អ្នកកាន់ បព្វជិតភាព ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន ហ្គរដុន ប៊ី ហ៊ីងគ្លី បានថ្លែងថា ៖ « បព្វជិតភាពមាននៅទីនេះ ។ … យើងដឹងហើយព្រោះយើងបានឃើញអំណាចនៃបព្វជិតភាពនេះ ។ យើងបានឃើញអ្នកជំងឺជាសះស្បើយ មនុស្សខ្វិនអាចដើរបាន ហើយការមកដល់នៃពន្លឺ និងចំណេះដឹង និងការយល់ដឹងដល់អ្នកដែលស្ថិតនៅក្នុងភាពងងឹត » ។ តើអ្នកបានឃើញភស្តុតាងអ្វីខ្លះដែលបញ្ជាក់ថាអំណាច និងសិទ្ធិអំណាចនៃបព្វជិតភាពរបស់ព្រះកំពុងប្រតិបត្តិការនៅក្នុងសាសនាចក្រនៃព្រះយេស៊ូវគ្រីស្ទនៅក្នុងសម័យយើង ?
ស្វែងយល់បន្ថែមទៀត
-
អាលម៉ា ១៣:១៤-១៩; គោលលទ្ធិ និងសេចក្តីសញ្ញា ៨៤:២៣-២៦; ១០៧:២–៨, ១៨, ៤២–៥២
-
« Chapter 8: The Everlasting Priesthood » Teachings of Presidents of the Church: Joseph Smith ( ឆ្នាំ ២០១១ ) ទំព័រ ១០១-១១៣
ផ្នែកទី ២
តាមរយៈសេចក្តីសញ្ញា និងពិធីបរិសុទ្ធនៃបព្វជិតភាពម៉ិលគីស្សាដែក អ្នកអាចរៀបចំខ្លួនដើម្បីត្រឡប់ទៅវត្តមានរបស់ព្រះវិញបាន
ប្រធាន ព្រិកហាំ យ៉ង់ បានបង្រៀនថា « ដំណឹងល្អ និងបព្វជិតភាពគឺជាមធ្យោបាយដែល [ ព្រះ ] បំពេញការងារដើម្បីសង្គ្រោះ និងលើកតម្កើងបុត្រាបុត្រីដែលគោរពប្រតិបត្តិរបស់ទ្រង់ដើម្បីទទួលនូវសិរីល្អ និងអំណាចដូចគ្នាជាមួយនឹងទ្រង់ និងអំណាចដើម្បីបានគ្រងមកុដនៃសិរីល្អ អមតៈភាព និងជីវិតដ៏នៅអស់កល្បជានិច្ច » ។ នៅក្រោមការណែនាំរបស់អ្នកដែលកាន់កូនសោបព្វជិតភាពម៉ិលគីស្សាដែក យើងអាចចុះសេចក្តីសញ្ញាជាមួយនឹងព្រះ ហើយទទួលនូវពិធីបរិសុទ្ធពិសិដ្ឋដែលចាំបាច់ដើម្បីទទួលបានជីវិតអស់កល្បជានិច្ច ។
រឿងទាំងឡាយដែលត្រូវពិចារណា
-
នៅពេលដែលបុរសម្នាក់ទទួលបព្វជិតភាពម៉ិលគីស្សាដែក និងត្រូវបានតែងតាំងទៅកាន់តំណែងមួយនៅក្នុងបព្វជិតភាព នោះលោកចូលទៅក្នុង « សម្បថ និងសេចក្ដីសញ្ញា ដែលជារបស់ផងបព្វជិតភាព » ។ សូមអាន គោលលទ្ធិ និងសេចក្តីសញ្ញា ៨៤:៣៣–៤៤ ។ តើសេចក្តីសញ្ញាអ្វីខ្លះដែលអ្នកកាន់បព្វជិតភាពធ្វើ ? តើព្រះបានសន្យាអ្វីខ្លះចំពោះអស់អ្នកដែលទទួល និងពង្រីកការហៅរបស់ពួកគេ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអញ្ជើញសមាជិកក្រុមរបស់អ្នកឲ្យអាន គោលលទ្ធិ និងសេចក្ដីសញ្ញា ៨៤:១៧-២២ ហើយពិភាក្សាអំពីអ្វីដែលព្រះអម្ចាស់បានបង្ហាញអំពីបព្វជិតភាព ។ ដើម្បីបញ្ជាក់អំពីអត្ថន័យនៃវគ្គបទគម្ពីរ សូមពិចារណាចែកចាយថា « សេចក្ដីអាថ៌កំបាំងទាំងឡាយនៃនគរ » គឺ « សេចក្ដីពិតខាងវិញ្ញាណ ដែលបានដឹងដោយសារវិវរណៈប៉ុណ្ណោះ។ » ( សេចក្តីណែនាំដល់បទគម្ពីរទាំងឡាយ « សេចក្តីអាថ៌កំបាំងទាំងឡាយនៃព្រះ » នៅលើបណ្ណាល័យដំណឹងល្អ ) ។ វាក៏អាចជួយពន្យល់ផងដែរថាអំណាចនៃព្រះគឺជាអំណាចនៃសេចក្ដីសុចរិតដែលយើងមកស្គាល់ព្រះ ហើយក្លាយទៅដូចជាទ្រង់ ( សូមមើល ប្រ៊ូស អ័រ ម៉ាក់ខុនឃី The Promised Messiah [ ឆ្នាំ ១៩៧៨ ] ទំព័រ ៥៨៩ ) ។ តើពិធីបរិសុទ្ធដ៏ពិសិដ្ឋអាចនាំយើងឲ្យយល់ដឹងអំពីព្រះ ហើយរៀបចំយើងឲ្យកាន់តែក្លាយដូចជាទ្រង់ដោយរបៀបណា ?
ស្វែងយល់បន្ថែមទៀត
-
ហិនរី ប៊ី អាវរិង « Families under Covenant » Liahona ខែ ឧសភា ឆ្នាំ ២០១២,ទំព័រ ៦២–៦៥
-
ខិនថ៍ អេហ្វ រីឆាតស៍ « The Power of Godliness » Liahona ខែ ឧសភា ឆ្នាំ ២០១៦ ទំព័រ ១១៨–១២០
-
ជូលី ប៊ី ប៊េក « An Outpouring of Blessings » Liahona ខែ ឧសភា ឆ្នាំ ២០០៦ ទំព័រ ១១–១៣
-
« The Holy Priesthood—for the Blessing of God’s Children » Teachings of Presidents of the Church: George Albert Smith ( ឆ្នាំ ២០១១ ) ទំព័រ ៤៥-៥៦
ផ្នែកទី ៣
ទាំងស្ត្រី និងបុរសបម្រើនៅក្នុងសាសនាចក្ររបស់ព្រះគ្រីស្ទដោយមានអំណាច និងសិទ្ធអំណាចបព្វជិតភាព
ព្រះហៅទាំងបុរស និងស្ត្រីនៅក្នុងសាសនាចក្ររបស់ទ្រង់ឲ្យជួយដល់កិច្ចការដ៏ចាំបាច់នៃសេចក្ដីសង្គ្រោះ និងភាពតម្កើងឡើង ។ ខណៈពេលដែលមានតែបុរសប៉ុណ្ណោះត្រូវបានតែងតាំងក្នងតំណែងបព្វជិតភាព ការចូលទៅប្រើសិទ្ធិអំណាច និងអំណាចបព្វជិតភាពគឺមានសម្រាប់ទាំងបុរស និង ស្ត្រី ដើម្បីជួយពួកគេឲ្យសម្រេចកិច្ចការរបស់ព្រះ ។ អំណាចនៅក្នុងបព្វជិតភាពត្រូវបានទទួលរៀងៗខ្លួននៅពេលដែលសមាជិកសាសនាចក្ររក្សាសេចក្ដីសញ្ញារបស់ខ្លួនដោយសុចរិតជាមួយនឹងព្រះអម្ចាស់ ។ ក្រោមការដឹកនាំរបស់បុរសម្នាក់ដែលកាន់កូនសោបព្វជិតភាព បុគ្គលម្នាក់ៗត្រូវបានញែកចេញដើម្បីធ្វើការងារនៅក្នុងការហៅក្នុងសាសនាចក្រ ។ ដោយការដាក់ដៃលើ នាងឬគាត់ទទួលសិទ្ធិអំណាចបព្វជិតភាពដើម្បីបំពេញភារកិច្ចដែលបានចាត់តាំង ។ ( សូមមើល ដាល្លិន អេក អូក « The Keys and Authority of the Priesthood » Liahona ខែ ឧសភា ឆ្នាំ ២០១៤ ទំព័រ ៥០–៥១ ) ។
រឿងទាំងឡាយដែលត្រូវពិចារណា
-
ប្រធាន អិម រ័សុល បាឡឺដ បានបង្រៀនថា ៖ « ព្រះវរបិតារបស់យើងដែលគង់នៅស្ថានសួគ៌មានចិត្តសប្បុរសជាមួយនឹងអំណាចរបស់ទ្រង់ ។ បុរស និងស្ត្រីគ្រប់រូបទាំងអស់មានសិទ្ធអាចទទួលយកអំណាចនេះសម្រាប់ជាជំនួយក្នុងជីវិតផ្ទាល់ខ្លួនរបស់ពួកគេ ។ អស់អ្នកទាំងឡាយណាដែលធ្វើសេចក្តីសញ្ញាពិសិដ្ឋជាមួយនឹងព្រះអម្ចាស់ និងអស់អ្នកទាំងឡាយណាដែលគោរពតាមសេចក្តីសញ្ញាទាំងនោះ មានសិទ្ធិទទួលបាននូវវិវរណៈផ្ទាល់ខ្លួន ត្រូវបានប្រទានពរដោយការបម្រើរបស់ពួកទេវតា ទាក់ទងជាមួយនឹងព្រះ ទទួលបាននូវភាពពេញលេញនៃដំណឹងល្អ ហើយទីបំផុតក្លាយជាអ្នកគ្រងមរតកជាមួយនឹងព្រះយេស៊ូវគ្រីស្ទនូវអ្វីៗទាំងអស់ដែលព្រះវរបិតាមាន » ។ ហេតុអ្វីវាសំខាន់ដើម្បីស្គាល់ថាពរជ័យដ៏ពិសិដ្ឋមិនពឹងផ្អែកលើបុគ្គលម្នាក់ដែលត្រូវបានតែងតាំងក្នុងតំណែងបព្វជិតភាពនោះទេ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមពិចារណាអញ្ជើញសិស្សម្នាក់ឲ្យអានសេចក្តីថ្លែងការណ៍ដូចខាងក្រោមដោយប្រធាន រ័សុល អិម ណិលសុន ៖
« បុរស និងស្ត្រីគ្រប់រូបដែលចុះសេចក្ដីសញ្ញាជាមួយនឹងព្រះ ហើយរក្សាសេចក្ដីសញ្ញាទាំងនោះ និងចូលរួមក្នុងពិធីបរិសុទ្ធបព្វជិតភាពដោយស័ក្ដិសម ដែលមានឥទ្ធិពលផ្ទាល់ចំពោះព្រះចេស្ដានៃព្រះ ។ អស់អ្នកដែលបានទទួលអំណោយទានពិសិដ្ឋនៅក្នុងព្រះដំណាក់នៃព្រះអម្ចាស់បានទទួលអំណោយទានមួយនៃអំណាចបព្វជិតភាព តាមរយៈគុណធម៌នៃសេចក្ដីសញ្ញារបស់ពួកគេ ព្រមទាំងអំណោយទាននៃចំណេះដឹងដើម្បីដឹងអំពីរបៀបដើម្បីទាញយកព្រះចេស្ដានោះ ។
« ស្ថានសួគ៌គឺបើកចំពោះ ស្រ្តី ដែលត្រូវបានប្រទានឲ្យនូវព្រះចេស្ដារបស់ព្រះតាមរយៈសេចក្ដីសញ្ញាបព្វជិតភាពរបស់ពួកគេ ដូចជាបុរស ដែលកាន់បព្វជិតភាពផងដែរ » ។
ចូរពិភាក្សាអំពីរបៀបដែលសមាជិកដ៏សក្ដិសមណាម្នាក់នៃសាសនាចក្រអាចទាញយកអំណាចរបស់ព្រះបាន ។
ស្វែងយល់បន្ថែមទៀត
-
រ័សុល អិម ណិលសុន « Spiritual Treasures » Liahona ខែ វិច្ឆិកា ឆ្នាំ ២០១៩ ទំព័រ ៧៦–៧៩
-
ដាល្លិន អេក អូក « The Keys and Authority of the Priesthood » Liahona ខែ ឧសភា ឆ្នាំ ២០១៤ ទំព័រ ៤៩–៥២
-
ជីន ប៊ី ប៊ីងហាំ « United in Accomplishing God’s Work » Liahona ខែ ឧសភា ឆ្នាំ ២០២០ ទំព័រ ៦០–៦៣