« ទុកចិត្តលើព្រះអម្ចាស់ »ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការស្ដារបព្វជិតភាពឡើងវិញ
ព្រះបានប្រទានសិទ្ធិអំណាចឲ្យធ្វើសកម្មភាពនៅក្នុងព្រះនាមរបស់ទ្រង់
សូមស្រមៃថាជីវិតរបស់បងប្អូននឹងមានភាពខុសគ្នាបែបណា ប្រសិនបើព្រះមិនបានស្ដារសិទ្ធិអំណាចបព្វជិតភាពឡើងវិញដើម្បីធ្វើសេចក្ដីសញ្ញា ពិធីបរិសុទ្ធ និងអំណោយទានដ៏ទេវភាពជាច្រើនទៀតដែលមានសម្រាប់អ្នក និងមនុស្សជាទីស្រឡាញ់របស់អ្នក ។ ផ្នែកដ៏សំខាន់នៃដំណឹងល្អរបស់ព្រះយេស៊ូវគ្រីស្ទគឺជាសារលិខិតដែលថា ដោយសារព្រះស្រឡាញ់បុត្រាបុត្រីរបស់ទ្រង់ នោះទ្រង់បានប្រទានអំណាចបព្វជិតភាព និងសិទ្ធិអំណាចទៅដល់អ្នកបម្រើរបស់ទ្រង់នៅក្នុងសាសនាចក្រ ។ បព្វជិតភាពរួមបញ្ចូលទាំងសិទ្ធិអំណាចក្នុងការផ្សព្វផ្សាយដំណឹងល្អរបស់ព្រះយេស៊ូវគ្រីស្ទ ហើយធ្វើកិច្ចការនៃសេចក្ដីសង្គ្រោះរបស់ព្រះ និងភាពតម្កើងឡើង ។ សព្វថ្ងៃនេះមនុស្សរាប់លាននាក់ត្រូវបានប្រទានពរដោយសេចក្តីសញ្ញាដ៏ពិសិដ្ឋ ពិធីបរិសុទ្ធ និងពរជ័យផ្សេងៗទៀតដែលបានផ្ដល់ឲ្យតាមរយៈអំណាច និងសិទ្ធិអំណាចនៃបព្វជិតភាពរបស់ព្រះ ។
បព្វជិតភាពនៃព្រះបានប្រទានពរដល់បុត្រាបុត្រីរបស់ទ្រង់នៅទូទាំងប្រវត្តិសាស្ត្រនៃពិភពលោក ។ បន្ទាប់ពីការស្លាប់របស់ពួកសាវករបស់ព្រះគ្រីស្ទនៅក្នុងសម័យព្រះគម្ពីរសញ្ញាថ្មី សិទ្ធិអំណាចក្នុងការធ្វើកិច្ចការក្នុងព្រះនាមរបស់ព្រះត្រូវបានបាត់បង់ ។ ក្រោយមកនៅក្នុងទសវត្សរ៍ ឆ្នាំ ១៨០០ សារទូតពីស្ថានសួគ៌បានយាងមក ហើយប្រគល់សិទ្ធិអំណាចបព្វជិតភាព និងកូនសោបព្វជិតភាពឲ្យទៅ យ៉ូសែប ស្ម៊ីធ និង អូលីវើរ ខៅឌើរី ។ ការស្ដារឡើងវិញនៃអំណាចរបស់ព្រះគឺជាផ្នែកដ៏សំខាន់មួយនៃការស្ដារឡើងវិញទាំងមូលនៃដំណឹងល្អរបស់ព្រះយេស៊ូវគ្រីស្ទ និងសាសនាចក្ររបស់ទ្រង់ ។ សិទ្ធិអំណាច និងកូនសោរនៃបព្វជិតភាពនៅតែមាននៅក្នុងសាសនាចក្រសព្វថ្ងៃនេះ ។
តើអ្វីជាការស្តារឡើងវិញនៃបព្វជិតភាព ?
បព្វជិតភាពគឺជាអំណាច និងសិទ្ធិអំណាចក្នុងការធ្វើកិច្ចការក្នុងព្រះនាមរបស់ព្រះ ។ សិទ្ធិអំណាចដ៏ទេវភាពនេះអនុញ្ញាតឲ្យបុត្រាបុត្រីរបស់ព្រះទទួលពិធីបរិសុទ្ធ និងសេចក្ដីសញ្ញាដែលចាំបាច់សម្រាប់សេចក្ដីសង្គ្រោះ និងភាពតម្កើងឡើង ។ បព្វជិតភាពនោះបានបាត់បង់ក្រោយពីការស្លាប់របស់ពួកសាវករបស់ព្រះអម្ចាស់នៅសម័យព្រះគម្ពីរសញ្ញាថ្មី ។ នៅដើមទសវត្សរ៍ ឆ្នាំ ១៨០០ សារទូតពីស្ថានសួគ៌បានយាងមក ហើយប្រគល់សិទ្ធិអំណាចបព្វជិតភាព និងកូនសោបព្វជិតភាពឲ្យទៅ យ៉ូសែប ស្ម៊ីធ និង អូលីវើរ ខៅឌើរី ។
ទិដ្ខភាពទូទៅនៃប្រធានបទ ៖ ការស្តារបព្វជិតភាពឡើងវិញ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ការស្ដារដំណឹងល្អឡើងវិញ, យ៉ូសែប ស្ម៊ីធ, បព្វជិតភាពអើរ៉ុន, បព្វជិតភាពម៉ិលគីស្សាដែក, កូនសោរបព្វជិតភាព, ពរជ័យបព្វជិតភាព, សេចក្ដីសញ្ញា និងពិធិបរិសុទ្ធ
ផ្នែកទី ១
ព្រះទ្រង់ចែកចាយអំណាចបព្វជិតភាពរបស់ទ្រង់ដើម្បីប្រទានពរដល់បុត្រាបុត្រីរបស់ទ្រង់
ព្រះបានប្រទានអំណាចបព្វជិតភាពដល់ពួកអ្នកបម្រើរបស់ទ្រង់តាំងពីដើមដំបូងមក ( សូមមើល ម៉ូសេ ៦:៧ ) ។ លោកអយ្យកោពីបុរាណមានលោកអ័ដាម ណូអេ អ័ប្រាហាំ ម៉ូសេ និងអ្នកផ្សេងទៀតរាប់មិនអស់ បានកាន់បព្វជិតភាពក្នុងគោលបំណងប្រទានព្រះពរដល់បុត្រាបុត្រីរបស់ព្រះ ។ តាមរយៈបព្វជិតភាព ព្រះបានអនុញ្ញាតឲ្យប្រជាជនរបស់ទ្រង់ចែកចាយសារលិខិតដំណឹងល្អ និងអនុវត្តពិធិបរិសុទ្ធដ៏ពិសិដ្ឋដែលជាផ្នែកមួយនៃការថ្វាយបង្គំរបស់ពួកគេ ។ នៅពេលណាដែលព្រះបានហៅពួកព្យាការី ទ្រង់បានដឹកនាំពួកគេតាមរយៈវិវរណៈដ៏ទេវភាព ហើយបានប្រទានអំណាច និងសិទ្ធិអំណាចនៃបព្វជិតភាពដល់ពួកលោក ។
សព្វថ្ងៃនេះ សមាជិកគ្រប់រូបនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមានឯកសិទ្ធិទទួលពរដែលទាក់ទងនឹងបព្វជិតភាពនៃព្រះ ។ តាមរយៈបព្វជិតភាព យើងអាចទទួលពិធីបុណ្យជ្រមុជទឹក ការបញ្ជាក់ និងអំណោយនៃព្រះវិញ្ញាណបរិសុទ្ធ ពិធីបរិសុទ្ធក្នុងព្រះវិហារបរិសុទ្ធ និងច្រើនជាងនេះទៀត ។ តាមរយៈពិធីបរិសុទ្ធនៃបព្វជិតភាព « អំណាចនៃព្រះត្រូវបានសម្ដែងឲ្យឃើញ » ( គោលលទ្ធិ និងសេចក្ដីសញ្ញា ៨៤:២០ ) រៀបចំយើងឲ្យកាន់តែប្រែក្លាយដូចជាព្រះវរបិតាសួគ៌ និងព្រះរាជ្យបុត្រារបស់ទ្រង់ព្រះយេស៊ូវគ្រីស្ទ ។
រឿងទាំងឡាយដែលត្រូវពិចារណា
-
ការចុះ និងការរក្សាសេចក្តីសញ្ញាដែលជាប់ទាក់ទងទៅនឹងពិធិបរិសុទ្ធនៃបព្វជិតភាព បង្កើតនូវទំនាក់ទំនងខាងវិញ្ញាណដ៏សំខាន់មួយរវាងអ្នកនិងព្រះ ។ អែលឌើរ ឌែល ជី រិនឡាន់ បានបង្រៀនថា « ការរក្សាសេចក្តីសញ្ញាដែលបានចុះនៅឯអាងនៃពិធីបុណ្យជ្រមុជទឹក និងនៅក្នុងព្រះវិហារបរិសុទ្ធ … ផ្ដល់កម្លាំងដល់យើងដើម្បីទប់ទល់នឹងការសាកល្បង និងការឈឺចាប់ក្នុងជីវិតរមែងស្លាប់នេះ ។ គោលលទ្ធិដែលទាក់ទងនឹងសេចក្ដីសញ្ញាទាំងនេះជួយសម្រួលដល់ដំណើររបស់យើង ហើយផ្ដល់នូវសេចក្ដីសង្ឃឹម ការលួងលោម និងភាពសុខសាន្ត » ។ តើអ្នកនឹងធ្វើអ្វីខ្លះដើម្បីធ្វើ និងរក្សាសេចក្ដីសញ្ញាដែលមានសម្រាប់អ្នកតាមរយៈបព្វជិតភាព ? តើអ្នកអាចគាំទ្រអ្នកដទៃ និងជួយពួកគេចុះសេចក្ដីសញ្ញាជាមួយនឹងព្រះដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអញ្ជើញសមាជិកក្នុងក្រុមឲ្យអានសេចក្តីថ្លែងការណ៍ខាងក្រោមដោយប្រធាន រ័សុល អិម ណិលសុន ៖
« ដោយសារតែបព្វជិតភាពម៉ិលគីស្សាដែកត្រូវបានស្ដារឡើងវិញ ទាំងស្ត្រី និងបុរសដែលរក្សាសេចក្ដីសញ្ញាអាចទទួលបាន ‹ ព្រះពរខាងវិញ្ញាណនៅក្នុងសាសនាចក្រទាំងអស់ › [ គោលលិទ្ធ និងសេចក្ដីសញ្ញា ១០៧:១៨ ] ឬយើងអាចនិយាយថា ទ្រព្យសម្បត្តិខាងវិញ្ញាណទាំងអស់ដែលព្រះអម្ចាស់មានសម្រាប់បុត្រាបុត្រីរបស់ទ្រង់ ។
« បុរស និងស្ត្រីគ្រប់រូបដែលចុះសេចក្ដីសញ្ញាជាមួយនឹងព្រះ ហើយរក្សាសេចក្ដីសញ្ញាទាំងនោះ និងចូលរួមក្នុងពិធីបរិសុទ្ធបព្វជិតភាពដោយស័ក្ដិសម ដែលមានឥទ្ធិពលផ្ទាល់ចំពោះព្រះចេស្ដានៃព្រះ ។ អ្នកទាំងឡាយណាដែលបានទទួលអំណោយទានពិសិដ្ឋនៅក្នុងព្រះដំណាក់នៃព្រះអម្ចាស់ ទទួលអំណោយទានមួយនៃអំណាចបព្វជិតភាពតាមរយៈគុណធម៌នៃសេចក្ដីសញ្ញារបស់ពួកគេព្រមទាំងអំណោយទាននៃចំណេះដឹងដើម្បីដឹងពីរបៀបទាញយកព្រះចេស្ដានោះ » ។
តើ « ទ្រព្យសម្បត្តិខាងវិញ្ញាណ » ឬពរជ័យអ្វីខ្លះដែលអ្នកបានទទួលដោយការទទួលពិធិបរិសុទ្ធ និងការចុះ និងរក្សាសេចក្ដីសញ្ញានោះ ?
ស្វែងយល់បន្ថែមទៀត
-
សេចក្ដីណែនាំដល់បទគម្ពីរទាំងឡាយ « សេចក្តីសញ្ញា » នៅលើបណ្ណាល័យដំណឹងល្អ ។
-
ជែហ្វ្រី អ័រ ហូឡិន « Our Most Distinguishing Feature » Liahona ខែ ឧសភា ឆ្នាំ ២០០៥ ទំព័រ ៤៣-៤៥
-
« Chapter 5: The Holy Priesthood—for the Blessing of God’s Children » ការបង្រៀនរបស់ប្រធាននៃសាសនាចក្រ ៖ ចច អ័លប៊ើត ស្ម៊ីធ ( ឆ្នាំ ២០១១ ) ទំព័រ ៤៥-៥៦ ។
ផ្នែកទី ២
យ៉ូហាន បាទីស្ទ ដែលបានរស់ឡើងវិញបានស្តារបព្វជិតភាពអើរ៉ុនឡើងវិញដល់ យ៉ូសែប ស៊្មីធ និង អូលីវើរ ខៅឌើរី ។
ព្រះអម្ចាស់បានរៀបចំផ្លូវមួយដែលមានរបៀបរៀបរយក្នុងការចែកចាយសិទ្ធិអំណាចនៃបព្វជិតភាពរបស់ទ្រង់ ។ គ្មានអ្នកណាលើកខ្លួនដល់សិទ្ធអំណាចនោះឡើយ ( សូមមើល ហេព្រើរ ៥:៤ ) ។ មានតែអស់អ្នកដែលកាន់បព្វជិតភាពប៉ុណ្ណោះដែលអាចតែងតាំងអ្នកដទៃបាន ហើយពួកគេអាចធ្វើដូច្នេះបានតែនៅពេលដែលមានការអនុញ្ញាតពីអ្នកដែលកាន់កូនសោសម្រាប់ការតែងតាំងប៉ុណ្ណោះ ( សូមមើល មាត្រានៃសេចក្ដីជំនឿ ១:៥ ) ។
ខណៈកំពុងបកប្រែព្រះគម្ពីរមរមន យ៉ូសែប ស្ម៊ីធ និង អូលីវើរ ខៅឌើរី បានប្រទះនឹងវគ្គមួយចំនួនអំពីពិធីបុណ្យជ្រមុជទឹក ។ យ៉ូសែប និង អូលីវើរ មានសំណួរអំពីរឿងនេះ ( សូមមើល យ៉ូសែប ស្ម៊ីធ—ប្រវត្តិ ១:៦៨ ) ហើយបានសម្រេចចិត្តទូលសួរព្រះអម្ចាស់ ។ ពួកលោកបានចូលទៅក្នុងព្រៃដើម្បីអធិស្ឋាន ហើយនៅក្នុងចម្លើយទៅនឹងការអធិស្ឋានរបស់ពួកលោក យ៉ូហាន បាទីស្ទ បានលេចមកឯពួកលោក ហើយបានផ្តល់សិទ្ធអំណាចនៃបព្វជិតភាពដល់ពួកលោកដោយដាក់ដៃលើ ( សូមមើល គោលលទ្ធិ និងសេចក្តីសញ្ញា ១៣ ) ។ យ៉ូហាន បាទីស្ទបានណែនាំពួកលោកឲ្យធ្វើពិធីបុណ្យជ្រមុជទឹកឲ្យគ្នាទៅវិញទៅមក ហើយតែងតាំងបព្វជិតភាពឲ្យគ្នាទៅវិញទៅមកផងដែរ ( សូមមើល យ៉ូសែប ស្ម៊ីធ—ប្រវត្តិ ១:៦៨-៧២ ) ។
រឿងទាំងឡាយដែលត្រូវពិចារណា
-
យ៉ូសែប ស្ម៊ីធ កាលពីវ័យក្មេងមានសំណួរអំពីការបង្រៀនខាងសាសនានៅសម័យរបស់លោក ។ ដើម្បីស្វែងរកការណែនាំ លោកបែរទៅរកព្រះដោយការអធិស្ឋាន ហើយត្រូវបានព្រះវរបិតាសួគ៌ និងព្រះយេស៊ូវគ្រីស្ទយាងមកជួប ។ សូមអាន យ៉ូសែបស្ម៊ីធ—ប្រវត្តិ ១:១៧–២០ ។ តើវគ្គបទគម្ពីរនេះជួយអ្នកឲ្យយល់កាន់តែច្បាស់អំពីមូលហេតុដែលចាំបាច់ត្រូវមានការស្ដារបព្វជិតភាពឡើងវិញដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ជាមួយសមាជិកក្រុមរបស់អ្នក សូមមើលវីដេអូ « Restoration of the Priesthood » ( នាទីទី ២:០០ ) ស្ដាប់រកពរជ័យដែលបានចូលមកក្នុងជីវិតរបស់យើងដោយសារតែការស្តារឡើងវិញនៃបព្វជិតភាពអើរ៉ុន ។ តើយើងអាចទាមទារពរជ័យនៃបព្វជិតភាពអើរ៉ុនឲ្យបានពេញលេញក្នុងជីវិតរបស់យើងដោយរបៀបណា ?
ស្វែងយល់បន្ថែមទៀត
-
« ការស្ដារឡើងវិញនៃភាពពោរពេញនៃដំណឹងល្អរបស់ព្រះយេស៊ូវគ្រីស្ទ ៖ការប្រកាសដល់ពិភពលោកនៃខួបលើកទីពីររយឆ្នាំ » នៅលើបណ្ណាល័យដំណឹងល្អ ។
-
Church History Topics « Restoration of the Aaronic Priesthood » នៅលើបណ្ណាល័យដំណឹងល្អ
-
« Days Never to Be Forgotten » The Priesthood Restored: A Joseph Smith Papers Podcast នៅលើគេហទំព័រ josephsmithpapers.org
ផ្នែកទី ៣
បព្វជិតភាពម៉ិលគីស្សាដែកបានស្ដារឡើងវិញទៅដល់ យ៉ូសែប ស្ម៊ីធ និង អូលីវើរ ខូវឌើរី ដោយសារទូតពីស្ថានសួគ៌ ពេត្រុស យ៉ាកុប និង យ៉ូហាន
ក្នុងរយៈពេលមួយខែនៃដំណើរទស្សនកិច្ចពី យ៉ូហាន បាទីស្ទ មានសារទូតពីស្ថានសួគ៌ជាច្រើនទៀតបានមកជួប យ៉ូសែប ស្ម៊ីធ និង អូលីវើរ ខូវឌើរី ។ ពេលនេះសាវកនៅក្នុងព្រះគម្ពីរសញ្ញាថ្មី ពេត្រុស យ៉ាកុប និង យ៉ូហាន បានប្រគល់ឲ្យ យ៉ូសែប និង អូលីវើរ នូវបព្វជិតភាពម៉ិលគីស្សាដែក និងកូនសោនៃនគរព្រះ ( សូមមើល គោលលទ្ធិ និងសេចក្ដីសញ្ញា ២៧:១២-១៣; ១២៨:២០ ) ។ នៅពេលដែលបព្វជិតភាពអើរ៉ុនបានផ្តល់សិទ្ធិអំណាចដល់ យ៉ូសែប និង អូលីវើរ ដើម្បីធ្វើពិធីបុណ្យជ្រមុជទឹក នោះបព្វជិតភាពម៉ិលគីស្សាដែកក៏បានប្រគល់ដល់ពួកលោកក្នុងការធ្វើជាអធិបតីក្នុងសាសនាចក្រ និងការធ្វើពិធីបរិសុទ្ធទាំងអស់ដែលចាំបាច់ដើម្បីទទួលបានសេចក្ដីសង្គ្រោះ និងភាពតម្កើងឡើង ។
ក្រោយមក យ៉ូសែប ស្ម៊ីធ និងថ្នាក់ដឹកនាំសាសនាចក្រដទៃទៀតត្រូវបានប្រទាននូវកូនសោរបព្វជិតភាពបន្ថែមទៀត ឬសិទ្ធិអំណាចដើម្បីមើលការខុសត្រូវ និងដឹកនាំផ្នែកខ្លះៗរបស់សាសនាចក្រ និងបេសកកម្មរបស់សាសនាចក្រ ។ នៅក្នុងព្រះវិហារបរិសុទ្ធខឺតឡង់ សារទូតពីស្ថានសួគ៌ផ្សេងទៀតមាន—លោកម៉ូសេ អេលីយ៉ាស និង អេលីយ៉ា—បានប្រគល់កូនសោទាំងឡាយនៃការប្រមូលផ្តុំអ៊ីស្រាអែល គ្រាកាន់កាប់ត្រួតត្រានៃដំណឹងល្អរបស់លោក អ័ប្រាហាំ ( ដែលរួមបញ្ចូលទាំងការស្ដារឡើងវិញនូវសេចក្ដីសញ្ញាអ័ប្រាហាំ ) និងកូនសោរនៃអំណាចនៃការផ្សាភ្ជាប់ ( សូមមើល គោលលទ្ធិ និងសេចក្តីសញ្ញា ១១០:១១-១៦ ) ។
រឿងទាំងឡាយដែលត្រូវពិចារណា
-
អ្នកកាន់បព្វជិតភាពគ្រប់រូបអាចតាមដានខ្សែស្រឡាយនៃសិទ្ធិអំណាចរបស់លោកត្រឡប់ទៅកាន់ព្រឹត្តិការណ៍ដ៏ពិសិដ្ឋនៃការស្តារបព្វជិតភាពឡើងវិញបាន ។ អែលឌើរ ជែហ្វ្រី អ័រ ហូឡិន បានពន្យល់ថា « យើងនៅក្នុងសាសនាចក្រដែលបានស្តារឡើងវិញនៃព្រះយេស៊ូវគ្រីស្ទ ដែលអាចតាមដានខ្សែស្រឡាយសិទ្ធិអំណាចបព្វជិតភាពដែលអនុវត្តដោយឌីកុនថ្មីបំផុតនៅក្នុងវួដ ប៊ីស្សពដែលជាអធិបតីលើគាត់ និងព្យាការីដែលជាអធិបតីលើយើងទាំងអស់គ្នា ។ ខ្សែស្រឡាយនោះជាប់តៗគ្នាចាប់តាំងពីពួកទេវតាដែលផ្ដល់ការងារបម្រើ ដែលមកពីព្រះរាជបុត្រានៃព្រះផ្ទាល់ ដោយទទួលបានអំណោយដ៏មិនអាចប្រៀបផ្ទឹមបានពីស្ថានសួគ៌ » ។ ខ្សែស្រឡាយនៃសិទ្ធិអំណាច របស់បុរសម្នាក់អាចស្នើសុំពីទីស្នាក់ការកណ្តាលសាសនាចក្របាន ។
សកម្មភាពសម្រាប់ការរៀនសូត្រជាមួយអ្នកដទៃ
-
តើអ្នកមានអារម្មណ៍ថាជីវិតរបស់អ្នកមានការផ្លាស់ប្តូរយ៉ាងណាបន្ទាប់ពីបានទទួលពិធីបរិសុទ្ធនៃបព្វជិតភាព ? ពេលអ្នក និងក្រុមដែលនៅសល់ពិចារណាអំពីសំណួរនេះ សូមអានសេចក្ដីថ្លែងការណ៍នេះមកពី យ៉ូសែប ស្ម៊ីធ—ប្រវត្តិ ១:៧៤ ៖ « ឥឡូវនេះ មកពីគំនិតយើងបានទទួលការបំភ្លឺ នោះយើងចាប់ផ្ដើមយល់នូវបទគម្ពីរទាំងឡាយ ដែលបានលាតត្រដាងនៅចំពោះយើង ហើយអត្ថន័យ និងគោលបំណងនៃវគ្គដ៏អាថ៌កំបាំងទាំងឡាយនោះ ក៏បានបើកសម្ដែងដល់យើង តាមរបៀបដែលយើងពុំដែលបានទទួលពីមុន ឬគិតពីមុនមកសោះ » ។
ស្វែងយល់បន្ថែមទៀត
-
ហ្កែរី អ៊ី ស្ទីវ៉ែនសុន « តួនាទីដ៏ចាំបាច់របស់បព្វជិតភាពក្នុងការស្ដារឡើងវិញ » លីអាហូណា ខែ មិថុនា ឆ្នាំ ២០២០ ទំព័រ ១៣-១៧
-
Church History Topics « Restoration of the Melchizedek Priesthood » នៅលើបណ្ណាល័យដំណឹងល្អ
-
« The Voice of Peter, James, and John » The Priesthood Restored: A Joseph Smith Papers Podcast នៅលើគេហទំព័រ josephsmithpapers.org
ធនធានផ្សេងៗទៀតអំពីការស្តារបព្វជិតភាពឡើងវិញ
-
ធនធានសម្រាប់ការបង្រៀនកុមារ