Magkat-on—Labing Dugay nga Oras: 45 Minutos

Karon nga Diskusyon:

• Hugot nga Pagtuo kang Jesukristo

• Panaghiusa uban sa Kapikas

• Commitment sa Self-Reliance

1. Trabahoa ug Dawata ang Responsibilidad

Basaha:Dihang gipabiya si Adan ug si Eva sa Garden sa Eden, miingon ang Dios, “Sa singot sa imong nawong magakaon ikaw sa tinapay, hangtud nga mopauli ka sa yuta.” (Genesis 3:19). Samtang nagtinguha ang Ginoo sa paghatag kanato sa tanang temporal nga atong gikinahanglan, naglaum Siya nga motrabaho ta og maayo ug dawaton ang responsibilidad para sa kaugalingon natong panginahanglan. Timan-i nga usa sa mga bongbong nga nagsuporta sa Mapa alang sa Kalampusan sa Pagkatinugyanan sa Panalapi (tan-awa sa pahina 8) mao ang “pagtrabaho.” Ang pagkahimong self-reliant nagkinahanglan og padayon nga tinuoray nga pagtrabaho ug kakugi.

Mitudlo si Presidente Dieter F. Uchtdorf, “Ang Ginoo wala magpaabut kanato sa pagtrabaho og mas kusog kay sa atong mahimo. Siya dili (ni kita kinahanglan) motandi sa atong mga paninguha ngadto sa uban. Ang atong Langitnong Amahan nangayo lamang nga atong himoon ang labing maayo nga atong mahimo. … Ang trabaho pangontra alang sa kabalaka, haplas sa kaguol, ug pultahan sa oportunidad. … Kon ang atong sakyanan malubong sa lapok, ang Dios mas gusto nga motabang sa tawo kinsa manaug aron sa pagduot kay sa tawo kinsa mopataas lamang sa iyang tingog diha sa pag-ampo—walay igsapayan unsa kanindot ang pagkasulti” (“Duha ka mga Baruganan alang sa Kaayohan,” Ensign o Liahona, Nob. 2009, 56).

Hisguti:Paghunahuna og mga example sa maayong mga trabahante sa imong kinabuhi. Unsang komon nga mga hiyas ang anaa niining mga tawhana?

Kinahanglan nga Atong Wagtangon nga Magsalig lang sa Uban sa Butang nga Temporal

Basaha:Mitudlo si Presidente Spencer W. Kimball nga, “Ang responsibilidad sa sosyal, emosyonal, espiritwal o ekonomikanhong pagkabutang sa kada tawo mag-una diha sa iyang kaugalingon mismo, ikaduha diha sa iyang pamilya, ug ang ikatulo diha sa Simbahan kon matinud-anon siya nga miyembro. Walay matinud-anon nga Santos sa Ulahing mga Adlaw, nga samtang makahimo pa sa pisikal ug emosyonal nga paagi ang buluntaryo nga motugyan sa responsibilidad sa pag-atiman sa iyaha mismo o sa iyang pamilya ngadto sa uban. Kutob sa iyang mahimo, ubos sa pagdasig sa Ginoo ug sa iya mismong pagbudlay, makasangkap siya sa iyang kaugalingon ug sa iyang pamilya sa esprituhanon ug temporal nga mga panginahanglan sa kinabuhi” (Mga Pagtulun-an ni Presidente Spencer W. Kimball [2006], 146).

Gitudlo ni Elder Dale G. Renlund, nga gamit ang kinutlo ni Elder Wilford W. Andersen: “Kon mas magkalayo ang distansya tali sa tighatag ug tigdawat, mas bation sa tigdawat nga angay siyang tabangan” (“Nga Ako Unta Makadala sa Tanan nga mga Tawo ngari Kanako,” Ensign o Liahona, Mayo 2016, 39). Ang pagbati nga may katungod kang makadawat og butang mao ang pagbati nga angay kang makadawat sa butang bisan wala kay tukma ug hingpit nga gibuhat nga gikinahanglan aron maangkon kini. Sukwahi kini sa responsibilidad. Kon mibati kang may katungod sa mga panalangin nga temporal, mopalayo sa imong kinabuhi ang Espiritu. Samtang magpaduol ka kang Kristo, ang pagbati sa responsibilidad alang sa kaugalingon nimong kaayohan mopuno sa imong kasingkasing, ug ang mga pagbati nga may katungod mahanaw.

Hisguti:

• Sa unsang paagi ang pagdepende sa uban molimit sa atong personal nga paglambo?

• Nganong importanting malikayan nga magsalig lang sa gobyerno o sa mga sosyal nga programa?

• Unsa ang nag-uban nga mga risgo kon magsalig lang sa uban, lakip sa pamilya, para sa personal natong panginahanglan?

2: Magtambayayong sa Pagdumala sa Kwarta

Pamalandungi:Sa unsang paagi nakaapekto kanimo sa espiritwal ug emosyunal nga paagi ang imong panalapi?

Basaha:Usa sa midagsang ug impluwensyal kaayong himan ni Satanas sa pagguba sa mga pamilya mao ang kawalay pag-amping sa pinansyal ug sa nag-uban nga stress o tensyon. Tungod kay sentro sa plano sa Langitnong Amahan ang mga pamilya (tan-awa sa Ang Pamilya: Usa ka Pamahayag sa Kalibutan), importante nga likayan nato ang mobasol sa uban, kawalay pagsalig, ug kapungot sulod sa atong panimalay. Minyo ka man o single, ang maalamong pagkatinugyanan sa panalapi maghimo nga magkasuod ang mga minahal ug ngadto sa Dios, ug mamahimong panalipud gikan sa dautan; ang usa ka hiniusang pamaagi sa pagkatinugyanan sa panalapi magdala og pasalamat, paghiusa, ug kalinaw sa kaulahian.

Hisguti:Nganong importante sa mga kapikas ang magkahiusa sa hilisgutang pinansyal?

Basaha:Ang mga kapikas sa kasagaran naggikan sa managlahing kultura, ekonomiya, ug relihiyusong mga kaagi. Tingali magkalahi ang ilang mga tradisyon, mga teknik sa pag-atiman sa mga bata, ug mga kinaiya sa pagpanggasto. Ang usa ka kapikas posibling interesado sa pag-monitor sa mga gasto ug magsunod sa budget, ug ang paris tingali nagtan-aw niini nga makapuol ug lisud. Tingali magsugod ang panaglalis tungod niini. Hinoon ang paghangop sa matag usa nga kalahian ug tinuoray nga pagpaminaw uban sa gugma ug pagpaubos makapasiugda og usa ka palibut sa paghiusa. Kon ikaw single pa, importante nga magmatinuoron ka sa imong kaugalingon ug iapil ang Ginoo sa imong mga pagdesisyon sa pagkatinugyanan sa panalapi.

Daghang magtiayon mituo nga ang solusyon sa ilang mga problema sa pinansyal mao ang pagpadako sa ilang kinitaan. Apan, ang wala magkahiusang pamaagi sa pagdumala sa kwarta mas makadaot sa usa ka relasyon kay sa gamay nga kinitaan o kakulang sa mga kapanguhaang pinansyal.

Hisguti:Sa unsang paagi ang kadili magkasinabut sa pinansyal mas makadaot kay sa gamay rang kinitaan o kulang sa kapanguhaan?

Basaha:Mitudlo si Elder Marvin J. Ashton, “Ang pagdumala sa panalapi sa pamilya kinahanglang sabutan sa bana ug asawa pinaagi sa pagsalig ug walay tinagoang kinaiya. Kon kontrolahon ang kwarta sa usa ra ka kapikas isip tinubdan sa gahum ug awtoridad mosangput kini sa pagkadili patas sa kaminyoon ug dili angay. Sa sukwahi nga paagi, kon ang kapikas boluntaryong dili manginlabut bisan gamay sa pagdumala sa panalapi sa pamilya, kapakyasan kana sa gikinahanglang responsibilidad” (One for the Money: Guide to Family Finance [booklet], 2006, 3).

Hisguti:Sa unsang paagi ang pagkahiusa sa imong kapikas mousab sa imong kinabuhi?

Ang Maalamong Pagkatinugyanan sa Panalapi Mag-andam Kanato alang sa Kaminyoon

Basaha:Nangandam ka man para sa kaminyoon o single, o diborsyado, o biyuda, ang maalamong pagkatinugyanan sa panalapi makatabang nga maandam ka para sa umaabut nga mga pakigrelasyon. Daghang bag-o nga magtiayon nagpas-an og utang ug ang dili maayong kinaiya sa pagpanggasto nadala sa ilang relasyon, nga maoy hinungdan sa lisud nga sinugdanan sa ilang kaminyoon. Ang paningkamot nga makapalambo og maayong kinaiya sa paggasto, pagtigum, ug pagpaminus o pagwagtang sa utang modapit sa Espiritu sa inyong relasyon ug makamugna og lig-ong pundasyon alang sa malampusong kaminyoon.

Hisguti:Sa unsang paagi ang pagkamaalamong tinugyanan sa panalapi karon makatabang nimo nga maandam para mahimong mas maayong kapikas sa umaabut?

Kalihokan (10 minutos)

Step 1: Tubaga sa matinuorong paagi ang mosunod nga mga pangutana.

Unsay Akong Gibati mahitungod sa Akong Ginastuhan?	Wala gyud	Usahay	Kasagaran	Kanunay
Makigtambag ko sa Ginoo mahitungod sa akong panalapi [pinansyal].	□	□	□	□
Makigtambag ko sa akong kapikas mahitungod sa among panalapi [pinansyal].	□	□	□	□
Ang pinansyal maoy tinubdan sa personal nga stress o tensyon.	□	□	□	□
Akong itago (o unta akong matago) sa akong kapikas ang akong ginastuhan.	□	□	□	□
Mosupak ko sa akong kapikas mahitungod sa panalapi [pinansyal].	□	□	□	□

Step 2: Puli-puli nga mopaambit sa inyong mga tubag diha sa ibabaw kauban sa inyong kapikas o partner. Kon wala motambong ang inyong kapikas, hangyoa siya sa pagkompleto sa mao ra gihapong assessment kon magkauban na mo, ug dayon ribyuha ang inyong mga tubag. Hinumdumi ang pagpaminaw uban sa gugma ug pagpaubos sa mga tubag sa inyong ka-partner.

Pamalandungi:Sa unsang paagi nga mas mapahiuyon nimo ang imong kaugalingon ngadto sa imong kapikas ug sa Ginoo?

3. Maghimo og Regular nga mga Family Council

Basaha:Sa milabayng semana gihisgutan nato ang kaimportante sa pagpakitambag sa Ginoo. Gusto Siyang motabang nga molampus ka. Agig dugang sa pagpakitambag sa Ginoo, mitudlo ang mga propeta sa kaimportante sa paghimo og regular nga mga family council.

Tan-awa:“Family Councils,” anaa sa srs.lds.org/videos. (Walay video? Basaha ang pahina 31.)

Hisguti:Sa unsang paagi ang paghimo og family council nakabenipisyo kanimo ug sa imong pamilya?

Hisguti ang Pagkatinugyanan sa Panalapi sa Inyong Family Council

Basaha:Ang regular nga executive family council tali sa bana ug asawa maoy pinakamaayong higayon nga mahisgutan ang pagkatinugyanan sa panalapi. Kon single ka, pagpili og usa ka ginikanan o laing sakop sa pamilya, imong ka-roommate, mentor, o higala ug paghimo og regular ug matinuorong council kauban niya mahitungod sa imong panalapi. Kon minyo ka, tingali nagkinahanglan nga maghimo ka og importanting mga diskusyon uban sa imong kapikas hangtud mahuman kini nga kurso. Human niini nga kurso, ang paghimo og regular nga family council makatabang nga makapadayon kamo nga mas mahiusa ug mas ma-self reliant.

Usa sa inyong mga commitment niining semanaha mao ang paggahin og panahon nga maghimo og regular nga family council. Isip kabahin sa inyong family council, hisguti ang panalapi. Mahimo ninyong gamiton ang outline sa “Sample sa Family Council Discussion” nga naa sa sunod nga pahina aron mogiya niini nga bahin sa inyong family council.

Sample sa Family Council Discussion

Siguroa nga sugdan ug tapuson pinaagi sa pag-ampo aron madapit ang Espiritu.

Part 1: Ribyu

• Igo ba ang imong pag-monitor sa imong mga gasto? Unsay imong nakat-unan mahitungod sa imong mga paggasto? Sa unsang paagi nimo mapalambo ang proseso sa imong pag-monitor sa mga gasto?

• Hisguti ang mga resulta sa assessment nga naa sa pahina 26.

Part 2: Plano

• Sa unsang paagi mas momaayo ang inyong komunikasyon mahitungod sa inyong panalapi [pinansyal]?

• Unsay inyong mahimo, kon gikinahanglan, aron mawagtang nga magsalig lang sa pamilya, gobyerno, simbahan, o sosyal nga tabang sa butang nga temporal?

Magkauban, Matag Gabii

Miabut una og lima ang among anak ug daghang tuig usa pa namo naamguhan (tingali kapin sa 20 ka tuig), apan ang paghimo og pag-ampo sa managtiayon kada gabii—nga siya ra ug ako, mangluhod ug maggunitay—usa sa mga butang nga sukad among nahimo nga impluwensyal kaayo sa pagpanalangin ug paglig-on sa among relasyon. Kon ang usa namo magbiyahe, buhaton namo ni sa telepono!