ʻOku ou kau nai ʻi heʻeku hoko ko ha mēmipa ʻo e Siasí?

ʻOku ʻI Ai ha Feituʻu Maʻau

Mamata ʻi he vitiō ʻa ʻEletā Kulistofasoni ko e “ʻOku ʻI ai Nai Ha Feituʻu Moʻoku?”

ʻOku Mau Fie Maʻu Koe Heni

“Kuo mau faʻa fakakaukau mo tokanga lahi ke mahino lelei ange ʻa e aʻusia ʻo e femanakoʻaki ʻa e Fefine mo e Fefine pe Tangata mo e Tangatá. Pea fakapapauʻi ʻoku ongoʻi ʻe he niʻihi fakafoʻituituí ʻoku nau ongoʻi ʻa e faʻahinga femanakoʻaki peheé, kae pehē ki honau fāmilí, ʻoku talitali lelei kinautolu pea ʻoku nau hoko ko ha konga ʻo e fāmili fakaemāmani lahi maʻongoʻongá ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

“ʻOku ou lea hangatonu heni ki he kāingalotu ʻo e Siasí ʻoku nau foua ʻa e femanakoʻaki ʻa e fefine mo e fefiné pe tangata mo e tangata ʻoku nau nonofo fakatangata, nonofo fakafefine, pe fakatou nonofo mo e tangata mo e fefiné. ʻOku mau loto ke mou ʻiloʻi ʻoku mau ʻofa ʻiate kimoutolu. ʻOku talitali lelei kimoutolu. ʻOku mau loto ke mou hoko ko ha konga ʻo ʻemau haʻofangá. ʻOku ʻi ai hamou ngaahi talēniti mo e ivi tokoni maʻongoʻonga ke foaki ki he puleʻanga ʻo e ʻOtuá ʻi he māmaní, pea ʻoku mau ʻiloʻi ʻa e ngaahi tokoni mahuʻinga ʻoku mou fakahokó. Kapau ʻoku ʻi ai hamou taha ʻoku ʻikai mahino ki ai ʻa e tuʻunga ʻo e Siasí ʻi he ngaahi meʻá ni, ʻoku mau fakaafeʻi koe ke ke kātaki ʻo vakai ki he naunau ʻoku pulusi ʻi he [Tokoni ʻo e Moʻuí mo e Moʻui Fakafalala Pē Kiate Kitá ʻi he ChurchofJesusChrist.org pe ʻi he polokalama Gospel Library]. Fekumi ʻi he faʻa lotu ki he Laumālié ke ne ʻomi ʻa e ngaahi tali ʻokú ke kumiá. Pea ke ʻiloʻi fakapapau ʻoku ʻofa ʻa e ʻOtuá ki Heʻene fānaú kotoa” (L. Whitney Clayton, “ʻOku ʻOfa ʻa e ʻOtuá Ki Heʻene Fānaú,” ChurchofJesusChrist.org).

Te u Lava Fēfē ʻo Kau Atú?

ʻOku talaʻofa mai ʻa e ʻOtuá kapau te tau talangofua ki Heʻene ngaahi fonó te tau maʻu ʻa e fiefia taʻengatá pea ʻokú Ne tauhi maʻu pē ʻEne ngaahi talaʻofá. ʻE lava ʻe he kakai ʻoku nau foua ʻa e femanakoʻaki ʻa e fefine mo e fefine pe tangata mo e tangatá pe ui ko ha kau fakafāfine/fakatangatá, ʻo fakahoko mo tauhi ʻa e ngaahi palōmesi ki he ʻOtuá. Te nau lava ʻo ʻaʻeva ʻi Heʻene māmá. Te nau lava ʻo kau kakato atu ki he meʻa ʻoku fai ʻi he Siasí.

“Kapau ʻoku ongoʻi ʻe he kāingalotú ha femanakoʻaki ʻa e fefine mo e fefine pe tangata mo e tangatá ka ʻoku nau feinga ke moʻui ʻaki ʻa e fono ʻo e angamaʻá, ʻe tokoniʻi mo poupouʻi kinautolu ʻe he kau takí ʻi heʻenau tukupaá. ʻE lava ke maʻu ʻe he kāingalotu ko ʻení ha ngaahi uiuiʻi ʻi he Siasí, maʻu ha lekomeni temipale, mo maʻu e ngaahi ouau fakatemipalé ʻo kapau ʻoku nau moʻui taau. ʻE lava ke maʻu mo fakaʻaongaʻi ʻe he kāingalotu tangatá ʻa e lakanga fakataulaʻeikí” (“Femanakoʻaki ʻa e Fefine mo e Fefine pe Tangata mo e Tangata mo e ʻUlungaanga Fakahomosekisualé,” Tohi Tuʻutuʻuni Fakakātoá: Ngāue ʻi he Siasi ʻo Sīsū Kalaisí pe Kau Māʻoniʻoni ʻi he Ngaahi ʻAho Kimui Ní 38.6.12).

Naʻe pehē ʻe Palesiteni Kōtoni B. Hingikelī:

“ʻOku tau ʻofa ʻiate kinautolu ko e ngaahi foha mo e ngaahi ʻofefine ʻo e ʻOtuá. Te nau ala maʻu ha faʻahinga fakahehema ʻoku fuʻu mālohi pea ala faingataʻa ke mapuleʻi. ʻOku maʻu ʻe he kakai tokolahi ha ngaahi fakahehema kehekehe ʻi ha ngaahi taimi kehekehe. Kapau ʻoku ʻikai ke nau fakahoko e ngaahi fakahehema ko ʻení, ʻe lava leva ke nau laka atu ki muʻa ʻo hangē ko e kau mēmipa kehe kotoa ʻo e Siasí. Kapau te nau maumauʻi e fono ʻo e angamaʻá mo e ngaahi tuʻunga ʻulungaanga angamaʻa ʻo e Siasí, ʻoku nau moʻulaloa leva ki he fakatonutonu faka-Siasí, ʻo hangē pē ko e niʻihi kehé” (“What Are People Asking about Us?” Ensign, Nov. 1998, 71).

Ko Hono Hiki Hake ʻo e Niʻihi Kehé

Mamata ʻi he vitiō ʻa Carol F. McConkie ko e “Ko Hono Hiki Hake ʻo e Niʻihi Kehé.”

ʻOku ʻI Ai e Ngaahi Meʻafoaki ʻa e Taha Kotoa Pē

Ko e hā pē ha tūkunga ʻoku ʻi ai ha taha, te ne lava ʻo tokoni ki he ngāue ʻa e ʻEikí ʻi he lolotongá ni mo fakatetuʻa atu ʻe lava ʻe heʻene faivelengá ʻo ʻomi e ngaahi tāpuaki tatau pē, ʻi heni pea mo e maama ka haʻú, ʻa ia kuo talaʻofa ʻe he ʻOtuá ki ha taha pē ʻoku faivelenga tatau. Kuo pehē ʻe ʻEletā D. Toti Kulisitofasoni:

“ʻOku ʻi ai e ngaahi meʻafoaki ʻa e taha kotoa; ʻoku ʻi ai e talēniti ʻo e taha kotoa; ʻe lava e taha kotoa pē ʻo kau ki hono fakahoko e palani fakalangí he toʻu tangata takitaha. Ko e konga lahi ʻo e ngaahi meʻa ʻoku leleí, ko e konga lahi ʻo e ngaahi meʻa ʻoku mahuʻingá—pea taimi ʻe niʻihi ko e ngaahi meʻa kotoa ʻoku fie maʻu he taimi ní—ʻe lava ke aʻusia ia ʻi ha tuʻunga [angamaheni pē]. ʻOku tokolahi hamou niʻihi ʻoku mou fai homou lelei tahá. Pea ʻi he taimi ʻoku tuʻu ai ʻa kimoutolu ʻoku fuesia ʻa e kavenga mamafa taha fakamatelié ʻo taukapoʻi e palani ʻa e ʻOtuá ke hakeakiʻi ʻEne fānaú, ʻoku tau mateuteu kotoa leva ke laka atu. ʻOku tau fakamoʻoni taʻe toe veiveiua ki he meʻa naʻe fakataumuʻa ki ai e Fakalelei ʻa Sīsū Kalaisí, pea ʻi he ikuʻangá te Ne totongi huhuʻi ʻa e meʻa kotoa pē naʻe mole meiate kinautolu ʻoku tafoki kiate Iá. ʻOku ʻikai ke ʻi ai ha taha ia kuo tuʻutuʻuni pau mai ke ne maʻu pē ha meʻa siʻisiʻi ange ʻi he meʻa kotoa kuo ʻomi ʻe he Tamaí maʻa ʻEne fānaú” (“ʻUhinga ʻo e Malí, ʻUhinga ʻo e Fāmilí,” Liahona, Mē 2015, 52).