Ko e hā ʻoku ʻikai tali mai ai ʻe he ʻOtuá ʻeku ngaahi lotú?

ʻOku Fanongo Mai ʻa e ʻOtuá Ki Hoʻo Ngaahi Lotú

Mahalo ʻe ngali taʻe-potupotu tatau ʻa e moʻuí ‘i he taimi ʻe niʻihi. Mahalo ʻe hangē ʻoku ʻikai tali mai ʻetau ngaahi lotu fakamātoató. Mahalo ʻe hangē ne fakasītuʻaʻi meiate kitautolu ʻa e kānokato ʻo e ngaahi faingamālié mo e ngaahi tāpuaki taupotu taha ʻa e ʻOtuá. Ka ʻoku ʻikai ha lotu fakamaatoato moʻoní ʻe taʻeongona. ʻE fakahoko ʻe he ʻOtuá ʻa ʻEne ngaahi palōmesi kotoa pē. He ʻikai taʻofi ha tāpuaki mei Heʻene fānau ʻoku talangofua mo fonu ʻi he tuí. Ko hotau ivi malava fakalangí ke tau moʻui ko e ngaahi fāmili taʻengata pea hoko ʻo hangē ko ʻetau Ongomātuʻa Fakalangí.

ʻE hā ngali fakamafasia he taimi ʻe niʻihi ʻetau ngaahi veiveiuá, manavasiʻí, mo e taʻefiemālié. ʻE lava ke ʻomi ʻe he moʻuí ha ngaahi fehuʻi faingataʻa mo ha ngaahi tūkiaʻanga mamafa. ʻOku ʻikai ko e tuí ko e maʻu ʻa e ngaahi talí kotoa, ka ko hono fili ko ia ʻa e tuí kae ʻikai ko e veiveiuá ko ha fili ia ke falala ki he ʻOtuá. ʻOku tau fili ke falala ki Heʻene palaní mo ʻEne taimí, neongo ʻoku ʻi ai ha konga ʻe niʻihi ʻo ʻetau moʻui fakamatelié ʻoku ʻikai hano ʻuhinga ʻe taha kiate kitautolu ʻi he taimí ni. ʻI heʻetau tui mo falala ki he ʻOtuá pea faʻa kātaki ke fakatupulaki ʻetau tuí ʻi he ʻaho takitaha, ʻe fakaʻau pē ʻo lelei ange ʻa ʻetau vakaí. (Vakai, 1 Kolinitō 13:12.)

Ko e vakai leleí ʻoku ʻikai ko ha meʻa ia ʻoku hoko tuʻo taha. Ko ha founga ngāue ia. ʻOku lelei ange ʻetau vakaí ʻi heʻetau fakahoko ʻa e meʻa te tau malava ʻi heʻetau hoko ko e fānau ʻa e ʻOtuá. Pea ko e hā leva ʻa e meʻa te tau malavá? Kapau te tau fai hotau lelei tahá ke tauhi ʻEne ngaahi fekaú, kuó Ne talaʻofa mai ʻa e fiefia taʻengatá—ʻa e fiefia ʻoku moʻoni mo tuʻuloa.