ʻOku fakaʻaongaʻi nai ʻa e palani ʻo e fakamoʻuí ki he kakai fakafāfine/fakatangatá?

ʻOku ʻI Ai ha Palani ʻa e ʻOtuá ki Hoʻo Fiefiá

ʻOku haohaoa ʻa e palani ʻa e ʻOtuá, neongo kapau ʻoku ʻikai haohaoa ʻetau mahino ki Heʻene palaní. Te tau lava ʻo maʻu ʻa e ʻamanaki lelei mo e fakamoʻui ʻi he Fakamoʻui ko Sīsū Kalaisí, neongo e ngaahi pole kehekehe ʻo e moʻuí.

ʻOku ʻi ai ha palani ʻa e ʻOtuá ki heʻetau fiefiá. Naʻá Ne ʻomi kitautolu ki he māmaní ke tau ako mei hotau ngaahi tūkungá. Naʻá Ne ʻomi kitautolu ki hení ke tau fakahoko ha ngaahi fili.

Ne tau nofo fakataha mo e ʻOtuá kimuʻa pea fanauʻi mai kitautolú. Naʻa tau ʻiloʻi Ia, pea ʻokú Ne ʻafioʻi kitautolu. ʻOkú Ne ʻafioʻi hotau ngaahi mālohingá mo e vaivaiʻangá, ʻa ʻetau ngaahi fakaʻānauá mo e ngaahi meʻa ʻoku tau manavasiʻi ki aí. Ko e moʻui fakamatelié ko ʻetau fononga fakafoʻituitui ia ke tau toe ʻiloʻi ai ʻa e ʻOtuá. ʻOkú Ne ʻafioʻi ʻa ʻetau ivi malava maʻongoʻongá mo e tuʻunga te tau lava ʻo aʻusiá. ʻOku ʻofa ʻa e ʻOtuá ʻiate kitautolu ʻo lahi hake ʻi ha toe meʻa (vakai, 2 Nīfai 2:25).

Mahalo kuo ngalo ʻiate kitautolu ʻa e taimi ne tau feohi ai mo e ʻOtuá, ka kuo teʻeki ke tau ngalo ʻiate Ia. ʻOkú Ne uiuiʻi ha kau palōfita ke fakamanatu mai ʻa e ʻuhinga ʻoku tau ʻi heni aí pea mo e founga ke tau hoko ai ʻo hangē ko Iá (vakai, Luke 11:49).

ʻOku tau ʻi heni koeʻuhí ko ha taumuʻa fakapotopoto. Ne ʻomi kitautolu ʻe he ʻOtuá ki he kuonga mo e feituʻu ko ʻení. Naʻá Ne ʻafioʻi ʻa e ngaahi faingataʻa te tau fepaki mo iá, ʻa e ngaahi fili ʻe fie maʻu ke tau fakahokó. He ʻikai fakamālohiʻi ʻe he ʻOtuá ha taha ʻi Heʻene fānaú ke nau talangofua ki Heʻene ngaahi fonó. Ko Hono finangaló ke tau fili pē maʻatautolu, ʻo tatau ai pē pe ko e hā hotau tūkungá, ke tau ako mei heʻetau aʻusiá pea hoko ʻo hangē pē ko Iá. Ka he ʻikai fakamālohiʻi kitautolu ʻe he ʻOtuá ke tau talangofua kiate Ia. (Vakai, 2 Nīfai 2:16.)

ʻI heʻetau hoko ko e kau muimui ʻo Sīsū Kalaisí, ʻoku tau ako ke fakafanongo ki he Laumālié pea ʻaʻeva ʻi he Maama ʻo Kalaisí. Te tau lava ʻo ʻiloʻi ʻa e meʻa ʻoku totonu pe halá neongo e ngaahi holi fakakakano mo e ngaahi ʻahiʻahi ʻoku fehangahangai mo e ngaahi tefitoʻi moʻoni totonú. Pea ʻi heʻetau fili ki he totonú, te tau tupulaki ʻo mālohi ange. Mahalo ʻe ʻi ai ha ngaahi taimi ʻe hangē ʻoku tau fekihiaki ʻiate kitautolu peé, ka ko hono ikunaʻi ko ia ʻa e fehangahangaí ko ha konga ia ʻo e palani ke tau toe mālohi angé. ʻOku ʻikai fakafiemālie ʻa e fehangahangaí, ka ʻoku ʻaonga ia.

“He ʻoku totonu ke ʻi ai, ʻa e fehangahangai ʻi he meʻa kotoa pē. Ka ne ʻikai ke pehē, … ʻe ʻikai lava ʻo fakahoko ʻa e angatonú, pe faiangahalá, pe māʻoniʻoní pe mamahí, pe leleí pe koví” (2 Nīfai 2:11).

Ko e taimi ʻoku tau faiangahala aí—pea ʻoku tau faiangahala kotoa pē—te tau lava ʻo fakatomala. ʻOku tokoni ʻa e founga ʻo e fakatomalá ke fakamaʻa hotau laumālié pea fakaʻatā ke tau tupulaki ke ofi ange ki he ʻOtuá. ʻOku ʻikai ko ha tautea ʻa e fakatomalá. Ko ha meʻaʻofa ia naʻe fakatau mai ʻe hotau Fakamoʻui ko Sīsū Kalaisí ʻi Ketisemani pea mo Kolokota.

“Ka naʻe lavea ia koeʻuhi ko ʻetau ngaahi angahalá, naʻe fakavolu ia koeʻuhi ko ʻetau ngaahi hiá; naʻe ʻiate ia ʻa e tauteá koeʻuhi ke tau fiemālie; pea ʻi hono ngaahi taá ʻoku tau moʻui ai” (ʻĪsaia 53:5).

Ko e feilaulau ʻa hotau Fakamoʻuí—ʻa ia ʻoku tau ui ko e Fakalelei ʻa Sīsū Kalaisí—ʻoku mahulu hake ia ʻi hono totongi pē ʻo ʻetau ngaahi angahalá. Te tau lava ʻo tafoki ki he Fakamoʻuí ke Ne fakamoʻui hotau lotó, ke Ne fakaivia hotau laumālié, ke tau maʻu ʻa e melinó. Te tau lava ʻo tuku ʻetau ngaahi kavengá kiate Ia, pea te Ne fuesia ia. Ko Ia ʻa hotau Huhuʻí. ʻOkú Ne ʻafioʻi kitautolu.

“Pea te ne toʻo kiate ia ʻa honau ngaahi vaivaí, koeʻuhi ke fonu hono lotó ʻi he ʻaloʻofa, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí” (ʻAlamā 7:12).