ʻOku fakaʻaongaʻi nai ʻa e fono ʻo e angamaʻá kiate kinautolu ʻoku nau foua ʻa e femanakoʻaki ʻa e fefine mo e fefine pe tangata mo e tangatá?

ʻOku Fakaʻaongaʻi ʻa e Angamaʻá ki he Tokotaha Kotoa Pē

Ko e haohaoa fakasekisualé ko ha konga ia ʻo e palani ʻa e ʻOtuá ki heʻetau ʻetau fiefiá. Naʻe pehē ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku fekauʻaki ʻa e fuofua fekau naʻe tuku ʻe he ʻOtuá kia ʻĀtama mo ʻIví pea mo e meʻa te na malava ʻi hona tuʻunga fakaemātuʻá, ko e husepāniti mo e uaifí. ʻOku mau fakahā ai heni ʻoku kei tuʻu maʻu pē ʻa e fekau ko ia ʻa e ʻOtuá ki Heʻene fānaú ke nau fanafanau mo fakatokolahi ʻa e māmaní. ʻOku mau toe fakahā foki heni kuo ʻosi tuʻutuʻuni ʻe he ʻOtuá ke toki ngāue ʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine, kuó na ʻosi mali fakalao ko ha husepāniti mo ha uaifi” (“Ko e Fāmilí: Ko ha Fanongonongo ki Māmani”).

“Ko e fono ʻo e angamaʻa ʻa e ʻEikí ke:

• Taʻofi ha faʻahinga fetuʻutaki fakasekisuale pē ʻi tuʻa ʻi ha nofo-mali ʻa ha tangata mo ha fefine ʻo fakatatau mo e fono ʻa e ʻOtuá.

• Anganofo ʻi he nofomalí” (“Angamaʻá mo e Anganofó,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.5).

ʻOku hoko ʻa e vā fakasekisuale ʻi he nofo-mali ʻa ha tangata mo ha fefine ko ha konga mahuʻinga ia ʻo e feohi ʻa e ongomeʻa malí. Ka neongo ia, kapau ʻe ʻi ai haʻatau vā fakasekisuale ʻi tuʻa he ngaahi fakangatangata kuo fokotuʻu ʻe he ʻEikí, ʻoku ʻikai ngata pē ʻi heʻetau uesia ʻetau malava ke fili fakapotopotó; ka ʻoku tau toe fakasītuʻaʻi foki ʻa e sīpinga kuo fokotuʻu ʻe he ʻEikí maʻa ʻetau fiefia taʻengatá.

Naʻe fakamatalaʻi ʻe ʻEletā Tāleni H. ʻOakesi ʻo pehē: “Ko e mālohi ke fakatupu ha moʻui fakamatelié ʻa e mālohi taupotu taha kuo foaki mai ʻe he ʻOtuá ki Heʻene fānaú. Ko hono fakaʻaongaʻí naʻe fakahā mai ia ʻi he ʻuluaki fekaú, ka ko e fekau mahuʻinga ʻe taha naʻe ʻomaí ko e tapui hono ngāue hala ʻakí. ʻOku tala ʻe he tokanga makehe ʻoku tau fai ki he fono ʻo e angamaʻá, ʻa e mahino kiate kitautolu ʻa e taumuʻa ʻo hotau mālohi ke fakatupú ko hano fakahoko ia ʻa e palani ʻa e ʻOtuá. …

“Ko ha angahala fakalielia mo tukuihifo moʻoni ʻa hono fakaʻaongaʻi ʻe ha tangata pe fefine ʻa hono mālohi ke fakatupú ʻi tuʻa he nofomalí ʻo tatau ai pē pe ʻoku lahi pe siʻisiʻi” (“Ko e Palani Lahi ʻo e Fiefiá,” Ensign, Nōv. 1993, 74).

Angamaʻá mo e Ponokalafí

“He ko e ngaahi mahalo ʻo hono lotó, ko ia ai pē ia” (Lea Fakatātā 23:7).

“ʻOku fakahalaiaʻi ʻe he Siasí ha faʻahinga founga pē ʻo e ponokalafí. ʻOku hanga ʻe ha faʻahinga fakaʻaongaʻi pē ʻo e ponokalafí ʻo maumauʻi e moʻuí fakafoʻituitui, ngaahi fāmilí, mo e sōsaietí. ʻOkú ne toe tuli foki mo e Laumālie ʻo e ʻEikí. ʻOku totonu ke fakaʻehiʻehi ʻa e kāingalotu ʻo e Siasí mei ha faʻahinga founga pē ʻo e ngaahi meʻa fakaponokalafí pea fakafepakiʻi hono faʻú, tufakí, mo hono fakaʻaongaʻí” (“Ponokalafí,” Tohi Tuʻutuʻuni Fakakātoá, 38.6.11).

Ko hono mamataʻi ʻa e ngaahi ʻīmisi fakalielia fakasekisualé, ʻo tatau ai pē kapau ko ha fie ʻilo, ʻokú ne maumauʻi foki ʻe ia ʻa e ngaahi fekau ʻa e ʻOtuá. ʻOku ʻi ai ha mālohi lahi fau ʻi heʻetau ueʻi fakasekisuale pē kitautolu. ʻOku fakatupunga ʻe he sio pē ki he ngaahi ʻīmisí pe fakakaukau ki he ngaahi tōʻonga fakasekisualé ke tau ongoʻi vivili pea holi lahi ange. ʻI hono fakaʻaiʻai ʻa e ueʻi ko ʻení, ʻoku hanga ai ʻe he ponokalafí ʻo tamateʻi ʻa e ongoʻingofua ʻe ha taha ʻa e fono ʻa e ʻOtuá ki he ʻulungaanga maʻá. Kae hiliō aí, ʻokú ne fakaʻitaʻi ʻa e Laumālié, ʻo ʻikai ke maʻu ai ʻe he taha ko iá ʻa e tataki mo e maluʻi ʻa e Laumālie Māʻoniʻoní.

ʻOku ʻomi ʻe he Siasí ʻa e ngaahi maʻuʻanga tokoni ko ʻení ke tokoni ki he kau pīsopé mo e kau palesiteni siteikí ʻi heʻenau enginaki ki he kāingalotu ʻoku nau fefaʻuhi mo e ponokalafí:

• Tokoni Maʻakú, ChurchofJesusChrist.org

• Maʻuʻanga Tokoni ki he Faleʻí, ChurchofJesusChrist.org

• Polokalama Fakaakeake mei he Maʻunimaá, ChurchofJesusChrist.org

• Tuku ke Ngaohi ke Fakaʻofoʻofa ʻe he Angamaʻá ʻa Hoʻo Ngaahi Fakakaukaú (tohi tufa)

ʻI heʻetau fakaʻaongaʻi ʻetau tauʻatāiná ke fai ha ngaahi fili ke muimui ki he ngaahi fono ʻa e ʻOtuá, ʻoku tupu ʻo mālohi ange hotau laumālié. Kapau te tau ongoʻi ʻoku tau vaivai fakalaumālie—pea ʻoku tau ongoʻi pehē kotoa pē he taimi ʻe niʻihi—ʻoku lava ʻe hotau Fakamoʻui ko Sīsū Kalaisí ʻo tokoniʻi kitautolu. Te tau lava ʻo foki ki ha moʻui ʻoku ʻulungaanga ʻaki ʻa e mapuleʻi kitá, ʻo fakafou ʻi he fakatomalá.

Fakatomalá

ʻE lava ʻa e kakai ʻo ha faʻahinga tuʻunga fakasekisuale pē ʻoku nau maumauʻi ʻa e fono ʻo e angamaʻá, ʻo fai ha fakalelei mo e ʻOtuá ʻo fakafou ʻi he fakatomalá.

Hangē ko ia ko e fakamatala ʻa ʻEletā Tēvita A. Petinaá:

“ʻOku ʻi ai ha niʻihi ʻo kimoutolu ʻoku mou maʻu e pōpoakí ni ʻe fie maʻu ke mou fakatomala mei he angahala fakasekisualé pe angahala kehe. ʻOku faʻa ui e Fakamoʻuí ko e Toketā Maʻongoʻongá, pea ʻoku fakatou mahuʻinga fakataipe mo moʻoni ʻa e hingoa ko ʻení. Kuo tau foua kotoa e mamahi ʻoku kau ai ha lavea pe kafo fakatuʻasino. ʻI he taimi ʻoku tau mamahi aí, ʻoku tau fekumi ki ha fakafiemālie pea ʻoku tau houngaʻia he faitoʻo mo e founga ʻoku tokoni ke fiemālie ai hotau faingataʻaʻiá. Tau fakakaukau ki he angahalá ko ha kafo fakalaumālie ʻokú ne fakatupu ʻa e loto-halaiá pe hangē ko hono fakamatalaʻi ʻe ʻAlamā ko e, ‘tautea ʻo e konisēnisí’ (ʻAlamā 42:18). ʻOku tatau e ongoʻi halaia ʻa hotau laumālié mo e mamahi ʻa hotau sinó—ko e halaiá ko e fakatokanga ki ha fakatamaki mo ha maluʻi mei ha maumau lahi ange. ʻOku maʻu e faitoʻó mei he Fakalelei ʻa e Fakamoʻuí ʻa ia te ne lava ʻo faitoʻo hotau ngaahi kafo fakalaumālié mo toʻo atu e ongoʻi halaiá. Neongo ia, ko e faitoʻo ko ʻení ʻe toki lava pē ke fakaʻaongaʻi ʻi he ngaahi tefitoʻi moʻoni ʻo e tui ki he ʻEiki ko Sīsū Kalaisí, fakatomalá, mo e talangofua maʻu pē. Ko e ola ʻo e fakatomala fakamātoató ko e nonga ʻa e konisēnisí, fiemālie, fakamoʻui fakalaumālie mo ha fanauʻi foʻou” (“ʻOku Mau Tui ki he Angamaʻá,” Liahona, Mē 2013, 44).

ʻOku fie maʻu ki he fakatomalá ha liliu ʻo e lotó. ʻOku malava ʻa e ongo meʻaʻofa mahuʻinga ʻo e fakatomalá mo e fakamolemolé tuʻunga ʻi he Fakalelei ʻa Sīsū Kalaisí. Te na lava ʻo fakamaʻa ʻetau moʻuí pea fakaivia ʻetau malava ke fakaʻaongaʻi ʻetau tauʻatāina ke fili ki he leleí.