ʻOku totonu nai ke u fakahaaʻi pe tala ki he niʻihi kehé [ʻoku ou fakafāfine/fakatangata]?

Ngaahi Meʻa ke Fakakaukau Ki Ai

ʻOku ʻi ai ha kakai ʻe niʻihi, ʻoku hoko ʻa hono tukulotoʻi ʻo e femanakoʻaki ʻa e fefine mo e fefine pe tangata mo e tangatá ke nau mā ai pe hoko ia ko ha fakakaukau fakaeloto ʻoku ʻikai ke sai. ʻE lava ke faka-tauʻatāina mo fakamoʻui hano vahevahe ʻa e ngaahi ongo ko iá ki ha taha ʻokú te falala ki ai. Ka neongo ia, ʻoku ʻi ai ha niʻihi ʻoku nau fakaʻamu ne nau tatali ke kiʻi fuoloa ange pe fakangatangata ʻa e tokolahi ʻo e kakai naʻa nau fakamatala ki ai ʻa e ngaahi ongo ʻoku nau maʻú, ko ia ʻoku ʻikai totonu ke fakatefito ʻa e fili ko ʻení ʻi haʻate fakavaivai ki ha teke mālohi mei ha tafaʻaki ke “fakahaaʻi ia” ki he kakaí pe tala mahino pē ʻokú te fakafāfine/fakatangata. Kapau ʻokú ke fili ke fakahaaʻi hoʻo ongoʻi femanakoʻaki ʻa e fefine mo e fefine pe tangata mo e tangatá, fakakaukauʻi ʻi he faʻa lotu ʻa e niʻihi ʻokú ke fie fakamatala ki aí mo e founga ke vahevahe ai ʻa e tafaʻaki ko ʻeni ʻo hoʻo aʻusia fakamatelié.

Kapau ʻokú ke fili ke vahevahe hoʻo ongoʻi femanakoʻaki ʻa e fefine mo e fefine pe tangata mo e tangatá pe tala mahino ʻokú ke fakafāfine/fakatangata, ʻoku totonu ke tokoniʻi pea ʻofeina mo fakaʻapaʻapaʻi koe, ʻo tatau pē ʻi ʻapi pea mo e lotú. ʻOku fie maʻu ke tau fekātakiʻaki kotoa pē ʻi heʻetau feinga ke ʻilo e meʻa ke fakahokó.

ʻI heʻetau hoko ko e kāingalotu ʻo e Siasí, ʻoku ʻi ai hotau fatongia kotoa ke fakatupu ha ʻātakai ʻo e fepoupouaki mo ʻofa maʻa hotau kāingá kotoa. ʻOku hanga ʻe he faʻahinga founga fepoupouaki peheé ʻo fakafaingofua ange hono moʻui ʻaki ʻo e ongoongoleleí pea mo e fekumi ki he Laumālié lolotonga hono fonongaʻia ha faʻahinga tafaʻaki pē ʻo e moʻui fakamatelié.