Ko e hā e meʻa ʻoku totonu ke u fai kapau ʻoku ou loto taʻotaʻomai pe loto-hohaʻa pe fakakaukau ke taonakita?

Ngaahi Telefoni Tokoni ki ha Faingataʻa

ʻAlu ki he “ʻOkú ke Faingataʻaʻia Nai? Talanoa he Taimí Ni [ki ha Taha].” ki ha maluʻi lahi ange mei he taonakitá mo ha tokoni ki he ngāue fakaetauhí.

Loto-Taʻotaʻomiá mo e Taonakitá

Ko e kakai ʻoku nau foua ʻa e femanakoʻaki ʻa e fefien moe fefine pe tangata mo e tangata pe ʻoku ʻilo ʻaki kinautolu ʻa e fakafāfine/fakatangatá ʻoku nau tuʻu laveangofua ange ki he kulukiatamakí pe taonakitá. Ko e kakai ʻoku nau loto-taʻotaʻomia pe fakakaukau ke taonakitá ʻoku fie maʻu ke nau ʻiloʻi ʻoku ʻofaʻi kinautolu pea ʻoku totonu ke ʻave kinautolu ki ha mataotao ʻi he moʻui lelei fakaeʻatamaí. ʻE lava ke maʻu ha maʻuʻanga tokoni lahi ange fekauʻaki mo e taonakitá, hangē ko e Ngaahi Fakakaukau Taonakitá, ʻi he Tokoni ʻo e Moʻuí mo e Moʻui Fakafalala Pē Kiate Kitá ʻi he ChurchofJesusChrist.org pe ko e polokalama Gospel Library.

ʻOku Moʻoni ʻa e Ngaahi Ongó

ʻOku moʻoni ʻa e ngaahi ongoʻi loto-taʻotaʻomiá pea ʻe malava pē ke ne lomekina mo holoki moʻui ia. ʻOku faʻa lava ʻe he faleʻi fakapalōfesinalé mo e tokoni fakafaitoʻó ʻo tokoniʻi e kakaí ke nau matatali e kulukiatamakí. Ko e taimi ʻoku liliu ai e ngaahi ongoʻi loto-taʻotaʻomiá ki ha ngaahi fakakaukau ke taonakitá, ʻoku matuʻaki mahuʻinga ke talanoa ki ha taha. Ko e kakai ʻoku nau fakakaukau taonakitá ʻoku nau matuʻaki mamahi fakaetuʻasino, fakaeʻatamai, pe fakaeloto; ʻoku faʻa liʻekina kinautolu; pea mahalo ʻoku nau ongoʻi kuo siva ʻenau ʻamanaki ki he kahaʻú. Mahalo ʻoku nau ongoʻi ʻoku ʻikai pē ha toe founga ke fakangata ʻa e mamahi faingataʻá ka ko hono toʻo pē ʻenau moʻuí. Ko e ngaahi fakakaukau ke taonakitá ʻoku faʻa tomuʻa vakavakaiʻi, fakakaukauʻi pea toutou fakakaukauʻi ia kimuʻa pea toki feinga ke fakahoko iá. Lolotonga ʻa e vahaʻa taimi ʻo e vakavakaiʻi ko ʻení, ʻe lava ke fai ai ha tokoni ke fakahaofi ha moʻui.

ʻOku kamata ʻa hono taʻofi ʻo e taonakitá ʻi hono fakatokangaʻi ʻa e ngaahi fakaʻilonga fakatokangá.  

Talanoa ki he Taha ʻOkú Ke Falala Ki Ai

Kapau ʻoku hangē ka ʻi ha tuʻunga fakatuʻutāmakí ha taha, ko e meʻa lelei taha pē ʻe lava ke fakahokó ko e talanoa kiate ia. Mahalo ʻe hā ngali kehe pe fie-matamuʻa, ka ko e kakai ʻoku loto-taʻotaʻomiá ʻoku nau faʻa fie maʻu vivili ha taha ke nau talanoa mo ia, ha taha ke tokoniʻi kinautolu ke nau makupusi ʻa e ngaahi fakakaukaú mo e ongó. Mahalo ʻe faingataʻa ʻa e ngaahi fepōtalanoaʻaki ko ʻení, ka ʻoku nau mahuʻinga ki hono fakasiʻisiʻi ʻo e ongoʻi liʻekiná mo e siva e ʻamanakí ʻa ia ʻe lava ʻo iku ki he taonakitá.  

ʻOku Meʻa Mahuʻinga ʻa e Manavaʻofá

ʻOku lea ʻa ʻEletā Sefilī R. Hōlani ʻi he manavaʻofa fekauʻaki mo e fekuki ko ia mo e loto-taʻotaʻomiá:

“Kāinga neongo pe ko e hā ʻokú ke fefaʻuhi mo iá—fakaʻatamai pe fakaeloto pe fakatuʻasino pe ko ha faʻahinga meʻa pē—ʻoua naʻá ke fili ke ke taʻofi e mahuʻinga ʻo e moʻuí ʻaki haʻo fakangata ia! Falala ki he ʻOtuá. Pikitai ki Heʻene ʻofá. ʻIloʻi ʻe ʻi ai ʻe ʻaho ʻe mafoa mai ai e atá pea ʻe mōlia atu leva e ngaahi haʻahaʻa kotoa ʻo e moʻui fakamatelié. Neongo te tau ongoʻi hangē ha ‘ipu kuo maumaú,’ ʻo hangē ko e lau ʻa e Tangata Sāmé, ka kuo pau ke tau manatuʻi ko e ipu ko iá ʻoku ʻi he nima ia ʻo e tokotaha ngaahi ipu fakalangí” (“Hangē ha Ipu Kuo Maumaú,” Liahona, Nōvema 2013, 42