Ինչո՞ւ Աստված չի պատասխանում իմ աղոթքներին

Աստված լսում է ձեր աղոթքները

Կյանքը երբեմն կարող է անարդար թվալ: Թվում է, թե մեր անկեղծ աղոթքներն անպատասխան են մնում: Թվում է, թե մեզ մերժել են հնարավորությունների լիությունից և Աստծո մեծագույն օրհնություններից: Սակայն ոչ մի անկեղծ աղոթք չի մնում առանց լսվելու։ Աստված կկատարի Իր բոլոր խոստումները։ Ոչ մի օրհնություն չի մերժվի Նրա հնազանդ և հավատավոր զավակներին: Մեր աստվածային ներուժն այն է, որ կարողանանք ապրել որպես հավերժական ընտանիքներ և նմանվել մեր Երկնային Ծնողներին:

Երբեմն մեր կասկածները, վախերն ու հիասթափությունները կարող են ճնշող թվալ: Կյանքը կարող է մեզ բարդ հարցերի և լուրջ խոչընդոտների առաջ կանգնեցնել։ Հավատք ունենալը չի նշանակում ունենալ բոլոր պատասխանները, բայց հավատի ու կասկածի միջև հավատն ընտրելը՝ Աստծուն վստահելու հարց է։ Մենք ընտրում ենք վստահել Նրա ծրագրին և ժամանակացույցին, նույնիսկ եթե մեր մահկանացու փորձառության որոշ կողմերը մեզ համար ներկայումս իմաստ չունեն: Երբ մենք հավատում և ապավինում ենք Աստծուն և համբերություն ունենում օրեցօր կառուցելու մեր հավատքը, ի վերջո, մենք ամեն բան պարզ կտեսնենք։ (Տես Ա Կորնթացիս 13․12)։

Պարզ տեսնելը իրադարձություն չէ։ Դա գործընթաց է։ Մենք ավելի պարզ ենք տեսնում, երբ իրականացնում ենք մեր ներուժը որպես Աստծո զավակներ։ Եվ ո՞րն է մեր ներուժը։ Եթե մենք ամեն ինչ անում ենք Նրա պատվիրանները պահելու համար, Նա խոստացել է հավիտենական ուրախություն՝ իրական, տևական ուրախություն: