Wase 17

A iVakadinadina ni Dina

Sa ka bibi ka vakamareqeti ena noda bula na ivakadinadina ni kosipeli i Jisu Karisito, ka na rawa mai na kena bulataki sara vakadodonu na ivakavuvuli ni kosipeli, ena sega ni rawa kevaka me vakamuri na veika vakavuravura.¹

iVakamacala Taumada

Ea dau vakatavuvulitaka o Peresitedi David O. McKay na bibi ni kena rawati e dua na ivakadinadina ni kosipeli, ka yalataka “ni Turaga ena sega ni laivi ira o ira era dau vakasaqarai koya” E a gadreva sara vakalevu o David O. McKay me rawata na nona ivakadinadina ni dina ena nona gauna ni gone. Ena nona vakananuma lesu na gauna ni nona bula o ya, e vakaoqo na ka e vola:

“Au a dau vakasamataka voli ena gauna au se cauravou kina ni na sega ni rawa ni da rawata e dua na ivakadinadina, vakavo sara ga ni da sotava na raivotu. Au wilika na imatai ni raivotu ni Parofita o Josefa Simici, kau kila ni a kila o koya na veika e sotava, sa mai vua na Kalou. Au a rogoca na ivakadinadina nei tamaqu ni rogoca e dua na domo ni kacivi koya, kau qai vakauqeti ni sa ikoya oqori na ivurevure ni ivakadinadina kece sara. Au a vakila ena noqu gauna ni itabagone ni ka bibi duadua me rawata e dua ena bula oqo sa ikoya na ivakadinadina ni kena vakalou na cakacaka oqo. Au a kolaiciba ena noqu gadreva; au a vakila ni kevaka meu a sa rawata na noqu ivakadinadina, na vo ni veika kece era sa na sega soti ni dua na ka.

“Au sega ni vakaweleweletaka na noqu dau masu. Au sa dau vakila voli ni masu vuni, ena loma ni rumu, mai veikau, se mai na ulunivanua, o ya sara ga na vanua ena basika kina na ivakadinadina. O ya sara ga na ka au a cakava niu a se gonetagane lailai voli ena noqu dau masu ena yasa ni veikau ni dau vesu voleka toka ga na noqu ose ena bati ni gaunisala.

“Au nanuma lesu na noqu a vodo sobu ena ulunivanua mai Huntsville ena dua na yakavisiga, ka vakananuma voli na vakanomodi ni veiulunivanua sa ikoya na vanua vinaka duadua me rawati kina na ivakadinadina. Au a tarova na noqu ose, viritaka wavoki e uluna na kena ivesu, toso vakalailai yani ki liu, ka tekiduru ena yasa ni dua na vunikau. E savasava vinaka dina na cagi, totoka na cila ni matanisiga; na tutubu ni veikau drokadroka vinaka kei na iboi ni veisenikau e vakaisaluwakitaka na saqata. …

“Au a tekiduru ka sovaraka kece sara ga na gagadre ni yaloqu vua na Kalou ka kerea me vukei au ena noqu ivakadinadina ni kosipeli. E a tiko voli e yaloqu na vakasama ni na yaco e dua na ka matalia; ka me na yaco vei au e dua na veisau ka me na vakadeitaka vei au ka me kakua tale ni dua na lomatarotaro.

“Au tucake, vodo ena noqu ose, ka sa tekivu me naulu yani vakamalua, kau qai nanuma niu a vakananuma voli ena noqu kureitaka na uluqu, “E sega saka, e sega ni dua na veisau, au se tautauvata tiko ga kei na gonetagane a tekiduru ni bera na masu.” Na veika matalia e a namaki me yaco e sega ni vakakina.”²

E dina ni sega ni a sotava o Peresitedi McKay na veika matalia e a namaka, e a tomana tikoga na nona sasaga me dua na nona ivakadinadina. E muri e sa qai mai talanoataka, “ni veika matalia vakayalo kau a masulaka ena gauna au se gone kina, e sa qai yaco mai ena gauna ni sa mai vakayacori voli na qaravi itavi.”³

Mai na veika e a sotava o Peresitedi McKay e vakatavuvulitaka ni na rawati na ivakadinadina ena talairawarawa kina ivakavuvuli ni kosipeli. E a vakadinadinataka: “Kevaka mo taura ka maroroya na ivakavuvuli ni bula tawamudu, o na qai raica ni na tatara sara kina nomu bula na veivakadeitaki ni Yalo Tabu, o koya ka na solia vei iko na ivakadinadina ni ka me sega tale ni lomalomaruataki ni bula tiko na Kalou, ni o koya e Tamada, ni oqo na nona cakacaka ka a tauyavutaka na Parofita o Josefa Simici. O ya na noqu ivakadinadina—na ka talei duadua ena noqu bula!”⁴

iVakavuvuli nei David O. McKay

Na ka talei duadua e vuravura na ivakadinadina ni dina.

E sega ni dua na ka me taukena na tamata e vuravura, me na kauta mai na lomavinaka, vakanuinui kei na vakabauta me tautauvata kei na ivakadinadina ni bula tiko na Tamada Vakalomalagi ka lomani keda, se na dina ni bula tiko na Luvena e Duabau Ga o Jisu Karisito, ka ni o rau na ibulibuili vakalomalagi oqo erau a rairai vei Josefa Simici ka tauyavutaka na Lotu i Jisu Karisito, ka sa vakadonui ki na tamata me ra matataka na Kalou.⁵

Na ka vakamareqeti duadua e vuravura sa ikoya na ivakadinadina ni dina. … Na dina ena sega ni tubu me laki qase, ia sa dina sara ni sa ivurevure ni kaukauwa [ni] Matabete na Kalou…; ni bula tiko, ni o Jisu Karisito, na Bete Levu kaukauwa, e liutaka tiko na Lotu.⁶

E sa mai tu oqo vei keda na ivakadinadina ni Yalotabu ni o keda kece eda luvena na Tamada mai lomalagi. Sa tu vei keda na ivakadinadina ni Kalou e bula tiko. Sa tu vei keda na ivakadinadina ni o Karisito, ka a lauvako ka tucaketale e na ikatolu ni siga, e iliuliu tiko ni Lotu. Sa tu oqo vei keda na ivakadindina ni Yalotabu ka sa vakaraitaka ena gauna oqo na kosipeli i Jisu Karisito ka sa vakalesui mai ena kena taucoko. Na kosipeli i Jisu Karisito, ka a vakatakilai vua na Parofita o Josefa Simici, e sa kena ka dina taucoko sara ga me kaukauwa ni veivakabulai ni Kalou [raica Roma 1:16]. Ena solia kina tamata yadua na bula vinaka eke, ia ni vakamuri na ivakavuvuli ni kosipeli ena rawa kina na bula tawamudu.⁷

Vakamareqeta ki na vuni yalomu na ivakadinadina ni dina; yavutaka me dei ka me kadre ka na sega ni yavalati vakarawarawa me vaka na kalokalo era serau tu mai lagi. Me na curu ki na yalo vakayadua kei na veimatavuvale na Yalo i Karisito, na noda Dauveivueti, kau kila ni dina taucoko sara ni bula tiko ka dau veivakauqeti.⁸

Ni da sa talairawarawa, eda na qai rawata na ivakadinadina ena kaukauwa ni Yalotabu.

Na savasava ni vakasama, kei na yalo e taleitaka na vaqara na veituberi ni veisiga ni iVakabula ena liutaki keda yani ki na ivakadinadina ni dina ni Kosipeli i Karisito me vaka sara ga na kena e a sotava o Pita… ena gauna e a vakamataliataki kina na Karisito, ka rogoca na domo ni Kalou ni vakadinadinataka tiko na nona vakalou na ka e yaco [raica na Maciu 17:1–5].⁹

Au sa dau vakasamataka tu se lewe vica vei keda e vakaraitaka tiko… [vei ira na itabagone] se ra na rawata vakacava [e dua na ivakadinadina]. Eda sa vakadeitaka tiko li ni na sega ni rawa me ra kila na dina kevaka me ra ivalavala ca tikoga, era na sega ni kila vakadua kevaka me ra na tomana tikoga na vaqara na veika vakavuravura. “A noqu Yalotabu ena sega ni veileti tiko kei na tamata.” (Vakatekivu 6:3; V&V 1:33; Mosese 8:17.) Na yalona ena sega ni tiko ena vanua dukadukali. (“Sa sega ni dautiko na Yalo ni Turaga ena vale dukadukali.” Ilamani 4:24) Ena sega ni rawa mo rawata e dua na ivakadinadina kevaka me sega na Yalo ni Kalou. …

… Na taro ena basika—Au na kila vakacava? Ea sa sauma oti o Jisu, ena ivakarau kece sara ni nona bula. Ena dua na siga, ena nona a vakadinadinataka na nona vakalou, ni nona ivakavuvuli e sa mai vua na Kalou, era qai kaya na Farisi kei ira era tu e ke ya, “E kila vakaevei na ivola na tamata oqo ni sa sega ni vakatavulici?” Eda na kila vakacava (o ya na nodra taro), ni ko ni vakalou? E qai sauma sara vakarawarawa: “Kevaka sa dua na tamata sa via cakava na loma ikoya, ena kila se sa ka mai vua na Kalou na ivakavuvuli seu vosa vakai au ga.” ( Joni 7:15, 17.) E tiko e dua na kena isau dodonu sara—sa itukutuku matata sara ga… “Kevaka dou sa cakava na lomai koya, dou na qai kila.” Kei na, “me ra kilai kemuni na Kalou dina duadua ga kei Jisu Karisito, ko koya ko ni a tala mai.” [Raica na Joni 17:3.]¹⁰

E soli vei ira e so sa tukuna na Turaga ena Vunau kei na Veiyalayalati, me ra kila ena kaukauwa ni Yalo Tabu ni o Jisu na Luvena na Kalou ka a lauvako me baleta na ivalavala ca ni kai vuravura [raica V&V 46:13]. Sa ira oqo kau tukuna tiko ni ra sa dei ena dela ni vatu ni ivakatakila ni ivakadinadina ka ra a wasea ena veiyasai vuravura. Ia e tu tale e so ka a tukuna na Turaga ka sa soli vei ira me ra vakabauta na nodra ivakadinadina ka me rawa talega ni ra na vakabulai kevaka mera yalodina tikoga [Raica na V&V 46:14]. Vei ira taucoko oqo, ena lako talega mai na ivakadinadina ni veika era sotava ena veisiga.

O ira kece sara na Yalododonu ena veiyasai vuravura era na sotava na ivakadei ni nodra ivakadinadina ena nodra dau qaravi itavi. Era kila ni vakavulici ira na kosipeli mera tamata vinaka cake; ni talairawarawa kina ivakavuvuli ni kosipeli ena vukei ira me ra turaga kaukauwa ka marama yalodina. Ena dau lako mai vei ira na kila vakaoqo ena veisiga, ka na sega ni rawa ni ra vakalasuya, era kila vinaka ni talairawarawa ki na kosipeli i Jisu Karisito era na yaco kina me tama vinaka cake ka gugumatua ka tina yaloyalo vinaka kei ira na gone talairawarawa. Era kila tiko ni talairawarawa ki na ivakavuvuli ni kosipeli ena vukei ira me ra iliuliu vinaka ni veimatavuvale; na ivakavuvuli e sa tiko kina, era na kila ena vuni yalodra, era na sega ni cakitaka, era sa na kila, ka ra kila talega ni nodra na vakatanitaka na ivakavuvuli ena tara na nodra bula yadua na kena revurevu kei na bula ni nodra matavuvale. Era kila ni talairawarawa kina kosipeli ena vakauqeta na yalo ni veitacini, kei na veimaliwai vinaka vakatamata, ka ra na kila talega ni ra na lewenivanua vinaka ena nodra dau talairawarawa kina ivakaro kei na kena cakacaka vakalotu. Ni gauna era na qaravi itavi voli kina ena veisiga, ka bula vakalotu ena vanua ni cakacaka, ena qai laurai ena nodra bula na dina ni Kosipeli.¹¹

O ni sa na sotavi ira beka na tamata era … vakataroga se rawata vakacava tiko na Lotu na kena vakaukauwataki kei na kena tubucake. Na kena itukutuku maroroi qo, o ira yadua na Yalododonu e tiko vei ira na ivakadinadina ni oqo na cakacaka ni Kalou, na kaukauwa vata ga ka a soli vei Pita kei Joni me rawa kina ni rau tucake ena kedra maliwa na dauveibeitaki kei ira na Sanidrini ka tukuna vakadodonu sara vei ira ni kaukauwa ga ka tu vei “Jisu o koya ko ni a vakota ki na kauveilatai sa ikoya na kaukauwa ka vakavuna na nona vakabulai na tamata oqo, ” ia na Yacana sa ikoya na yaca ena vakabulai ira na tamata kecega [raica na Cakacaka 4:10, 12].

Na ka e vakamareqeti e koto ena nodra ivakadinadina na lewenilotu yadua ka ra vakabauta na ivakavuvuli ni Lotu i Karisito, ni dina na ivakavuvuli ni kosipeli. … Na ivakadinadina oqo e sa vakaraitaki ki na tamata kecega era sa vakamuria na ivakavuvuli ni kosipeli i Jisu Kasrisito, talairawarawa kina kena cakacaka vakalotu, era sa vakadonui mera ciqoma na Yalo ni Kalou, sa ikoya na Yalo Tabu, me dau tuberi ira. Na tamata yadua era na tu vakataki ira ena nodra ivakadinadina, me vakataki ira [na] veimatanicina ni gaunisala ena koro levu o Salt Lake City… ni ra dau cila serau ena bogi, ni ra dau ramase vakataki ira, ia na kaukauwa e vakavuna na kena waqa tiko e lako vata ga mai na duabulu na vanua, ka duabulu ga na kena ivurevure.¹²

Kevaka me da sa ciqoma na ivakadinadina ni tamata, ia na ivakadinadina ni Kalou e vinaka cake, ni sa ikoya oqo na ivakadinadina ni Kalou ka sa vakadinadinataka na Luvena: “O koya sa vakabauta na Luve ni Kalou sa rawata e lomana na itukutuku.” [1 Joni 5:10] E tiko na ivakadinadina ni Yalotabu. Na Kalou e sa dau vakatakila ena yalo ni tamata na dina ni nona tucaketale na Turaga, na kena vakalou na cakacaka levu oqo, na dina, na dina tawamudu vakalomalagi, ni bula tiko na Kalou, e sega ni kaukauwa walega, se na kena vakilai, na kena kaukauwa, me vaka na livaliva, ia me vaka ni Tamada Vakalomalagi. … Na Kalou e vakatakila ki na yalo ni bula tiko. E vakatakila na vakalou nei Jisu Karisito, ka a lako mai ki vuravura me mai vakadeitaka kina kawatamata ni rau bula dina tiko na Kalou kei na Luvena.¹³

Ni sa dau tuberi keda na dina, noda itokani, noda ito, nodai dauniveivakauqeti, sa rawa ni da na vukei mai na noda veiwekani kei na Kalou, sa na kau laivi na leqa, na rarawa, na veivakatovolei, na veivakararawataki ni bula oqo me vaka ga e dua na raivotu ka laurai ena tadra. O ya na noda veivakalougatataki mai vua na Kalou kevaka me da na bulataka tiko ena veisiga na ivakavuvuli kei na veika e vakarautaka na kosipeli i Jisu Karisito.¹⁴

Na ivakadinadina ni kosipeli sa ivakadei ni yalo.

Na ivakadinadina ni kosipeli sa ivakadei ni yalo ena gauna ni veilecayaki kei na leqa. …Na kila na Kalou kei na Nona ivakavuvuli e kena ibalebale, na dei, e kena ibalebale na vakacegu, e kena ibalebale na veivakacegui, kei na yalo dauloloma ka na vukei ira yani na kai nomu ena nomu wasea na veivakalougatataki kei na veivakadeitaki.¹⁵

Ena sega ni rawa me da vakabauta tiko ni da luvena na Kalou, ka bula dina tiko o Koya, ka qai sega ni vakabauta ni na qaqa na dina ni kosipeli i Jisu Karisito. Kevaka me da vakabauta o ya, ena lailai sara na noda leqataka na vakarusai ni vuravura kei na veivakatorocaketaki ena gauna oqo, baleta ni Kalou e sa tauyavutaka na nona Lotu ka na sega tale ni vakarusai se me soli tale vei ira e so na tamata. Ia me vaka ni bula tiko na Kalou ka ra sa dina tu vua na nona tamata kei ira na wekadra, me da kakua soti ni leqataka na kena na qaqa ga na dina.

… Kevaka sa tiko vei iko na ivakadinadina [ni dina], ena rawa ni ko na lako sivia na buca ni vosa vakacacataki, vakadewataki cala ni vosa, kei na veivakatotogani, ko na sega sara ni yalolailai me vaka ga ni o daramaka tiko e dua na isasabai ka na sega ni curubasikata yani e dua na gasau ni dakai, se me curu botea yani e dua na mata ni moto. E rawa ni ko laveta cake na ulumu, ka mai veiraiyaki tu yani ena bolebole, ka vakaraici ira yaduadua na tamata ena yaloka ni matadra… Ko na kila ni na lako vinaka na veika kece; e na yaco me vakakina; ni ra na drovaka taucoko na rarama ni dina, ni sa seyavu yani na butobuto ena veivakararamataki ni siga rama.¹⁶

Vakatutu ni Vuli kei na Veivosaki

Na cava na ibalebale ni sa tiko na ivakadinadina kei Jisu Karisito kei na nona Kosipeli? Na cava na vuna me sa ka vakamareqeti duadua e rawa ni da rawata na ivakadinadina? (Raica tabana 190–91.) Na cava e bibi kina me tiko na noda dui ivakadinadina?
Na cava me da cakava me rawa ni da rawata kina na ivakadinadina ni dina? (Raica tabana 190–93.) Na cava e tiki kina ni ivakadinadina kaukauwa na talairawarawa? Na cava na itavi ni Yalo Tabu ena noda rawata na ivakadinadina?
Na cava e bibi kina me da tosoya tikoga na vakaukauwataki ni noda ivakadinadina ena noda bula taucoko? Na gaunisala cava soti o sa kunea ka na vakabulabulataka tiko na nomu ivakainadina?
Na cava e rawa ni da cakava me da vukei ira na luveda me ra rawata e dua na nodra ivakadinadina kei Jisu Karisito kei na nona kosipeli?
E vakatavuvulitaka o Peresitedi McKay ni “ivakadinadina ni kosipeli sa ivakadei ni yalo” (Raica tabana 193.) Na cava na vuni kena gadrevi na ivakadinadina me vakadeitaka na yalo? (Raica tabana 193.) E sa maroroi iko ka vakaukauwataki iko vakacava na nomu ivakadinadina ena gauna leqaleqa ni - bula oqo?
Na cava na vuna e bibi kina me da wasea na noda ivakadinadina vei ira na tani? Na veivakalougatataki cava o sa bau sotava ena nomu dau wasea na nomu ivakainadina?

iVolanikalou e Veisemati: Maciu 16:13–17; Luke 22:32; Joni 7:17; 14:26; Ica 12:4; Moronai 10:3–5; V&V 1:39; 93:24–28

sister bearing testimony — “Na ka vakamareqeti duadua ena vuravura na ivakadinadina ni dina.”