iVakamacala Taumada

Eratou sa tauyavutaka na Mataveiliutaki Taumada kei na Kuoramu ni iApositolo Le Tinikarua na umaivola na Nodra iVakavuvuli na Peresitedi ni Lotu me vukei ira na lewenilotu ena nodra vaqaqacotaka na nodra kila ka ena ivunau ni kosipeli ka me ra toro voleka yani vei Jisu Karisito ena nodra ivakavuvuli na parofita ni itabagauna oqo. Na ivola oqo e volai kina na ivakavuvuli nei Peresitedi David O. McKay, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na Epereli 1951 ki na Janueri 1970.

Na iVakavakayagataki ni iVola Oqo

E va na iwasewase lalai ni iwase yadua ni ivola oqo: (1) e dua na vosacavuti ka vakamacalataki kina vakalekaleka na veika e vakabibitaki ena iwase ni ivola; (2) e dua na “iVakamacala Taumada, ” ka vakaraitaki kina na itukutuku ni iwase ni ivola vata kei na dua na italanoa se ivakasala mai vei Peresitedi McKay; (3) “iVakavuvuli nei David O. McKay, ” ka tukuni kina na ivakavuvuli mai na vuqa na nona itukutuku kei na ivunau; kei na (4) “Vakatutu ni Vuli kei na Veivosaki, ” ka lewena tu na taro me na vakayaloqaqataka na railesu kei na vakatataro yadua, vakayagataki ni ivakavuvuli ni kosipeli, kei na veivosaki mai vale ka vakakina mai valenilotu. Me vakaikuritaki na noda kila ka vakayalo me baleta na nona ivakavuvuli ena noda railesuva na taro ni se bera ni da vulica na vosa nei Peresitedi McKay. Ka vakatalega kina, me ikuri ni ivurevure ni vuli kei na veivosaki, sa okati ena veiwase yadua e dua na ituvatuva lekaleka ni ivolanikalou veiwekani.

Oqo na veivanua me vakayagataki kina na ivola:

Vulici yadudua se vulici vakamatavuvale. Eda na rawata yadudua na ivakadinadina ni dina na veika e vakatavulica o Peresitedi McKay ena noda masulaka ka vulica vagumatua. Na ivola oqo ena kuria na nomuni kila ka ena kosipeli ka na okati talega me dua na ivurevure bibi ni ivakaro ki na matavuvale kei na vuli ena itikotiko.

Veivosaki ena soqoni ni Sigatabu. Na ivola oqo me vakayagataki ena soqoni ni Sigatabu ena iSoqosoqo ni bete levu, kuoramu ni qaselevu, kei na iSoqosoqo ni Veivukei, oqori ena ikarua kei na ikatolu ni Sigatabu ni veivula yadua. Na soqoni ni veiSigatabu oqori e dodonu me veivosakitaki kina na ivunau kei na ivakavuvuli ni kosipeli. Me ra vakanamata na qasenivuli ena lewe ni ivola kei na veitiki ni ivolanikalou e veiwekani kaya, ka vukei ira na lewenilotu me ra taurivaka na ivakavuvuli oqo ena nodra bula. Me ra tomitomi mai na qasenivuli ena veitaro e so ena mua ni veiwase yadua me vakauqeti kina na veivosaki vakalasi. Me ra cavuta nodra ivakadinadina o ira na lewenilotu ka ra wasea na veika era dui sotava ka salavata kei na lesoni. Ni ra vakasaqara na Yalo Tabu o ira na qasenivuli ena yalomalumalumu ena nodra vakavakarau ka veivakavulici ena lesoni, ena vakaukauwataki kina na nodra kila ka dina o ira kece era vakaitavi.

Me ra veivakayaloqaqataki o ira na iliuliu kei ira na qasenivuli vei ira na lewenilotu me ra wilika mai na wase ni ivola me ra na vakarau mai kina ena soqoni ni Sigatabu ka me ra dau kauta mai na nodra ivola ki valenilotu. Me ra rokova na nodra vakavakarau vakaoqori ena nodra veivakavulici mai na vosa nei Peresitedi McKay. Ni ra sa dau wilika toka mai e liu na lewenilotu na wase ni ivola, era sa na vakarau toka mai me ra veivakavulici ka veivakatataki cake vakaiira.

E sega ni gadrevi se vakaturi me ra volia na lewenilotu e so tale na ikuri ni itukutuku e so me tokona na lewe ni lesoni ena ivola oqo. Era sa vakauqeti na lewenilotu me ra na goleva ga na ivolanikalou veiwekani ena “Vakatutu ni Vuli kei na Veivosaki” me vakuri kina na vulici ni vunau.

Me vaka ni inaki ni ivola oqo me ka ni vuli yadua kei na idusidusi ni kosipeli, e vuqa na wase ni ivola e tu kina e levu sara na tikina ka na sega ni rawa me tarai kece ena soqoni ni Sigatabu. O koya gona, e dodonu kina me ra vulica yadudua mai vale me rawa ni na yaga vakalevu sara kina na ivakavuvuli nei Peresitedi McKay.

Vakavulici ni Veilesoni mai na Veiwase ni iVola Oqo

Na veiwase e so ni ivola oqo era lewena tu e levu cake sara na itukutuku mai na veika e rawa ni ra vakavuvulitaka e vuqa na qasenivuli ena dua na gauna ni lesoni. Me ra masuta na veivuke, vakasaqara na veituberi ni Yalo Tabu, ka cakacaka vagumatua ena nodra digia na veivosacavuti, na veidusidusi vakaivolanikalou, kei na veitaro ka na sotava na nodra gagadre na lewe ni kalasi.

Vakarautaki ni Lesoni

Na veivakatutu ka tarava oqo e vakaraitaka e dua na ivalavala me vukei ira na qasenivuli ena nodra vakarautaka ka solia na veilesoni e so mai na ivola oqo (e rawa ni ra vakayagataka talega na itubutubu na veidusidusi oqo ena kena vakarautaki na lesoni ni lotu vakamatavuvale):

1. Vulica ka masulaka na iwase. Vakasamataka mo makataka na veimalanivosa ka veivakauqeti vei iko.

2. Lewa na veika e dodonu me yaco ena nodra bula o ira o vakavulica me vua ni ivakavuvuli ni iwase oqo. Vakasaqara na veidusimaki ni Yalo Tabu ena nomu vakasamataka na veika era gadreva o ira o vakavulica.

3. Lewa na veika mo vakavuvulitaka. Wilika tale na iwase, ka digia na veimalanivosa ka na veivuke vakalevu vei ira o vakavulica.

4. Lewa na sala mo veivakavulici kina. Tuva rawa na veisala e so mo na vakavuvulitaka kina na veimalanivosa o sa digia. Sa koto oqori e so na vakatutu.

   • Liutaka na veivosaki ka yavutaki mai na veitaro e so ena “Vakatutu ni Vuli kei na Veivosaki” ena mua ni veiwase yadua.

   • Veivosakitaka na veimalaniivolanikalou mai na ivolanikalou veiwekani ka tuvai koto ena mua ni veiwase yadua.

   • Vakarautaka e dua na sala mo dreta kina na nodra vakarorogo na lewe ni kalasi ena itekivu ni lesoni. Me vakaoqo, mo na wasea beka e dua na italanoa mai na ivakamacala taumada ni iwase, vola e dua na taro ka na vakavurea na vakasama ena papanivolavola, se vakayagataka e dua na lesoni vakaraitaki.

   • Vakayagataka na serenilotu kei na sere ni Lalai me vukei ira na lewenilotu me ra vakavakarau me ra vakila na Yalotabu.

   • Wasea na nomu ivakadinadina ena veigauna kecega e vakauqeti iko kina na Yalotabu, me kua ni gauna ga e sa cava kina na lesoni.

   • Sureta e dua se rua na lewenilotu me ra lako mai ki na kalasi ka vakavakarau tu mai me rau mai wasea vakaleleka na nodrau ivakadinadina me baleta na ivakavuvuli ena iwase oqo.

   • Kevaka e veiganiti, wasea na veika e so o sa sotava ka salavata kei na ivakavuvuli ena iwase oqo. Sureti ira na kena vo me ra vakayacora vakakina.

   Ena veivakatutu me baleta na kena vakayagataki na ivalavala ni veivakavulici oqo se na kena tale e so, raica na “Na Veituberi, Ai Lutua ni Bula (36123); na iDusidusi ni Veivakavulici (34595); kei na “Veituberi kei na Veiliutaki Vakosipeli” wase 16 ni iDusidusi ni Lotu, iVola 2: Veiliutaki ni Matabete kei na Mataisoqosoqo (35903). Ka vakatalega kina, me vukea na nomuni qarava vakavinaka na nomuni itavi, o ni sa vakauqeti kina mo ni vakaitavi ena vuli ka 12 na macawa na kena balavu ni Veivakavulici ena Kosipeli ena nomuni tabanalevu kei na tabana, ka vakatalega kina na veisoqoni ni vakatorocaketaki ni qasenivuli e veivulatolu.!

5. Tuvalaka na nomu vakasama. O na gadreva beka mo vola toka e dua na idusidusi me dusimaki iko tiko ena nomu vakavulica tiko na lesoni oqo.

Liutaka na Veivosaki e Vakaibalebale

Se vakayacori tiko ena matavuvale se ena valenivuli, e vakarautaki ena veiwase ni ivola oqo na veigauna vivinaka vei keda yadua me da veivakaukauwataki vakataki keda ena noda vakaitavi ena veivosaki vakosipeli. Ena rawa ni vukei iko na veidusidusi oqo ena nomu liutaka na veivosaki vakaibalebale:

• Taroga na veitaro ka na vakavure vakasama kei na veivosaki, ka me kua na taro ka na saumi ga ena io se sega. Na taro ka tekivutaki ena na cava, na sala cava, na cava na vuna, o cei, se ena vanua cava e dau yaga sara vakalevu ena kena tekivutaki na veivosaki.

• Vakayaloqaqataki ira na lewe ni kalasi me ra wasea na veika era sa sotava ka vakaraitaki kina na kena vakayagataki na ivakavuvuli ni kosipeli ena bula ni veisiga. Vakarorogo sara vakavinaka ka vakaraitaka na nomu taleitaka na nodra cau.

• Mo dau kidava na veivakauqeti ni Yalo Tabu. Ena vukei iko o koya mo kila na veika mo taroga, o cei mo kaciva, se na sala mo okati ira kina na kena vo ena veivosaki. Kevaka o nanuma ni sa lako tani tiko mai na iulutaga na veivosaki, mo qai vagoleya tale kina ena yalo vakarokoroko.

• Qarauna mo kakua ni tinia dole e dua na veivosaki vakaibalebale ena nomu segata mo tara taucoko sara na lesoni o sa vakarautaka mai. Na ka bibi duadua ga sai koya me ra vakila na lewe ni kalasi na Yalotabu, ka me tubu cake kina na nodra kila ka ena kosipeli, vakayagataka ena nodra bula na ivakavuvuli ni kosipeli, ka vaqaqacotaka na nodra sa yalataki ira me ra bulataka na kosipeli.

iTukutuku ena iVurevure E so ka Cavuti ena iVola Oqo

Na ivakavuvuli e so nei Peresitedi McKay sa kumuni vata mai na veiivurevure e so. Sa maroroi tiko ena veivosacavuti oqori na icegu, na ituvatuva vakamatanivola ni vosa, kei na ilelevu ni matanivola ena vanua e cavuti mai kina vakavo kevaka sa mai vakayacori kina e so na veisau me vukea na kena wiliki vakarawarawa. Era na raica beka kina na dauwiliwili e so na duidui lalai, ena vuku ni ka oqori.

E dau vakayagataka o Peresitedi McKay e so na vosa me vaka na tamata, tagane, se kawatamata me baleti ira na tamata kece sara, na tagane kei na yalewa. E dau vakayagataka talega vakalevu o koya na o koya me baleta ruarua na tagane kei na yalewa. Oqo e matau tu ena ivosavosa ni gauna o ya. E dina ni na tu na duidui ena ivakarau ni kena vakayagataki na vosa, era na raica o ira na wilika na ivola oqo, ni nona ivakavuvuli o Peresitedi McKay e yaga vakatautauvata ki na yalewa kei na tagane.

Sa vakatalega kina na kena dau kilai vakavinaka na vosa nei Peresitedi McKay, ka dau cavuta talega na nodra vosa e so na dauvola ivola ena nona ivakavuvuli. Ena vuqa na ivurevure taumada, ena vakaraitaki ena ivakatakilakila ni cavuvosa ni cavuta tiko o Peresitedi McKay na nona vosa e dua tale, ia ena dau soli ga ena so na gauna na yacana o koya dina e tukuna na vosa. Me kakua kina ni vakacacani na veiwase ni ivola oqo ena “[sega ni kilai o koya e vola], ” ena vakayagataki ena ivola na ivakatakilakila ni cavuvosa taumada me vakaraitaki kina ni vakayagataka tiko o Peresitedi McKay na nona vosa e dua tale.

E a tabaki me iApositolo o David O McKay ena 1906 ka tokoni me Peresitedi ni Lotu ena 1951.